“Sapwellimomwi Mehn Kataman Kan Me Wia Kaperenpei”

“Pwe mehkoaros me ntingdier mwowe e ntingdier pwe en padahkih kitail.”—ROM 15:4.

1. Iaduwen Siohwa kin ketikihong kitail mehn kataman kan, oh dahme kahrehda kitail kin anahne mepwukat?

SIOHWA ketikihong sapwellime aramas akan mehn kataman kan pwe en sewese irail nan ahnsou apwal akan. Ekei mehn kataman pwukat kin pwarada nan ahnsou en atail kin wia atail wadawad en Paipel, a ekei kin kohda ni ahnsoun padahk oh ekei kin kohda ahnsou me meteikan kin pasapeng nan mihding en Kristian kan. Kitail esehier pali laud en mehkan me kitail kin wadek de rong. Ele kitail koasoiaier soangen ire pwukat. Ahpw, pwehki kitail kin mengei en manokehla, ihme kahrehda kitail anahne en kin ahnsou koaros katamankin kitail duwen kupwuren Siohwa kan, sapwellime kosonned oh kaweid kan. Kitail anahne perenki sapwellimen Koht mehn kataman de kaweid kan. Irail kin kangoange kitail oh kin sewese kitail en kihong atail madamadau ohng kahrepe kan me pahn kamwekid kitail en alehda soangen mour me koht kupwurki. Ihme, sounmelkahkao koulki ohng Siohwa: “Sapwellimomwi mehn kataman kan me wia kaperenpei.”—Melkahka 119:24.

2, 3. (a) Dahme kahrehda Siohwa kin kolokol lel atail ahnsou koasoi mehlel kan en irail aramas akan nan Paipel? (b) Mehnia poadoapoad kan me kitail pahn tehk nan artikel wet?

² Mendahki e ntingdi sounpar epwiki kei samwalahro, ahpw Mahsen en Koht me inenen manaman. (Ipru 4:12) E kin kasalehiong kitail duwen dahme kin wiawi mahs ohng irail akan me kin kileledi nan Paipel. Mendahki tiahk oh madamadau en aramas akan arail kin kilangwohng mehkan kin wekila sang ni ahnsou en Paipel, kahpwal kan me kitail kin lelohng rahnwet kin kalapw duwehte dahme irail mehn mahs kan kin pil lelohng. Poadoapoad tohto kin kileledi nan Paipel kin wia kamwahupatail oh e kin kasalehda duwen mehn kahlemeng mwahu kan en aramas akan me kin poakohng Siohwa oh kin papah Ih ni lelepek mendahki uhwong kan. Poadoapoad teikan kin kasalehda duwen tiahk kan me Koht kin tateki. Siohwa kin kupwurki poadoapoad pwukat, me mwahu oh me suwed kan en kileledi nan Paipel pwe en wia mehn kataman ohng kitail. E kin pwungiong dahme wahnpoaron Pohl ntingihdi: “Pwe mehkoaros me ntingdier mwowe e ntingdier pwe en padahkih kitail, pwe kitail en ahneki koapworopwor sang ni kanengamah oh kakehlepen loalatail me Pwuhk Sarawi kin ketikihong kitail.”—Rom 15:4.

³ Kitail tehkpene poadoapoad siluh sang nan Pwuhk Sarawi: koasoi duwen Depit oh Sohl, Ananaias oh Sapaira, oh tiahk en Sosep rehn ahn Podipar pwoud. Ehuehu koasoi pwukat kin padahkihong kitail mehn kasukuhl mwahu kan.

Lelepek ohng Sapwellimen Koht Koasoandi kan

4, 5. (a) Ia irair en nanpwungen Nanmwarki Sohl oh Depit? (b) Iaduwen Depit mwekidki en Sohl ah kin kouimwintihti ohng ih?

