Ia Wehwehn Koapworopwor En Kaiasada Ong Komwi?

“Komwi kin ketikihong irail uwen me itar oh kin ketin kaitarala ar anahn akan koaros.”—MELKAHKA 145:16.

1-3. Ia koapworopwor me ekei kin ahneki ong ahnsou kohkohdo? Kawehwe.

KRISTOPHER me mahki sounpar duau oh rie pwutak laud iang ih, oh pil rien ara nohno lih oh ah pwoud, iangahki nein pwopwoudo pwutak riemen kalohk ihmw lel ihmw nan arail wasahn kalohk karanih Manchester, England. Awake! makisihn kawehwehda dahme wiawi. “Mwurin souwaso irail kohla mwemweit oh kilang wasa kaselel ieu me adaneki Blackpool, wasahn mwemweit ieu me mihmi limwahn sehd. Irail me wenemeno iang meh ehk riemeno me mehla nan aksident en weren nansahpw oh polihs kan kawehwehda aksident ni ahl wet, ‘lapalahn aksident wiawi, tohto rehrail mehkihla weren nansapwo lulda.’ ”

² Ni pwong en kahpwalo, peneineio iang towehda Pwuhk Study en Mwomwohdiso, oh re onopki duwen mehla. En Christopher pahpa koasoia, “Christopher kin mwahuki madamadau oh doudouloale. Ni pwong en onopo e kasalehda duwen sampah oh ah koapworopwor ong ahnsou kohkohdo. Se doula wia aht onopo oh Christopher pil doula koasoia: ‘Ehu kamwahupen en ese duwen padahk mehlel oh wia emen Sounkadehdehn Siohwa iei pwehki mendahki e kin wia mehkot kamedek ong kitail, kitail ese me ehu rahn kitail pahn pwurehng tuhwong irail me melahr akan pohn sampah. Se sohte ese me lokaia pwukat pahn wia lokaia kei me sohte pahn kak manokonokla.”a

³ Sounpar kei samwalahro nan pahr 1940, emen Sounkadehde sang nan wehin Austria me adaneki Franz lelohng kalokolok oh ese me e pahn kak pil kamakamala pwehki ah sohte men sapeikiong Siohwa. Franz ntinglahng ah nohno sang ehu wasahn kalokolok nan Berlin oh e koasoia: “Nin duwen ahi wehwehki, ma I pahn iang wia ai inou ong pali en sounpei, I wiahdahr dihp oh konehng ien kamakamla. Ahpw ong ngehi met wia elen salelepek ong Koht. Oh sohte koapworopwor en kaiasda ong ie. . . . Eri, met ai nohno oh koaros riei brother oh sister kan, rahnwet I alehdier pakair me I pahn kamakamla nimenseng en lakapw ahpw kumwail dehr masepwehk. Ahi kehl kohsang rehn Koht, me duwehte irail Kristian mehlel akan en mahso. . . . Ma kumwail pahn lelepek lel mehla, kitail pahn kak pwurehng tuhpene ahnsoun kaiasadao. . . . Eri, kitail nek pwurehng tuhpene.”b

4. Soangen mehn kasukuhl dah ke ale sang ekspiriens pwukat oh dahme kitail pahn tehkpene mwurin met?

⁴ Koapworopwor en kaiasada kin wia mehkot kesempwal ong Christopher oh Franz. Ira uhdahn kamehlele me ira pahn iasada. Ekspiriens pwukat kin sair atail mongiong! Pwehn kalaudehla atail kalahngan ong Siohwa oh kakehle atail koapworopwor ong kaiasada, kitail kak tehkpene dahme kahrehda kaiasada pahn wiawi oh iaduwen atail pahn mwekidki atail ese duwen ire wet.

Kasansal me pid Kaiasada Pohn Sampah

5, 6. Dahme kasansalo me wahnpoaron Sohn ntingihdi nan Kaudiahl 20:12, 13 kasalehda?

⁵ Nan kasansal kan me wiawi erein Kaunda Pahr Kid en Krais Sises, wahnpoaron Sohn kilang kaiasada en irail me pahn iasada nin sampah. E koasoia, “I ahpw pil kilangada me melahr akan, me lapalap oh me tikitik kan. Madau eri kapehda me melahr akan. Mehla oh Hades pil kapehda me melahr akan me ira kolokol.” (Kaudiahl 20:12, 13, NW) Sohte lipilipil ma emen ahneki pwukoa laud de soh.​—me “laud” oh “tikitik”⁠—koaros me nekinekla nan Hades (Sheol), me iei sousou, pahn kepitla irail me mehla kan. Irail kan me mehla nan sehd akan pil pahn iang iasada ahnsowo. Wiewia kaselel wet iei kisehn kupwuren Siohwa kan.

