“Kumwail Dehr Dupungkihong me Suwed”

“Kumwail dehr dupungkihong me suwed. Kumwail nantihong kapwaiada soahng mwahu kan me aramas koaros kin pwungki.”—ROM 12:17.

1. Soangen lamalam de tiahk dahieu me kin kalap wiawi?

NI AHNSOU me kisin pwutak de serepein men pahn kin siken emen rie, dahme kin kalap wiawi iei rie-o pahn pil siken ih. E kansensuwed en ese me soangen irair en men dupuk wet sohte kin wiawihte nanpwungen seri kan. Tohto me laud kan kin pil wia met. Ni arail kin medekla de sarohdi rehn emen, irail kin men dupuk. Mehlel, tohto me laud kan sohte pahn uhdahn siken emen, ahpw tohto en irail pahn kin mwomwen siken emen ni ahl akan me sohte uhdahn sansal. Ele irail kin kauwe me kamedekihala irail ki lokaia likamw akan de kin rapahki ahl akan me pahn kasohwe arail pahn kin pweida nan arail doadoahk de nan arail pwukoa kan. Sohte lipilipil soangen ahl dah me irail kin doadoahngki, kahrepeo duduwehte—iei en dupukohng dahme emen wiaiong ih, de en ikih emen.

2. (a) Dahme kahrehda Kristian mehlel kan kin pelianda pepehm en men ikih emen me wiaiong irail suwed? (b) Soangen peidek dah kan oh mehnia irelaud nan Paipel kitail pahn tehkpene?

² Mendahki pepehm en dupuk kin laud rehrail, Kristian mehlel kan kin pelianda soangen pepehm wet oh sohte men dukula pah. Irail kin uhd nantihong en idawehn peneu en wahnpoaron Pohl: “Kumwail dehr dupungkihong me suwed.” (Rom 12:17) Dahme pahn kamwakid kitail en mour nin duwen irair en mour ileile wet? Ihs irail kan me kitail pahn keieu dehr dupukohng me suwed? Soangen kamwahu dah kan kitail kak dolung ma kitail irehkitailsang pepehm en men dupukohng suwed me emen wiaiong kitail? Pwehn sapengla peidek pwukat, kitail en onopki mahs audepen en Pohl mahsen kan oh kilang iaduwen Rom irelaud 12 kin kasalehda me en ireikitailsang pepehm en men ikih emen me wiaiong kitail suwed iei ahl pwung, limpoak, oh mpahi me kitail en idawehn. Kitail pahn tehkpene ehu ehu irair siluh pwukat.

“Eri, I Wia Pekipek Ngidingid Wet ong Kumwail”

3, 4. (a) Nan tepin irelaud en Rom 12, dahme Pohl kin koasoia, oh ia wehwehn eh doadoahngki lepin lokaia wet “eri”? (b) Soangen pepehm dahieu me sapwellimen Koht kalahngan anahne wiaiong Kristian kan en Rom?

³ Tepida nan irelaud 12, Pohl kin koasoiahda ire pahieu me dokedoke mour en Kristian men. E kawehwehda duwen atail nanpwung mwahu rehn Siohwa, rehn riatail akan nan pwoson, rehn irail kan me kaidehn kisehtail nan pwoson, oh pil kaun en koperment kan. Pohl kasalehda me mie kahrepe kesempwal ehu en pelianda ineng en wia me sapwung kan, me iangahki ineng en men ikih emen ni e mahsanih: “Eri, riei ko, pwehki reken sapwellimen Koht kalahngan ong kitail, I wia pekipek ngidingid wet ong kumwail.” (Rom 12:1) Tehk lepin lokaia wet “eri” me wasaht kin wehwehki “nin duwen me kawehwehdahr mwowe.” Wasaht Pohl kin mahmahsanih: ‘Nin duwen me I kawehwehiongehr kumwail, I peki ni ngidingid kumwail en kapwaiada dahme I pahn ndaiong kumwail mwurin met.’ Dahme Pohl kawehwehiongehr irail Kristian en Rom akan?

