Siohwa Kin Ketin Kapitala Ih Me Kin Mihla Nan Apwal

“Apwal tohto kin lelohng aramas mwahu men, ahpw Siohwa kin ketin doarehsang nan eh apwal akan koaros.”​—MELKAHKA 34:19.

1, 2. Kahpwal dah me emen Kristian lelepek kin lelohng, oh dahme kahrehda kitail pahn kak lelkihong soangen pepehm kohte?

EREPEIN pwulopwul men me ede Keikoa wiahkier emen Sounkadehdehn Siohwa tohtohsang pahr 20. Ahnsou kis, e wia sounkalohk kaukaule men en wehio. E inenen perenki kapai tohrohr wet. Ahnsou kerendo ieu, pepehm en me sohla ah koapworopwor oh men kelekelehpw eri tapihada kipehdi ahn Keiko mour. E koasoia: “Ieite me I kak wia iei sengiseng.” Pwe en song en kauhdi ah pahtou, Keiko kalaudehla ah ahnsou ohng pein onop mehkan me pid Pwuhk Sarawi. E pil koasoia: “Ahpw, met sohte kak wekid ahi madamadau. Ahi pahtou me inenen laud oh lel ni irair ieu me I kin men mehla.”

² Iaduwen ke sou kin pepeiong pepehm akan en loal ohla me rasehng met? Nin duwen emen Sounkadehdehn Siohwa, mie kahrepe tohto kan me pahn kahrehong uhk ken kin peren pwehki lelepek ohng Koht “pahn kahrehiong kitail mour ahnsou wet, oh pil ahnsou kohkohdo.” (1 Timoty 4:8) Ni ahnsou wet ke koukousoan nan paradais en ngehn! Ahpw iaduwen, met kin wehwehki me ke solahr kak lelohng kahpwal kan koaros? Uhdahn soh! Paipel mahsanih: “Apwal tohto kin lelohng aramas mwahu men.” (Melkahka 34:19) Met sohte kapwuriamwei pwehki “sampah unsek mi pahn manaman en Me Suwedo,” iei Sehdan me Tepil. (1 Sohn 5:19) Ni soangsoangen ahl, kitail koaros kin lelohng nan doadoahk en Tepilo.​—Episos 6:12.

Imwila kan en Kahpwal akan

3. Kihda karasepen Paipel duwen sapwellimen Koht ladu kan me kin lelohng pwunod laud?

³ Ahneki pwunod ahnsou reirei kak kauweikitailla. (Lepin Padahk 15:15) Tehk duwen ohl pwung Sohp. Nan ah apwal laud, Sohp mahsanih: “Kitail koaros ipwidi luwet. Aramas koaros ahneki soangen mourtehieu me mwotomwot oh diren apwal.” (Sohp 14:1) Sohp solahr peren. Ahnsou kis, pein ih lemehiong me Siohwa ketin solahr ieiang ih. (Sohp 29:1-5) Kaidehn Sohp kelehpw sapwellimen Koht ladu me lelohng pwunod laud duwehte met. Paipel mahsanihong kitail me Ana “pahtoula laud” pwehki ah sohte kak naineki seri. (1 Samuel 1:9-​11) Repeka nda nin doken ah mihla nan lokolok pwehki apwal me lelohng ah peneinei: “I inenen tihwohlahr.” (Senesis 27:46) Ahnsou me Depit tamanda ah sapwung kan e mahsanih: “I kin nsensuwedki sang nimenseng lel nipwong.” (Melkahka 38:6) Mehn karasepe malaulau pwukat kasalehda mwahu me aramas lahn Koht akan me kin mour mwohn Sises ketido sampah kin lelohng irair en pahtou laud akan.

4. Dahme e sohte kapwuriamweiki me kin mie “irail me nan kapehd tikitik” nanpwungen Kristian akan rahnwet?

⁴ Ah iaduwen Kristian akan? Wahnpoaron Pohl kilang me e kesempwal en padahkihong mehn Deselonika en “kakehlaka irail kan me nan kapehd tikitik.” (1 Deselonika 5:14) Ehu pwuhk koasoia me lokaiahn Krihk me kin wehwehki “irail me nan kapehd tikitik” kak wehwehki irail “me kin toutoukihla apwal en mour ohng lepin ahnsou kis.” Sapwellimen Pohl mahsen kasalehda me ekei me keikihdi ngehn sarawi nan mwomwohdiso en Deselonika kin pahtoula. Mie me kin wia aramas pahtou kei nan atail ahnsou. Ahpw dahme kahrehda re pahtouki? Kitail kilang soahng siluh me kalap wiahda met.