⁴ Nanmwarki Sohl kasalehda me e sohte kin lelepek ohng Siohwa oh sohte konehng kaunda sapwellime aramas akan. Eri, Koht soikala Sohl oh kaweidih soukohp Samuel en keiehdi Depit en wia nanmwarki en Israel mwuri. Ni en Depit kasalehda koahiek oh kehl tohrohr nin duwen sounpei men oh ale kaping sang rehn aramas akan, Sohl tepida kilangwohng ih nin duwen imwintihti men. Sohl kin pwurepwurehng nantihong kemehla Depit. Ahpw, Depit kin pitla nan ehuehu ahnsou pwukat pwehki Siohwa kin ieiang ih.—1 Samuel 18:6-12, 25; 19:10, 11.

⁵ Erein sounpar kei, Depit kin ale idihd en rukurukseli. Ni ahnsou mwahu kohieng Depit en kemehla Sohl, ienge kan kin kangoange en kemehla pwe re kin nda me Siohwa ketikihongehr ah imwintihtio pahn ah manaman. Ahpw, Depit sohte wia met. Ah lelepek ohng Siohwa oh wauneki ahn Sohl pwukoa nin duwen nanmwarki keidi men pohn sapwellimen Koht aramas akan kin kamwekid ih en wia met. Siohwa me ketin pilada Sohl en wia nanmwarki en Israel, kaidehn? Pil pein Siohwa me pahn ketikihsang Sohl nan dewe ni pein sapwellime ahnsou. Depit wehwehki me sohte ah pwung en iang pidada met. Mwurin ah song en kameleileidi ahn Sohl kouimwintihti ohng ih ahnsou ko koaros, e nda: “I ese me Kauno pahn pein ketin kemehla Sohl, ni eh pahn mehla ni uhdahn rahnen eh mehla de e pahn mehla nan mahwen. Kauno en ketin irehdi sang ie pwe ih en dehr wiahiong mehkot suwed ohng ih me Kauno ketin pilada.”—1 Samuel 24:3-15; 26:7-20.

6. Dahme kahrehda poadoapoad en Depit oh Sohl kesempwal ohng kitail?

⁶ Poadoapoad wet kin audaudki mehn kasukuhl kesempwal. Mie pak ke medemedewe dahme kahrehda ekei soangen irair kan kin pwarada nan mwomwohdiso en Kristian kan? E kakete me emen sohte kin wia tiahk me konehng. Mwein ah tiahk sohte uhdahn suwed ahpw e kin kedirepwe iuk. Iaduwen ahmw pahn mwekidki met? Pwehki ke men kasalehda limpoak en Kristian ohng aramaso oh ahmw lelepek ohng Siohwa, ke ele pahn pilada en koasoiong ih ni ahl en kadek pwe ke en kak kamwauihala irairo. Iaduwen ma kahpwalo doudoulahte? Mwurin ahmw wiahier mehkoaros me ke kak wia, ele ke kak mweidohng Siohwa en apwalihala irairo. Iei met me Depit wia.

7. Pwe en kahlemengih Depit, iaduwen atail pahn mwekid ma kitail lelohng irair en kapwung sapwung de lipilipilki emen pwehki eh pelien lamalam?

⁷ De ele ke kin lelohng kahpwal en kapwung sapwung de lipilipilki emen pwehki pelien lamalam. Ele sohte nohn mie mehkot ke kak wiaiong irail nan ahnsouwet. Soangen irair wet kin inenen apwal en dadaur pah ahpw mwomwen Depit kin mwekidki kapwung sapwung kin wia mehn kasukuhl ohng kitail. Melkahka kan me Depit ntingihdi kin sair kitail, e kin kasalehda kaidehn ihte sapwellime loulou kan ohng Koht me kohsang nan mohngiong pwe e kin sewese ih en dehr lohdi pahn Sohl, ahpw e pil kin kasalehda ah lelepek ohng Siohwa oh kin nsenohki mwaren Koht en sarawihla. (Melkahka 18:1-6, 25-27, 30-32, 48-50; 57:1-11) Depit kin kolokolete ah lelepek ohng Siohwa mendahki Sohl kin doudoulahte nan ah mwekid sapwung kan erein sounpar kei. Kitail pil anahne en kolokolete atail lelepek ohng Siohwa oh sapwellime pwihn mendahki kapwung sapwung kan me kitail kin lelohng oh mendahki soahng kan me aramas akan kin wia. Kitail kak koapworopworki me Siohwa mahsanih mepwukat.—Melkahka 86:2.

