“Kalekeikumwailsang Noahrok Suwed Koaros”
“Mour mehlel en aramas sohte kin mi ni kepwe kan me e ahneki, mehnda ma e kepwehpwe mehlel.”—LUK 12:15.
1, 2. (a) Dahme ke kin kilang duwen en aramas akan kin nsenohki oh raparapahki rahnwet? (b) Iaduwen met kak kamwakid kitail?
MWOHNI, kepwe kan, ndand, doadoahk me pwei mwahu, peneinei—soahng pwukat iei mehkan me pali laud en aramas akan kin wiahki mehn sosohng en pweida de mehn perepe ong ahnsou kohkohdo. E sansal me nan sahpw kepwehpwe oh semwehmwe kan, aramas tohto kin nsenohki oh raparapahki kepwe kan. Ahpw ni pali teio, arail nsenohki ar nanpwungmwahu rehn Koht kin mwadang tikitikla, de sohlahr mie.
2 Met duwehte dahme Paipel kohpadahr. E mahsanih: “Uhdahn pahn mie ahnsou apwal ekei ni imwin rahn akan. Aramas pahn roporop ong pein irail, mehwo, . . . re pahn inengieng pein arail peren laudsang kupwur en Koht. Re pahn kin liksansalamwahuki mwomwen [arail] pelien lamalam, ahpw re kin kahmahmki katepe. Kalekeiukasang aramas pwukat.” (2 Timoty 3:1-5) Pwehki Kristian mehlel akan kin mih nanpwungen soangen aramas pwukat rahn koaros, re kin mih pahn kasongosong laud en iang ahneki soangen madamadauohte oh pil mwomwen arail mour. Dahme kak sewese kitail en pelianda ‘wiewia kan en sampah wet’?—Rom 12:2.
3. Mehnia kaweid me Sises ketikihda me kitail pahn tehkpene ni ahnsouwet?
3 Sises Krais, iei “me tepin atail pwoson oh me kaunsekala atail pwoson,” kin ketin padahkiong kitail mehn kasukuhl kehlail me pid duwen ire wet. (Ipru 12:2) Ni ehu ahnsou me Sises ketin mahmahsanihong pokon en aramas akan pwehn padahkiong irail mehkan me pid duwen kaudok mehlel, emen ohl katokehdi sapwellime padahk oh peki reh: “Komw mahsanihong mahs rieio en nehkpeseng nanpwungat sohsohn at pahpao.” Pwehn sapeng pekipeko, Sises ketikihong ohlo—oh koaros me rongorong—kaweid kesempwal ieu. E ketikihda kaweid kehlail ieu me pid duwen noahrok kepwe, oh e ketin kalaudehla kaweido sang ni eh ketin doadoahngki ehu karasaras me kamwakid arail madamadau. Kitail anahne tehk kanahieng dahme Sises ketin mahsanih ni ahnsowo oh medemedewe iaduwen kitail kak paiekihda sang ni atail pahn kapwaiada sapwellime mahsen nan pein atail mour.—Luk 12:13-21.
Pekipek Sapwung Ieu
4. Dahme kahrehda e sapwung en ohlo eh katokehdi sapwellimen Sises kapahreko?
4 Mwohn ohlo katokehdi sapwellime padahk, Sises ketin mahmahsanihong sapwellime tohnpadahk kan oh meteikan en dehr mwalaun, oh duwen anahnepen eimah en pohnese Nein-Aramas, oh pil duwen en ale sawas en ngehn sarawi. (Luk 12:1-12) Mehlel soahng pwukat wia ire kesempwal kan me tohnpadahk pwukat anahne tamataman. Ahpw, nanwerengen sapwellime kapahrek loal wet, ohlo katokehdi kapahreko oh peki rehn Sises en kapwungala kahpwal ieu me wiawi nan peneinei me pid duwen kepwe kan. Ahpw, mie mehn kasukuhl kesempwal ieu me kitail kak sukuhliki sang wiewia wet.
