“Siohwa Sohte Pahn Ketin Likidmeliehla Sapwellime Aramas Akan”
“Apwal tohto kin lelohng aramas mwahu men, ahpw Siohwa kin ketin doarehsang nan eh apwal akan koaros.”—MELKAHKA 34:19.
1, 2. (a) Iaduwen Siohwa kin kapaiada sapwellime aramas akan rahnwet? (b) Dahme Kristian tohto kin lelong, oh peidek dah kei kohda?
NI pweidahn kokohp en Paipelo, sapwellimen Siohwa tohnkaudok kan kin mih nan paradais en ngehn. (2 Korint 12:1-4) Sounkadehdehn Siohwa kan kin iang pwihn ehu me kin kasalehda irairen limpoak oh miniminpene. (Sohn 13:35) Irail kin perenkihda ahneki loalokong loal en padahk mehlel en Paipel. (Aiseia 54:13) Ia uwen laud arail kalahngan ong Siohwa pwehki e ketikihong irail pwais kasalel ieu en patohlong nan Sapwellime Tehnpasen!—Melkahka 15:1.
2 Edetehn koaros nan sapwellimen Siohwa pwihn kin paiekihda pali ngehn, ekei kin ahneki mour meleilei oh popohl, ahpw me teikan kin lelong soansoangen kahpwal akan. Kristian tohto kin lelong irair apwal erein ahnsou reirei oh mwomwen kahpwal me irail kin lelong sohte pahn mwahula. Ihme irail kin pahtoula pahn soahngen irair pwukat. (Lepin Padahk 13:12) Kahpwal akan kin wia mehn kadehde me Koht sohte kupwureki mehkot? Siohwa kin perehla ni ahl tohrohr ehu ekei Kristian akan ahpw pohnsehsehla mehteikan?
3. (a) Siohwa me pwukoahki kahpwal akan me sapwellime aramas akan kin lelong? (b) Dahme kahrehda tohnkaudok lelepek kan en Siohwa kin pil lelong lokolok?
3 Paipel sapengki: “Mehmen me lelohng nan songosong pwehki apwal me kohiengehr en dehr nda me, “Kasongosong wet sang rehn Koht.” Pwe sohte me suwed kot kak kasongosonge Koht, oh pein Koht sohte kin kasongosonge aramas.” (Seims 1:13) Siohwa iei Sounperepen oh Sounkatineinpen sapwellimen aramas akan. (Melkahka 91:2-6) “Siohwa sohte pahn ketin likidmeliehla sapwellime kan.” (Melkahka 94:14) Ahpw met, sohte wehwehki me tohnkaudok lelepek kan sohte pahn lelong kalokolok de kahpwal akan. Aramas soh-unsek kan me kakaun koasondi en sampah nan rahnpwukat. Irail tohto me mwersuwed, oh ekei me uhdahn loalsuwed. Irail koaros sohte kin sohpeiwong Siohwa pwehn ale erpit. Met kin imwikihla aramas tohto kin lelong lokolok. Paipel ni sansal kawehwehda me sapwellimen Siohwa aramas kan sohte kak ahnsou koaros irairdi sang imwila kansensuwed kan en aramas soh-unsek kan oh aramas mwersuwed kei.—Wiewia 14:22.
Kristian Lelepek kan Ese Me Re Pahn Lelong Kalokolok
4. Dahme Kristian kan koaros anahne wehwehki ma re kin memour nan koasondi suwed wet, oh pwekihda?
4 Edetehn irail kaidehn kisehn sampah, tohnpadahk kan en Sises kin memour nan koasondi wet. (Sohn 17:15, 16) Paipel kasalehda me Sehdan iei ngehnen sampah wet. (1 Sohn 5:19) Ihme kahrehda, Kristian kan koaros anahne ese me ni ahnsou keren irail pahn lelong kahpwal laud. Wahnpoaron Piter koasoia: “Kumwail onohnop oh mwasamwasahn. Pwe amwail imwintihtio, Tepil, kin kohkohseli duwehte laion emen me kin weriwer, raparapahki ihs me e pahn kadallehla. Eri kumwail tengeteng ni amwail pwoson oh kehlail ong ih, pwe kumwail ese me riamwail Kristian kan wasa koaros nin sampah kin iang kumwail mihla nan soangen lokolok me kumwail kin mihla loale.” (1 Piter 5:8, 9) Ei, pwihn en Kristian pwon anahne wehwehki me re pil kak lelong kalokolok.
