Ia Kahrepen Koht Eh Ketin Mweidohng me Suwed en Kin Wiawi?
ME SUWED oh kahpwal kan kin wiawi wasa koaros. Mahwen kan kin kemehla aramas tohto oh pil sounpei kan. Mwersuwed oh tiahk lemei kin kalapw wiawi. Mwein ke lelohngehr kahpwal me aramas kin mwamwahlikin uhk de koasoandi sapwung wiawihong uhk. Pwehki dahme ke kilangehr oh lelohngehr, ele ke kin idek, ‘Ia kahrepen Koht eh ketin mweidohng me suwed en kin wiawi?’
Aramas tohto pil kin idek peidekohte. Mpen sounpar 3,600 samwalahro, sapwellimen Koht ladu lelepek men me adaneki Sohp idek: “Dahme Koht kin ketin mweidikihong aramas suwed kan en momour?” (Sohp 21:7) Mpen sounpar 2,600 samwalahro, soukohp Seremaia nsensuwedkihla wiewia suwed kan en aramas akan ahnsowo oh pil idek: “Dahme aramas suwed kan kin kepwehpwehki? Dahme aramas mwersuwed kan kin pweikihda?” (Seremaia 12:1) Sohp oh Seremaia wehwehki me sapwellimen Koht koasoandi kan kin pwung. Ahpw re kin medemedewe dahme kahrehda wiewia suwed kin tohtohla. Ele ke pil kin medemedewe duwen met.
Ekei aramas kin medewe me Koht me ketin kahrehda me suwed oh kahpwal kan. Meteikan kin idek: ‘Ma Koht kin ketin manaman, pwung oh limpoak, eri dahme kahrehda e sohte ketikihsang me suwed oh kahpwal kan? Dahme kahrehda e kin ketin mweidohng me suwed en kin mihmihte leledo rahnwet?’ Oaralap en mwuhr pahn sapeng peidek pwukat oh pil peidek kesempwal teikan.
[Kawehwehpen kilel kan nan ehu ehu pali 3]
AP Photo/Adam Butler