Siohwa Iei Koht En Kalahnganki Men
“Koht me uhdahn pwung; e sohte pahn ketin meliehla amwail wiewia kan de amwail limpoak ong ih ni sawas me kumwail kasalehdahr.”—IPRU 6:10.
1. Iaduwen Siohwa kasalehda sapwellimen kalahngan ohng Rud, lihen Mohapo?
SIOHWA inenen kesempwalki uwen nanti me irail me kin rapahki en wia kupwure kan oh e kin ketin kapaiada irail pwukat. (Ipru 11:6) Ohl lelepek Pohas wehwehki duwen irair kaselel wet me Koht sapwellimanki, ihme e ndahiong Rud, lih en Mohap men me kin ni limpoak apwalih ahn ah pwoud nohno me pil wia liohdi men: “Siohwa, Koht en Israel, me pein kowe piladahr me wiahla perepomw, en ketikihong uhk keting laud ehu.” (Rud 2:12) Iaduwen, Koht kapaiada Rud? Ehi, uhdahn! Ihme, koasoiepe pil kileldi nan Paipel! E pil pwoudkihla Pohas oh ira koaros wia pahpa oh nohno kahlap en Nanmwarki Depit oh Sises Krais. (Rud 4:13, 17; Madiu 1:5, 6, 16) Met ehute karasaras sang nanpwungen karasaras tohtohie me kasalehda duwen Siohwa eh kin ketin kalahnganki dahme sapwellime ladu kan kin wia.
2, 3. (a) Dahme kin kahrehda sapwellimen Siohwa elen kasalehda kalahngan inenen kaselel? (b) Dahme kahrehda Siohwa kak kasalehda kalahngan mehlel? Kawehwe.
2 Siohwa pahn ketin pehm me e sohte pwung ma e sohte pahn ketin kasalehda irair en kalahnganki. Ipru 6:10 mahsanih: “Koht me uhdahn pwung; e sohte pahn ketin meliehla amwail wiewia kan de amwail limpoak ong ih ni sawas me kumwail kasalehdahr oh pil kin kasalehiong riamwail Kristian kan.” Dahme wiahda ire wet en inenen kaselel iei duwen Koht ah kin kasalehda kalahngan ohng irail kan me kin lelepek mendahki irail kin wiahda dihp oh dohsang sapwellime lingan.—Rom 3:23.
3 Pwehki atail sohte unsek, kitail ele pahn pehm me atail wiewia kan me pid lelepekihong Koht me nohn tikitik oh sohte warohng sapwellimen Koht kapai kan. Ahpw Siohwa wehwehki atail lamalam oh irair kan, oh e uhdahn kesempwaliki atail doadoahk kan me ngehnatail unsek. (Madiu 22:37) Karasepe ehu: Nohno men diarada kisakis ehu—mwaramwar sohte pweilaud ehu—pohn ah tehpel. E kak kilangwohng met nin duwen kisakis sohte kesempwal ehu oh kesehdi. Ahpw, kisinlikou me iangodo kisakiso kasalehda me kisakiso sang nah kisin serepeino, me netikihla nah kisin sent koaros me e nekinekid pwe en pwainda met. Eri met nohno menet kilangwohng kisakiso ni ahl tohrohr ehu. Ele pilen mese pahn dirda oh e pahn pwoalehdi nah serio pwehn kasalehda ah kalahngan me kohsang mohngiong.
4, 5. Iaduwen Sises kin alasang Siohwa ni eh kin kasalehda kalahngan?
4 Siohwa kin ketin mahsanih duwen atail lamalam oh uwen me kitail kin kakohng, ihme e kin ketin kalahnganki atail kin kihong ih uwen atail kak koaros, mehnda ma e tikitik de laud. Ni ahl wet, Sises wia karasepe keieu mwahu duwen mwomwen Semeo. Tamanda duwen koasoi nan Paipel duwen nein liohdi men sent toantoal kan. “Sises eri ketin mahmahsenseli nan Tehnpas Sarawio, oh mahsanihada duwen ekei aramas kepwehpwe ar kesekese ar mehn meirong kan nan dewen meirongo. E ahpw pil mahsanihada liohdi semwehmwe men me kesehdi sens toantoal riau. Ih eri mahsanihong sapwellime tohnpadahk ko, ‘Kumwail en ese pwe en liohdi menet eh meirong laudsang mehlel en meteiko koaros ar meirong. Pwe meteiko koaros meirongkihong Koht mehkot me peisengen ar pai, a lih menet sang nan eh semwehmwe e meirongkihla mehkoaros me e naineki oh kin mourki.’”—Luk 21:1-4.
