Siohwa Ketin Karonge Atail Pekipek kan
“KAUNO kin ketin sinsile me pwung kan oh kin ketin karonge ar likwer kan.”—MEL. 34:15.
1, 2. (a) Ia pepehm en me tohto rahn pwukat? (b) Dahme kahrehda kitail sohte kin pwuriamweiki duwen met?
KE MIHLAHR nan kapwunod kan? Ma iei, eri me tohto kin pil pehm soangen kahpwal pwukat. Me tohto kin nannanti en apwalih arail iren kapwunod kan nan koasoandi suwed wet. Ong ekei, e kin mwomwen me re solahr kakohng mour. Re kin wehwehki pepehm en sounmelkahka Depit ni eh ntingihdi: “I weikeklahr oh mwoahtohtalahr; mohngiongiet miher nan apwal, oh I weiweirengki ei medek. Mohngiongiet wie rerrer, solahr ei kehl, oh nan mesei kat ediedlahr.”—Mel. 38:8, 10.
2 Nin duwen Kristian kei, kitail sohte pahn pwuriamweiki kilang kahpwal akan me pwarada nan atail mour. Kitail wehwehkier me “ahnsou duwehte medek en neitik” kin wia kisehn kilel me kohpada duwen ketier en Sises. (Mark 13:8; Mad. 24:3) Uhdahn wehwehpen lokaiahn Krihk kan wasaht “medek en neitik” kin dokedoke apwal akan. Ia uwen lokaia pwukat eh pwungiong lokolok me aramas akan mihlahr loale nan rahn akan en “ahnsou apwal.”—2 Tim. 3:1.
Siohwa Ketin Wehwehki Atail Kahpwal akan
3. Dahme sapwellimen Koht aramas akan wehwehkier?
3 Sapwellimen Siohwa aramas akan esehier me irail sohte pahn pitsang nan soangen kahpwal pwukat, oh irair pwukat sohte pahn mwamwahula ahpw pahn susuwedla. Pwehn kapataiong dahme aramas akan lelohngehr, nin duwen sapwellimen Koht sounpapah kei, kitail kin pil pelianda “imwintihtio, Tepil,” me koasoanedier en kauwehla atail pwoson. (1 Pit. 5:8) Ia uwen mengei en wehwehki pepehm en Depit ni eh koasoia: “Lokaia kepweikeng kan kauwelahr mohngiongi, oh sohte mehkot kak sewese ie. I men emen en sewese ei nsensuwed, I ahpw sohte diar; I rapahki emen me pahn kansenamwahwihiehla, I ahpw sohte diar”!—Mel. 69:20.
4. Dahme kin wahdohng kitail mehn kamweit ni ahnsou me kitail kin lelong nan kahpwal?
4 Iaduwen, en Depit koasoi kin wehwehki me e sohte ahneki koapworopwor? Soh. Tehk duwen dahme e kapatahiong nan mahsen en melkahka ohte: “KAUNO kin ketin karonge irail kan me kin mihmi nan anahn laud oh sohte kin ketin likidmeliehla sapwellime kan me kin sensel nan imweteng.” (Mel. 69:33) Ni oaralap, ekei pak kitail kin pehm me kitail kin wie sensel pahn atail kahpwal akan de lokolok kan. Ele e kin mwomwen me ekei aramas sohte kak uhdahn wehwehki atail irair en kansensuwed—oh mwein irail kakete sohte kak wehwehki. Ahpw pwe en duwehte Depit, kitail kak ale mehn kamweit sang ni atail kin wehwehkihla me Siohwa kin uhdahn wehwehki atail kahpwal akan.—Mel. 34:15.
5. Dahme Nanmwarki Solomon kin koapworopworki?
5 Sapwellimen Depit pwutak Solomon kasalehda wehwehn ire mehlel wet ni kasarawihen tehnpas en Serusalem. (Wadek 2 Kronikel 6:29-31.) E ngoangki peki rehn Siohwa en karonge kapakap en irail me mohngiong mwakelekel me kin patohdo Reh pwehki emenemen irail pein ‘kolulahr nan kapehdarail.’ Iaduwen Koht kin mwekidki kapakap akan en emenemen irail akan me mihla nan kahpwal? Solomon kasalehda duwen e kin koapworopworki me Koht sohte pahn ihte karonge arail kapakap akan ahpw e pahn pil wia mehkot pwehn sewese irail. Pwekida? Pwehki e ketin mwahngih ni mehlel “lamalam en aramas.”
