Kawehwehda Kilel akan Kin Wia Mehkot Kesempwal!
“Nin tapio, I lemehiong me nait pwutak me ede Andreas ahnekihte kisin moahng medek. Ahpw, e tepida kahngada mwenge oh karakar laud. Moahng medeko laudla, oh ngehi pwunodikihda. Ni ahi pwoudo pwurodo ni imwato, se wahla Andreas rehn toahkte. E kilang kilel en soumwahuo oh kapidelong ih nan imwen wini. Soumwahu doar mehlel, kaidehn kisin moahng medek kis met. Andreas ahneki moahng medek kehlail me adaneki “meningitis.” E ale wini oh pil mwadangete pwurehng kehlailda.—Gertrud, nohno men nan Germany.
DAHME lelohng Gertrud wia mehkot me aramas tohto pil kin lelohng. Irail kin kilang kilel akan pwehn kasalehda me neirail seri kan mwein soumwahu. Edetehn kaidehn soumwahu koaros kin kemehla aramas, ahpw pahpa oh nohno kan sohte kin men pohnsehse kilel akan me kin kasalehda me neirail seri kan kin soumwahudahr. Kasawih kilel akan oh mwekid ni ahl konehng kak wia mehkot inenen mwahu. E wia mehkot kesempwal.
Met kin pil mehlel nan irair teikan me sohte pid soumwahu. Ehu mehn karasepe mwahu iei ilok laud (tsunami) me wiawi nan December 2004 nan wasa kan nan sehden India. Pali kan nan wasa kan me duwehte Australia oh Hawaii kasawihadahr rerrer en sahpw nan paliepeng en Sumatra me inenen laud oh re esehier me e kakete wiahda kahpwal laud. Ahpw sohte mehkot nan wasa pwuko me kak alehdi mehn pakairpen ren kaunopadahng kahpwalo. Kahrehda, aramas pohnangin 220,000 mehla.
Kilel akan me Kesempwal Sang Met
Ahnsou me Sises ketiket sampah, e padahkiong irail me rongorong sapwellime padahk kan duwen kesempwalpen tetehk mwahu kilel akan oh mwekidki nin duwen me konehng. E ketin mahsanih duwen mehkot me inenen kesempwal kowahlap. Paipel mahsanih: “Parisi oh Sadusi kei ahpw patohdo rehn Sises pwe re en lidipihedi, iei me re patohwan pekihki en ketin wiahiong irail ehu manaman, pwe en kasalehda en Koht eh ketin kadehde duwen ih. Sises ahpw ketin sapeng irail, mahsanih, ‘Ni eh kin soutikpene, kumwail kin nda, “Lakapw e pahn kaselel, pwe pahnlahng me poh weitahta.” A ni menseng kumwail kin nda, “Rahnwet e pahn keteu, pwe pahnlahng me poh weitahta oh mahliok.” Eri, kumwail kak kasawihada iren ahnsou sang ni mwomwen pahnlahng; ahpw kumwail sohte kak kasawihada kilel kan duwen ahnsou pwukat!’”—Madiu 16:1-3.
Ni ahnsou me Sises mahsanih duwen “kilel akan en ahnsou,” e kasalehda me irail mehn Suhs en ahnsowo anahnehier ese duwen karuwaru en ahnsou me re koukousoan loale. Koasoandi en mehn Suhs akan pahn ohla oh pahn pidada mour en irail koaruhsie. Rahn ekei mwohn ah pahn pwoula, Sises pil mahsanih ong sapwellime wahnpoaron ako pil ehu kilel—kilel en ah pahn ket nan mwoale. Dahme e mahsanih ni ahnsowo wia mehkot kesempwal ong emen emen kitail koaros nan rahnwet.