8. Iaduwen irail Sounkadehdehn Siohwa kan nan Mozambique kin mwekidki arail lelepek ohng Siohwa ni ahr kin lelohng kasongosong kan?

⁸ Kristian kan nan Mozambique kin wia mehn kahlemeng mwahu nan rahnwet ni ekei kin kolokolete arail lelepek ohng Siohwa mendahki kasongosong kan lelohng irail. Nan pahr 1984, kisin kahnimw kan kin pwurepwurehng lelohng kalokolok kan sang irail akan me kin uhwongada koasoandi kan oh kin pirapa irail, isikada ihmw kan oh kemehla aramas akan. Likamwete sohte nohn mehkot laud irail Kristian mehlel kan kak wia pwe en pere irail. Tohn wasa ko anahne en wiahla sounpei kei de ekei me kin utungada sounpei ko ni ahl tohrohr kei. Sounkadehdehn Siohwa kan pehm me met sohte pwungiong arail wia Kristian kei me sohte kin poupali. Arail kin soikala met kin kahrehda pelien sounpei kan kin lingeringer laud. Mpen sounkadehde 30 kin mehla ni ahnsoun apwal wet, ahpw mehla sohte pil kin kauhdi irail sapwellimen Koht aramas akan en kolokol arail lelepek.a Duwehte Depit, irail kin dadaurete pahn kapwung sapwung kan oh kin imwila mwahu.

Mehn Kataman me Wia Mehn Kalekehki Ehu

9, 10. (a) Iaduwen atail kak paiekihda ekei mehn kahlemeng kan sang nan Paipel?(b) Sapwung dah me Ananaias oh Sapaira wia?

⁹ Ekei irail akan me kin ntingdi nan Paipel kin wia mehn kataman kei me kin kalekehkin kitail en liksang mwomwen arail tiahk kan. Mehlel, Paipel kin audaudki koasoi tohto duwen aramas akan pil lella sapwellimen Koht ladu kan me kin wia sapwung kan oh kin imwila suwed ohng irail. (1 Korint 10:11) Ehu koasoi iei duwen Ananaias oh Sapaira, pwopwoud ehu me iang kisehn mwomwohdiso en Kristian en senturi keieu nan Serusalem.

¹⁰ Mwurin Pendekos 33 C.E., mie anahn en kihong kepwe kan ohng irail me kapw ni pali ngehn me mihmihte nan Serusalem pwe ren kak iang paiekihda arail kin werekiong wahnpoaron ko. Ekei irail nan mwomwohdiso kin netikihla sahpw pwe irail en kak kaitarala anahn en irail kan me anahne. (Wiewia 2:41-45) Ananaias oh Sapaira netikihla ara mwaht oh wahdo ekei sent ko ohng wahnpoaron ko, oh nda me ira wahdo sent ko koaros pwe en wia kisakis ehu ohng irail. Ananaias oh Sapaira ahneki pwung en kihla uwen me ira mwahuki ahpw mwomwen ara lamalam me sapwung oh ara tiahk kan kin sohte mehlel. Ira liksansalmwahu oh likamwkihda me ira wia laudsang dahme ira uhdahn wia. Wahnpoaron Piter, ki kaweid en ngehn sarawi, eri kasalehda duwen ara likamw oh mwalaun oh Siohwa eri kemehla ira.—Wiewia 5:1-10.

11, 12. (a) Ia ekei mehn kataman akan duwen mehlel? (b) Kapai dah kan me kin kohsang mour mehlel?

¹¹ Ma kitail kin inengihada en lokaia likamw pwe aramas akan en leme me kitail mwahu, a koasoi en Ananaias oh Sapaira en wia mehn kataman ehu ohng kitail. Mwein kitail kak pitihedi aramas akan ahpw kitail sohte kak pitih Siohwa. (Ipru 4:13) Pwuhk Sarawi kin pwurepwurehng katamankihong kitail en kin mehlelpene nanpwungatail pwe irail me kin likamw akan pahn sohrala sang sampah wet. (Lepin Padahk 14:2; Kaudiahl 21:8; 22:15) Kahrepen met uhdahn sansal. Ih me tepikihda likamw akan koaros iei Sehdan me Tepil.—Sohn 8:44.