5 Ei, Sises wehwehki duwen irair en lih menet—me ih liohdi men oh e semwehmwe—Sises wehwehki duwen uwen kesempwalpen ahn liho kisakiso, oh e inenen kalahnganki met. Met pil duwehte sapwellimen Siohwa pepehm. (Sohn 14:9) E soh kin wia mehn kangoang ehu en ese me mendahki mwomwen irair me ke mih loale, Siohwa oh sapwellime ohl kin kesempwalkin uhk?
Siohwa Kapaiada Mehn Idiopia Men me Kin Lemwiki Ih
6, 7. Dahme kahrehda oh iaduwen Siohwa kin kasalehda sapwellime kalahngan ohng Epedmelek?
6 Iren Pwuhk Sarawi kan kin pwurepwurehng kasalehda duwen Siohwa ah kin ketin kapaiada irail akan me kin kapwaiada kupwure kan. Medewehla duwen dahme e ketin wiahiong Epedmelek, emen mehn Idiopia me kin lemwiki Koht ni mwein Seremaia oh ladu men nan tehnpesen Nanmwarki Sedekaia en Suda me kin salelepek. Epedmelek diarada duwen irail lapalap akan en Suda arail kadeikada soukohp Seremaia ni sapwung me e kin wia soun pelianda men oh irail kesehdi ih nan pwoahr ehu pwe en mehkihla duhpek wasao. (Seremaia 38:1-7) Epedmelek wehwehki me aramas kan kin tateki ih pwehki rohng me e kin kalohkiseli, ihme e kin pein kihong ah mour nan keper oh pwarala mwohn nanmwarkio. Ni eimah, e nda: “Maing, Wasa Lapalap, me sapwung dahme aramas pwukat wiadahr. Re kesehdiong Seremaia nan pwoahro, wasa e pahn duhpekla ie oh mehla. Pwe solahr kisin tungoal nan kahnimw wet.” Nanmwarkio eri ketin ruwese irail ohl 30 en iang Epedmelek doarehla sapwellimen Koht soukohpo.—Seremaia 38:8-13.
7 Siohwa mahsanih me Epedmelek mwekidki ah pwoson me sewese ih en powehdi soangen masak koaros me e ahneki. Ihme, Siohwa kasalehda sapwellime kalahngan oh mahsan ohng Epedmelek ki Seremaia: “I pahn ketikihdo pohn kahnimwet paisuwed, ahpw kaidehn paiamwahu . . . Ahpw ngehi, Siohwa, pahn sinsileiuk, . . . oh ke sohte pahn pengpenglahng rehn aramas akan me ke kin masak. I pahn sinsileiuk pwe ke en onepek mwahu . . . ; ke pahn pitla oh mourla pwehki omw koapworopworkin ie.” (Seremaia 39:16-18) Ei, Siohwa ketin kapitala Epedmelek, pil iangahki Seremaia, sang irail lapalap suwed kan en Suda oh mwuhr sang irail mehn Papilon kan me kauwehla Serusalem. Melkahka 97:10 mahsanih me “[Siohwa] kin ketin sinsile mour en sapwellime aramas akan; e kin ketin kapitirailla sang pahn manaman en aramas suwed kan.”
“Samamwailo me Kin Mwahngih Amwail Wiewia Rir kan Pahn Katingih Kumwail”
8, 9. Nin duwen me Sises kasalehdahr, soangen kapakap dah me Siohwa kin kupwurki?
8 Pil ehu me kasalehda me Siohwa kin kalahnganki oh kesempwalki atail lelepek iei me sansalda nin duwen me Paipel mahsanihki duwen kapakap. Ohl loalokongo ntingihdi me “[Koht] kin ketin kupwurperenki en aramas mwahu kan ar kapakap.” (Lepin Padahk 15:8) Ni mwehin Sises, kaun en pelien lamalam tohto kin kapakap wasa me aramas tohto mih ie, kaidehn sang ni kapehd mehlel ahpw irail kin me aramas akan en kapinga irail. Sises mahsanih: “Eri, ni amwail pahn kin kapakap, kumwail pedolong nan amwail pere, ritingedi wenihmw, kumwail ahpw kapakapohng Samamwail me kumwail sohte kin kilangki masamwail kan. Samamwailo me kin mwahngih amwail wiewia rir kan, e ahpw pahn ketin katingihkin kumwail.”—Madiu 6:5, 6.
