Siohwa Kin Wia ‘Atail Wasahn Ruk Ni Ansoun Apwal Akan’
“Siohwa kin ketin doarehla aramas pwung kan oh kin wia arail wasahn ruk ni ansoun apwal akan.”—MELKAHKA 37:39, NW.
1, 2. (a) Dahme Sises kapakapki ni ah welien sapwellime tohnpadahk ko? (b) Ia kupwuren Koht ong sapwellime aramas akan?
SIOHWA sapwellimanki kehl unsek. E sapwellimanki kehl en pere sapwellime tohnkaudok lelepek kan ni soangen mwohmw me e kin ketin kupwurki. E pil kak ketin katohrehla ni paliwar en sapwellime aramas akan sang nin sampah oh ketikihong irail wasa kan me meleilei oh sohte keper. Ahpw, me pid sapwellime tohnpadahk kan, Sises kin ketin kapakap ong Seme nanleng: “I sohte peki rehmwi pwe komwi en ketikinirailsang nin sampah ahpw pwe komwi en ketin perehsang irail me suwedo.”—Sohn 17:15.
2 Siohwa ketin piladahr en dehr “ketikihweikitailsang nin sampah.” Ahpw, sapwellime kupwur iei kitail en mih nanpwungen aramas akan pwe kitail en kak padahkiong irail sapwellime kalohk en koapworopwor oh kamweit ong mehteikan. (Rom 10:13-15) Ahpw, nin duwen Sises mahsanih nan sapwellime loulou, pwehki kitail mihmi nan sampah wet, kitail sohte rir sang “Me Suwedo.” Aramas sapeik oh ngehn suwed kan kin kahrehda medek oh lingeringer, oh Kristian akan kak lelohng kapwunod kan.—1 Piter 5:9.
3. Sapwellimen Siohwa tohnkaudok lelepek kan pil lelohng nan soangen irair dah kan en mour, ahpw soangen kamweit dah kei me kitail kin diar sang sapwellimen Koht Mahsen?
3 Ahnsou me emen kin lelohng lokolok, uhdahn pahn mie ahnsoukis me e pahn kin pahtoula. (Lepin Padahk 24:10) Pwuhk Sarawi audaudki duwen koasoipen irail me lelepek kan me kin lelohng kapwunod. Sounmelkakaho mahsanih, “Apwal tohto kin lelohng aramas mwahu men, ahpw Siohwa kin ketin doarehsang nan eh apwal kan koaros.” (Melkahka 34:19) Ei, soahng suwed akan kin pil lelohng “aramas pwung men.” Duwehte sounmelkakaho Depit, mie ahnsou me kitail pahn kin “weikeklahr oh mwoahtohtalahr.” (Melkahka 38:8) Ahpw, e pil kansenamwahu en ese me “Siohwa kin ketiket mpen irail me nan kapehd tikitikalahr; oh kin ketin doarehla irail kan me kin sohla ahr koapworopwor.”—Melkahka 34:18; 94:19.
4, 5. (a) Pahrekiong Lepin Padahk 18:10, dahme kitail anahne en wia pwehn kak alehdi sapwellimen Koht perepe? (b) Soangen ewen kahk oaritik dah kei me kitail anahne en wia pwehn ale sapwellimen Koht sawas?
4 Pahrekiong sapwellimen Sises kapakap, Siohwa kin apwahpwalih kitail. E wia atail “wasahn ruk ni ansoun apwal akan.” (Melkahka 37:39, NW) Pwuhken Lepin Padahk kin doadoahngki soangen kawehwehohte ni ah mahsanih: “Mwaren Siohwa kin rasehng wasahn doulik kehlail ehu. Aramas pwung kan kin kak patohla ie oh ale mehn pereparail.” (Lepin Padahk 18:10, NW) Ire wet kin kasalehda duwen mehlelpen sapwellimen Siohwa nsenohki sapwellime kepikipikda kan. Koht kin ketin doare irail me pwung kan me kin rapahki Ih, duwehte atail kin tangewohng wasahn doulik kehlail ehu pwehn pere kitail.
5 Ni atail kin lelohng nan kahpwal laud akan, iaduwen kitail kak tangewohng Siohwa pwehn pere kitail? Mie ewen kahk silu kesempwal kei me kitail anahne wia pwehn ale sapwellimen Siohwa sawas. Keieu, kitail anahne sohpeiong Samatail nanleng ki kapakap. Keriau, kitail anahne doadoahk pahrekiong sapwellime ngehn sarawi. Oh kasiluh, kitail anahne uhpaiong sapwellimen Siohwa koasoandi ni atail kin werekiong iengatail Kristian kan me kak sewese katikala atail kahpwal akan.