⁶ Sapwellimen Krais kaunda ni erein pahr kido pahn tepkihda ah pahn salihdi Sehdan oh kihong nan pwoar soh kapi. Sohte emen me pahn iasada ni ahnsowo de irail kan me pil pitsang Kahn Kamakam Kowahlap sohte pahn ale songosong sang Sehdan erein sapwellimen Sises kaunda pwe Sehdan pahn sensel. (Kaudiahl 20:1-3) Mwein erein pahr kid pahn wia ahnsou reirei ong uhk ahpw ni mehlel ong Siohwa met kin pahrekiong “rahn ehu.”​—2 Piter 3:⁠8.

7. Dahme pahn wia poahsoanpen kadeik erein en Krais pahn kaunda erein Pahr Kido?

⁷ Nin duwen kasansalo kasalehda, sapwellimen Krais Kaunda Pahr Kido pahn wia ahnsoun kadeik. Wahnpoaron Sohn ntingihdi: “I ahpw pil kilangada me melahr akan, me lapalap oh me tikitik kan, duwen ar uh mwohn mwoahlo. Pwuhk kan eri papahkpeseng, oh pil ehu pwuhk papahkpeseng, iei pwuhken me momour kan. Me melahr akan eri pakadeingkihda mehkan me ntingting nan pwuhk ko duwen ar wiewia kan. . . . Irail koaros eri pakadeida duwen ar wiewia kan.” (Kaudiahl 20:12, 13) Tehk mwahu me met kaidehn kadeikpen ahn irail aramas akan mour mwohn re mehla. (Rom 6:⁠7) Me weksang met, e kasalehda me “doaropwe limilim kan” pahn papahkpeseng ni ahnsou kohkohdo. E kasalehda me ahn aramas wiewia mwurin ah sukuhlikier mahsen me mih nan doaropwe limilimo pahn me pahn kasalehda ma edeo pahn iang ntingdi nan “pwuhken komouro.”

“Kaiasadahn Mour” de “Kaiasadahn Kadeik”

8. Soangen kaiasada riau dah me pahn wiawiong irail me pahn iasada kan?

⁸ Nan tepin kasansal me Sohn kasalehda me Sises kolokol “key en mehla oh Hades.” (Kaudiahl 1:18) E wia sapwellimen Siohwa “Sounsawas en Mour,” me kohieng manaman en kadeik “me mour oh mehla kan.” (Wiewia 3:15; 2 Timoty 4:⁠1) Iaduwen ah pahn wia met? Sang ni ah pahn kapwurehdo irail me memeir nan mehla. Sises padahkiong pokono met: “Kumwail dehr pwuriamweiki mepwukat, pwehki ahnsou ehu pahn kohdo me irail koaros me mihmi nan sousou kan pahn rong kapitie.” E pil kapataiong: “A me wiewia mwahu kan pahn iasadahng mour, a me wiewia suwed kan pahn iasadahng kadeik.” (Sohn 5:28-​30) Eri soangen ahnsou me awiawih irail ohl oh lih lelepek kan en mahso?

9. (a) Ni arail pahn pwurodo nan kaiasadaho, dahme irail me tohto pahn ni soh peikasal sukuhlki? (b) Doadoahk en kasukuhl lap dahieu pahn wiawi?

⁹ Ni ahnsou me irail lelepek en mahs ako pahn iasada irail ahpw pahn diarada me inou kan me irail kin likih ko pweidahier. Ia uwen arail pahn men sukuhliki duwen ihs ih me kin karasaras ong Kadaudok en sapwellimen Koht lih, me sansalda nan keieun kokohp nan Pwuhk Sarawi nan Senesis 3:15! Ia uwen arail pahn perenki en rong me Mesaia me inouda me iei Sises, lelepek lel ni ah pwoula, sang ni ah meirongkihla moure! (Madiu 20:28) Irail kan me pahn kasamwohdo irail me melahr kan pahn diar peren laud ni ahnsou me irail pahn sewese irail en kalahnganki me meirong kin wia kasalepen en Siohwa kadek sapan oh mahk. Ni ahnsou me irail me iasada kan pahn diarada me sapwellimen Koht Wehio kin pweida ni ah kin kapwaiada kupwuren Siohwa ong sampah, arail mongiong pahn ni soh peikasal dirkihda peren oh met pahn sansalda sang arail peren kapinga Siohwa. Irail pahn ahneki ahnsou mwahu en kasalehda arail lelepek ong arail Sahm limpoak nanleng oh sapwellime Ohl. Koaros me memour pahn ahneki peren en ni arail pahn iang doadoahk lap en sukuhliki irail meh lik kei duwen tomwo me Siohwa wiahda.