Atail Soh Unsek Kak Kahrehda Kitail en Pahtou

5, 6. Madamadau en kamweit dah me kin kohsang nan Rom 7:22-25?

⁵ Kristian mehlel akan me kin weksang irail oko me “solahr arail namenek,” kin pahtoukihla arail sapwung kan. (Episos 4:19)Irail kin kak ahneki soangen pepehm me Pohl ntingihedi oh mahsanih: “Nan kapehdi kin perenkihda kosonned en Koht. Ahpw I kin kilang ehu soangen koasoandi tohrohr me kin wia eh doadoahk ni paliwereiet—ehu soangen koasoandi me kin uhwong kosonnedo me mohngiongi kin pwungki. Koasoandi tohrohr wet kahrehiong ei selidi pahn kosonned en dihp me kin wia doadoahk ni paliwereiet.” Pohl pil doula koasoia: “Uhdahn aramas paisuwed men ngehi!”​—Rom 7:22-​24.

⁶ Mie pak ke kin ahneki soangen pepehm me duwehte Pohl? E sohte sapwung ken kin inenen pehmitikiong pein ahmw soh unsek kan, pwe met pahn kin katamankin uhk toutou en dihp oh kak kakehla iuk en irehwei sang uhk wiewia suwed. Ahpw ke sohte anahne ken ahnsou koaros wia pwunupwunodki pwehki mie omw soh unsek kan. Mwurin Pohl eh koasoia duwen irair en pwunod me e mih loale, e kapatahiong: “Kalahngan ong Koht, me kin ketin kapwaiada met rehn atail Kaun Sises Krais!” (Rom 7:25) Ehi, Pohl kin koapworopworki me ntahn Sises kak pwainda ih sang sohsohn dihp.​—Rom 5:18.

7. Dahme kak sewese aramas emen en dehr pahtoula pwehki ah pwunod akan?

⁷ Ma ke kin toutoukihla pein omw irair en soh unsek kan, ale kamweitpen kapehdomw ki mahsen en wahnpoaron Sohn me ntingihedi: “A ma emen pahn wiahda dihp, sounsawasapatail mie rehn Koht, iei Sises Krais, pwe ih me pwung. Pwe Krais, ih me tomwkiher dipatail kan, ahpw kaidehn dipatailte, pwe pil dipen aramas koaros.” (1 Sohn 2:1, 2) Ma ke kin pahtoula pwehki ahmw soh unsek kan, tamataman ahnsou koaros me Sises matkihla aramas dipan akan, kaidehn aramas unsek kan. Ni mehlel, “aramas koaros wiadahr dihp, oh irail koaros dohsangehr sapwellimen Koht lingan me e kin ketikihong aramas.”​—Rom 3:23.

8, 9. Dahme kitail en dehr ahnekihda pepehm akan me dene kitail riahlahr?

⁸ Iaduwen ma ke wiahda dihp toutou ieu mahso. Uhdahn ke peki sawas sang rehn Siohwa nan ahmw kapakap duwen met, mwein pak tohto. Ke alehier sawas en pali ngehn sang rehn Kristian elder kan. (Seims 5:14, 15) Ke koluhkihlahr ni mehlel oh eri ieiang kisehn mwomwohdiso. De mwein ke kesehlahr sapwellimen Koht pwihn kisin ahnsou kis, ahpw mwuhr ke koluhla oh pwurehng alehda irair en mwakelekel. Sohte lipilipil mehnia irair me ke lelohng, ahmw dipen mahs akan me ke kakete kin tamanda oh kin kahrehiong uhk en pwunod. Ma met pahn wiawi, tamataman me Siohwa kin ketin mahkikihong irail me koluhla mehlel “ni ahl laud.” (Aiseia 55:7) Patehng met, e sohte kupwurki ken ahneki pepehm me ke riahla. Sehdan kin men ken ahneki pepehm wet, pwe met kak kauwehla ahmw pwoson. (2 Korint 2:7, 10, 11) Tepil pahn kasohrala pwehki iei me pwungiong ih, ahpw e men ken ahneki pepehm me ke pil konehng iang ale soangen lokolokohte. (Kaudiahl 20:10) Ke dehr mweidong Sehdan e pweida nan ah elen widing pwehn kauwehla ahmw pwoson. (Episos 6:11) Ahpw, “pelianda ih” nan irair wet, duwehte omw pil kin wia nan irair tohrohr teikan.​—1 Piter 5:9.