Manaman en Kapakap
6. Iaduwen Kristian mehlel kan kin kilangwong kapakap?
6 Ekei me samanih palien roson kin kangoange aramas en kapakap pwehn sewese kihsang pahtou oh pwunod. Mehlel me ahneki ahnsoukis me meleilei pwehn kapakap kak kihsang pwunod, ahpw e pil duwehte, ekei ngihl malamal en kepikipikda teikan de pil eliel en tihnsou pil kak wia mehn sawas. Kitail kin kilangwohng kapakap me iei ahl sarawi ehu en patoh ong Sounkapikadao. Kapakap pid atail lelepek ong Koht oh likih Ih. Ei, kapakap wia kisehn atail kaudok.
7. Ia wehwehn en kapakap ni likilik, oh iaduwen soangen kapakap pwukat kak sewese kitail en powehdi kansensuwed kan?
7 Atail kapakap kan anahne iangahki likih oh koapworopworki Siohwa. Wahnpoaron Sohn ntingihdi: “Kitail uhdahn kin kamehlele me pein ih pahn karonge atail pekipek kan, ma kitail pahn peki mehkot nin duwen kupwure.” (1 Sohn 5:14) Siohwa, me Ileilehie, me wia Koht mehlel tehmen oh Wasa Lapalahpie, kin tehk keneinei kapakap ngidingid en sapwellime tohn kaudok kan. En esehte me atail Koht limpoak kin rong kitail ni atail kin ehukihong Ih atail kapwunod oh kahpwal kan kin kansenamwahuwih kitail.—Pilipai 4:6.
8. Dahme kahrehda Kristian lelepek kan en dehr namenengki de ahneki pepehm en soh warohng ahnsou kan me re kin tuhwong Siohwa ni kapakap?
8 Kristian lelepek kan sohte anahne namenek, pehm me re sohte warohng, de sohte ahneki likilik ni ahr kin tuhwong Siohwa ni kapakap. Mehlel, me ni atail kin nsensuwedkihla pein kitail de atail kahpwal akan, kitail mwein ekei pak sohte men kapakap ong Siohwa. Nan soangen ahnsou pwukat, e konehng kitail en taman me Siohwa kin “ketin kupwurkalahngan ong sapwellime kan me wie lokolok” oh e kin ketin “kamarahda nan kapehd en me toutoulahr akan.” (Aiseia 49:13; 2 Korint 7:6) Eri, keieu ahnsou me kitail lingeringer oh lelohng nan apwal, kitail en ni koapworopwor sohpeiong Siohwa nin duwen wasahn ruk kehlail.
9. Ni ahl dah me pwoson kin doadoahk ni atail tuhwong Koht ni kapakap?
9 Pwehn kak alehdi kapaipen kapakap, kitail anahne ahneki pwoson mehlel. Pwuhk Sarawi mahsanih, “pwe mehmen me men kowohng rehn Koht uhdahn pahn kamehlele me Koht ketin mie, oh me Koht kin ketin katingih irail kan me kin raparapahki.” (Ipru 11:6) Pwoson laud sang ihte kamehlele me “mie Koht.” Pwoson mehlel pid kamehlele laud sapwellimen Siohwa koahiek oh ineng en kapaiada atail mouren peik ong ih. “Pwe silangin Kauno kin mahmahsanih me pwung kan, oh e kin karonge ar pekipek kan ahnsou koaros; a e kin sohpeisang me kin wia me suwed.” (1 Piter 3:12) Atail kin ahnsou koaros pohnese sapwellimen Siohwa nsenoh limpoak kin kahrehiong en mie wehwehn atail kapakap.
10. Dahme anahn nan atail kapakap kan pwehn alehdi sawas ngenin kan sang rehn Siohwa?
10 Siohwa kin karonge atail kapakap kan ma kitail kin kapakap sang mohngiong unsek. Sounmelkahkao ntingihdi: “Sang nan mohngiongi unsek I kin likweriong komwi; Maing Kaun, komwi ketin sapeng ie.” (Melkahka 119:145) Weksang kapakap en sarawi teikan me wiahte mwohmw ehu, atail kapakap akan sohte kin wiahte tiahk ehu de sohte kohsang mohngiong unsek. Ahnsou me kitail kin kapakap ong Siohwa ki “mongiong unsek,” atail lokaia kan kin mie wehwe oh kahrepe. Mwurin atail kapakap mehlel akan, kitail kin ahneki pepehm en maiouda me kin kohsang atail kin “mweidong Siohwa atail pwunod kan koaros.” Nin duwen me Pwuhk Sarawi inoukihda, “pwehki eh kin ketin apwahpwalih kumwail.”—Melkahka 55:22; 1 Piter 5:6, 7.