9 Mehlel me Sises sohte kin kalekihdi kapakap nan pokon, pwe pein ih pil wia met ekei ahnsou. (Luhk 9:16) Siohwa kin inenen kalahnganki ni atail kin kapakap ohng ih sang mohngiong mehlel oh sohte kin ahneki lamalam en mwahuki meteikan en wadekala kitail. Ni atail kin kelehpw kapakap, e kin kasalehda duwen laud en atail limpoak ohng Koht oh likih ih. Ihme, e sohte kapwuriamwei me Sises kin kalapw rapahki wasa me e pahn kin kelehpwla oh kapakap. Pak ehu, e wia met “nin sohrahn,” ni e wie rotorot. Pil ehu ahnsou, “e ketidahla kalapwukala pohn dohl ehu oh loulou.” Oh mwohn Sises pilada irail wahnpoaron 12, pwohng ehu pwon e kelekelehpw loulou.—Mark 1:35; Madiu 14:23; Luhk 6:12, 13.
10. Ni atail kapakap kan kin kasalehda mehlel oh loal en pepehm kan, dahme kitail kak kamehlele?
10 Medewehla ia uwen Siohwa ah ketin karonge kanaiehng koasoi kan me kin kohsang mohngiong en sapwellime Ohlo! Ehi, ekei pak Sises kin “ketin loulou oh peki ni ngidingid oh kapitie laudida, iangahki pilen silangi. Eri, Koht ketin karonge sapwellime pekipeko.” (Ipru 5:7; Luhk 22:41-44) Ni atail kapakap kan kin kasalehda mehlel oh loal en pepehm kan, kitail kak kamehlele me samatail nanleng pahn ketin karonge kitail ni keneinei oh kalahnganki. Ehi, “[Siohwa] kin ketiket limwahn irail kan . . . me kin likweriong ni mehlel.”—Melkahka 145:18.
11. Ia pepehm en Siohwa ohng dahme kitail kin wia ni rir?
11 Ma Siohwa kin kalahnganki ni atail kin kapakap ohng ih ni rir, eri ia uwen ah pahn ketin kalahnganki ni atail pahn kin peikiong ih ni rir! Ehi, Siohwa mahsanih dahme kitail kin wia ni rir. (1 Piter 3:12) Ehi, ni atail pahn kin lelepek oh peik ni atail kin kelehpw kin kasalehda me kitail ahneki “mohngiong unsek” ohng Siohwa, me mohngiong ehu mehlel oh tengedi ohng dahme pwung. (1 Kronikel 28:9) Ia uwen met kin kahrehiong mohngiong en Siohwa en kin peren!—Lepin padahk 27:11; 1 Sohn 3:22.
12, 13. Iaduwen atail kak pere atail lamalam oh mohngiong oh duwehla tohnpadahk Nadaniel?
12 Ihme kahrehda Kristian lelepek kan kin pere arail mohngiong sang soangen dihp rir kan me kin kauwehla lamalam oh mohngiong, duwehte kilang kilel suwed kan de kasdo me kin diren pei oh kamaramas. Mendahki ekei dihp kan sohte kin sansal ohng aramas teikan, kitail ese me “mehkoaros nanleng oh sampah pokon kin sansal oh dehde mwohn silangi. Eri, kitail koaruhsie pahn wehkadahng ih atail wiewia kan.” (Ipru 4:13; Luhk 8:17) Ni atail pahn kin song en liksang mehkan me Koht sohte kin kupwurki, kitail kak ahneki nsen mwakelekel oh perenki ese me Koht kin kupwurperenki kitail. Ehi, kitail kak likih me Siohwa uhdahn kin ketin kalahnganki emen emen me kin “peikiong Koht ni mehkoaros oh kin wia me pwung ahnsou koaros, me kin lokaia pwung oh mehlel.”—Melkahka 15:1, 2.
13 Eri, Iaduwen atail kak pere atail lamalam oh mohngiong nan sampah ehu me direkihla suwed? (Lepin Padahk 4:23; Episos 2:2) En kapatahiong atail kin isaneki ale oh doadoahngki mwengehn ngehn kan me kin kohieng kitail, kitail en pil nantihong kitail en soikala dahme suwed oh wia dahme mwahu, mwekid mwadang pwe ineng sapwung kan en dehr laudla oh kahrehiong kitail nan dihp. (Seims 1:14, 15) Medewehla ia uwen ahmw pahn peren ma Sises pahn mahsanih met duwen kowe duwehte dahme e mahsanih duwen Nadaniel: “Iet uhdahn ohl mehlel men, me sohte kin widing.” (Sohn 1:47) Nadaniel me pil adaneki Pardolomiu, mwuhr ahneki kapai en wiahla emen sapwellimen Sises tohnpadahk ehk riemeno.—Mark 3:16-19.