⁹ Nan Kaudiahl 12:10, Sehdan kin adaneki “ih me kin karakaraune riatail akan”​—irail Kristian keidi kan. E kin “karakaraune irail ni rahn oh nihpwong” mwohn Koht. Sang petehkpen ire wet, e kak sewese iuk en kilang me Sehdan, me sounkaraun likamw, pahn perenda ma ke pahn ahneki pepehm en me ke riahla, mendahte ma kaidehn iei met me Koht ketin kupwukupwure duwen kowe. (1 Sohn 3:19-​22) Dahme ke nohn tihwohki omw sapwung kan oh ahnekihda madamadau me pahn pwilkihdier omw pwoson? Ke dehr mweidohng Sehdan en kauwehla ahmw nanpwung mwahu rehn Koht. Dehr mweidong Tepil en kasalongehsang nan omw madamadau me Siohwa me ketin “diren kalahngan oh kadek, me sohte kin mwadang lingeringerda, oh me diren limpoak lapalap oh loalopwoat mehlel.”​—Eksodus 34:⁠6.

Atail Soh Itar akan Kak Kansensuwedihkitailla

10. Ni ahl dah kan me atail soh itar kan kin kahrehong kitail en sohla ngoang?

¹⁰ Ekei Kristian kin nsensuwedla pwehki arail soh itar akan kin kawekila mwomwen ahr papah Koht. Met kin pil wiawi ohng uhk? Mwein ele soumwahu laud ieu de irair en likeilapalahr, de soangen irair teikan kin kahrehiong omw sohte kak kihong ahnsou laud ong doadoahk en kalohk duwehte me ke kin wia mahso. Mehlel, Kristian akan ale mehn kangoang ren kihong ahnsou laud ohng papah Koht. (Episos 5:15, 16) Ahpw iaduwen ma soh itar mehlel kei me ireiukasang ken kak kalaudehla omw doadoahk en kalohk oh met eri wia mehkot kansensuwed ohng uhk?

11. Iaduwen sapwellimen Pohl kaweid nan Kalesia 6:4 kak mwahu ohng kitail?

¹¹ Paipel kangoangehkin kitail, kitail en dehpa luwetala, ahpw kitail en “alasang irail kan me kin pwoson oh kanengamah re lao lel dahme Koht ketin inoukihong irail.” (Ipru 6:12) Kitail kak wia met ma kitail pahn kasawih arail mehn kahlemeng mwahu oh song en alasang arail pwoson. Ahpw, kitail sohte kak diar kamwahu ma kitail pahn kapahrekiong kitail aramas teikan oh lemeleme me kitail me suwed, oh kose me soahng koaros me kitail kin wia sohte kin itar. Kahrehda e pahn mwahu ma kitail doadoahngki kaweid en Pohl me mahsanih: “Emenemen en pein kasakasawih pein eh wiewia kan. Ma eh wiewia kan me mwahu, eri, e kak pohnmwahsohki; a ieremen e kapahrekiong en meteikan ar wiewia kan.”​—Kalesia 6:4.

12. Dahme kahrehda kitail kak peren nan atail pwukoahn papah Siohwa?

¹² Kristian kan kin ahneki kahrepe mwahu kan en peren, mehnda ma soumwahu laud akan kin wia kahpwal ohng irail. Paipel kamehlelehiong kitail mahsanih: “Koht me uhdahn pwung; e sohte pahn ketin meliehla amwail wiewia kan de amwail limpoak ohng ih.” (Ipru 6:10) Ele irair akan, me sohte me kitail pahn kak wiahiong, kin kahrehiong uhk ken wia soahng kan me ke kin perenki wiewia mahso nan omw papah Siohwa. Ahpw sang ni sapwellimen Siohwa sawas, ke mwein kak iang kalaudehla omw papah Koht nan elen kalohk en Kristian teikan, me duwehte doadoahngki telephone ohng kalohk de ntingihada kisinlikou. Ke kak koapworopworki me Siohwa Koht pahn ketin kapai iuk pwehki omw papah ki omw mour unsek oh pwehki limpoak me ke kin kasalehiong ih oh aramas akan.​—Madiu 22:36-​40.

“Ahnsou Apwal” Kak Kamworuseikitaildi

13, 14. (a) Ni ahl dah kan me “ahnsou apwal akan” kak wahdo kahpwal kan ong kitail? (b) Iaduwen sempoak ah kin sansal nan rahnwet?

