Dahkot Wehin Koht?

IA OARALAP en sapwellimen Sises kalohk? Nin duwen me pein Sises mahsanih, me iei Wehin Koht. (Luk 4:43) Ni aramas akan arail kin rong sapwellime mahsen, irail kin rong wasa tohto me e kin mahsanih duwen Wehio. Iaduwen, irail kin pwonopwonkihda met? Iaduwen, irail peipeidengki dahkot Wehi wet? Soh. Pwuhken Rongamwahu kan sohte kilelehdi soangen peidek pwukat. Eri dah, Wehin Koht wia mehkot me aramas pwuko esehier?

Ni mehlel, iren Pwuhk Sarawi kan me ntingdier sangete kawao me mehn Suhs akan kin wauneki, kawehwehdahr duwen Wehio, oh kasalehda ni koasoi oaritik oh dehde dahkot met oh dahme Wehio pahn wahdo. Nan rahnwet, atail esehla duwen Wehio pil kak laud sang mahso ni soangen ahlohte—iei kilangasang nan Paipel. Kitail tehkpene ire mehlel isuh me Paipel padahkihong kitail me pid duwen Wehio. Meh siluh kin inenen sansal mwahu ong mehn Suhs akan nan mwehin Sises oh pil mwowe sang. A meh siluh Sises oh sapwellime wahnpoaron akan ketin kasalehda nan mwehin tepin Kristian akan. Oh meh ehu me kaimwisekla kin sansalda nan pein atail ahnsou.

1. Wehin Koht iei koperment mehlel ieu, oh e pahn mihmi kohkohlahte. Tepin kokohp en Paipel kasalehda me Koht pahn ketin kadarodo soundor emen ong tohnsampah lelepek kan. Memenet kin adaneki “kadaudokeo” oh ih me pahn kihsang kahpwal akan me tepidahr miehla, pwehki ahn Adam oh Ihp oh Sehdan arail uhwongo. (Senesis 3:15, New World Translation) Mwurihdo douluhl, rohng kaperen eri peiong ohl lelepek Nanmwarki Depit me pid duwen “kadaudokeo” de Mesaiao. Ih me pahn wia kaunepen Wehi ieu. Koperment wet pahn weksang koperment teikan koaros. E pahn mihmi kohkohlahte.—2 Samuel 7:12-14.

2. Wehin Koht pahn kauwehla koperment en aramas akan koaros. Soukohp Daniel alehdi kaudiahl ieu me e kilang irekidi en kaunda lapalap ekei en sampah, me kipe erein poadopoad akan leledohng atail ahnsou. Eri tehk imwila kaperen kaudiahlo: “Eri, ni ahnsou me [kaimwiseklahn nanmwarki en sampah] ko pahn kakaun wasa, Koht en nanleng pahn ketin kauwada mwehi ehu me sohte imwi. Mwehi wet sohte pahn kak lohdi, ahpw e pahn kauwehla mwehi teikan koaros, oh pahn mihmi kohkohlahte.” Kahrehda mwehi koaros de koperment koaros en sampah wet—oh arail mahwen akan, kaunda lemei, oh wiewia mwersuwed—pahn kohsang kohkohlahte. Kokohp en Daniel kin kasalehda me Wehin Koht pahn mwadangete kaunda sampah pwon. (Daniel 2:44, 45) Mehn kadehde mwahu mie, me Wehio pahn ieite koperment me pahn luwehdi.a

3. Wehin Koht pahn ketikihwei sang mahwen akan, oh soumwahu, oh duhpek, oh pil mehla. Kokohp kaperen en Paipel akan kasalehda dahme Wehin Koht pahn ketin wia nan sampah. Kopermento pahn wiahda dahme koperment en aramas akan saikinte wia sang mahs kohdo, oh sohte pahn wia sang met kohla. Nna medewehla—soangen dipwisou en mahwen keper koaros pahn kohsang kohkohlahte! “E kin ketin katokehdi mahwen wasa koaros nin sampah.” (Melkahka 46:9) Solahr pahn mie toahkte, imwen wini, de pil soangen soumwahu kan. “Sohte emen me kin kousoan nan sahpwo pahn kaulimkihla eh soumwahu.” (Aiseia 33:24) Solahr duhpek, apwal en mwenge, soh itar en tene mwenge nan paliwar, de lehk. “Reken wahn pilawa en kin wiewiawihte nan wehiet.” (Melkahka 72:16) Solahr sarepedi mehla, pehdin pwong ki mehla, sousou, wasahn nekid paliwar mehla nan ais, de pahtou me kin mie pwehki mehla. Mehla, me kin wia atail imwintihti, pahn solahr douluhl. Koht “pahn ketin kamwomwala mehla kohkohlahte! E pahn ketikihsang pilen mesen aramas koaros.”—Aiseia 25:8.

