Karanih Koht
Ih me Pahn Ketin Kapwurehdo Mour
MIE ahnsou me emen kisehmw de kompoakepahmw mehla? Ma ei, eri ke lelohngehr ahnsou me keieu kamedek nan mour. Sounkapikpatail kin mwahngih duwen ahmw pahtou. Laud sang met, e kak ketikihsang kansensuwed en mehla. Paipel kin kasalehiong kitail duwen kaiasada kan me wiawi mahs pwehn kasalehda me Koht sohte ihte ketikihong atail mour ahpw e pil kak ketin kapwurehdo mour. Kitail pahn tehkpene duwen ehu kaiasada me e ketin kahrehiong sapwellime Ohl, Sises Krais, en wia. Manaman wet kin kileldi nan Luk 7:11-15.
Met iei nan pahr 31 C.E. ahnsou me Sises ketilahng nan ehu kahnimw nan Kalili me adaneki Nain. (Iretikitik 11) E kereniong ni soutiklahr ni ahnsou me Sises ketin lelehr ni irepen kahnimwo. Paipel mahsanih: “Ni eh ketin lel ni ewen kelen kahnimwo, iet kapar en mehla ieu pa kohkohieisang loale. Me melahr emen, nein liohdi men nah iehros, me re weuwa kohiei,oh pokon laud ehu pil iang liohdio.” (Iretikitik 12) Ke kak medewehla uwen laud en pahtou me liohdi menet ahneki? Met wia keriapak en ahnsou me emen kiseh me kak apwalih ih oh sewese ih mehla.
Sises ketin mahsanih duwen pahtou me liohdi men ahneki, me wie alialu limwahn kohpwa me paliweren nah pwutak melahro mih loale. Iren Paipelo mahsanih: “Ni Sises eh mahsanihada liohdio, e ahpw ketin kupwurehla, mahsanihong, ‘Lih ke dehr seng!’” (Iretikitik 13) Sises inenen poakehla liohdio pwehki soangen irair kapahtou me e mih loale. Mwein e kin ketin medemedewe duwen pein ineo, me pil wiahlahr liohdi men ni ahnsowo, oh me ni ahnsou keren pahn pil pahtoukihla pwoulahn Sises.
Sises keiong mpen kohpwao—ahpw sohte iang kapar en mehlao. Ni eh “ketikidahng limeo powe” me wia mwekid ehu me kasalehda duwen sapwellime manaman, e kahrehiong pokono en uhdi. Sises eri ketin mahsanwei ni mwomwen mahsen me kasalehda duwen eh sapwellimanki manaman en powehdi mehla: “‘Mwahnakapw, pwourda!’ Ni ahnsowohte me melahro pa mwohdada oh tapihada lokolokaia. Sises eri ketikihong rehn ineo.” (Iretikitik 14, 15) Mwahnakapw menet solahr wie nein liohdio ni ahnsou me e melahr. Eri, ni ahnsou me Sises “ketikihong rehn ineo,” ira pwurehng wiahla peneinei ehu. Pilen mesen peren laud uhd wiliandi ahn liohdio pahtou.
Mohngiongomw kin inengieng ahneki soangen peren ehu—peren en pwurehng tuhwong kompoakepahmw me melahr? Tamanda me Koht kin ketin nsenohkin uhk. Soangen pepehm me Sises sapwellimaniki ni eh kin kilang liohdi pahtouo kin kasalehda duwen soangen pepehmohte me Koht sapwellimaniki, pwe Sises kin ketin kahlemengih irair en Semeo ni unsek. (Sohn 14:9) Paipel kin padahkihong kitail me Koht kupwurki en kapwurehdo mouren irail me melahr akan me e kin ketin tamataman. (Sohp 14:14, 15) Sapwellime Mahsen, me iei Paipel, kin kihong kitail koapworopwor kaselel ehu, iei koapworopwor en mour nan paradais pohn sampah oh kilang iasadahn kompoakpatail me melahr akan. (Luk 23:43; Sohn 5:28, 29) Se kangoange iuk en kalaudehla ahmw sukuhliki duwen Ih me pahn ketin kapwurehdo mour oh iaduwen ke kak ahneki koapworopwor me kompoakepahmw me melahr akan pahn iasada.
[Kawehwehpen kilel kan nan ehu ehu pali 29]
“Me melahro pa mwohdada oh tapihada lokolokaia. Sises eri ketikihong rehn ineo”