¹³ Edetehn kitail kin kasikasik mour nan sapwellimen Koht sampah kapw oh mwahu, ahpw ahnsouwet kitail kin mihmi “nan ahnsou apwal akan.”(2 Timoty 3:1) Kitail en nsenamwahu pwe kitail ese me irair suwed akan kin kasalehda me komour kerendohr. Ahpw, dahme wiwiawi limwahtail kin sair kitail. Karasepe, iaduwen ma sohte omw doadoahk me ke diar? Doadoahk ele malaulau, oh mwurin sounpwong kei, ke kak medemedewe ma Siohwa mwahngih omw kahpwal de karonge omw kapakap akan? De mwein, ke lelohng irair me aramas teikan kin katohre iuk de soangen madamadau en kopwung sapahrek teikan. Pil wadekete nuhs akan kak kahrehong uhk pepehm en pwunod duwehte ohl pwung Lot, me “inenen pahtoula” pwehki wiewia samin en irail akan me kin kapilpene ih.​—2 Piter 2:7.

¹⁴ Mie ehu irair me pid imwin rahn akan, me kitail sohte kak pohnsehse. Paipel kohpada me aramas tohto pahn “sempoak.” (2 Timoty 3:3) Limpoakpene en peneinei kin sohte rehn tohnihmw tohto. Ni mehlel, pwuhk me ede Family Violence (Tiahk Lemei nan Peneinei) koasoia: “Mehn kadehde kan kasalehda me aramas akan kin kak kamala, wiakaula, oh alehdi ohlahn madamadau oh lelohng angkehlail sang rehn tohn arail peneinei kan, laudsang wasa teikan. Wasa me aramas laud oh seri kan konehng en alehdi limpoak oh koapworopworki iei wasa keieu keper sang wasa teikan koaros.” Irail akan me kin mihmi nan soangen wasa suwed pwukat pahn kakete alehdi soumwahu en pwunod oh pahtou laud mwuhr. Eri iaduwen ma met kin wiewiawi ohng uhk?

15. Iaduwen sapwellimen Siohwa limpoak ah kin ilehsang limpoak en aramas koaros?

¹⁵ Sounmelkahka Depit koulki: “Semei oh inei pil kak keseiehla, ahpw Kauno pahn ketin apwahpwalih ie.” (Melkahka 27:10) Ia uwen kansenamwahu en ese me sapwellimen Siohwa limpoak inenen siksang limpoak en pahpa oh nohno koaros! Edetehn kailok, lemei de kesehla seri me pahpa oh nohno kin wia kin kamedek, ahpw met sohte kin wekidala uwen Siohwa kin ketin kupwure iuk. (Rom 8:38, 39) Tamataman me Koht kin ketin kakaranihodohng reh irail oko me e ketin loalloale. (Sohn 3:16; 6:44) Sohte lipilipil dahme aramas akan kin wiaiong uhk, Semomw me ketiket nanleng kin ketin limpoak ohng uhk!

Ewen Kahk Mehlel Katapan akan ohng Kihsang Pepehm en Mworusala

16, 17. Ni aramas emen a kin pahtoula, dahme e kak wia pwe en kin kolokol kehlail en pali ngehn?

¹⁶ Ke kak wia ewen kahk katapan kan pwehn powehdi ahmw pepehm en mworusala. Karasepe, ke kak iang ideidawehn koasoandi en wiewiahn Kristian me kin kansenamwahu oh kangoang. Doudouloale Mahsen en Koht, ahpw mehlel ni ahnsou me nsensuwed kin kasokala ahn aramas emen madamadau. Sounmelkahkao koulki: “Ni ahi patohwan, ‘I pwupwudier’; Maing Siohwa, sapwellimomwi limpoak poatopoat me koliehda. Ni ahnsou me I kin pwunodada oh pahtoula, komw kin ketin kansenamwahwihiehla oh kapereniehda.” (Melkahka 94:18, 19) Wadek Paipel kaukaule pahn sewese kadirehki ahmw madamadau mahsen en kamweit kan oh kolokol madamadau mwahu kan.

¹⁷ Kapakap pil wia mehkot kesempwal. Mehnda ma ke sohte kak uhdahn kawehwehda ahmw pepehm akan ni lepin lokaia kan, Siohwa mwahngihier dahme ke kin songosong en nda. (Rom 8:26, 27) Sounmelkahkao kamehlelehda oh mahsanih: “Mweidohng Kauno omw kahpwal akan, eri e pahn ketin doareiukala; pwe e sohte kin ketin mweidohng me lelepek kan en lohdi.”​—Melkahka 55:22.