¹² Ma kitail kin mourki mehlel, met pahn wahdo soangen kapai tohto kan. Ekei soangen kapai pwukat iei ahneki nsen mwakelekel oh nsenamwahu pwehki meteikan kin likih kitail. Nan irair tohto, pwehki Kristian kan kin mehlel kahrehda irail kin kak ale doadoahk mwahu oh kolokol arail doadoahk. Ahpw, kapai me keieu kesempwal iei atail mour mehlel kin sewese kitail en kompoakepahnki Koht Lapalahpie.—Melkahka 15:1, 2.

Kolokolete Mwakelekel

13. Irair dahieu me Sosep lelohng oh dahme e wia?

¹³ Sapwellimen Seikop pwutak Sosep netila en wiahla ladu men ni eh mahki sounpar 17. Mwuhr e mihla ni imwen Podipar, emen kaun en sounpei kan en Isip, oh en Podipar pwoud mwahukihda ih. Liho mwahuki wendi rehn Sosep, me wia mwahnakapw masamwahu emen, ihme rahn koaros e kin ngihtehtehkiong ih: “Kohdo wendi rehi.” Sosep dohsang ah peneinei oh mih nan sahpw ehu me sohte me ese ih. E mengei en wendi rehn lih menet oh sohte me pahn ese. Ahpw, ahnsou me en Podipar pwoud song en parokedi ih, e tangasang ih.—Senesis 37:2, 18-28; 39:1-12.

14, 15. (a) Dahme kahrehda poadoapoad en Sosep kesempwal ohng kitail? (b) Dahme kahrehda emen lih Kristian kin kalahnganki ah peikiong sapwellimen Koht mehn kataman kan?

¹⁴ Sosep keirada nan peneinei ehu me kin lemwiki Koht oh e wehwehki me wendipene en riemen me sohte pwopwoud me sapwung. E pein idek reh: “Iaduwen ahi pahn kak wiahda soangen dihp laud wet oh dipkihda mwohn Koht?” Ah pilipil wasaht ele poahsoankihda ah wehwehki duwen sapwellimen Koht koasoandi kan ohng aramas ako nan Eden, me pid en pwoudiki emente. (Senesis 2:24) Sapwellimen Koht aramas akan rahnwet kin paiekihda sang ni arail kin medemedewe dahme Sosep kin wia nan irair wet. Nan ekei wasa kan, tiahk en wendipene inenen rek me kahrehda ekei me pwulopwul kan sohte kin iang wia met, iangarail kan kin kepitkin irail. Tiahk en kamwahl pil kin rek rehn irail aramas laud kan. Kahrehda, koasoi en Sosep kin wia mehn kataman ehu me kin pwungiong atail ahnsou. Kosonned en Koht kin kasalehda me nenek oh kamwahl kin wia dihp kei, oh kosonned wet sohte wekidekla. (Ipru 13:4) Me tohto me kin lelohng nan songosong en iang wia tiahk en wendipene saut kan kin mwuhr kamehlelehla me mie kahrepe mwahu kan en dehr iang wia met. Ekei imwila suwed kan me kin kohsang met iei namenekla, kauwehla nsen mwakelekel, luwak, liseianda oh alehda soumwahu suwed kan. Duwehte dahme iren Pwuhk Sarawi kan kin katamankin kitail, aramas emen me kin wia dipen nenek kin “wiahda dihp ohng pein paliwere.”—1 Korint 5:9-12; 6:18; Lepin Padahk 6:23-29, 32.