5. Iaduwen Sises kawehwehda ni sansal me Kristian lelepek kan pil pahn lelong kahpwal akan nan ahr mour?
5 Mehndahki kitail inenen poakong Siohwa oh pil kin kapwaiada sapwellime koasondi kan, kitail pahn pil lelong kahpwal kan me kin kansensuwedih kitail. Sises kawehwehda met ni sansal ni ahnsou me e wiahda eh karasaras me kileledi nan pwuhken Madiu 7:24-27, e koasoia duwen wekpeseng en irail kan me kin peikiong ih oh irail me sohte kin. E karasaiong tohnkaudok peik kan duwehte ohl loaloakong men me kauwada imwe pohn paip ehu. Irail kan me sohte peikiong sapwellime mahsan kan, e karasaiong irail duwehte ohl pweipwei men me kauwada imwe pohn pihken ni oaroahr. Ni ahnsou eh pahn keteuda oh lapakehda, ihmwote me kokouda pohn paipo me sohte pahn ohla. Tehk duwen imwen ohl loaloakongo, “e pahn keteuda oh lapakehda, oh lapalahn kisinieng ipidohng ihmwo, e sohte pahn ohla.” Sises sohte inoukihda me ohl loaloakongo pahn ahnsou koaros paiekihda popohl oh meleilei. Ahpw, loalokong en ohlo pahn sewese ih en kaunopada ong melimelo. Mouren padahk wet en karasaras wet pil kin mih nan karasaras en Sounkamwarako. Sises uhd kawehwehda nan karasaraso me tohnkaudok peik kan me nan “kapehdirail ni peik oh mwakelekel” pahn “wah mwahu ni kanengamah.”—Luk 8:4-15.
6. Nan ahn Pohl karasaras me pid duwen dipwisou kan me sohte kak ohkihla kisiniei, ihs me pahn lelong soangen kasongosong wet?
6 Ni ahnsou me wahnpoaron Pohl ntingwong mehn Korint kan, e doadoahngki karasaras kan pwen kak sewese irail en ahneki irair kesempwal kan me pil kak sewese kitail en powehdi kasongosong kan. Dipwisou kan me kisiniei sohte kak kawehla duwehte kohl, silper, oh takai kesempwal kan kin rasehng irair kan me Koht kin sapwellimaniki. (Pil kilang Lepin Padahk 3:13-15; 1 Piter 1:6, 7.) Ni pali teio, irairen pali uduk kan kin rasehng dipwisou kan me kisiniei kak kawehla. Eri, Pohl uhd mahsanih: “Ahpw iren doadoahk en emenemen soukou ihmw pahn sansalda mehlel ni Rahnen Krais. Pwe Rahno pahn tepkihda kisiniei; oh ih kisiniei me pahn sohng, oh kasalehda iren en emenemen eh doadoahk.” (1 Korint 3:10-14) Wasaht, Paipel kin kawehwehda me kitail koaros pahn uhdahn lelong soangen kasongosong kan.
7. Nin duwen pwuhken Rom 15:4, Iaduwen Iren Paipel kan kak sewese kitail en dadaur pahn kasongosong kan?
7 Mie poadopoad tohto nan Paipel me pid duwen sapwellimen Koht ladu lelepek kan me lelong oh dadaur pahn kasongosong kan, ekei pak erein ahnsou reirei. Ahpw, Siohwa sohte likidmeliehla irail. Wahnpoaron Pohl kin medemedewe duwen met ni ahnsou e koasoia: “Pwe mehkoaros me ntingdier nan Pwuhk Sarawi e ntingdier pwe en padahkih kitail, pwe kitail en ahneki koapworopwor sang ni kanengamah oh kakehlepen loalatail me Pwuhk Sarawi kin ketikihong kitail.” (Rom 15:4) Medemedewe duwen mehn kalemeng en ohl silimen, edetehn irail paikihda ahr ahneki nanpwungmwahu rehn Koht, irail ahpw lelong kahpwal tohto.
