Kapakap en Kauno Ia Wehwe ong Uhk

KAPAKAP en Kauno, nin duwen Sises Krais a ketikihda nan sapwellime Kapahrek en Pohn Dohlo, kak diarek nan Pwuhk Sarawi nan Madiu irelaud 6, iretikitik 9-13. Dahme kahrehda Kapakap en Kauno ntingdi nan Pwuhk Sarawi? Sang ni mehn kaweid wet, Sises kin ketin kasukuhlikin kitail ia mwomwen atail kapakap akan ah pahn wiawi pwe Koht en ketin kupwurki. Nan kapakap wet, kitail pil diar pasapeng kan ong ekei peidek kan me wia poahsoan en mour. Kitail tehkpene ehu ehu pali nan Kapakap en Kauno.

Ia Mwaren Koht?

“Samat me ketiket nanleng, mwaromwi en sarawihla.” (Madiu 6:9) Mahsen pwukat me ritingada kamwomwadahn kapakap wet kin sewese kitail en karanih Koht ni atail pahn panginki ih “Samat.” Duwehte seri men me kin ipwikihdi pepehm en kerendohng limpoak oh wehwehn ah pahpa oh nohno, pil kitail kak kohdohng rehn Samatail nanleng oh likih me E kin ketin kupwurki en karonge kitail.

Sises kaweidkin kitail en kapakapki mwaren Koht en sarawihla, de en sansalamwahu me Ih me sarawi. Ahpw, ia mwaren Koht? Pwuhk Sarawi sapeng ni mahsen pwukat: “Komwihte, me mwarenki Siohwa, Komwi te me lapalapasang mehkan koaros nan sampah.” (Melkahka 83:18, NW)

Ni mehlel, mwaren Koht, Siohwa pwarada mpen pak 7,000 nan Pwuhk Sarawi en kawao. Ahpw, ekei kawehwehn Pwuhk Sarawi inenen dohla oh kihsang mwar wet nan neirail kawehwehn Pwuhk Sarawi akan. Ihme kahrehda, e konehng kitail en kapakapki Sounkapikada en kasarawihala mware, de en kawahuwihala. (Esekiel 36:23) Ehu elen wiahda met iei en doadoahngki mwaren Siohwa ni atail kin kapakap ong Koht.

Kupwuren Koht en Wiawi Pohn Sampah

“Wehi omwi en ketido. Kupwuromwi en wiawi pohn sampah duwen ah kin wiawi nanleng.” (Madiu 6:10, NW) Iaduwen pali wet en ahn Sises kamwomwadahn kapakapo ah pahn kak wiawi? Pali laud en aramas akan kin medemedewe me nanleng iei wasahn meleilei oh popohl. Pwuhk Sarawi kin ndahki nanleng me iei sapwellimen Siohwa “mwoahl ileile sarawi oh lingan.” (Aiseia 63:15) Eri, e sohte kapwonopwon atail kin kapakapki kupwuren Koht en wiawi nin sampah “duwehte nanleng”! Ahpw, iaduwen met pahn kak wiawi?

Sapwellimen Siohwa soukohp Daniel kohpada: “Koht en nanleng pahn kauwada wehi ehu me sohte pahn ohla kohkohlahte. Oh Wehio sohte pahn kohieng ekei aramas tohrohr. E pahn kauwehla wehin sampah kan koaros oh Wehio pahn mihmi kohkohlahte.” (Daniel 2:44) Wehin nanleng wet de koperment wet, pahn ahnsou keren wahdo meleilei wasa koaros nan sampah pahn kaunda pwung.​—2 Piter 3:13.

Kapakap Oh Atail Anahn en War akan

Dahme Sises mahsanih nan karasepen kapakapo, e kin kasalehda me dahme keieu kesempwal ni ahnsou en atail kapakap en pid mwaren Koht oh kupwure. Ahpw, karasepen mwomwen kapakap wet ahpw doula oh peki anahne en war akan me konehng kupwuren Siohwa.

Keieu iei: “Ketikihdo rahnwet at tungoal pilawa en rahnwet.” (Madiu 6:11) Met sohte wia pekipek en kepwehpwehla. Sises kangoangehkin kitail en kapakapki kanatail pilawa wen me itarongete rahno.” (Luk 11:3, NW) Pwehn pahrekiong Kapakap en Kauno, kitail kak kapakap ni pwoson pwe kupwuren Koht en ketikihdo atail anahn akan en ehu ehu rahn, ma kitail poakohng oh peikiong Ih.