⁴ Nan keieu en irelaud 11 en sapwellime kisinlikou, Pohl kin koasoiahda duwen pwais kaselel me ritidahng koaros mehn Suhs kan oh pil mehn liki kan en wiahla kaun ekei rehn Krais nan sapwellimen Koht Wehi, koapworopwor ehu me mehn Israel en mahs akan sohte men alehda. (Rom 11:13-36) Pwais kaselel wet kin miehla “pwehki reken sapwellimen Koht kalahngan.” Iaduwen Kristian akan anahne en mwekidki duwen sapwellimen Koht kadek kalahngan? Arail mohngiong kan anahne en kin direkihla pepehm en kalahngan mehlel me uhd pahn kamwakid irail en wia duwehte me Pohl koasoia mwuhr: “Kumwail mweidala paliwaramwail kan pwe en wiahla mehn meirong momour, me sarawi oh kaperen pahn kupwur en Koht. Met ih soangen kaudok mehlel me kumwail pahn kin wia.” (Rom 12:1) Ahpw iaduwen irail Kristian ko kak mweidala paliwararail pwe en wiahla “mehn meirong momour” ong Koht?

5. (a) Iaduwen emen kak en toukihda pein ih nin duwen “meirong” ehu ong Koht? (b) Mehnia mour en kosonned me anahne en kamwakid tiahk oh lamalam en emen Kristian?

⁵ Pohl pil doula oh kawehwe: “Kumwail dehr kahlemengih wiewia kan en sampah wet, ahpw mweidohng Koht en ketin kawiliakapwala loalamwail kan unsek. Eri, kumwail ahpw pahn esehda dahme kupwuren Koht—dahme mwahu, oh dahme e kin ketin kupwurperenki, oh dahme unsek.” (Rom 12:2) Pwe irail en dehr mweidohng ngehn en sampah en kawekala arail lamalam, irail anahne en kawiliakapwala loalarail oh ahnekihla soangen lamalamohte me Krais ketin sapwellimanki. (1 Korint 2:16; Pilipai 2:5) Mour en kosonned wet anahne en kamwakid tiahk oh lamalam en Kristian mehlel kan koaros ehu ehu rahn, iangahki kitail rahnwet.

6. Poahsoanda sang en Pohl ah kawehwe Rom 12:1, 2, dahme kin kamwakid kitail en soikala pepehm en men dupukohng emen me suwed?

⁶ Iaduwen en Pohl kawehwe Rom 12:1, 2 kin sewese kitail? Duwehte irail Kristian kan en Rom me keikihdi ngehn sarawi, kitail kin inenen kalahnganki pali tohto en sapwellimen Koht kalahngan me e ketikihong kitail oh pil kin kihkihong kitail rahn koaros nan atail mour. Eri, mohngiong me direkihla kalahngan kin kamwakid kitail en papah Koht ki atail kehl, atail kepwe de dipwisou kan, oh pil sang ni atail koahiek kan koaros. Soangen ineng en loalatail wet pil kamwakid kitail en wia uwen atail kak en kin lamalam, kaidehn nin duwen lamalam en sampah wet, ahpw nin duwen lamalam en Krais. Oh en ahneki lamalam en Krais pahn pidada atail wiewia ong meteikan—ong iengetail kan nan pwoson oh pil irail kan me kaidehn kisehtail nan pwoson. (Kalesia 5:25) Karasepe ehu: Ma kitail kin ahneki soangen lamalamohte me Krais kin sapwellimaniki, e pahn kamwakid kitail en pelianda ineng en men dupukohng irail me kin lahlahwe kitail.—1 Piter 2:21-23.