5. Dahme ahn ohlo pekipeko kasalehda duwen ih?
5 Mie me ntingihdi me “irair en emen aramas kin kalapw sansalda sang dahme e kin medemedewe ni ahnsou e wia rongorong padahk me pid sarawi.” Ni ahnsou me Sises ketin wia mahmahsanih duwen ire kesempwal kan me pid arail nanpwungmwahu rehn Koht, mwein ohlo medemedewehte duwen dahme e kak wia pwehn ale pai en kepwe kan. E sohte sansal ma mie kahrepe pwung ong eh kapwunod me pid duwen eh sohso. Mwein e songosong en isaneki sapwellimen Sises manaman oh ndand nin duwen sounkopwung loalokong men ong kahpwal en sampah akan. (Aiseia 11:3, 4; Madiu 22:16) Sohte lipilipil ia kahrepeo, eh pekipek kasalehda me mie kahpwal ieu nan eh mohngiong—eh sohte kin kesempwaliki eh nanpwunmwahu rehn Koht. E sou kesempwal kitail en kasawih pein kitail? Karasepe, ni ahnsoun mihding en Kristian akan, e mengei en mweidohng atail madamadau en kohkohseli de medemedewe duwen dahme kitail pahn wia mwuhr. Ahpw, kitail anahne rong kanahieng ire kan me kin kohda oh medemedewe duwen ahl kan me kitail kak doadoahngki ire pwukat pwe kitail en kak kamwahwihala atail nanpwungmwahu rehn Samatail nanleng, Siohwa Koht, oh pil rehn iangatail Kristian akan.—Melkahka 22:22; Mark 4:24.
6. Dahme kahrehda Sises sohte ketin mwekidki ahn ohlo pekipeko?
6 Sohte lipilipil dahme kamwakidada ohlo en wiahda pekipeko, Sises sohte kupwurki mwekidki eh pekipeko. Ni pali teio, Sises ketin mahsanihong ih: “Kompoakepahi, ihs me mweidohng ie I en sounkopwung oh nehk ong amwa sohso?” (Luk 12:14) Ni eh ketin mahsanih met, Sises ketin kasalehda mehkot me aramas ako eseier, pwe Kosonned en Moses kin kasalehda me sounkopwung kan nan kahnimw kan kin idihdda pwehn apwalih soangen kahpwal pwukat. (Deuderonomi 16:18-20; 21:15-17; Rud 4:1, 2) Ahpw, Sises kin ketin nsenohki mehkan me kesempwalsang—en kadehdehda duwen padahk mehlel en Wehio oh padahkiong aramas akan kupwuren Koht. (Sohn 18:37) Kitail men kahlemengih sapwellimen Sises mehn kahlemeng mwahu sang ni atail kin liksang en nohn nsenohki mehkan en sampah, oh ni atail kin doadoahngki atail ahnsou oh kehl pwehn kalohki rongamwahu ong “tohn wehi kan koaros pwe re en wiahla . . . tohnpadahk.”—Madiu 24:14; 28:19.
Kalekeikumwailsang Noahrok Kepwe
7. Dahme Sises ketin kasawihada duwen ahn ohlo pekipeko?
7 Pwehki Sises kak kasawih pepehm loal nan mohngiong en aramas akan, e ketin mwahngih me mehkot sapwung kin pidada nan ahn ohlo pekipeko ong Sises en kapwungala eh kahpwalo. Kahrehda Sises sohte ihte soikala mwekidki pekipeko, ahpw e ketin kasalehda dahme uhdahn kamwakidada ohlo en wia pekipeko oh mahsanih: “Kumwail kalekeikumwailsang noahrok suwed koaros, pwe mour mehlel en aramas sohte kin mi ni kepwe kan me e ahneki, mehnda ma e kepwehpwe mehlel.”—Luk 12:15.
8. Dahkot noahrok kepwe, oh dahme e kak wiaong aramas?
8 Noahrok kepwe kaidehn ihte ineng en naineki mwohni de kepwe kan me kitail kak doadoahngki ni ahl me pwung oh ong kahrepe mwahu. Noahrok kepwe iei ineng me nohk daulihala ong men kepwehpwehla de naineki kepwe tohto kan de pil men ahneki ahn emen aramas kepwe kan. E kak pidada soangen ineng me sohte kak kaitarala, ineng en ahneki soahng kan—mwein soahng kan me aramas teikan ahneki—pwehki ihte e men ahneki, oh e sohte kin medewe duwen ma e uhdahn anahne de dahme met pahn wiaiong meteikan. Aramas me kin noahrok kepwe kin mweidohng dahme e men ahneki en kaunda eh madamadau oh wiewia kan oh mweidohng eh ineng en wiahla eh koht. Tamanda me wahnpoaron Pohl kin kapahrekiong aramas me kin noahrok kepwe duwehte aramas men me kin pwongih dikedik kan, me sohte pahn iang sohsohki Wehin Koht.—Episos 5:5; Kolose 3:5.