Dahme Kitail kin Sukuhlikisang Poadoapoad en Paipel kan
8. Dahme Siohwa mweidong en wiawiong Sosep, oh ia uwen reirei?
8 Nein Seikop pwutak, Soseph kenikenla rehn Siohwa sang ni ahnsou me e pwulopwul. Ahpw, mehndahki kaidehn ah sapwung, e lelong ekei kasongosong kan. E pirapodohsang nansapwen mehn Irpu kan oh rie kan inenen lemei ong ih. E netla nin duwen ladu men nan sahpw doh oh wasao aramas karaunlikamwe ih oh kihong ih nan “pwoar en imweteng.” (Senesis 40:15) Oh iei wasao, “neh kan eri lipwalipwkihla sahl kehlail kei, me pirapiriong, oh selmete pwoat pirapiriong nin tepinwere.” (Melkahka 105:17, 18) Erein e wia ladu men oh selidi, Sosep kin ahnsou koaros peki Siohwa en sewese ih en pitsang imwetengo. Ahpw, erein sounpar 13, edetehn Siohwa kin kakehle ni ahl tohto, Sosep kin pirada ni menseng koaros wiahte lidu men.—Senesis 37:2; 41:46.
9. Dahme Depit dadaur erein sounpar kei?
9 Depit pil lelong soahngen irairohte. Ni ahnsou me Siohwa ketin pilipil ohl koahiek men en kaunda Israel, e mahsanih: “I diaradahr me Depit, nein Sehsi, iei soangen ohl me I kupwurki.” (Wiewia 13:22) Mendahki e kenikenla rehn Siohwa, Depit kin lelong kahpwal tohto. Pwehki kahpwalo kin pidada eh mour, e kin rukihla sounpar tohto nan sapwtehn, nan pwoar kan oh nan sahpw en mehn liki kan. Pwehki, e duwehla mahn lawalo pwekipwek men, e kin pahtou laud oh masapwek. Ahpw, e kin dadaur pwehki sapwellimen Siohwa kehl. Depit kak ni pwung oh konehng koasoia met: “Apwal tohto kin lelohng aramas mwahu men, ahpw Siohwa kin ketin doarehsang nan eh apwal akan koaros.”—Melkahka 34:19.
10. Kahpwal laud dahieu me Napod oh eh peneinei lelong?
10 Ni mwein Elaisa, ihte aramas 7,000 nan wehin Israel me sohte kin pwongih koht likamwo, Paal. (1 Nanmwarki 19:18; Rom 11:4) Napod, emen rehrail me lelepek, kohieng kopwung sapwung. E sarohdi pwehki aramas kadipehki me dene e lalahwe Nanmwarkio oh Koht. Dene e dipkihda met, oh kalohkpe iei e pahn kamakamkihla kostakaidi, oh kidi kan pahn tamwehsang nta. Nah pwutak kan pil kamakamala! Ahpw, Napod sohte wiahda sapwung wet. Sounkadehde riemeno me lalahwe ih me wiahda likamw wet. Lih Nanmwarki Sesepel me wiahda pilahn wet pwe eh pwoud nanmwarkio en kak sapwenikihla sapwen Napod.—1 Nanmwarki 21:1-19; 2 Nanmwarki 9:26.
11. Dahme wahnpoaron Pohl padahkiong kitail duwen ohl oh lih lelepek kan nan poadopoad en Paipel?
11 Sosep, Depit, Napod, wiahte ohl silimen sang nanpwungen ohl oh lih lelepek tohto me ntingdi nan Paipel me pil lelong kahpwal akan. Wahnpoaron Pohl ntingihdi kohsapahl en poadopoad en sapwellimen Siohwa ladu kan sangete mahs lel ni mwein Pohl. E koasoia duwen irail, “Ekei aleier lokolok kaweikek oh wowoki, oh ekei selidiong nan imweteng. Ekei kostakaidi, ekei rasaraspeseng, oh ekei mehkihla kedlahs. Ekei sansaruwaruseli, likawih likou kilin sihpw de kuht; re semwehmwe, paisuwed, oh sekeniken. Re sohte perenki sampah wet! Re kin kohkohseli nan sapwtehn, pohn nahna kan, pahn paip akan, oh nan pwoahr akan.” (Ipru 11:36-38) Ahpw Siohwa sohte likidmelieirailla.