“Amwail Limpoak en Uhdahn Mehlel”

7. Soangen limpoak dah me Rom irelaud 12 kin koaskoasoia?

⁷ Kitail kin ireikitailsang en dupungkihong me suwed ong ni me suwed kaidehn ihte pwehki e wia ahl pwung ehu, ahpw pwehki e pil wia elen limpoak. Tehk iaduwen wahnpoaron Pohl uhd koasoia duwen kahrepen en kasalehda limpoak. Nan pwuhken Rom, Pohl kin doadoahngki lepin lokaia “limpoak” (a·gaʹpe ni lokaiahn Krihk) pak tohto ni ahnsou me e pahn kin koasoia duwen sapwellimen Koht oh Krais ara limpoak. (Rom 5:5, 8; 8:35, 39) Ahpw, nan irelaud 12, Pohl doadoahngki a·gaʹpe ni ahl me weksang met—ni eh kin koasoia duwen limpoak me kin kasansal ong aramas akan. Mwurin eh koasoia duwen kisakis kan en pali ngehn eh kin wekpeseng oh kin mihmi nanpwungen irail me pwoson akan, Pohl eri koasoia duwen irair ehu me Kristian koaros anahne en kakairada rehrail. E mahsanih: “Amwail limpoak en uhdahn mehlel.” (Rom 12:4-9) En kasalehda limpoak ong meteikan iei uhdahn kilelepen Kristian mehlel akan. (Mark 12:28-31) Pohl kin kangoange kitail ni kehlail en tehk kanaiehng pwe limpoak me kitail kin kasalehda nin duwen Kristian kei anahne en uhdahn mehlel.

8. Iaduwen kitail kak kasalehda limpoak mehlel?

⁸ Pohl pil doula koasoia iaduwen limpoak mehlel en kin kasansalda, ni eh mahsanih: “Kumwail tatki me suwed kan, oh tengeteng ni me mwahu kan.” (Rom 12:9) “Tatki” oh “tengeteng” kin wia lepin lokaia kehlail kei. “Tatki” kak wehwehki en “kailongki douluhl.” Kitail en kailongki kaidehn ihte imwila en wiewia suwed akan ahpw en kailongki me suwedo. (Melkahka 97:10) Lepin lokaia wet “tengeteng” iei kawehwehn lokaiahn Krihk me wehwehki “en pas duwehte kluh.” Ma Kristian men kin ahneki limpoak mehlel, eh irair en mahk kalahngan kin inenen pas reh oh kakete wiahla kisehn eh mour me sohte kak tohrohr sang ih.

9. Peneu dahieu me Pohl kin pwurepwurehng koasoia duwe?

⁹ Mie ehu kasalepen limpoak me Pohl kin pwurepwurehng koasoia. E mahsanih: “Peki rehn Koht en ketin kupwuramwahwih irail kan me kin kalokei kumwail; ei kumwail peki pwe en ketin kupwuramwahwihirailda, oh dehr kerieirailla.” “Kumwail dehr dupungkihong me suwed.” “Riei ko, kumwail dehr pein dupuk.” “Dehr mweidohng me suwed en poweiukedi, ahpw omw mwahu en powehdi me suwed.” (Rom 12:14, 17-19, 21) Mahsen en Pohl wasaht kin inenen sansal ia pahn duwen atail wiewia ong irail kan me sohte mih nan padahk mehlel, oh pil irail kan me kin uhwong kitail.

“Peki Rehn Koht en Ketin Kupwuramwahwih Irail kan me Kin Kalokei Kumwail”

10. Ni ahl dahieu kitail kak peki rehn Koht en ketin kupwuramwahwih irail kan me kin kalokei kitail?

¹⁰ Iaduwen kitail pahn kapwaiada kangoang kehlail wet sang Pohl: “Peki rehn koht en ketin kupwuramwahwih irail kan me kin kalokei kumwail”? (Rom 12:14) Sises padahkiong sapwellime werek kan: “Kumwail poakohng amwail imwintihti kan oh kapakapki me kin kalokei kumwail.” (Madiu 5:44; Luk 6:27, 28) Ihme kahrehda, ehu ahl kitail en peki rehn Koht en ketin kupwuramwahwih me kin kalokei kitail iei en kapakapkin irail, peki rehn Koht pwe ma ekei kin uhwong kitail pwehki arail sawehwe, Siohwa en kahrehda masarail kan en pehdpeseng ong padahk mehlel. (2 Korint 4:4) Mehlel, ele e sohte kin kalap wiawi en peki rehn Koht en kupwuramwahwih me kin kaloke kitail. Ahpw ma atail lamalam pahn kin duwehla lamalam en Krais, atail en kasalehiong limpoak ong atail imwintihti kan pahn pil laudla. (Luk 23:34) Imwila dahieu kak wiawi ma emen pahn kasalehda soangen limpoak wet?