6. Iaduwen kitail kak song en powehdi kapwunod laud kan, oh pwekida?
6 Duwehte irail akan me Solomon kin kapakapki, kitail pil kak kapakapkiong Siohwa pein ‘atail apwal oh lokolok,’ me emenemen kitail kin pwunodki. Kitail anahne en ese me e ketin mwahngih atail pwunod akan oh ketin nsenohki kitail. Wahnpoaron Piter kin kamehlelehiong kitail duwen met ni e koasoia: “Kumwail mweidohng ih amwail pwunod koaros, pwehki eh kin ketin apwahpwalih kumwail.” (1 Pit. 5:7) Siohwa kin inenen nsenohki dahme kin wiawiong kitail. Sises kawehwehda mwahu sapwellimen Siohwa epwel limpoak ong kitail ni eh ketin mahsanih: “Kumwail kak pwainkihda kisin menpihr riemen sens ehu; ahpw sohte emen ira pahn pwupwudiong nanpwel, ma Samamwail sohte ketin mweidohng [“mwahngih,” NW]. A ong kumwail, pil pitenmoangamwail koaros iangehr wadawadedi. Eri, kumwail dehr masak, pwe kumwail kesempwalsang mehlel menpihr tohto!”—Mad. 10:29-31.
Koapworopworki Sapwellimen Siohwa Sawas
7. Soangen sawas dahieu kitail kak kamehlele me kitail kak en alehdi?
7 Kitail kak uhdahn kamehlele me Siohwa ketin kupwurki oh kak sewese kitail ni ahnsou kitail mihla nan apwal akan. “Koht me perehpatail oh atail kehl, me kin ketin sewese kitail ni ahnsou apwal akan.” (Mel. 34:15-18; 46:1) Iaduwen Koht kin ketikihda sapwellime sawas? Medemedewe duwen dahme 1 Korint 10:13 kin mahsanih: “Koht me uhdahn mehlel, oh e sohte pahn ketin mweidohng kumwail en ale songosong me kumwail sohte kak powehdi; ahpw ahnsoun songosong, e pahn ketikihong kumwail kehlail pwe kumwail en kak dadaur oh pitsang nan songosongo.” Mwein ele Siohwa kak kaweidih mehkan pwe kitail en kak kamwahwihala atail iren kahpwalo, de mwein e pahn ketikihong kitail kehl me anahn pwe kitail en kak dadaur pahn kasongosong kan. Sohte lipilipil mehnia rehra, Siohwa pahn sewese kitail.
8. Iaduwen kitail kak alehdi sapwellimen Koht sawas?
8 Iaduwen kitail kak en isaneki alehdi soangen sawas wet? Tehk dahme kaweid wet padahkiong kitail en wia: “Kumwail mweidohng ih amwail pwunod koaros.” Met kin wehwehki ni karasaras me kitail en kihong Siohwa atail pwunod akan koaros de soahng koaros me kitail kin medemedewe. Kitail kin song en uhdihsang pwunodki mehkot oh kin kanengamah likih ih en apwalihala atail anahn akan. (Mad. 6:25-32) Soangen likilik wet kin anahne karakarahk, pwe kitail sohte kin koapworopworkihte pein atail kehl oh loalokong. Ni atail kin karakarahkala “pahn nin limen Koht manaman,” kitail kin pohnese me dewetail me karakarahk. (Wadek 1 Piter 5:6.) Ni atail kin wia met, kitail pahn kak dadaur pahn mehkoaros me Koht mweidohng kitail en lelohng. Ele kitail kin kasik laud en alehdier sawas ni ahnsou karuwaru, ahpw kitail en kin koapworopworki me Siohwa ketin mwahngih ahnsou oh dahme uhdahn konehng en wiawi pwe en ketin apwalihala atail kahpwalo.—Mel. 54:7; Ais. 41:10.