10, 11. (a) Erein Pahr Kido soang dah kan irail koaros me pahn mih pohn sampah pahn ahneki ahnsou mwahu en wia? (b) Iaduwen met pahn kamwekid kitail?

¹⁰ Ni ahnsou me Eipraam pahn iasada, e pahn diar peren ni ahnsou me e pahn iangehr mih nan “kahnimw” me e kin kilikilangwohng. (Ipru 11:10) Ia uwen Sohp me wia ohl lelepek pahn peren ni ahnsou me e pahn sukuhliki ah lelepek kin wia mehn kakehl ong sapwellimen Siohwa ladu teikan ni arail kin lelong kasongpen ahr lelepek ong Siohwa! Oh Daniel pil pahn men ese duwen pweidahn kokohp kan me e ntingihdi!

¹¹ Ei, irail koaros me pahn mih nan koasondi kapw wet, mehnda ma irail iasada de pitsang Kahn Kamakam Kowahlap, pahn ale mehn kasukuhl duwen kupwuren Siohwa ong sampah oh irail towe kan. En mour kohkohlahte oh kapikapinga Siohwa ni ahnsou kohkohlahte pahn uhdahn wia ahnsou kaperen ehu ni arail pahn ale kasukuhl erein pahr kido. Ahpw ni mehlel ahn emenemen wiewia ni ah pahn sukuhlikier duwen doaropwe limilimo me pahn keieu kesempwal. Kitail pahn kapwaiada dahme kitail sukuhliki? Kitail pahn doudouloale oh kapwaiada soahng kan me kitail sukuhlki pwehn sewese kitail en kak dehr lohdi pahn Sehdan ni ah pahn kin nantiong song en kaluwetala kitail pwe kitail en sohla iang padahk mehlel?

12. Dahme pahn sewese emenemen en kak iang doadoahk kaukaule ong doadoahk en kasukuhl oh kadoadoahk en kawekila sampah ong paradais ehu?

¹² Kitail en dehr pil manokehla duwen kapai kan me pahn kohsang meirong en Sises. Irail kan me pahn iasada ni ahnsouo sohte pahn iang ahneki soangen soumwahu kan en mahso. (Aiseia 33:24) Sang ni atail pahn ahneki paliwar kehlail oh unsek met pahn mweidong kitail en kak iang doadoahk en padahki irail me lik kei me pahn iasada. Oh irail pwukat pahn uhd pil iang ale ahnsou mwahu oh iang doadoahk en kawekila sampah wet ong paradais ehu me pahn kapinga Siohwa.

13, 14. Dahme kahrehda Sehdan pahn pwurehng sapwedekda ni kaimwseklahn kasongosong, oh soangen imwilah dahieu me pahn mie ong emenemen kitail?

¹³ Ni ahnsou me Sehdan pahn pwurehng lapwada ong kaimwiseklahn kasongosongo e pahn pwurehng nantiong kasonge aramas akan. Nin duwen me Kaudiahl 20:7-9, kasalehda me ‘wehi kan,’ de pwihn en aramas me pahn pwupwudiong en Sehdan wiewia widing kan pahn ale kadeikparail: ‘Kisiniei mweredihsangehr nanleng oh kamwasikeiraillahr.’ Ong irail akan me pahn iang iasada nan Kaunda en Pahr Kido, kamwomwala wet pahn wehwehki me irail iasadahng kadeik. Weksang met, aramas akan me pahn iasada oh kasalehda me irail aramas lelepek kan, re pahn ale kisakis en mour soutuk. Ni mehlel, ahr iasada pahn wiahla “iasadahng mour.”​—Sohn 5:29.

¹⁴ Iaduwen koapworopwor en kaiasada pahn kak kihong kitail kamweit ni ahnsouwet? Oh me kesempwal sang met, dahme kitail pahn wia pwe kitail en iang ale kapai kan ni ahnsou kohkohdo?