11. (a) Dahme kitail kak sukuhlikihsang kahlemeng mwahu en Stipen? (b) Me sansalehr nan mour en Pohl, soangen wekidekla dah kan ele kak wiawi ong ekei me kin kaloke Kristian akan?

¹¹ Stipen iei emen me kapakapkin irail kan me kaloke ih, oh mie lipwen eh kapakapo. Sohte pwand mwurin Pendekos 33 C.E., irail me kin uhwong mwomwohdiso en Kristian kan ahnsowo parokedi Stipen oh urahdekiheila ih likin Serusalem, oh kate ih. Mwohn eh mehla, e ngihl laudida, patohwan: “Maing, komw dehr ketikihong irail pwukoahpen dihp wet.” (Wiewia 7:58–8:1) Emen ohl oko me Stipen kapakapki rahno iei Sohl, me iang kadehde oh pil pwungki duwen kamakamlahn Stipen. Mwuri, Sises me iasadahr uhd pwarowohng Sohl. Soun kalokolok menet wiahla emen sapwellimen Krais tohnpadahk oh mwuhr wiahla wahnpoaron Pohl, me ntingihada kisinlikou wet ong mehn Rom akan. (Wiewia 26:12-18) Pwehn pahrekiong kapakap en Stipen, Siohwa ni sansal mahkohng Pohl pwukoahpen dihp me e ahneki nin duwen soun kalokolok men. (1 Timoty 1:12-16) Ihme kahrehda e sohte kapwuriamwei en Pohl kin kangoange ni kehlail Kristian kan: “Peki rehn Koht en ketin kupwuramwahwih me kin kalokei kumwail”! Pwehki mahs pein ih kin wia emen me kin kaloke Kristian akan, e ese me ekei tohn kalokolok kan ele kak mwuhr wiahla sapwellimen Koht ladu kei. Nan atail ahnsou, ekei me kin kalokei Kristian kan kin wiahla emen me pwoson padahk mehlel pwehki tiahk meleilei kan en sapwellimen Siohwa ladu kan.

“Kumwail en Ahneki Popohl Rehn Aramas Koaros”

12. Iaduwen mahsen en peneu kan me dierek nan Rom 12:9, 17 kin mwomwen duwepenehte?

¹² Peneu me Pohl kihda mwuhr me pid ia atail wiewia ong irail me kisehtail nan pwoson kan oh pil me kaidehn kisehtail nan pwoson kan iei: “Dehr dupungkihong emen me suwed.” Lepin mahsen pwukat wia imwila pwung oh pahrek ong dahme e koasoiahier nin tepio, me iei: “Kumwail tatki me suwed kan.” Pwehki ni mehlel, ia mwomwen emen pahn nda me e uhdahn tatki me suwed ma pein ih kin doadoahngki mehkot suwed pwehn dupukohng meteikan? En wia met pahn weksang en ahneki limpoak me “uhdahn mehlel.” Mwurin mwo Pohl mahsanih: “Kumwail nantihong kapwaiada soahng mwahu kan me aramas koaros kin pwungki.” (Rom 12:9, 17) Iaduwen kitail en doadoahngki mahsen pwukat?

13. Ni ahl dah me kitail kin “kapwaiada soahng mwahu kan me aramas koaros kin pwungki”?

¹³ Mwohnte met, nan nah kisinlikou ong mehn Korint kan, Pohl ntingihada duwen kalokolok me wahnpoaron kan pahn lelohng. E mahsanih: “Se rasehng aramas me pahn ale kalokolok en mehla pwe tohnleng kan koaros iangahki tohn sampah kan en uduhdiahl. . . . Ma aramas akan pahn kin kerieikitala, a se pahn kin kapairailda; ma re kalokei kiht, a se kin kanengamahiong; ma re kin kasaroweikitedi, a se kin kasapahlkihong irail lokaia kadek.” (1 Korint 4:9-13) Pil duwehte, aramas en sampah pwon kin uduhdiahl Kristian mehlel kan rahnwet. Ni ahnsou me aramas akan pahn kin kilang duwen soahng mwahu kan me kitail kin wia mendahki ekei kin kalokei kitail, irail ele kakete men tepida perenki rong duwen padahk en Kristian kan me kitail kin wahseli.—1 Piter 2:12.