9. Soangen kahpwal dahieu Depit anahne en mweidohng Siohwa?
9 Tamanda mahsen en Depit kan me kileldi nan Melkahka 55:22: “Mweidohng KAUN-O omw kahpwal akan, eri e pahn ketin doareiukala; pwe e sohte kin ketin mweidohng me lelepek kan en lohdi.” Ni ahnsou me Depit ntingihada mahsen pwukat, e kin mihla nan ehu kahpwal. (Mel. 55:4) E kin sansal me melkahka wet ntingda ni ahnsou me Apsalom koasoanedier ni rir en adihasang reh pwung en kaunda. En Depit soun kaweid me e kin keieu likih, Ahidopel pil iangehr pwungki koasoandi wet. Depit anahne en tangasang Serusalem pwe en kak doarehla eh mour. (2 Sam. 15:12-14) Mendahki e mihla nan soangen irair en kahpwal wet, Depit kin doulahte likih Koht oh e sohte kin pahtoula oh mworusala.
10. Dahme kitail anahne wia ni atail pahn lelong nan kahpwal?
10 E kin inenen kesempwal kitail en duwehte Depit, ni atail kin pwarala rehn Siohwa ki kapakap me pid soangsoangen kahpwal akan me kitail kin mihla loale. Kitail tehkpene dahme wahnpoaron Pohl kangoangehki kitail ong me pid duwen ire wet. (Wadek Pilipai 4:6, 7.) Dahme kin imwikihla kapakap ni ngidingid? “Sapwellimen Koht popohl, me inenen laudsang uwen atail dehdehki, ahpw pahn nekinekid [mohngiongitail] oh pil [atail] lamalam rehn Krais Sises.”
11. Iaduwen “sapwellimen Koht popohl” kin kak perehla atail mohngiong kan oh atail kehl en madamadau kan?
11 Kapakap kin kak kahrehiong ahmw irair en wekila? Mwein e kak. Ahpw kitail anahne wehwehki me Siohwa sohte kin sapengla atail kapakap akan ahnsou koaros nin duwen me kitail kin mwahuki. Weksang met kapakap kin sewese kitail en kolokol madamadau toupahrek pwe kitail en dehr duhla pahn atail kahpwal kan. “Sapwellimen Koht popohl” kin kameleileidi kitail ni ahnsou me kitail kin toutoukihla de weikekla nan atail nsensuwed. Duwehte pwihn en sounpei kan me ahneki pwukoa en sinsile perehla kahnimw ehu sang imwintihti kan, ih duwen “sapwellimen Koht popohl” eh kin sinsile perehla atail mohngiong kan oh atail kehl en madamadau kan. E kin pil mweidohng kitail en powehdi atail madamadau en pweiek kan, pepehm en perki oh pahtou oh mwoaros me kin sewese koledihsang kitail en wia tiahk soaloalokong kan.—Mel. 145:18.
12. Kawehwehda iaduwen emen aramas kak ahneki meleilei.
12 Iaduwen atail madamadau kak ahneki meleilei nin doken atail kin mihmi pahn kahpwal akan? Medewehla karasaras wet me kak kawehwe atail irair kan. Emen tohndoadoahk ele kin doadoahk pahn kaun emen me kin perenki lipwoar. Ahpw tohndoadoahko kin kak kasalehda eh pepehm rehn me ahneki wasahn doadoahko, me kin kadek oh kak wehwehki eh irair ko. Me ahneki wasahn doadoahko kin kamehlelehiong tohndoadoahko me e wehwehki eh irair ko oh kin kasalehda me ahnsou keren kaun me perenki lipwoaro pahn sohla ahneki eh pwukoa en kaun. Iaduwen met kin wiahiong pepehm en tohndoadoahko? Ni eh kin ese oh kamehlele dahme pahn kereniong wiawi kin kakehlailih ih en pousehla dadaur mendahki e anahne mihmihte nan kahpwalo ekis ahnsou. Pil duwehte met, kitail kin ese me Siohwa kin wehwehki atail irair kan oh kin kamehlelehiong kitail me kereniong “kaunen sampah wet pahn lekdekla.” (Sohn 12:31) Ia uwen kansenamwahu en ese met!