Siohwa kin Nsenohkin Irail kan me kin Lelong Kahpwal akan
12. Ia ekei kahpwal akan me Sounkadehde kan en Siohwa kin lelong nan rahnpwukat?
12 Iaduwen sapwellimen Siohwa aramas akan nan rahn pwukat? Nin duwen pwihn ehu, kitail kak likih perepe sang powe en pitsang imwen rahn akan oh kamakam kowalap. (Aiseia 54:17; Kaudiahl 7:9-17) Ahpw nin duwen emen emen pein kitail, kitail pohnese “paisuwed kin lelong aramas koaruhsie.” (Eklesiasdes 9:11) Rahnwet, Kristian lelepek tohto kin lelong kahpwal akan. Ekei kin dadaur nan ahr semwehmwe. Paipel kin koasoia duwen Kristian “sepwoupwou kan oh liohdi kan” me kin lelong kahpwal akan. (Seims 1:27) Mehteikan kin lelong kahpwal akan pwehki lapake, rerrer en sahpw ape, mahwen, mwersuwed, doadoahngki manaman ni ahl sapwung, soumwahu, oh mehla.
13. Ripoht kapw dah kei kohda me pid aramas kan me kin lelong kahpwal akan?
13 Karasepe ieu, nan ahr ripoht kan nan pahr 1996 ong Governing Body en Sounkadehdehn Siohwa kan, rahn opisen Watch Tower koasoia me ekei riatail brother oh sister kan kin lelong kalokolok nan imweteng suwed kan, pwehki irail kin kolokolte ahr pwoson Paipel. Mwomwohdiso silu nan ehu wehi nan South America, sohla kin wiawi pwehki pwihn en uhwong koperment kin iding Sounkadehde epwiki kei en tangsang wasao. Nan ehu wehi nan West Africa, ekei Sounkadehde kan mih nanpwungen mahwen me wiawi oh kamakamla. Nan ehu wehi en Central America, arail irair en apwal en mwohni pil suwedla ni ahnsou me melimel ehu lelohng arail wehi, oh riatail brother kan lelong kahpwal en mwohni wasao. Nan sahpw teikan me mwehin kahpwal en mwohni oh duhpek sohte nohn wia kahpwal laud, irairen madamadau sapwung kan kak kihsang peren en riatail brother kan. Mehteikan kin toutouki kahpwal kan en momour nan atail ahnsou. Oh ekei kin pahtouki madamadau en aramas akan me soukauti ong rong rongamwahu en Wehio.
14. (a) Dahme kitail sukuhlikisang kahlemeng en Sohp? (b) Pwehn dehr ahneki madamadau soh-koapwoaroapwoar, dahme kitail kak medemedewe ni ahnsou kitail kin lelong kahpwal akan?
14 Irairen kahpwal pwukat sohte kin wia kilelen sapwellimen Koht kupwursuwed. Tamanda Sohp, ia uwen tohtohn kalokolok kan me e lelong. Ih emen “ohl me loalopwoat oh mwahu.” (Sohp 1:8) Sohp inenen nsensuwedla ni ahnsou me Elipas kapwukoahkin ih me e wia mehkot sapwung! (Sohp, irelaud 4, 5, 22) Kitail en dehr ahneki madamadau me kitail kin lelong kapwal akan pwehki kitail sohte kapwaiada kupwuren Siohwa de Siohwa kihsang rehtail sapwellime kapai kan. Ma kitail ahneki soangen madamadau wet ni ahnsou me kitail kin lelong kalokolok pahn kak kaluwetala atail pwoson. (1 Deselonika 3:1-3, 5) Ni ahnsou me kitail kin lelong kapwal akan, e pahn mwahu en medemedewe ireo me Siohwa oh Sises kin karanih irail me pwung kan mendahki dahme wiawiong irail.