14. Ia uwen laud me kitail anahne en wia pwehn kasalehda popohl?

¹⁴ Ia uwen laud me kitail anahne en kasalehda popohl? Kitail en wia uwen atail kak. Pohl mahsanihong rie Kristian brother kan: “Kumwail wia uwen amwail kak pwe kumwail en ahneki popohl rehn aramas koaros.” (Rom 12:18) “Uwen amwail kak” kin wia mahsen konehng kei en kasalehda me kaidehn ahnsou koaros me kitail kin kasalehda popohl ong meteikan kin kak pweida. Ni karasaras, kitail sohte pahn kauwehla kosonned en Koht ma ihte pwehn kasalehda popohl ong aramas. (Madiu 10:34-36; Ipru 12:14) Ahpw kitail kin wia soahng koaros kitail kak en wia—ni soh anahnepen en kauwehla mour en kosonned pwung kan—en kasalehda popohl “ong aramas koaros.”

“Kumwail Dehr Pein Dupuk”

15. Me dierek nan Rom 12:19, kahrepe dahieu kitail en dehr ikih?

¹⁵ Pohl pil kihda kahrepe ehu kitail en tehk mwahu duwen dahme kahrehda kitail sohte anahne en ikih emen, pwe iei elen mpahi me kitail en idawehn. E mahsanih: “Riei ko, kumwail dehr pein dupuk, ahpw kumwail mweidohng engieng en Koht en doadoahk. Pwe Pwuhk Sarawi mahsanih, ‘Kauno ketin mahsanih, ngehi me pahn dupuk, ngehi me pahn ikih.’” (Rom 12:19) Kristian men me song en dupukohng emen me suwed wia aramas aklapalap men. E pein kihong ih pwukoah ehu me uhdahn Koht me sapwellimanki. (Madiu 7:1) Laudsang met, ni eh pein dupuk ong emen me suwed, e kin kasalehda me e sohte pwoson sapwellimen Siohwa mehn kamehlel wet: “Ngehi me pahn dupuk.” Weksang met, Kristian mehlel kan kin likih me Siohwa “uhdahn pahn mwadang sewese irail nan arail apwal akan.” (Luk 18:7, 8; 2 Deselonika 1:6-8) Irail kin mpahi oh mweidohng limen Koht en dupuk suwed koaros me wiawihong irail.—Seremaia 30:23, 24; Rom 1:18.

16, 17. (a) Ia wehwehn en “kanamenekihala mehlel rasehng mwoalus mwehl” pohn moangen emen? (b) Ke kilangehr iaduwen wiewiahn kadek kin kak kamwahwihala mohngiong en emen me kaidehn kisehtail nan pwoson? Ma ei, kihda ehu karasaras.

¹⁶ En dupukohng imwintihti men suwed pahn kakete kahrehiong ih en keptakaila, ahpw ma ke pahn kadek ong ih e pahn kak kameleileidi nan kapehde. Dahme kahrehda? Tehk en Pohl mahsen ong Kristian en Rom kan. E mahsanih: “Ma omw imwintihti men men mwengedahr, eri, kamwenge; ma e men nimpildahr, eri, kanampile; pwe ma ke pahn wia met, ke pahn inenen kanamenekihala mehlel, rasehng mwoalus mwehl pohn moange.” (Rom 12:20; Lepin Padahk 25:21, 22) Ia wehwehn met?