Sapwellimen Koht Ngehn Sarawi Iei Sawaspatail
11. Ia ehu ahl me Siohwa kin sapeng kitail ahnsou kan me kitail kin “wie pekipek” sapwellime sawas?
11 Siohwa sohte ihte wia Sounkaronge atail kapakap, ahpw e pil wia Sounsapeng. (Melkahka 65:2) Depit ntingihdi: “I patohwan likweriong komwi ni ahnsou apwal, pwehki omwi kin ketin sapeng ei kapakap akan.” (Melkahka 86:7) Pil duwehte met, Sises kangoange sapwellime tohnpadahk ko “wia pekipek” rehn Siohwa en sewese irail pwehki “Sahm me ketiket nanleng” pahn “ketikihong ngehn sarawi irail kan me kin peki reh.” (Luk 11:9-13) Ei, sapwellimen Koht ngehn sarawi kin wia sounsawas men, de sounkansenamwahu men, ong sapwellime aramas.—Sohn 14:16.
12. Iaduwen sapwellimen Koht ngehn sarawi kak sewese kitail ahnsou kan me atail kahpwal kan kin mwomwen apwal mehlel?
12 Pil ahnsou kan me kitail kin lelohng nan kalokolok kan, sapwellimen Koht ngehn sarawi kak kihong kitail “kehl me laudsang aramas.” (2 Korint 4:7) Wahnpoaron Pohl, me powehdi soangen irair kapwunod tohto ni koapworopwoar mahsanih: “I kakohng mehkoaros sang ni manamano me Koht kin ketikihong ie.” (Pilipai 4:13, NW) Duwehte met, Kristian tohto rahnpwukat pil pehmehr kakehlepen arail pali ngehn oh ahr pepehm pwehki pasapengpen arail pekipek kan. Pak tohto, atail kahpwal kan kin solahr nohn laud mwurin atail kin ale sawas sang sapwellimen Koht ngehn sarawi. Pwehki kehl wet me sang rehn Koht, kitail kak nda, duwehte me wahnpoarono nda: “Soangen apwal koaros kin lel kiht, ahpw se sohte kin ohkihla; se kin mihla nan peikasal ekei ahnsou, ahpw e sohte kin kauwehla at koapworopwor; mie at imwintihti tohto, ahpw se sohte mwahn kin kelehpwla; oh ekei ahnsou paliwarat lellel, se ahpw sohte ohla douluhl.”—2 Korint 4:8, 9.
13, 14. (a) Iaduwen Siohwa kin kasalehda me e ketin wia atail wasahn ruk ki sapwellime Mahsen? (b) Iaduwen kapwaiada iren Pwuhk Sarawi kan eh sewese pein kowe?
13 Ngehn sarawi en Koht kamwekid ntingdahn Mahsen en Koht oh kolokoldohng atail ahnsou pwehn wia kamwahu ong kitail. Iaduwen Siohwa ah ketin kasalehda me e wia wasahn ruk kehlail ahnsou kan me kitail kin lokolok ki sapwellime Mahsen? Ehu ahl iei sang ni ah kin ketikihong kitail erpit en doadoahk oh madamadau. (Lepin Padahk 3:21-24) Pwuhk Sarawi kin kaiahne atail madamadau oh kamwahuiala atail kehl en pilipil. (Rom 12:1) Sang wadek oh onop Mahsen en Koht kaukaule, iangahki kapwaiada dahme kitail sukuhliki, kitail pahn “ahnlahr oh eselahr wekpeseng en me mwahu oh me suwed.” (Ipru 5:14) Mwein pein kowe pil pehmehr iaduwen kaweid en Pwuhk Sarawi sewese iuk en wiahda pilipil loalokong kan ahnsou kan me ke lelohng nan kahpwal kan. Pwuhk Sarawi kin kihong kitail loalokong me kak sewese kitail en pasapengpen atail kahpwal kapwunod kan.—Lepin Padahk 1:4.