Iren Kasukuhl me Kitail Anahne Sukuhliki Ni Ahnsouwet

15. Iaduwen atail kamehlele duwen kaiasada pahn sewese kitail ni ahnsouwet?

¹⁵ Mwein mie emen kompoakepahmw me melahr oh mwein ke pil nannantiong koasoansapahlih ahmw mour. Koapworopwor en iasada pahn sewese iuk en ahneki meleilei loalomw oh kehl me weksang irail me sehse duwen padahk mehlel. Pohl kangoange irail akan nan Deselonika, “Riat ko, se men kumwail en esehla mehlel duwen irail akan melahr, pwe kumwail en dehr kin nsensuwed duwehte irail kan me sohte ar koapworopwor.” (1 Deselonika 4:⁠13) Ke kak kilang pein kowe nan koasondi kapwo oh iang kalohki duwen kaiasada? Ke kak ale mehn kamweit ni ahnsouwet ni ahmw pahn doudouloale duwen ahmw pahn tuhwong kompoakepahmw kan nan koasondi kapwo.

16. Ia pahn ahmw pepehm ni ahnsou me kaiasada pahn wiawi?

¹⁶ Mwein ni ahnsouwet ke kin ale lokolok sang ahn Adam pelian sang ni mwein soumwahu en paliwar. Ke dehr mweidong pwunod wet en kahrehong uhk ken manokehla duwen peren me kitail pahn ahneki ni atail pahn pwurehng ale mour unsek me sohte soumwahu oh paliwar mwahu nan sampah kapwo. Oh ni ahmw pahn pwurehng pehdpeseng oh kilang me mas peren akan me kohdohng kasamwo iuk ni ahmw iasada, ke sohte kak en manokehla en kalahngan ong Koht pwehki sapwellime limpoak kadek.

17, 18. Mehn kasukuhl kesempwal riau dahieu kitail en dehr manokehla?

¹⁷ Ahpw ni ahnsowohte tehk duwen mehn kasukuhl riau me kitail anahne en taman. Ehu iei kesempwalpen en kihong atail mour unsek ong Siohwa ni ahnsouwet. Ni atail pahn alasang atail Kaun Sises Krais, atail mour en soh roporop kin wia kasalepen limpoak ong Siohwa oh mehn mpatail kan. Ma kalokolok de uhwong pahn kihsang atail saledek, kitail en nantiongete kesihnenda teng mendahki soangen kalokolok dah me kitail pahn lelohng. Ma irail me uhwong kan kamasangki kitail mehla, eri koapworopwor en kaiasada en kakehle oh kansenamwahuwih kitail en kolokolte lelepek ong Siohwa oh sapwellime wehi. Ei, atail ngoang ong doadoahk en Wehio oh doadoahk en katohnpadahk en kak kolokol kitail ong kapai kan me Siohwa kin kolokol ong irail me pwung kan.

¹⁸ Mehn kasukuhl keriau kin pid duwen iaduwen atail kin kilangwohng kasongosong kan sang ni soh unsek en paliwar. Atail loalokong me pid duwen kaiasada oh atail kalahnganki en Siohwa kadek sapan kin kakehle atail kin kesihnenda teng nan pwoson. Wahnpoaron Sohn kihda kaweid, “Kumwail dehr poakong sampah, de dipwisou me mihmi nin sampah. Pwe ma kumwail kin poakohng sampah, poakepen Sahmo sohte mih loalamwail. Pwe mepwukat koaros kisehn sampah​—dipen ineng en uduk, oh mehkan me aramas kin kilang oh ahnehda, oh mehkoaros me mi nin sampah me aramas kin pohnmwahsohkihda​—⁠mepwukat koaros sohte kohsang rehn Sahm, re kohsang nin sampah. Sampah wet oh mehkoaros nin sampah me aramas kin inengieng kin sosohrala; ahpw me kin kapwaiada kupwur en Koht pahn momour kohkohlahte.” (1 Sohn 2:15-​17) En sampah kasongosong me kin kohda ni mwomwen noahrok en kepwe kin wia mehkot sohte katepe ma kitail pahn kapahrekiong duwen “mour me uhdahn moure.” (1 Timoty 6:17-​19) Ma kitail pahn lelohng kasongosong en wiahda dipen kamwahl de nenek, kitail en ni kehlail soikala. Ma peien kitail pahn mehla mwohn Armakedon, oh kitail kin weweidki elen mour ieu me sohte kin pwungiong kupwuren Siohwa, eri kitail pahn duwehte irail akan me sohte ahneki koapworopwor en kaiasada.

19. Soangen kapai laud tohrohr dah kitail en dehr manokehla?

¹⁹ Pohnangin mehkoaros, kitail en dehr manokehla me kitail ahneki kapai laud tohrohr en kaperenda sapwellimen Siohwa mongiong met oh kohkohlahte. (Lepin Padahk 27:11) Atail pahn lelepek lel mehla de atail pahn doulahte kolokolte atail lelepek lel kaimwiseklahn koasoandi suwed wet kin kasalehong Siohwa ahn ihs pali kitail kin uhki ong me pid duwen ihs me uhdahn ahneki pwung en kaunda. Oh ia uwen peren laud kitail pahn ahneki ni atail pahn mour nan Paradais nin sampah sohte lipilipil ma kitail iang iasada de kitail pitsang Kahn Kamakam Kowahlapo!