15. Dahme kitail esehki me Siohwa kin nsenohkin sapwellime aramas akan ahr kin lelong kalokolok kan?
15 Wahnpoaron Pohl padahkiong kitail: “Eri, ihs me kak irehdihsang kitail ni limpoak en Krais? Ia duwe, lokolok, de apwal, de kamakam, de duhpek, de semwehmwe, de keper, de mehla? . . . pil sohte mehkot pohnangin sampah de pahnangi-mehlel sohte mwahn mehkot nan audepen lahng oh sampah koaros kak irehdisang kitail ni limpoak en Koht me kitail ahneki rehn Sises Krais atail Kaun.” (Rom 8:35, 38, 39) Siohwa kin nsenohkin kitail oh pil wehwehki duwen atail kalokolok kan. Ni ahnsou me Depit tangsang eh imwintihtih kan, e ntingihdi met: “Kauno [Siohwa] kin ketin sinsile me pwung kan, oh kin ketin karonge ar likwer kan. Kauno [Siohwa] kin ketin doarehla iral kan me kin sohla ar koapworopwor.” (Melkahka 34:15, 18; Madiu 18:6, 14) Samatail Nanleng kin ketin apwahpwali kitail oh poakepoake irail kan me kin lelong kalokolok. (1 Piter 5:6, 7) E ketikihong kitail sawas pwen sewese kitail en dadaur, sohte lipilipil soahngen kahpwal kitail ele pahn lelong.
Sapwellimen Siohwa Kisakis kan kin Ketin Sewese Kitail
16. Sawas dah me kohsang rehn Siohwa me kin sewese kitail en dadaur, oh ia duwe?
16 Mehndahki kitail sohte kak ahneki mour ehu me saledek sang kahpwal nan koasondi mering wet, “kitail sohte kelehpwla.” (2 Korint 4:8, 9) Sises inoukihong sapwellime tohnpadahk kan me e pahn kihong irail sawasparail. E mahsanih: “I pahn peki rehn Semei, oh e pahn ketikihong kumwail pil emen Sounsawas, iei ih Ngenen mehlel, pwe en ieiang kumwail kohkohlahte.” (Sohn 14:16, 17) Nan Pendekos 33 C.E., wahnpoaron Piter padahkiong aramas akan me rong eh padahk me re kak ale “ngehn sarawi.” (Wiewia 2:38) Ngehn sarawi kin sewese kitail nan rahnpwukat? Ehi! Sapwellimen Siohwa manaman soh-sansal kin ketikihong kitail wah kaselel kan: “Limpoak, peren, popohl, kanengamah, kadek, kamwahu, loalopwoat, opampap, liksang me suwed.” (Kalesia 5:22, 23) Mehpwukat koaros iei irair kesempwal kei me pahn sewese kitail en dadaur.
17. Ia ekei padahk mehlel kan en Paipel me kin kakehlailda atail pwoson oh sewese kitail en kanengamah awihawih Siohwa?
17 Ngehn sarawi pil kin sewese kitail en wehwehki me kalokolok en rahn pwukat iei “kisin apwal tikitik” ni ahnsou me kitail pahn kaparehkiong met kating en mour soutuk. (2 Korint 4:16-18) Kitail kin kamehlele me Koht sohte pahn likidmeliela atail doadoahk kan oh limpoak me kitail kasalehong ih. (Ipru 6:9-12) Wia wadawad en Paipel, pahn kakele kitail ahnsou me kitail kin wadek mehn kahlemeng mwahu en ladu lelepek kan me dadaur pahn kalokolok kan ahpw kin peren. Seims ntingihdi: “Riei ko, kumwail tamanda soukohp ako me mahsenier ni mwaren Kauno. Kumwail alasang arail kanengamah oh nannanti nan ar lokolok kan.” (Seims 5:10, 11) Paipel inoukihong kitail “duwen manaman lapalap eh uhdahn sapwellimen Koht, a kaidehk aht” en sewese kitail dadaur pahn kalokolok kan. Siohwa pil kin kapaikin kitail koapwoaroapwoar en kaiasada. (2 Korint 1:8-10; 4:7) Wadek neitail Paipel ehu ehu rahn oh pil medemedewe duwen inou pwukat, pahn kakele atail pwoson oh atail kanengamah awihawih Koht.—Melkahka 42:5.