¹⁵ Jenny,b Sounkadehde men me sohte pwopwoud ahneki kahrepe mwahu en kalahnganki sapwellimen Koht mehn kataman kan. Nan ah wasahn doadoahk, mie ienge ohl masamwahu emen me kin mwahuki ih. Ni ahn Jenny sohte kin kasalehiong soangen pepehmohte me e kin kasalehiong ih, ohlo kin ahpwte ngihtehtehla. Jenny wehkada nda: “I kin diarada me I kin apwaliki kolokol ahi mour mwakelekel pwe e pil kaperen en ese me mie me kin men tehk de mwahukin ie.” Ahpw, e diarada me ohlo ihte kin nantihong en wendi reh duwehte me e kin wiaiong lih tohto teikan. Ni e kin pehm me e luwetala nan ah kin song en soikala met, e kin kapakap ong Siohwa en sewese ih en kolokolete ah lelepek ohng Ih. Jenny diarada me soahng kan me e kin diarada nan ah research nan Paipel oh pwuhk en Kristian teikan kin wia mehn kataman kei me kin sewese ih en kesihnente. Ehu mehn kataman pwukat iei poadoapoad en Sosep oh ahn Podipar pwoud. Jenny koasoia, “Ma I pahn katakatamankin ie uwen laud en ahi poakohng Siohwa, I sohte pahn anahne masak me I pahn wiahda suwed laud de dihp.”

Peikiong Sapwellimen Koht Mehn Kataman kan!

16. Iaduwen kitail kak paiekihda atail pahn tehk oh doudouloale mour en irail akan me kileledi nan Paipel?

¹⁶ Kitail koaros kak kalaudehla atail kalahnganki sapwellimen Siohwa koasoandi kan ni atail pahn kin song en wehwehkihla dahme kahrehda e kin ketin kolokolete poadoapoad kan nan Pwuhk Sarawi ohng kitail. Dahme mepwukat kin padahkiong kitail? Soangen irair de wiewia dah kan me kileledi nan Paipel me kitail anahne en alasang de soikala? Irail aramas epwiki kei kin kileledi nan Mahsen en Koht. Koaros me kin poakohng kaweid sarawi kan kak paiekihda ah pahn kalaudehla ah ineng en ale mour me diren erpit oh met kin iangahki mehn kasukuhl kan me kitail kin sukuhliki sang mehn kahlemeng kan me Siohwa ketin apwalih oh kolokolete ni keneinei. Makisihn wet kin kalapw kihda artikel kan duwen irail akan me kin wia mehn kasukuhl mwahu ohng kitail. Kitail sou kihong ahnsou en tehk mepwukat?

17. Ia ahmw pepehm ohng sapwellimen Siohwa mehn kataman kan, oh dahme kahrehda?

¹⁷ Ia uwen atail kin kalahnganki limpoak kadek me Siohwa ketin kasalehong irail akan me kin songosong en kapwaiada kupwure kan! Kitail uhdahn sohte unsek, duwehte irail ohl oh lih akan me kileledi nan Paipel me pil sohte unsek. Ahpw, poadoapoad kan me ntingdi nan Paipel duwen mour en aramas pwukat inenen kesempwal ohng kitail. Ni atail pahn kin peikiong sapwellimen Siohwa mehn kataman kan, kitail kak liksang wiahda sapwung laud kan, oh kitail kak alasang mehn kahlemeng mwahu kan en irail akan me kin weweid ni ahl en me pwung kan. Ma kitail pahn wia met, kitail pahn kak iang sounmelkahkao koulki: “Meid pai irail akan me kin kapwaiada sapwellimen [Siohwa] mehn kataman kan, oh kin peikiong ni kapehd unsek. Ih kin kapwaiada sapwellimomwi mehn kataman kan; I kin poakohng ni mohngiong unsek.”—Melkahka 119:2, 167.

[Nting tikitik me mi pahs]

Iaduwen Ahmw Pahn Sapeng?

• Dahme kitail kak sukuhlikihsang mwomwen ahn Depit mwekid de lamalam ong Sohl?

• Dahme poadoapoad en Ananaias oh Sapaira kin padahkihong kitail?

• Dahme kahrehda koasoi en Sosep kin kesempwal ohng kitail rahnwet?

[Kawehwehpen kilel kan nan ehu ehu pali 24]

Dahme kahrehda Depit kahng mweidala Sohl en kamakamala?

[Kawehwehpen kilel kan nan ehu ehu pali 25]

Dahme kitail sukuhliki sang poadoapoad en Ananaias oh Sapaira?

[Kawehwehpen kilel kan nan ehu ehu pali 26]

Dahme kamwekid Sosep en liksang kasongosong en wia dipen nenek?