14 Mahsen en Koht pil kin kihong kitail pil ehu mehn kakehl—koapworopwor en kamourla. (Rom 15:4) Pwuhk Sarawi kin padahkiong kitail me soahng suwed sohte pahn mihmi kohkohlahte. Kahpwal kan me kitail kin lokolongki pahn wiawi ahnsoukiste. (2 Korint 4:16-18) Kitail ahneki “koapworopwor en mour soutuk. Koht, me sohte kin ketin likamw, ketin inoukihongkitailehr mour wet mwohn tepin kawa.” (Taitus 1:2) Ma kitail kin pereperenki koapworopwor wet, oh kin ahnsou koaros pohnese duwen kamwahu kan en ahnsou kohkohdo nin duwen me Siohwa inoukihda, kitail pahn kak dadaur mendahki kalokolok.—Rom 12:12; 1 Deselonika 1:3.
Mwomwohdiso—Kasalepen Sapwellimen Koht Limpoak
15. Iaduwen Kristian kan kak wia mehn kangoang?
15 Pil ehu sawas me Siohwa ketikihong kitail nan ahnsou kansensuwed kan iei werek mwahu me kitail kak perenki nan mwomwohdiso en Kristian. Pwuhk Sarawi mahsanih: “Kompoakepah kan kin kasalehda ar limpoak ahnsou koaros, oh e kin wiahla riomw ni ahnsou apwal.” (Lepin Padahk 17:17, NW) Sapwellimen Koht Mahsen kin kangoange koaros nan mwomwohdiso en kahkahki oh limpoak ong emen emen. (Rom 12:10) Wahnpoaron Pohl ntingihdi, “Eri, kumwail dehr kin ngoangki raparapahkihte pein kamwahupamwail kan, ahpw emenemen en ngoangki rapahki kamwahupen meteikan.” (1 Korint 10:24) Ahneki soangen madamadau wet pahn sewese kitail en kak tehk anahn en meteikan ah kaidehn pein atail kahpwal kan. Ni atail kin toukihda pein kitail ong mehteikan, kaidehn ihte kitail kin sewese irail, ahpw kitail kin ahneki pepehm en peren oh nsenamwahu me kak kahrehiong kitail en kakong pein atail mehn katoutou kan.—Wiewia 20:35.
16. Iaduwen Kristian kan koaros kak wia mehn kangoang??
16 Irail ohl oh lih mah ngehnin kan kak kakehle mehteikan. Pwehn wia met, irail anahne wia aramas kei me mengei en tuhwong. (2 Korint 6:11-13) Mwomwohdiso kin inenen paiekihda ahnsou me koaros kin wiahda ahnsou en tuhpene oh kapinga me pwulopwul kan, en kakehle me kapw akan, oh en kangoange me pahtoulahr kan. (Rom 15:7) Limpoak ong riatail kan pil kin sewese kitail en soikala ngenin soh likilik nanpwungatail. Kitail en dehr mwadangete koasoanedier me en emen kahpwal kan wia kilel en luwet en pali ngehn. Pohl kangoange Kristian kan en “kakehlaka irail kan me nan kapehd tikitik.” (1 Deselonika 5:14) Pwuhk Sarawi kasalehda me pil irail Kristian pwoson kan pil kin lelohng nan kahpwal kansensuwed kan.—Wiewia 14:15.
17. Soahngen ahnsou mwahu dah kan me kitail ahneki pwehn kakehle selen pirien Kristian kan?
17 Mihding en Kristian kan kin wia ahnsou mwahu ong kitail en kansenamwahuwih oh kangoange mehteikan. (Ipru 10:24, 25) Ehupene ni limpoak kaidehn en wiawihte nan mihding en mwomwohdiso kante. Ahpw, sapwellimen Koht aramas akan kin pil rapahki ahnsou mwahu teikan pwe ren pil patpene. Ahnsou me kahpwal akan kin pwarada, kitail kin mwadang sewese emenemen pwehki atail selin pirien mehlel me miehier. Wahnpoaron Pohl ntingihdi: “Saminimin en dehr kin mie ni paliwaratail, ahpw . . . kakon koaros anahne . . . nsenoh teieu ong ni sawaspene. Ma kakon en war ehu kin medekla, kakon koaros kin iang medekla, ma kakon ehu kin ale kaping, kakon koaros kin iang paieki kapingo.”—1 Korint 12:25, 26.