13. Patehng kapakap, dahme kitail anahne en pil wia?
13 Eri kitail en itarkihte en pwarala rehn Siohwa ki atail kahpwal akan ni kapakap? Soh. Kitail anahne en wia laud sang met. Kitail anahne mwekidki wiewia me pahrekiong dahme kitail kin peki nan atail kapakap kan. Ni ahnsou me Nanmwarki Sohl kadarala ohl ekei ni imwen Depit pwehn kemehla ih, Depit kapakap nin duwen met: “Maing ei Koht, komw ketin doareiesang ei imwintihti kan; komw ketin sileiesang me kin pelian ie. Komw ketin kapitiesang aramas loallap suwed pwuko; komw ketin kapitiehla sang sounkam aramas pwuko!” (Mel. 59:1, 2) Patehng eh kapakapo, Depit kin rong eh pwoud oh wiahda dahme konehng pwe en doarehla pein ih. (1 Sam. 19:11, 12) Ni soangen ahlohte, kitail kak kapakapki erpit me konehng en sewese kitail en dadaur nan kahpwalo oh mwein kak pil kamwahwihala atail irair en apwalo.—Seims 1:5.
Iaduwen Kitail Kak Ahneki Kehl en Dadaur?
14. Dahme kak sewese kitail en dadaur ni atail kin sohpeiong atail kahpwal akan?
14 Atail kahpwal kan sohte kin mwadangete sohrala. Mepwukat kin kak en pousehlahte mihmihte erein ahnsou kis. Ma met mehlel, dahme kak sewese kitail en dadaur? Keieu kitail en tamanda me ni ahnsou me kitail kin pousehlahte papah Siohwa ni loalopwoat mendahki kitail mihla nan kahpwal akan, kitail kin kasalehda mehlelpen atail limpoak ong ih. (Wiewia 14:22) En tamataman en Sehdan karaun likamw me pid duwen Sohp: “Ia duwe, Sohp pahn kak pwongih komwi, ma komw sohte ketin kapaiahda? Komw ketin silehdier ih oh eh peneinei oh pil mehkoaros me e ahneki. Komw pil kin ketin kupwuramwahwih mehkoaros me e kin wia, oh sapweo direkilahr kou me komw ketikihong. Ahpw ma komw pahn ketikihsang mehkoaros me e ahneki—e pahn lahlahwei komwi mwohn silangomwi.” (Sohp 1:9-11) Pwehki eh lelepek, Sohp kasalehda suwed oh likamw en karaun likamwo. Kitail kin ahneki ahnsou mwahu en pil kasalehda me Sehdan sounlikamw emen ni atail kin dadaur nan irair apwal akan. Ni ahnsowohte, atail kin dadaur kin kakehlaka atail madamadau en koapworopworki oh kamehlele Siohwa.—Seims 1:4.
15. Mehn kahlemeng dahkei kak kakehleikitailda?
15 Keriau, kitail anahne tamataman me “riamwail [Kristian] kan wasa koaros nin sampah kin iang kumwail mihla nan soangen lokolok me kumwail kin mihla loale.” (1 Pit. 5:9) Ei, “songosong koaros me kin lelohng kumwail, ih me kin lelohng aramas koaros.” (1 Kor. 10:13) Ihme kahrehda ke kak alehda kehl oh eimah sang ni ahmw kin medemedewe kahlemeng mwahu kan en meteikan ahpw kaidehn pwe ken kilangwohngete pein ahmw kahpwal akan. (1 Des. 1:5-7; Ipru 12:1) Kihla ahnsou kan en medemedewe duwen kahlemeng mwahu en irail ko me ke ese me kin dadaur ni lelepek mendahki irail mihla pahn kalokolok de irair kansensuwed kan. Mie pak ke kin rapahki nan neitail pwuhk kan duwen ekspiriens en irail akan me kin lelong kahpwal akan me duwehte kahpwal me ke lelong? Mweinte ke pahn diarada me koasoi pwukat pahn kakehlailiukada.
16. Iaduwen Koht kin ketin kakehlailiada kitail ni ahnsou kitail kin mihla nan atail apwal akan koaros?
16 Kesiluh, en tamataman me Siohwa iei “Samatail me kalahngan oh Koht me pwarer en kansenamwahu koaros. Ih me kin ketin sewesei kitail nan atail apwal akan koaros, pwe kitail en pil kak sewese irail kan me kin mihla nan soangen apwal koaros, ni atail kin doadoahngki soangen sawasohte me pein kitail kin ale sang rehn Koht.” (2 Kor. 1:3, 4) Mwomwen Koht kin ketiket limwahtail pwe en kangoange kitail oh kakehlaka kitail “nan atail apwal akan koaros” kaidehn ongete atail apwal en ahnsouwet. Met kak sewese kitail en kak kansenamwahwihala meteikan me “kin mihla nan soangen apwal koaros.” Pein Pohl pil lelohngehr oh dehdehkihla mehlelpen koasoi pwukat.—2 Kor. 4:8, 9; 11:23-27.
