Padahk Mehlel akan Iawasa Ke Kak Diar?
OHL EMEN nan Tibet kapir dirom pwonopwon ehu me aramas kin ntingihda arail kapakap akan oh kesehiong loale. E kamehlele me ah kapakap pahn kin kapwurpwuhreng pak koaros me diromo kin pir. Nan ihmw lapalap ieu nan India, kisin pere kis mie me wiawihda ong wia Puja (meirong ong dikedik)—soangen kaudok ehu me kin iangahki isikada mehn pwohtik, wahdo rohs oh soahng teikan ong sansal en soangsoangen koht ohl oh koht lih kan. Ah pil pohnangin mwail kid kei nan Italy, lih emen mih nan ihmw sarawi ieu me kapwatada loale oh ih kelepwikihdi mwohn sansal en Mery, inen Sises, oh wie kapakap oh kolokol nan peh weren rosario kei me mweteu sang ni sahl.
Ele ke kilangehr mwekidpen pelien lamalam akan nan mour en aramas akan. Pwuhk me ede The World’s Religions—Understanding the Living Faiths koasoia: “Pelien Sarawi ... kin wia oh pil pahn doudoulahte wia mehkot kesempwal ong pwihn en aramas nan wasa koaros nan sampah.” Nan pwuhk me ede God--A Brief History, John Bowker koasoia: “Saikinte pwihn en aramas ieu me Koht sohte kin mie nan arail koasoandi, oh kin pid pwukoahn kakaun oh kapikipikda. Met pil kin mehlel pil rehn pwihn en aramas me irail sohte kin iang ehu ehu pwihn en sarawi.”
Ni mehlel, pelien sarawi kin poahsoanehda mour en aramas tohto. Met soh kin wia kadehdepen me aramas mie arail anahn en pali ngehn oh kin mwahngih mehkan en pali ngehn? Nan nah pwuhk me ede The Undiscovered Self, toahkte en palien madamadau ndand Dr. Carl G. Jung koasoiahki ahn aramas anahne en wia kaudok me e wia anahn ileile ieu. E koasoia me “anahn wet kin sansal nan erein dih en koaros nan poadoapoad en aramas.”
Ahpw, aramas tohto sohte kin men nda me dene re pwoson Koht oh sohte kin mwomwen me re perenki palien lamalam. Ekei aramas me sohte kamehlele me mie Koht kin wia met pwehki soangen mwomwen sarawi me re ese sohte kin kaitar arail anahn en pali ngehn. Aramas kin kawehwe pelien lamalam duwe met “kamehlele mour en soangen koasoandi kei; tengediong elen mour ehu de lelepek ong; ese lamalam; poakohng de pahtowan koasoandi en pwihn en sarawi.” Sang ni kawehwe wet, kereniong aramas koaros kin kasalehda soangen mwomwen lelepek ong palien sarawi nan ah mour. Pil lel irail akan me kose me re sehse Koht.”
Ni erein pahr kid kei en poadoapoad en aramas, ahn aramas arail kin song en kaitar ah anahn en pali ngehn kin kaweid ong ih nan soangsoangen ahl tohto. Imwilahn met soangsoangen madamadau me pid palien lamalam miehlahr nan sampah pwon. Karasepe, edetehn palien lamalam koaros kin wauneki utupen manaman ileile ieu, arail madamadau ong ihs oh dahme kin wekpeseng. Pali tohtohn sarawi kan kin kalap koasoia duwen kesempwalpen komour oh pitsang nan lokolok. Ahpw, arail padahk duwen komour kin wekpeseng me pid dahkot met oh iaduwen aramas ah pahn alehda komour. Sang nan soangen tohtohn palien lamalam pwukat, iaduwen atail pahn kak kasawihada mehnia padahk kan me Koht ketin kupwurki?