18. Soahngen irair dah kan me kitail en soikala ahnsou kan me kitail kin nsensuwedla?
18 Ekei pak, kitail pahn kin nsensuwedla oh sohte men patehng riatail Kristian kan. Kitail anahne peiong soangen pepehm wet pwe kitail dehr katiasang kamweit oh sawas me riatail nan pwoson kak sawaskihda. Pwuhk Sarawi kehkehlikiong kitail: “Aramas me sohte kin men patehng meteikan kin nsenohkihte pein irail; re kin sapwungki mehkoaros me aramas koaros ese me pwung.” (Lepin Padahk 18:1) Riatail brother oh sister kan wia kasalepen en Koht nsenohki kitail. Ma kitail kin pohnese elen limpoak wet, kitail pahn kak diar sawas ahnsou kapwunod kan.
Ahneki Madamadau en Pweida
19, 20. Iaduwen iren Pwuhk Sarawi kan kin sewese kitail en powehdi lamalam sapwung kan?
19 Ahnsou me emen kin luwetala oh nsensuwedla, e kin mengei en ahneki madamadau luwet. Karasepe ehu, ahnsou me ekei kin lelohng nan apwal, irail mwein kakete peikasalki pein arail pwoson, oh medemedewe me arail lelohng nan apwal iei kilel ehu me Koht sapwungkin irail. Ahpw, tamataman me Siohwa sohte kin kasonge emen ki mehkot “suwed.” (Seims 1:13) Pwuhk Sarawi mahsanih, “E sohte kin kupwurperenkihda ni eh kin ketikidohng kitail pahtou de medek.” (Koulen Kedepwidepw kan 3:33) Weksang met, Siohwa kin inenen nsensuwedala ahnsou me sapwellime ladu kan kin lokolok.—Aiseia 63:8, 9; Sekaraia 2:8.
20 Siohwa iei “Samatail me kalahngan oh Koht me pwarer en kansenamwahu koaros.” (2 Korint 1:3) E kin nsenohki kitail, oh e pahn ketin kapaikitailda ahnsou keren. (1 Piter 5:6, 7) Atail kin ahnsou koaros pohnese sapwellimen Koht limpoak ong kitail pahn sewese kitail en ahneki madamadau en pweida, oh pil peren. Seims ntingihdi: “Riei ko! Kumwail perenkihda ma soangen apwal koaros kin lelohng kumwail.” (Seims 1:2) Pwekihda? E sapengki: “E pahn ale nin duwen keting ehu, mour me Koht ketin inoukihong irail kan me kin poakohng Ih.”—Seims 1:12.
21. Mendahki soangen kahpwal dah kan me kitail kin lelohng, soangen mehn koapworopwor dah kan me Koht ketikihong irail kan me kin poadidi ong ih?
21 Nin duwen me Sises kehkehlikiong kitail, nan sampah wet kitail pahn lelohng lokolok. (Sohn 16:33) Ahpw Pwuhk Sarawi inoukihda me “lokolok de apwal, de kamakam, de duhpek, de semwehmwe, de keper” sohte pahn kak irehdihsang kitail limpoak en Koht oh limpoak en sapwellime Ohl. (Rom 8:35, 39) Ia uwen kansenamwahu en ese me kahpwal koaros me kitail kin lelohng sohte pahn poatopoat! Ni ahnsou keren, ni atail awiawih kaimwisekpen en aramas lokolok kan, Samatail limpoak, Siohwa kin apwahpwalih kitail. Ma kitail kin tangewong Ih ni repen sawas, e pahn kasalehda me e wia “wasahn ruk ong me toutoulahr akan, iei wasahn rukula ni ansoun apwal.”—Melkahka 9:9.
Dahme Kitail Sukuhlki?
• Dahme Kristian kan en kasik ni ahr mihmi nan sampah suwed wet?
• Iaduwen atail kapakap kaukaule kan kak wia mehn kakehl ni ahnsou kan me kitail kin lelohng kahpwal kan?
• Iaduwen sapwellimen Koht ngehn sarawi wia sounsawas men?
• Dahme kitail kak wia pwehn sewese emen emen?
[Kilel nan Pali 12]
Kitail anahne rapahki Siohwa duwehte me kitail tangatangwohng wasahn doulik kehlail ehu
[Kilel nan Pali 14]
Me mah kan ni pali ngehn kak doadoahngki ahnsou mwahu koaros pwehn kapinga oh kangoange mehteikan