17. Iaduwen Paipel kak sewese kitail en powehdi kahpwal kan nan mour?
17 Kapahieu, kitail naineki Paipel, mahsen en Koht me kin “mwahu ong atail doadoahk en padahkihong aramas akan me mehlelo, ong atail peneu ong tiahk sapwung, ong atail kapwungala wiewia sapwung kan, oh pil ong atail padahk duwen mour lelepek; pwe irail kan me kin papah Koht en kak wia oh koahiekla ni soangen wiewia mwahu koaros.” (2 Tim. 3:16, 17) Sapwellimen Koht mahsen sohte kin ihte kahrehiong kitail en kin “koahiekla ni soangen wiewia mwahu koaros.” E kin pil sewesei kitail en apwalih atail mour me kin diren kapahtou oh kahpwal. Nan lokaiahn Krihk lepin lokaia “koahiekla” kin kak en kawehwehdi nin duwen met “koasoanehdi mwahu.” Lepin lokaia wet mwein kin kadoadoahk mahso ni en aramas akan kin wiahda oh koasoanehdi mehkoaros ong pwoat ehu de misihn en pwoat ehu pwe seiloak en kak pweida mwahu. Me kin duwehte met, Siohwa ki sapwellime Mahsen kin ketikihong kitail soahng koaros me kitail anahne pwe kitail en kak powehdi soangen apwal sohte lipilipil akan me kitail pahn lelong. Ihme e kin pwung en nda, “Ma Koht ketin mweidohng kahpwal wet, I pahn kak powehdi oh dadaur ki sapwellime sawas.”
Maiaudahsang Atail Apwal akan Koaros
18. Dahme kitail anahne en medemedewehte pwe en kak sewese kitail en dadaur ni lelepek?
18 Ire kelimau, en kin medemedewehte ire mehlel kaselel me pid en Siohwa pahn doarehla aramas sang nan arail kahpwal akan. (Mel. 34:19; 37:9-11; 2 Pit. 2:9) Ni ahnsou me met pahn pweida, atail pahn maiauda sohte wehwehki kitail pahn ihte pitsang atail kahpwal akan me kitail mih loale ahpw met pil kin iangahki ahneki mour soutuk, ehu rehra ma mour soutuk nanleng rehn Sises de nan paradais pohn sampah.
19. Iaduwen dadaur ni lelepek kak pweida mwahu?
19 Eri lao lel ahnsowo, kitail en song pousehlahte apwalih atail irair apwal akan en koasoandi suwed wet. Ia uwen atail kin kasikasik ahnsowo me apwal sohla pahn mie! (Mel. 55:6-8) Kitail en tamataman me atail kin dadaur ni lelepek kin kasalehda en Tepil kin likamw. Ele mwein kitail kak alehdi kehl sang atail kapakap oh sang riatail Kristian akan, ni atail kin medemedewe duwen riatail kan me kin lelong nan kahpwal akan me kin duwehte atail kahpwal akan. Pousehlahte wia oh koahiekla mehlel sang ahmw doadoahngki Mahsan en Koht ni ahl akan me pahn inenen pweida mwahu. Kitail en dehr mweidohng en katikala atail kin koapworopworki epwel mwahu en “Koht me pwarer en kansenamwahu koaros.” Tamataman me “KAUNO kin ketin sinsile me pwung kan oh kin ketin karonge ar likwer kan.”—Mel. 34:15.
Ke Kak Sapeng?
• Iaduwen Depit kin pehm duwen eh kahpwal akan me e mihla loale?
• Koapworopwor dahieu Solomon kasalehda?
• Soangen sawas dahieu kak apwalih kahpwal akan me Siohwa ketin mweidohng kitail?
[Kawehwehpen kilel kan nan ehu ehu pali
17]
Solomon kin koapworopworki me Siohwa pahn wia mehkot pwehn sewesehda Sapwellime aramas me mih nan kahpwal