Nohn nsenohkihla kahpwal en mwohni kak kahrehda atail en sohla nsenohki atail anahn en ngehn oh kahrehda atail sohla wia dahme Koht ketin kupwurki kitail en wia. Ahpw ma kitail kin mwohniki nan atail mour atail kaudok ong Koht, kitail kak kamehlele me atail pekipek me pid kepwe kan, me duwehte mwenge oh likou, Koht pahn karonge. Sises mahsanih: “Rapahki . . . mahs wehin Koht oh ah pwung, oh mepwukat koaros pahn kapatapationg kumwail.”​—⁠Madiu 6:26-​33.

Atail Kapakap akan oh Mahkepen Dihp

“Mahkikihong kiht dipat akan, duwehte kiht me kin mahk ong me wia dihp ong kiht.” (Madiu 6:12) Samatail me ketiket nanleng “onopadahr en mahk ong” dipen irail oko me sang ni koluhla mehlel kin likwer ong Ih. Siohwa Koht kak ketin mahkikihong kitail douluhl dipatail kan.

Ahpw, Sises mahsanih mehkot me pahn uhdahn wiawi pwe Koht en ketin ketikihda mahk. (Madiu 6:14, 15) Ma kitail kin mahk ong irail me wia dihp ong kitail, kitail pahn kaperenda Koht oh pahn pil kak ale kapai en sapwellime mahk.

Kapakapki Sawas ni Atail Rapahki Ahl Pwung

“Komw dehr ketikihong kiht nan songosong, ahpw kapitasang kiht sang Me Suwedo.” (Madiu 6:13) Siohwa sohte kin likidmelieikitailla oh ketikihong kitail nan songosong de ketin wiahiong kitail en pwupwudiong nan dihp. Sapwellime Mahseno ketihtihki: “Pwe sohte me suwed kot kak kasongosonge Koht, oh pein Koht sohte kin kasongosonge aramas.” (Seims 1:13) Koht ketin mweidong kitail en lelohng songosong, ahpw E kak ketin kapitkitailasang rehn Soun Wia Songosong Lapalapo​—“Me Suwedo” me ede Sehdan me Tepil.

Sang ni sampah me mih pahn ah kaunda, Tepilo kak kasongosong kitail pwe kitail en wia mehkan me Koht sohte kupwurki. (1 Sohn 5:19) Kahrehda, e inenen kesempwal kitail en kaukaule pek sawas rehn Koht, ahpw mehlel ni atail kin lelohng kasongosong iei me kin kaukaule pwurepwurehng. Oh ma kitail pahn kin kaudok Siohwa nin duwen sapwellime Mahseno me pwilisang ngehn sarawi, iei Pwuhk Sarawi, e pahn pere kitail ki ah pahn sewese kitail en kak pelianda Tepilo. Pwuhk Sarawi mahsanih, “Koht me uhdahn mehlel, oh e sohte pahn ketin mweidohng kumwail en ale songosong me kumwail sohte kak powehdi.”​—1 Korint 10:13.

Pwoson Koht Inenen Kesempwal

E inenen wia kamweitpen mohngiong en ese me Samatail nanleng kin nsenohki emen emen kitail! E pil ketin wiahiong pein sapwellime Ohl, Sises Krais, en padahkiong kitail iaduwen kapakap. Met kin wiahiong kitail en kin men kaperenda Siohwa Koht. Iaduwen atail kak kaperenda Siohwa?

Koasoakoasoipene wet me pid Kapakap en Kauno e wiawi pwe en kaloalehla ahmw wehwehkihla mour en kapakapo. Ni ahmw pahn kalaudehla ahmw loalokong pwung me pid duwen Siohwa oh sapwellime kating kan me e pahn ketikihong “irail oko me kin rapahki Ih ni mehlel,” met pahn kak kakehlailihala ahmw pwoson Koht. Se koapworopworki me ke pahn pil kalaudehla ahmw sukuhiki duwen Ih oh sapwellime koasoandi kan pwe ken kak iang ale kapai en karanih Semomw me ketiket nanleng kohkohlahte.​—Sohn 17:3.