“Samworo Lapalap Lelepek oh Diren Kalahngan Emen”
14. Iaduwen Sises kin kilangwohng dahme Meri wia ah weksang meteikan?
14 Pwehki “Krais me kasalepen Koht me soh sansal” ihme e kin ahnsou koaros alasang Semeo ni ah kin kasalehda kalahngan ohng irail kan me kin papah Koht ni mohngiong mwakelekel. (Kolose 1:15) Karasepe, rahn limau mwohn ah pwoula, Sises oh ekei sapwellime tohnpadahk ko iang ket nan imwen Saimon mehn Pedani. Ni soutiko, Meri, rien Lasarus oh Marda serepeino, “wahdo leh ehu me inenen pweilaud mehlel me wiawihkidahr tuhke me adaneki nard” (pweinen leho pahrekiong pweinen doadoahk ong sounpahr ehu), oh keiehdi tapwin Sises oh aluweluwe ko. (Sohn 12:3) “Dahme e wiakauwehkihla met?” ekei kin idek. Ahpw, Sises kilangwohng dahme Meri wia wasaht ni ehu ahl tohrohr. E kilangwohng met nin duwen tiahk en kadek oh mehn kataman kesempwal ehu ohng sapwellime pwoula me pahn kereniong wiawi. Ihme, Sises sohte kauwe Meri ahpw e kapinga ih. E mahsanih me “wasa koaros me rongamwahu wet pahn lohkseli ie nin sampah, me e wiadahret pahn pil iang lohkseli pwe en katamanda lih menet.”—Madiu 26:6-13.
15, 16. Iaduwen atail ale kapai sang ni en Sises ketido oh wia aramasala pwe en ketin papah Koht?
15 Ia uwen atail pai pwehki atail soumas, Sises, wia emen me kin ahneki lamalam en kalahnganki laud! Ni mehlel, en Sises mour nin duwen aramas emen kin kaunopada ih ohng doadoahk ehu me Siohwa ketin kolokol ohng ih—doadoahk en wia Samworo Lapalap oh Nanmwarki, keieu ohng mwomwohdiso en irail me keidi kan oh mwuhr ohng sampah pwon.—Kolose 1:13; Ipru 7:26; Kaudiahl 11:15.
16 Mwohn ah ketido sampah, Sises perenkiher aramas akan. (Lepin Padahk 8:31) Ahpw, ni ah wia aramasala e wehwehkihla oh kalahnganki ni unsek songosong kan me kitail kin lelohng nan atail doadoahk ohng Siohwa. Wahnpoaron Pohl ntingihdi me “[Sises] uhdahn duwehla rie ko ni soahng koaros pwe en wiahla arail samworo lapalap, loalopwoat oh kalahngan, ni sapwellime doadoahk ong Koht . . . Eri met, e kakehr ketin sewese irail kan me kin ale songosong, pwehki pein ih ketin iangehr ale songosong sang ni sapwellime lokolok.” Sises kakehr “pehmada atail tungoal luwet” pwehki e “ketin iang ale songosong ni soahng koaros duwehte kitail, ahpw ihte, e sohte ketin wiahda dihp.”—Ipru 2:17, 18; 4:15, 16.
17, 18. (a) Dahme kisinlikou ohng mwomwohdiso isuh en Eisia kin kasalehda duwen sapwellimen Sises lamalam en kalahnganki laud? (b) Dahme irail Kristian keidi kan kin kaunopada ohng?
17 Kalahnganki laud me Sises sapwellimanki ohng irail akan me kin idawehn ih sansalda laud mwurin e kaiasada. Medewehla sapwellime kisinlikou ohng mwomwohdiso isuh nan Eisia me e doadoahngki wahnpoaron Sohn en ntingihada. Ohng mwomwohdiso en Smirna, Sises mahsanih: “I ese omw kahpwal kan.” Wasaht Sises song en kasalehda me, ‘I uhdahn wehwehki omw kahpwal kan oh I wehwehki dahme ke kin lelohng.’ Eri, pwehki e poakehla aramas akan oh e wehwehki arail irair kan sang ni ah lelohngehr mepwukat oh kahrehiong ah mehla, ihme Sises pil kapatahiong oh mahsanih:“Ke en loalopwoatohng ie mehnda ma ke mehla, I ahpw pahn kihong uhk nihnen mour soutuk.”—Kaudiahl 2:8-10.