18. (a) Nan 2 Korint 1:3, 4, kangoang dah kohwong kitail en wia? (b) Iaduwen sounapwalih en Kristian akan kin wiahla utupen kamweit oh kangoang?
18 Patehng met, Siohwa ketikihong kitail paradais en ngehn ehu, wasa kitail kak paiekihda limpoak mehlel en riatail Kristian brother oh sister kan ni pali ngehn. Kitail koaros ahneki pwukoah en kamweitala riatail kan. (2 Korint 1:3, 4) Sounapwalih en Kristian kan pahn kak keieu kihda kamweit oh kangoang. (Aiseia 32:2) Nin duwen “kisakis en aramas akan,” re kin ale pwukoah ehu en kakele irail kan me lelong kalokolok, “kakehlaka irail kan me nan kapehd tikitik,” oh “sewese me luwet akan.” (Episos 4:8, 11, 12; 1 Deselonika 5:14) Elder kan kin ale kangoange en doadoahngki mwahu makisihn kan en Watchtower oh Awake!, oh pil pwuhk teikan me “ladu lelepek oh loalokong” kin wiahda. (Madiu 24:45-47) Pwuhk pwukat kin oarepene kaweid tohto en Paipel me pahn kak sewese kitail en kapwungala—oh pil dehr lelong—ekei kahpwal akan me kin kahrehda pwunod. Eri, kitail en alasang Siohwa sang ni atail pahn kamweitiala oh kangoange riatail brother kan ni ahnsou me kahpwal akan kin pwarada!
19. (a) Dahme kin sewese kitail en dehr lelong kahpwal akan? (b) Keieu, ihs me kitail pahn liki, oh dahme pahn sewse kitail en dadaur pahn kalokolok kan?
19 Nin duwen kitail kin mih ni imwin rahn akan oh irairen koasoandi wet kin suwedla, Kristian akan kin wia dahme re kak wia en dehr lelong nan kahpwal akan. (Lepin Padahk 22:3) Doadoahngki loalokong, oh pil loalokong en Paipel pahn kak sewese kitail en wiahda pilipil mwahu oh loalokong. (Lepin Padahk 3:21, 22) Kitail kin rong sapwellimen Siohwa Mahsen oh peikiong pwen dehr wiahda sapwung kan. (Melkahka 38:4) Ahpw, kitail ese me atail nannanti sohte pahn kak irehdi kahpwal akan nan atail mour. Nan koasoandi wet, aramas pwung tohto kin lelong kahpwal laud. Ahpw, edetehn kitail lelong kahpwal akan, kitail kak liki ni unsek me “Kauno [Siohwa] sohte pahn ketin kesehla sapwellime kan.” (Melkahka 94:14) Oh kitail ese me koasondi wet oh kahpwal pwukat pahn sohlahr wiawi. Ihme kahrehda, kitail en nantiong wiahda atail pilipil en “dehr pwangahki atail wiewia mwahu kan; pwe ma kitail sohte pahn pwangahkihda, ahnsou pahn leledo kitail ahpw pahn dolung.”—Kalesia 6:9.
Dahme Kitail Sukuhliki?
◻ Kasongosong dahkei pwihn en Kristian kin lelong?
◻ Mehnia poadopoad en Paipel kan me kin sewese kitail en wehwehki me kahpwal akan sohte kin wia kilel me Siohwa sohte kupwureki emen?
◻ Ia sapwellimen Siohwa pepehm ong kalokolok de kahpwal akan me sapwellime aramas akan kin lelong?
◻ Ia ekei kisakis kan me kohsang rehn Siohwa me kin sewese kitail en dadaur kasongosong kan?
[Kilel nan pali 22]
Depit, Napod, oh Sosep iei irail silimen me lelong kahpwal akan