9. Ni ahl dah kan noahrok kepwe kin sansalda? Kihda karasepe kan.
9 Sises ketin mahsanih kitail en kalekeikitailsang “noahrok suwed koaros.” Noahrok kepwe kin sansalda ni ahl tohto. Kaimwisekalahn Kosonned Eiseko kasalehda ekei ahl pwukat, ni eh mahsanih: “Kumwail sohte pahn noahroke imwen emen. Kumwail sohte pahn noahroke en emen eh pwoud, de eh lidu, de nah ahs de nah kou, de mehkot me uhdahn ah.” (Eksodus 20:17) Paipel kin audaudki karasaras en aramas akan me lohdi pahn dihp laud pwehki arail kin noahrok ni soangsoangen ahl akan. Sehdan me tepin noahrokehda mehkot me e sohte ahneki—lingan, wahu, oh manaman me Siohwa kelepw me ketin sapwellimaniki. (Kaudiahl 4:11) Ihp noahrokehda mehkot me Siohwa kelepw sapwellimaniki, iei pwung en koasoanehdi dahme pwung oh sapwung, oh eh lohdiong widing wet kahrehiong tohnsampah en sohsohki dihp oh mehla. (Senesis 3:4-7) Ngehn saut kan iei tohnleng kan me sohte itarki “uhdahn dewerail, ahpw kesehla uhdahn ar wasa” pwehn ale mehkot me sohte mweimweiong irail. (Sud 6; Senesis 6:2) Pil medewehla duwen Palaam, Akan, Keasi, oh Sudas. Irail sohte kin itarki dahme re ahneki, ahpw re mweidohng irail en kakairada ineng me nohk laud ong kepwe kan, oh met kahre irail ong imwila suwed.
10. Iaduwen kitail kak ‘kalekeikitailsang’ noahrok kepwe, nin duwen Sises ketin padahngki?
10 Ia uwen eh konehng Sises en ketin tepikihda sapwellime kaweid duwen noahrok kepwe ki lepin lokaia wet “kalekeikumwailsang”! Pwekida? Pwehki e uhdahn mengei ong aramas akan en kilang ahn aramas teikan ar kin noahrok kepwe, ahpw pali laud en ahnsou, re sohte kin pohnese me pein irail kin noahrok kepwe. Ahpw, wahnpoaron Pohl kasalehda me “limpoak ong mwohni, iei tepin soangen suwed koaros.” (1 Timoty 6:9, 10) Tohnpadahk Seims kawehwehda duwen ineng suwed wet, me ni “eh kin kanaitikihada eh ineng suwed, oh ni dihp eh kin pweidahr mehlel.” (Seims 1:15) Duwehte Sises ketin kaweidih, kitail anahne ‘kalekeikitailsang’ noahrok kepwe kan, oh kasawih pein kitail pwehn tehk dahme kitail kin inengieng, pwehn liksang “noahrok suwed koaros.”
Dahkot Mour Mehlel?
11, 12. (a) Soangen kaweid dahieu Sises ketikihda me pid duwen noahrok kepwe? (b) Dahme kahrehda kitail anahne tehk sapwellimen Sises kaweido?
11 Mie pil ehu kahrepe me kitail anahne kalekeikitailsang noahrok kepwe. Tehk dahme Sises mahsanih: “Mour mehlel en aramas sohte kin mi ni kepwe kan me e ahneki, mehnda ma e kepwehpwe mehlel.” (Luk 12:15) Met kesempwal en medemedewe pwehki nan atail ahnsou, aramas tohto kin lemeleme me kepwehpwe wehwehki nsenamwahu oh pweida mwahu. Sang ni mahsen pwukat, Sises ketin kasalehda me mour me uhdahn katapan oh nsenamwahu sohte kin kohsang de poahsoankihda kepwe kan, sohte lipilipil ia uwen laud en kepwe me emen naineki.