4. Wehin Koht sapwellimaniki Kaun emen me Koht me ketin pilada. Mesaia sohte pein kasapwilada pein ih, oh pil kaidehn aramas soh unsek kan me idihada ih. Pein Siohwa Koht me ketin pilada ih. Mwar wet Mesaia de Krais kasalehda me Koht me ketin idihada ih. Lepin lokaia pwukat koaros kin wehwehki “Ih me Keidi.” Kahrehda Nanmwarki menet e keidi, de idihda ong pwukoa tohrohr ieu, sang rehn Siohwa. Koht mahsanihong ih: “Iet ei laduwo me I kakehlahda—me I piladahr oh kin kupwurperenki. I audehkidahr ngeni, oh e pahn ketikihong wehi koaros pwuhng pahrek.” (Aiseia 42:1, Madiu 12:17, 18) Ihs me ese sang Sounkapikpatail soangen Kaun dah me kitail anahne?

5. Kaunepen Wehin Koht kasalehdahr mwohn tohnsampah koaros me e ketin konehng wia kaun. Sises en Nasaret kadehdedahr me iei ih me Mesaia me miher nan kokohp. E ipwidiong nan peneinei ehu me Koht ketin mahsanihiero. (Senesis 22:18; 1 Kronikel 17:11; Madiu 1:1) Ni eh ketiket sampah, e ketin kapwaiada audepen kokohp tohto me pid duwen Mesaia me ntingdier sounpar epwiki kei mwowe. Oh sang nanleng kadehde kohda me iei ih me Mesaia. Iaduwen met eh wiawi? Eri, Koht mahsen sang nanleng, oh pein kadehdehda me ih iei pein Sapwellimen Ohl; oh tohnleng kan kadehdehda me Sises iei ih Mesaia me ketier nan kokohp; oh Sises pil ketin wiadahr manaman akan—kin kalapw mwohn aramas soun kadehde epwiki de pil kid akan—met kin sansal me e sang ni manaman en Koht.b Sises kin pwurepwurehng kasalehda soangen Kaun dah me e pahn ketin wia. Kaidehn e sapwellimanikihte kehl en sewese aramas ahpw e pil sapwellimaniki ineng en wia met. (Madiu 8:1-3) E sohte kin ketin kisekol, e kin ketin poakepoake aramas, kupwur kehlail, oh karakarahk. Koasoiepen sapwellime mour ni eh ketiket sampah mih nan Paipel pwe aramas koaros en wadek.

6. Irail aramas meh 144,000 me pahn uhpah Krais oh iang kakaun nan Wehin Koht. Sises mahsanih me mie irail teikan, me iangahki sapwellime wahnpoaron akan, pahn iang ih kakaun nanleng. E ketin kamwarehki pwihn wet “kisin pwihn sihpw.” (Luk 12:32) Mwurin met, kasansal ahpw kohwong wahnpoaron Sohn me irail kisin pwihn sihpw wet patpene wiahda meh 144,000. Irail pwukoahki doadoahk kapohl ehu nanleng, ni arail pahn iang Krais wia nanmwarki kan oh samworo kan.—Kaudiahl 5:9, 10; 14:1, 3.

7. Wehin Koht wie kakaunehr nanleng ni ahnsou wet, oh ni ahnsou keren e pahn tapihada kaunda sampah pwon. Keisuh en padahk mehlel wet iei me keieu kapohl me kitail kak sukuhliki. Paipel ketikihda mehn kadehde tohto me Sises ketin alehier sapwellime manaman en wia Nanmwarki nanleng. E ketin kakaunehr wasao ni ahnsou wet, oh ni ahnsou keren e pahn katehlapahdo sapwellime kaunda ong sampah koaros, oh kapwaiada audepen kokohp kaselel akan me kitail koasoiapenehr oko.

[Nting tikitik me mi pahs]