Peidek kan Sang Sounwadawad kan
Wehin Koht Mih Nan Mohngiongomw?
Aramas tohto kin kamehlele me pasapeng en peidek me mi powe iei ei. Karasepe ehu, pwuhk me adaneki The Catholic Encyclopedia nda: “Wehin Koht wehwehki kaundahn Koht nan mohngiongitail.” Sounpadahk kan kin kalapw wia soangen padahk wet. Iaduwe, Paipel kin uhdahn padahngki me Wehin Koht mihmi nan mohngiongitail?
Ekei kin medemedewe me pein Sises me katapiada padahk me Wehin Koht kin mihmi nan mohngiongitail. Sises mahsanih: “Wehin Koht miher nanpwungamwail.” (Luk 17:21, New World Translation) Ekei kawehwe kan kawehwe nin duwe met: “Wehin Koht miher loalamwail.” Kawehwe pwukat pwungiong mahsen en Sises? Ahn Sises mahsen wehwehki me Wehin Koht mihmi nan mohngiong en aramas akan?
Keieu, tehk mwahu dahkot mohngiong en aramas. Ni ahmw pahn kasawih Paipel, mohngiong en aramas ni karasaras kin wehwehki soangen aramas dah men kowe nan loalomw, utupen ahmw madamadau kan, wiewia kan oh pepehm kan. Padahk wet me dene mehkot lapalap oh wahu duwehte Wehin Koht kak mih nan mohngiong en aramas—karasepe re kin nda me e kin wekidala oh kamwahwihala mouren aramas—met kak mwomwen kansenamwahu en rong, ahpw mie poahsoanpen padahk wet?
Paipel kin padahkiong kitail: “Ihs me kak wehwehki audepen mohngiong en aramas? Sohte mehkot me duwehte me diren piht; sohte kamwahupe ieu kak dierekda.” (Seremaia 17:9) Pein Sises mahsanih: “Sang loalen aramas, sang nan eh mohngiong, me lamalam suwed kan kin kohda sang ie, me kin kahrehiong nan dipen tiahk suwed, pirap, kamaramas, kamwahl, noahrok, oh wia soahng suwed teikan koaros.” (Mark 7:20-22) Medewe mahs: Soahng kansensuwed kan me kitail kin kilang nan sampah rahnwet sou kin tepidohsang mohngiong suwed en aramas? Eri iaduwen Wehi unsek ehu en Koht eh pahn kak kohdahsang soangen irair en mohngiong en aramas? Ni mehlel, e sansal me mohngiong en aramas men sohte kak wiahda Wehin Koht duwehtehte dihpw tekatek eh sohte kak wiahda wahn wain.—Madiu 7:16.
Keriau, pil tehk kanahieng ihs me Sises koasoakoasoiong nan Luk 17:21. Nan iretikitik kan en mwowe e mahsanih: “Parisi kei ahpw kalelapak rehn Sises, ‘Iahd Wehin Koht pahn pwarodo?’ E ahpw ketin sapeng irail.” (Luk 17:20) Parisi kan iei imwintihti en Sises kei. Sises mahsanih me irail mwalaun pwukat sohte pahn pedolong nan Wehin Koht. (Madiu 23:13) Eri ma Parisi kan sohte kak pedolong nan Wehin Koht, Wehio kak mihmi nan mohngiongirail kan? Sohte kak douluhl! Eri, ia wehwehn sapwellimen Sises mahseno?
Ni petehkpe mwahu eh kohwong mahsen pwukat en Sises, ni keneinei mie ekei kawehwe kan me doadoahngki soangen lepin lokaia me pahrekiong dahme Paipel en New World Translation doadoahngki. Ekei nda Wehio miher “nanpwungamwail” de “rehmwail.” Iaduwen Wehio a kak mih nanpwungen aramas akan en ni ahnsowo, iangahki Parisi kan? Sises iei emen me Siohwa ketin pilada pwehn wiahla Nanmwarki en Wehio. Nin duwen Nanmwarki pilipilda men, Sises mihmi nanpwungen aramas akan en ni ahnsowo. E kin padahkihong irail duwen Wehin Koht oh wiahda manaman kan, kasalehong aramas akan duwen dahme Wehio pahn wia ni ahnsou kohkohdo. Eri ni sansal, Wehio mihmier nanpwungen aramas akan en ni ahnsowo.
E pil sansal me sohte wasakis nan Paipel me utungada padahk me Wehin Koht kin mihmi nan mohngiong en aramas akan. Ahpw, e wia koperment mehlel ehu me pahn wahdo wekidekla laud kan ong sampah wet, duwehte dahme soukohp ako kohpadahr.—Aiseia 9:6, 7; Daniel 2:44.