Kaitarla Atail Anahn akan

20, 21. Dahme pahn kak sewese kitail en kolokolte atail lelepek mendahki ekei atail peidak kan duwen kaiasada saikinte pasapengla? Kawehwe.

²⁰ Ni atail koasoakoasoaia duwen kaiasada miehte peidek kei kitail saikinte sapengala. Iaduwen Siohwa pahn koasonehdi koasoandi kan ong irail akan me pwopwoud ahpw mehla? (Luk 20:34, 35) Wasa me aramas akan mehla ie ihte wasa re pahn pil kaiasada ie? Irail akan me pahn kaiasada pahn iasada limwahn ahn en kisehrail akan wasahn kousoan? Tohto peidek kan me pid kaiasada saikinte pasapengla. Ahpw, mendahki met kitail en taman mahsen kan en Seremaia: “Kauno kin ketin kupwuramwahu ong koaros me kin likih. Eri, ih me mwahu kitail koaros en kin kanengamah oh awiawih​—⁠awiawih pwe en ketin kamourkitailla.” (Koulen Kedepwidepw kan 3:25, 26) Ni ahnsou me Siohwa kupwurki, koaros peidek kan pahn pasapengla ong kitail. Dahme kahrehda kitail kak likih met?

²¹ Doudouloale en sounmelkahkaho koulki duwen Siohwa: “Komwi kin ketikihong irail uwen me itar oh kin ketin kaitarala ar anahn akan koaros.” (Melkahka 145:⁠16) Ni ahnsou kitail kin mahla soang kan me kitail kin inengieng kin wekila. Dahme kitail kin mwahuki ni ahnsou me kitail seri kan, kin wekilahr rahnwet ni atail kin mahlahr. Atail kin kilangwohng mour kin wekila pwehki atail ekspiriens nan mour oh dahme kitail kin kilangwong. Sohte lipilipil soahng dah kei kitail kin kilangwong nan koasoandi kapwo Siohwa uhdahn pahn kapweiong kitail.

22. Dahme kahrehda kitail ahneki kahrepe mwahu en kapinga Siohwa?

²² Dahme keieu kesempwal met ong kitail iei kitail en lelepek. “A ia duwe, dahme konehng en kin mie rehn sounkohwa kan? Re en kin likilik pahn ar kaun akan.” (1 Korint 4:⁠2) Kitail sounpapah kan ong rongamwahu en Wehin Koht. Atail ngoangki lohkiseli rongamwahu en Wehio ong koaros me kitail kin tuhwong pahn sewese kitail en kekeidwei nan ahlo me pahn kahluwalahng kitail mour. Kitail en ahnsou koaros taman me “ahnsou oh soangen irair akan me kitail sohte kasik kak lelohng kitail.” (Eklesiasdes 9:11) Pwehn katikiala soahng soh katepe kan me pahn kak kahrehong kitail pwunod nan mour ahnsou kitail en kolokol teng koapworopwor en kaiasada. Ma ke ese me ke pahn mehla mwohn sapwellimen Krais Kaunda en Pahr Kido, eri ke kak ale mehn kamweit sang ni ahmw pahn kamehlele ni mehlel me kamaiaupatail uhdahn pahn kohdo. Ni ahnsou me sapwellimen Siohwa ahnsou pahn kohdo ke pahn kak iang nda lokaia pwukat me Sohp mahsanihong Sounkapikadaho: “Eri, ahnsowo, komw pahn ketin malipe ie, I ahpw pahn patohwan sapeng.” Kaping koaros pahn kohwong Siohwa, me kin kupwurperenkin kaiasada aramas koaros!​—Sohp 14:⁠15.

[Nting tikitik me mi pahs]

Ke Tamataman?

• Dahme pahn wia poahsoanpen kadeik erein Pahr Kido?

• Dahme kahrehda ekei pahn “iasadahng mour” oh meteikan “iasadahng kadeik”?

• Iaduwen koapworopwor en kaiasada pahn sewese kitail ni ahnsou wet?

• Iaduwen mahsen kan nan Melkahka 145:16 kin sewese kitail ong peidek kan me saikinte pasapengla me pid duwen kaiasadaho?

[Kilel nan Pali 19]

Iaduwen atail kamehlele kaiasadaho pahn sewese kitail ahnsouwet?