¹⁷ En “kanamenekihala mehlel rasehng mwoalus mwehl pohn moange” kin kohsang mwomwen lokaia kan en ahnsou kan en Paipel me pid wiawihdahn mete kan. Ni ahnsowo, mehkot ieu me mwomwen mete kin kohsang nan pwehl, pahn kin kohieng nan uhmw en kisiniei mwehl, oh me kin saun kisinieio pahn toukada mwoalus karakar kan kaidehn ihte pah ahpw pil pohn mete wet. Mwoalus mwehl me kin kohieng powe kin kalaudehla karakaro eri pahn kahrehiong mete kekeluwak wet en peipeseng oh kahrehiong soahng sakanakan kan en tohrohr sang ni meteo. Pil duwehte, ni atail kin wiahda tiahk kadek kan ong emen me kin uhwong kitail, kitail kakete “kapeipeseng” lamalam en keptakai me e ahneki nan kapehde oh uhd kapwarehda eh irair kaselel kan. (2 Nanmwarki 6:14-23) Ni mehlel, me tohto nan mwomwohdiso en Kristian kan kin tepida iangala kaudok mehlel pwehki wiewia kadek kan me sapwellimen Siohwa ladu kan kin kasalehiong irail.

Dahme Kahrehda Kitail Sohte Kin Dupuk ong Emen Suwed

18. Dahme kahrehda e wia ahl pwung, limpoak oh mpahi en dehr kapwurehiong me suwed ong emen?

¹⁸ Nan petehkpe mwotomwot en Rom irelaud 12, kitail kilangehr ekei kahrepe kesempwal kan ong dahme kahrehda kitail en “dehr dupungkihong me suwed.” Keieu, en ireikitailsang en ikih emen iei ahl pwung me kitail en idawehn. Duwen sapwellimen Koht mahk kalahngan me e ketin kasalehiong kitail, e pahn uhdahn pwung kitail en men toukihda pein kitail ong Siohwa oh kapwaiada sapwellime kosonned akan—me pil iangete kehkehlik me kitail en poakohng atail imwintihti kan. Keriau, en dehr dupukohng emen me suwed iei elen limpoak me kitail en idawehn. Ni atail sohte kin ikih emen oh kin kasalehda popohl, kitail kin ni limpoak kasik en sewese irail kan me kin inenen uhwong kitail en wiahla sapwellimen Siohwa tohnkaudok kei. Kesiluh, en ireikitailsang en dupukohng me suwed emen iei elen mpahi me kitail en idawehn. En tiengla mwowe oh pein dupukohng emen me suwed kin wia elen aklapalap, pwe Siohwa mahsanih: “Ngehi me pahn dupuk.” Mahsen en Koht pil panawihkin kitail: “Aramas aklapalap pahn mwadang namenekla, ahpw me mpahi me loalokong.” (Lepin Padahk 11:2) Ni erpit, en mweidohng limen Koht en pein dupuk me suwed pahn kasalehda atail irair en mpahi.

19. Dahme kitail pahn tehkpene nan artikel en mwuhr?

¹⁹ Sang me e koasoiahier, Pohl eri kasalehda ni mwotomwot ia pahn duwen atail wiewia ong meteikan. E kin kangoange ni kehlail Kristian akan: “Dehr mweidohng me suwed en poweiukedi, ahpw omw mwahu en powehdi me suwed.” (Rom 12:21) Soangen manaman suwed dah kei me kin lelohng kitail rahnpwukat? Iaduwen kitail kak en powehdi irail? Kitail pahn tehkpene nan artikel en mwuhr pasapengpen peidek pwukat oh pil ekei peidek me pid ire wet.

Ke Kak Kawehwe?

• Nan Rom irelaud 12, peneu dahieu me kin pwurepwurehng dierekda?

• Dahme pahn kamwakid kitail en dehr kapwurehiong suwed ong emen?

• Soangen kamwahu dah kan kitail oh pil meteikan kak dolung ma kitail sohte kin “dupungkihong me suwed” ong emen?

[Kawehwehpen kilel kan nan ehu ehu pali 5]

Sapwellimen Pohl kisinlikou ong mehn Rom kan kin kihda kaweid katapan kan

[Kawehwehpen kilel kan nan ehu ehu pali 7]

Dahme kitail kak sukuhliki sang kahlemeng mwahu en tohnpadahk Stipen?