Koasoandi me Sohte Soun Koasonepe?
MPEN sounpar 150 samwalahr oko Charles Darwin koasoia me dene irail akante me paliwararail akan kehlail oh konehng iei irail me kin momour pohn sampah, oh me dene met iei me kahrehda soangsoangen mour wekpeseng kan oh mour kapwuriamwei tohto miehki nan sampah rahn wet. Ahpw kawehwe wet me adaneki ‘evolution’ oh iangahki kawehwehpe kapatapat kapw akan me kohda nan atail ahnsou, kin kahrehda peidek laud miehda nan madamadau en aramas akan me kamehlele me paliwar akan nohn wiawihda mwahu oh kahrehda e pahn uhdahn mie pilahn oh koasoandi mwahu en paliwar pwukat. Pil ekei irail saintis wadawad akan sohte kin kamehlele me evolution me kahrehda miehki soangsoangen mour en mahn, tuhke oh aramas tohto kan me mie pohn sampah rahn wet.
Ekei soangen saintis pwukat kin kihda arail mehn akpwung kan me uhwong padahk en evolution—oh arail padahk kin adaneki Koasoandi Kupwurokong—oh kin kadehdehda me palien sains me ede biology, oh palien mathematics oh pwungen madamadau, kin utung mehlel koasoandi en kepikipikda. Irail pwukat kin songosong en kapidelong ire wet ong nan mehn kasukuhl akan me kin wiawi nan perehn sukuhl kan. Uhpenehn palien madamadau pwukat kin wia kamwakid laud ahpw mehlel nan wehin United States, oh ni mehlel met kin pil wiewiawi nan wehin England, wein Netherland akan, oh Pakistan, Serbia, oh Turkey.
E Kapwuriamwei me Ire Kesempwal Ieu Sohte Kasansalda
E wia mehkot me inenen sansal mwahu me sang ni koahiek en koasonepen koasoi, irail akan me kin utung padahk me pid koasoandi kupwurokong, irail kin kihweisang mehkot kesempwal nan arail koasoakoasoi kan. Met kin pidada arail sohte kin men koasoia duwen Soun Wiahda Koasoandio. Ke kak kamehlele me koasoandi mwahu ieu kin sohte Soun Koasonepe? Ripoht sang The New York Times Magazine koasoia me dene irail akan me kin uhki padahk en koasoandi kupwurokong “sohte kin wiahda kadehde kehlail duwen ihs de dahme kin wia soun koasoandi. Sounnting me ede Claudia Wallis koasoia me aramas akan me kin uhki padahk en koasoandi kupwurokong kin “kanahieng pwe koasoiepen Koht en dehr pwarada nan arail koasoakoasoi.” Oh makasihn me ede Newsweek koasoia me “aramas akan me pwungki padahk en koasoandi kupwurokong sohte mehkot re kak koasoiahki pwehn kadehde me mie de pil kawehwehda duwen Soun Koasoanehdi men.”
Kitail kak wehwehki me e inenen apwal en song en pohnsehse peidek me pid duwen soun koasoandi. Iaduwen kawehwehpen koasoandi mwahu me kin mie nan audepen lahng oh sampah oh me pid duwen mour eh pahn kak unsekla ma aramas pahn wie ekieki me mie soun koasoandi men oh ihs ih?
Pali moron en aramas pahn pwungki mahsen en wahnpoaron Pohl me mahsanih: “Aramas akan me kin kauwada ihmw.” (Ipru 3:4) Pohl eri kaimwisekihla: “Koht, iei ih me ketin wiahda mehkoaros.” Sounkadehdehn Siohwa kan lukehkin komwi en wehwehkihda duwen Soun Koasoandi Lapalapo nin duwen emen me uhdahn ketin mie. Komw pahn kak wehwehkihda mware oh duwen sapwellime irair tohrohr oh duwen sapwellime wiewia kan ong tohnsampah. Sang nan sapwellime Mahsen, iei Paipel, komw pahn wehwehkihda dahme kahrehda kitail en dehr ihte wadewadekalahte sapwellime koasoandi kan ahpw kitail en pil kasarawih ih nin duwen eh ketin wia Soun Koasonepen mehkan.—Melkahka 86:12; Kaudiahl 4:11.
[Kawehwehpen kilel kan nan ehu ehu pali 3]
Charles Darwin kamehlele duwen pilipil en ihs me warohng kin kawehwe duwen kapwonopwon en mour
[Credit Line]
Darwin: Nan kilel me Mrs JM Cameron/ US National Archives wiahda