12 Ahpw, mwein ekei pahn sapwungki. Mwein re lemeleme me en ahneki kepwe kan kin kahrehda mour nsenamwahu oh kaperen, eri e uhdahn katapan. Ihme kahrehda re kin doadoahngki ahnsou laud ong wiewia kan me pahn kihong irail koahiek en ahneki kepwe kan oh dipwisou kan me re inengieng. Irail lemeleme me met pahn imwikihla mour nsenamwahu oh pweida. Ahpw ni ar ahneki soangen madamadau wet, re sohte kin kilang ire kesempwal ieu me Sises ketin kasalehda.
13. Ia madamadau me toupahrek me pid duwen mour oh kepwe kan?
13 Sises sohte ketin mahsanih duwen ma e pwung de sapwung en ahneki kepwe tohto, ahpw e ketin kasalehda me mouren aramas sohte kin kohsang “kepwe kan me e ahneki,” oh met wehwehki soahng kan me e ahnekier. Me pid duwen ire wet, kitail koaros ese me kitail sohte anahne ahneki soahng tohto pwehn momour de kolokol mour me kitail ahneki. Ihte kitail anahne, iei kisin mwenge, ekei likou me kitail en likawih, oh wasa me kitail pahn wendi ie. Me kepwehpwe kan kin ahneki soahng tohto, oh me semwehmwe kan kin apwaliki ahneki dahme re anahne. Ahpw irail koaros pahn duwepenehte ni ahnsou me arail mour pahn imwisekla—soahng koaros pahn imwisekla. (Eklesiasdes 9:5, 6) Kahrehda en ahneki kepwe kan sohte kak wiaiong atail mour en katapan. Oh pil kitail en dehr lemeleme me soahng pwukat kak kihong kitail kahrepen mour. Ire wet pahn sansalda ni atail pahn kasawih soangen mour dahieu Sises ketin mahsanih duwe.
14. Dahme kitail kak sukuhliki sang lepin lokaia me kawehwehdi “mour” nan Paipel?
14 Ni ahnsou me Sises ketin mahsanih me “mour mehlel en aramas sohte kin mi ni kepwe kan me e ahneki,” lepin lokaia me e ketin doadoahngki ong “mour” nan Pwuhken Luk (lokaiahn Krihk, zo·eʹ) wehwehki, kaidehn mwomwen de elen mour, ahpw uhdahn mour, mour me kitail ahneki. Sises ketin mahmahsanih me sohte lipilipil ma kitail kepwehpwe de semwehmwe oh ma kitail kak ahneki kepwe tohto de kitail kin apwaliki ahneki dahme kitail anahne ong mour, kitail sohte kak uhdahn koasoanehdi ia uwen werei kitail pahn mour de ma kitail pahn momour lakapw. Sises ketin mahsanih nan sapwellime Kapahrek en pohn Dohl: “Ihs rehmwail me kak kareireikihla eh mour kisin ahnsou kis pwunupwunodki eh mour?” (Madiu 6:27) Paipel kin kasansalehda me Siohwa kelepw me wia “poahsoan en mour koaros,” oh ih kelepw me kak ketikihong irail me lelepek kan “mour mehlel,” de “mour soutuk,” soangen mour me sohte imwi nanleng de pohn sampah.—Melkahka 36:9; 1 Timoty 6:12, 19.
15. Dahme kahrehda aramas tohto kin koapworopworki kepwe kan?
15 Sapwellimen Sises mahsen kan kin kasalehda me e mengei ong aramas akan en ahneki madamadau sapwung duwen mour. Sohte lipilipil ma aramas akan kin kepwehpwe de semwehmwe, irail koaros aramas soh unsek oh ahneki imwila tehieu. Moses mahsanih: “Sounpar 70, ihte werein at mour—a ma se kehlail, e pahn lel 80; ahpw pahr pwukat kin kahrehiong kiht pwunodte oh apwal; mour kin mwadang imwisekla, oh se solahr mie. Kitail koaros ipwidi luwet. Aramas koaros ahneki soangen mourteieu me mwotomwot oh diren apwal.” (Melkahka 90:10; Sohp 14:1, 2; 1 Piter 1:24) Ong kahrepe wet, aramas akan me sohte kin kakairada nanpwungmwahu rehn Koht kin kalapw ahneki soangen madamadau me wahnpoaron Pohl koasoia, “kitail en kin kamakamadipwte, pwe lakapw kitail pahn mehla.” (1 Korint 15:32) Meteikan kin kehn me mour uhdahn mwotomwot oh irail sohte wehwehki dahme pahn wiawiong arail mour, kahrehda re kin song en diarada sang nan arail kepwe tohto kan mehn perepe oh mehkot me kak katengehdi arail mour. Mwein re lemeleme me en ahneki kepwe tohto pahn pere arail mour. Kahrehda re kin doadoahk laud pwehn kepwehpwehla oh kin medemedewe me soahng pwukat pahn kihong irail mehn perepe oh nsenamwahu.—Melkahka 49:6, 11, 12.