18. Ewen kahk mehlel dah kan me aramas pwunod emen en kak wia?

¹⁸ Ekei aramas kin lelohng pepehm en sohla koapworopwor pwehki irail kin ahnekihda soumwahu en pwunod.b Ma met kin wiawihong uhk, eri song kihlahng ekei omw madamadau ohng sapwellimen Koht sampah kapw oh ni ahnsou me “sohte emen me kin kousoan nan sahpwo pahn kaulimkihla eh soumwahu.” (Aiseia 33:24) Ma ahmw madamadau en sohte koapworopwor kin likamwete nohn dod, e pahn konehng ken rapahki sawas en irail semen kan. (Madiu 9:12) E pil kesempwal en apwalih kanahieng paliweromw. Kang mwengehn karoson kan oh ekis eksersais kak sawas. Tehk mwahu pwe ken ale uwen ahnsou en kommoal me anahn ohng paliweromw. Ke dehr pepehd werei kilikilang kasdo, oh ke dehr pil wia soangen mehn kamweit kan me pahn kahrehiong ahmw madamadau oh paliweromw en pwangada. Laudsang koaros, nantihong wiewia soahng kan me kin kaperenda Koht! Mehnda ma saikinte ahnsou ohng Siohwa en “limwihasang pilen mas,” e pahn ketin sewese iuk ken dadaur pahn kahpwal kan.​—Kaudiahl 21:4; 1 Korint 10:13.

Mih “Pahn Kehl en Limen Koht”

19. Dahme Siohwa ketin inoukihong irail me mihlahr nan apwal?

¹⁹ Paipel kamehlelehiong kitail me edetehn kahpwal akan en aramas pwung emen me tohto, “ahpw Kauno kin ketin doarehsang nan eh apwal akan koaros.” (Melkahka 34:19) Iaduwen Koht ah kin ketin wia met? Nin doken wahnpoaron Pohl ah kin kapwukapwurehiong ah kapakapki doarepe sang “kisin tek kamedek kis kohieng nan paliwar,” Siohwa mahsanihong ih: “Ei manaman kin sansalda mehlel rehn me luwet akan.” (2 Korint 12:7-9) Dahme Siohwa ketin inoukihong Pohl, oh dahme e ketin inoukihong uhk? Koht sohte ketin inouki kamwahula mwadang, ahpw e ketin inoukihong uhk kehl en kolokol kanengamah pahn apwal.

20. Mendahte ma kitail mih nan irair en kasongosong apwal kan, dahme 1 Piter 5:6, 7 kin kamehlelehiong kitail?

²⁰ Wahnpoaron Pohl ntingihdi: “Kumwail pein karakarahkala pahn nin limen Koht manaman, pwe en ketin kasapwilkumwailda ni ahnsou me konehng. Kumwail mweidohng ih amwail pwunod koaros, pwehki eh kin ketin apwahpwalih kumwail.” (1 Piter 5:6, 7) Pwehki sapwellimen Siohwa ketin kupwurperenkinuhk, e sohte pahn ketin likidmelieiukala. E pahn ketin utung uhk nan soangen apwal sou lipilipil kan me ke pahn lelohng. Tamataman me Kristian lelepek kan kin “mihmi pahn limen Koht manaman.” Nin doken atail kin papah Siohwa, E pahn kin ketikihong kitail kehl en dadaurete. Ma kitail pahn kin lelepek ohng ih, sohte mehkot pahn kak kihong kitail ohla poatopoat en pali ngehn. Kitail en kolokolete atail lelepek ohng Siohwa pwe kitail en kak ale kapai en mour soutuk nan sapwellimen sampah kapw me e ketin inoukihda oh iang kilang rahno me e pahn ketin kamaiauda soutuk me mih nan apwal kan!

[Nting tikitik me mi pahs]

Ke Kak Tamanda?

• Dahme kahrehda apwal kin lelohng sapwellimen Siohwa ladu kan?

• Soahng dah kan me kak wiahda ekei sapwellimen Koht aramas akan en ahnekihda pepehm en sohla koapworopwor?

• Iaduwen Siohwa ah kin ketin sewesei kitail en powehdi kapwunod kan?

• Ni soangen ahl dah me kitail kin “mih pahn limen Koht lapalap”?

[Kawehwehpen kilel kan nan ehu ehu pali 17]

Mendahki apwal akan, sapwellimen Siohwa aramas akan ahneki kahrepen ren peren