Pekipek Ieu me Wiawi Wasa Koaros Nan Sampah
NNA medewehla aramas sapw kei, de pil kakete meh lik kei, irail koaruhsie pekipekih soahng tehieu. Irail pekipekih rehn kaun emen me keieu lapalahpie en nanleng oh sampah en kapwaiong irail pekipeko. Ahpw me malaulaute nanpwungarail me ese dahme re wie pekipeki. Soahng wet kak wiawi? Ni mehlel, met kin wiawi rahn koaros. Eri, dahme aramas pwukat koaros kin wie pekipeki? Wehin Koht en pweida!
Ehu kendo,de mwenek, koasoia me mpen palien lamalam 37,000 kin kose me irail iang Kristian, oh me dene Sises Krais iei Soun Kahluwa irail. Tohn sarawi pwukat mihmi mpen aramas rielik. Pali moron en irail pwukat kin wiewia kapakap me aramas kin kahdaneki Kapakap en Samat de Kapakap en Kaun-o. Ke ese kapakap wet? Ni ahnsou me Sises padahkihong sapwellime tohnpadahk kan kapakap wet, e tepikihda: “Samat me ketiket nanleng: Mwaromwi en sarawihla rehn aramas koaros, mweimwi en pweida wasa koaros, kupwuromwi en kin wiawi nin sampah duwen eh kin wiawi nanleng.”—Madiu 6:9, 10.
Erein sounpar epwiki kei leledo met, tohn sarawi pwukat kin kalapw kapadal lepin mahsen pwukat nan ahnsoun arail kaudok. Irail pil kin wia met ni ahnsoun kapakap en pwihn peneinei kan oh nan pein ahn emenemen kapakap, nan ahnsou mwahu oh pil nan ahnsoun apwal. Irail kin wia met sang nan mohngiong unsek oh ni ngoang. Aramas tohto wadlikihala audepen kapakapo oh kin kapadal ni arail sohte kin medemedewe dahme re wie ndinda. Kaidehn ihte irail tohn sarawi en pwihn kan me dene irail Kristian kan me kin koapworopworki oh kin wie kapakapki Wehin Koht en pweida.
Pekipek me Pil Kin Wiawi nan Sarawi kan Likin Sarawi en Kristian
Ehu kapakap ndand me palien sarawi en mehn Suhs kin kalapw kapadal ni ahnsoun mehlahn arail peneinei iei kapakap me ede Kaddish. Mendahki audepen kapakap wet eh sohte kin pid mehla de kansensuwed en mehla, re kin kalapw wia ni ahnsou en mwahiei. Kapakapo kin peki: “[Koht] en ketikihdo sapwellime Wehio nan mour wet . . . , oh ni ahnsou mwadang.” Pil ehu kapakap en nan sinakoke en kawa ko kin koasoia duwen koapworopwor en Wehin Mesaia me pahn kohdohsang ni tehnpas en Depit.
Sarawi teikan me kaidehn Kristian kin diar me madamadau me pid Wehin Koht wia koapworopwor kaselel ieu. Nin duwen me The Times of India koasoia, me kaunen lamalam ndand men en India en mpen sounpar epwiki samwalahr me kin men rapahkihda soangsoangen madamadau en padahk kan me duwepenehte nanpwungen sarawi en Hindu, Muslim, oh Kristian koasoia: “Wehin Koht mehlel sohte pahn kak pweida ma sohte minimin pahn mie nanpwungen palimese oh palikapi.” Oh kaunen sukuhl en Islamic college en Strathfield, nan Australia, ntingihalahng palien nuhs ni ahnsou kerendohr ieu oh nda: “Duwehte mehn Muslim teikan, I kamehlele me Sises pahn ketido sapahl oh ketin kauwada Wehin Koht mehlel ieu.”
Ni soh peikasal, irail akan me kin koapworopworki oh pekipeki Wehin Koht mihmi mpen aramas lik kei. Ahpw tehk irair mehlel ehu.
Ele ke ese me kiht Sounkadehdehn Siohwa kan, me kin ntingihada makasihn wet, kin kohkohseli ni ihmw akan nan omw wasa oh kin koasoakoasoi ong aramas kan duwen Paipel. Ni ahnsou wet, se kin wia doadoahk wet wasa koaros nan sampah, nan sahpw 236, ni lokaia pohnangin 400. Oaralap me keieu poahsoanehda at kalohk iei Wehin Koht. Ni mehlel, ma ke tehk mwahu pwe oaralap unsek en makasihn wet iei Kahn Iroir Pakpakairki Wehin Siohwa. Se kin kalapw idek rehn aramas kan ma re kin iang kapakapki Wehio. Pali moron en aramas kin nda me ei. Ahpw ni at kin idek, a dahkot Wehio, aramas tohto kin nda “I sehse,” de arail pasapeng kin sohte sansal mwahu oh irail sohte kin nohn wehwehki.
Dahme kahrehda aramas tohto kin wie pekipekihki mehkot me re sohte kak kawehwehda? Iei pwehki madamadau me pid Wehin Koht me nohn apwal en wehwehki, oh sohte nohn sansal mwahu? Soh. Wehio inenen kawehwehda oaritik oh sansal nan Paipel. Laud sang met, padahk en Paipel me pid duwen Wehio kin kihong uhk koapworopwor mehlel ong nan ahnsou rotorot pwukat. Nan artikel en mwurin met, kitail pahn kilang iaduwen Paipel eh kin kawehwehda duwen koapworopworo.