Ahnsou Kohkohdo me Tengeteng
16. Dahme katep mehlel en mour sohte kin poahsoankihda?
16 Mwein met mehlel me soangen mour mwahu—ahneki reken mwenge, likou tohto, ihmw kaselel, oh soahng teikan—kak wahdo mour nsenamwahu de mweidohng en ale epwelpen pali en wini mwahu oh kareireila ahn emen mour. Ahpw, soangen mour wet uhdahn katapan oh tengeteng? Katep mehlel en mour sohte kin poahsoankihda sounpar depe emen kak mourki de uwen tohtohn kepwe kan me emen pahn ahneki de doadoahngki. Wahnpoaron Pohl kasalehda keper en nohn koapworopworki soahng pwukat. E ntinglahng Timoty: “Panawiheki koaros me kepwehpwe nan mour wet re en dehr aklapalap, oh dehr koapworopworki soahng kan me sohte kin tengeteng, duwehte atail kepwehpwehn sampah; ahpw re en koapworopworki Koht, me kin ketin kalahngan oh me kin ketin sapankihong kitail soahng koaros pwe kitail en peren.”—1 Timoty 6:17.
17, 18. (a) Mehn kahlemeng dah kan me pid duwen kepwe kan me warohng kitail en kahlemengih? (b) Artikel en mwurin met pahn kasawih mehnia sapwellimen Sises karasaras?
17 En koapworopworki kepwe kan sohte elen loalokong pwehki soahng pwukat “sohte kin tengeteng.” Sohp uhdahn kepwehpwe, ahpw ni ahnsou me kahpwal kan mwadang lelohng ih, eh kepwe kan sohte sewese ih; re mwadang sohrala. Eh nanpwung kehlail rehn Koht me kin sewese ih en dadaurete pahn kahpwal koaros oh lokolok koaros. (Sohp 1:1, 3, 20-22) Eipraam sohte kin mweidohng eh kepwe tohto en irehsang ih en ale pwukoa apwal ieu sang rehn Siohwa, oh e ale kapai en wiahla “semen wehi ngedehrie.” (Senesis 12:1, 4; 17:4-6) Irail oh mehn kahlemeng teikan warohng kitail en kahlemengih. Sohte lipilipil ma kitail pwulopwul de mah, kitail anahne kasawih pein kitail pwehn tehk dahme uhdahn kesempwal nan atail mour oh dahme kitail kin koapworopworki.—Episos 5:10; Pilipai 1:10.
18 Kitail tehkpenehr ekeite sapwellimen Sises mahsen kan me pid duwen noahrok kepwe oh madamadau toupahrek duwen mour, oh ire pwukat inenen katapan oh wia sawas laud. Ahpw, Sises ketin koasoanehdi en kapatahiong kaweid teikan ong ire pwukat, oh e ketin doadoahngki ehu karasaras mwahu me kamwakid madamadau, me pid duwen ohl kepwehpwe pweipwei men. Iaduwen karasaraso kin dokedoke atail mour rahnwet, oh dahme kitail kak sukuhliki sang met? Artikel en mwurin met pahn kihda pasapeng kan.
Ia Ahmw Pasapeng?
• Dahme kitail kak sukuhliki sang en Sises sohte ketin mwekidki pekipek en ohl emen nan pokono?
• Dahme kahrehda kitail kalekeikitailsang noahrok kepwe, oh iaduwen kitail kak wia met?
• Dahme kahrehda mour sohte kohsang kepwe kan?
• Dahme kak wiahki mour uhdahn katapan oh tengeteng?
[Kawehwehpen kilel kan nan ehu ehu pali 5]
Dahme kahrehda Sises sohte ketin mwekidki ahn ohl men pekipek?
[Kawehwehpen kilel kan nan ehu ehu pali 5]
Noahrok kepwe kak kahrehda imwila suwed
[Kawehwehpen kilel kan nan ehu ehu pali 7]
Iaduwen Eipraam kasalehda madamadau pwung duwen kepwe kan?