18 Sapwellime kisinlikou kan ohng mwomwohdiso isuho kin direki soangen koasoi kan me kin kasalehda duwen en Sises kin wehwehki mehlel soangen kahpwal kan e sapwellime tohnpadahk kan kin lelohng oh duwen ah kin kalahnganki mehlel arail mour en lelepek. (Kaudiahl 2:1–3:22) Tamataman me irail pwukat me Sises kin mahsenwohng wia Kristian keidi kei oh arail koapworopwor iei en iang ih kaunda nanleng. Irail kin idawehn arail Kauno, oh kaunopada pein irail ohng arail pwukoa laud en sewese kakaun ni lamalam en poakehla me keieu laud me iei kapai sang tomw en Krais ohng irail me pahtoulahr kan.—Kaudiahl 5:9, 10; 22:1-5.
19, 20. Iaduwen irail me kin wiahda “pokon kalaimwun” kin kasalehda arail kalahngan ohng Siohwa oh sapwellime Ohlo?
19 Ehi, sapwellimen Sises limpoak ohng sapwellime keidi kan pil kin kowohng irail “sihpw teikan” me lelepek oh tohtohki meh rar kei oh met wiahdahr pwihn en “pokon kalaimwun . . . me kohsang wehi teikan koaros,” me pahn komourala ni ahnsou en “kahn kamakam laud.” (Sohn 10:16; Kaudiahl 7:9, 14) Irail pwukat kin pokondohng rehn Sises pwehki arail kin kalahnganki sapwellime tomw oh arail koapworopwor en mour soutik. Iaduwen arail kin kasalehda arail kalahnganki? Irail kin wia met sang ni arail kin “mihmi mwohn mwoalen Koht oh kin papah ni rahn nipwong nan tehnpese.”—Kaudiahl 7:15-17.
20 Ripoht en pahr en 2006, ni pali 23 lel 26, kin kihda mehn kasansal mwahu duwen irail sounkalohk lelepek kan me kin uhdahn “papah Siohwa ni rahn oh nipwong.” Ni mehlel, erein sounparo, irail iangahki irail luwen Kristian keidi malaulau me luhwehdi kan kin kihlong awa 1,333,966,199 nan doadoahk en kalohk—met kin pahrekiong daulih sounpar 150,000!
Doudoulahte Kasalehda Kalahngan!
21, 22. (a) Me pid kasalehda kalahngan, dahme kahrehda kitail Kristian akan anahne kaleke kitail sang rahnwet? (b) Dahme kitail pahn tehkpene nan artikel en mwuhr?
21 Siohwa oh sapwellime Ohl kin kasalehda kalahngan me inenen laud mehlel ohng irail aramas soh unsek kan. Ahpw e kansensuwed pwe pali laud en irail aramas akan sohte kin nohn kesempwalki Koht, irail kin pein kilangwohngete nsenarail kan. Pohl kawehwehda duwen irail aramas akan me kin memour ni “imwin rahn akan,” ni ah ntingihdi: “Irail pahn roporop ohng pein irail, noahrok mwohni . . . Irail sohte pahn kasapahl kalahnganki mehkot.” (2 Timoty 3:1-5, Phillips) Ia uwen irail pwukat ar weksang irail Kristian mehlel kan me kin kasalehda arail kalahnganki mehkoaros me Siohwa ketikihong irail sang ni arail kapakap sang nan mohngiong, peik, oh wia arail doadoahk sang ni kapehderail unsek!—Melkahka 62:8; Mark 12:30; 1 Sohn 5:3.
22 Nan artikel en mwuhr, kitail pahn tehkpene ekei mehkan me Siohwa kin ketikihong kitail pwehki sapwellime limpoak. Ni atail pahn medewe duwen ‘kisakis mwahu’ pwukat, atail kalahnganki en pil laudla sang mahs.—Seims 1:17.
Iaduwen Ahmw Pahn Sapeng?
• Iaduwen Siohwa kin kasalehda me ih Koht men me kin ahneki lamalam en kalahnganki?
• Ni atail kin kelehpwla, iaduwen atail kin wahdo peren ohng sapwellimen Siohwa mohngiong?
• Ni ahl dah kei me Sises kasalehda kalahngan?
• Iaduwen en Sises mour nin duwen aramas emen kin kahrehiong ih en wia kaun emen me kin ahneki lamalam en poakehla oh kalahnganki?
[Kawehwehpen kilel kan nan ehu ehu pali 15]
Duwehte nohno limpoak emen kin kalahnganki kisin kisakis sang nah serepeino, Siohwa kin kalahnganki atail kin kihong ih atail kak koaros