Kolokol Peren ni Ahnsou Apwal akan
“Koaros me kin diar arail wasahn ruk rehmwi [Siohwa] pahn kin pereperen; re kak kokoulki ar peren ahnsou koaros.”—MEL. 5:11.
1, 2. (a) Soahng dah kan me kin kahrehda kapwunod rahnwet? (b) Likin kahpwal kan me aramas koaros kin lelohng, dahme Kristian mehlel akan anahne dadaur?
SOUNKADEHDEHN Siohwa kan pil kin lelohng kahpwal kan me aramas koaros kin lelohng. Tohto sapwellimen Koht aramas akan kin lelohng mwersuwed, mahwen oh pil soangen koasoandi sapwung oh sapahrek kan. Kahpwal me duwehte melimel ape, duhpek, soumwahu oh mehla kin kahrehda kapwunod laud. Wahnpoaron Pohl ntingihdi: “Pwe kitail eseier me audepen lahng oh sampah koaros kin weiweirek, rasehng medek en neitik, lao lel ahnsou wet.” (Rom 8:22) Kitail pil kin lelohng apwal pwehki atail soh unsek. Duwehte Nanmwarki Depit, kitail ele kin nda: “I mwopwlahr nan ahd en dipei kan, dipei kan katoutouwihielahr, I solahr kak wahda.”—Mel. 38:4.
2 Likin kahpwal kan me koaros kin lelohng, Kristian mehlel kan kin ni karasaras kapaikada arail tuhkehn kalokolok. (Luk 14:27) Ei, duwehte Sises, kailok oh kalokolok kin lelohng sapwellime tohnpadahk kan. (Mad. 10:22, 23; Sohn 15:20; 16:2) Eri, kitail anahne nantihong oh dadaur ni atail kin idawehn Krais oh awiawih kapai kan nan koasoandi kapw.—Mad. 7:13, 14; Luk 13:24.
3. Ia duwen atail ese me Koht sohte kupwurki kitail en mourki mour ehu me diren nsensuwed oh lokolok?
3 Met kin wehwehki me Kristian mehlel kan kin mourki mour ehu me sohte peren oh nsenamwahu? Atail mour anahne en mihte nan nsensuwed oh kapahtou lao lel imwin koasoandi wet? Sansal me Siohwa kupwurki kitail en peren ni atail awiawih pweidahn sapwellime inou kan. Pak tohto Paipel kawehwehda me tohnkaudok mehlel kan kin wia aramas peren kei. (Wadek Aiseia 65:13, 14.) Melkahka 5:11 mahsanih: “Ahpw irail koaros me kin diar arail wasahn ruk rehmwi [Siohwa] pahn kin pereperen; re kak kokoulki ar peren ahnsou koaros.” Ei, kitail kak ahneki peren, popohl oh nsenamwahu mendahki ahnsou apwal pwukat. Kitail pahn tehk ia duwen Paipel eh kak sewese kitail en peren mendahki kitail kin lelohng kahpwal kan.
Siohwa—“Koht en Peren”
4. Ia sapwellimen Koht pepehm ahnsou me emen kin soikala sapwellime kaunda?
4 Karasepe, medewehla duwen Siohwa. Nin duwen Koht Wasa Lapalahpie, eh sapwellimanki manaman en kaunda lahng oh sampah unsek. E sohte ketin anahne emen de pil mehkot. Mendahki e sapwellimanki manaman me keieu kehlail, Siohwa kupwurtoutoula ni ahnsou me emen sapwellime tohnleng ko pelianda ih oh wiahla Sehdan. Koht pil kupwurtoutoula ni ahnsou me tohnleng teikan pil iang pelianda ih. Pil medewehla duwen medek me Koht sapwellimanki ni Adam oh Ihp, sapwellime kapikipikda me keieu kaselel nan sampah, ara soikala ih. Sang ni ahnsowo kohdo, kadaudokara lik lik kei pil soikala sapwellimen Siohwa pwung en kaunda.—Rom 3:23.
5. Dahme kin keieu katoutouwihala kupwuren Siohwa?
5 Uhwong me Sehdan tapiada kin wiwiawi lao lel rahn pwukat. Erein sounpar 6,000 samwa, Siohwa kin mahsanih tiahk en pwongih dikedik kan, lemei, mwersuwed oh tiahk en nenek. (Sen. 6:5, 6, 11, 12) Patehng met, e pil ketin karongeier soangen karaun likamw oh lahlahwe kan. Pil ekei sapwellime tohnkaudok kan kin ekei pak kahrehiong en kupwurtoutoula. Paipel doadoahngki lokaia pwukat pwehn kawehwehda ehu soangen irair pwukat: “Ia uwen tohtohn ar kin kahngohdiong nan sapwtehno; ia uwen tohtohn ar kansensuwedihada! Re pwurupwurehngete kasongosonge Koht oh katoutouwihala nan kupwuren Koht Sarawien Israel.” (Mel. 78:40, 41) Medek me Siohwa sapwellimanki ni ahnsou me sapwellime aramas akan kin soikala ih uhdahn laud. (Ser. 3:1-10) Sansal me soahng suwed kan kin wiawi, oh Siohwa kin ketin kupwurtoutoula ni ahnsou me mepwukat kin wiawi.—Wadek Aiseia 63:9, 10.
6. Ia duwen Koht eh kin ketin kilangwohng irair kansensuwed kan?
6 Ahpw medek oh soahng kansensuwed kan sohte kin kauhdi Siohwa. Ni ahnsou me kahpwal kan kin pwarada, Siohwa kin ketin mwadang en mwekid pwehn katikala imwilahn soahng suwed me wiawiher. E pil kin ketin koasoanehdier soahng kan ong ahnsou kohkohdo pwe ni imwi kupwure pahn pweida. Ni eh ketin wiahda soahng mwahu pwukat, Siohwa kin ketin kilikilangwohng ahnsou me kadehdehpen sapwellime pwung en kaunda lahng oh sampah pahn wiawi oh pil kapai kan me sapwellime tohnkaudok lelepek kan pahn alehdi. (Mel. 104:31) Ei, mendahki soahng kansensuwed kan lelohng ih, Siohwa kin ketin wiahte “Koht en peren” men.—1 Tim. 1:11, NW; Mel. 16:11.
7, 8. Ma mie kahpwal, ia duwen atail kak alasang Siohwa?
7 Kitail uhdahn sohte kak kapahrekihong kitail ong Siohwa pwehn apwalihala atail kahpwal kan. Ahpw kitail kak alasang Siohwa ni atail pahn lelohng kahpwal kan. Kitail pahn nsensuwedkihla kahpwal kan, ahpw kitail en dehr kolokol atail nsensuwed. Pwehki kitail kapikipikda rasehng Siohwa, kitail ahneki koahiek en madamadau oh loalokong pwehn kasawih atail kahpwal kan oh kamwahwihala ni uwen atail kak.
8 Ehu ire kesempwal me kak sewese kitail pwehn powehdi atail kahpwal kan iei en ese me mie soahng kan me kitail sohte kak wia. Atail pahn pwunpwunodiki soangen kahpwal pwukat kak kalaudehla atail pwunod oh kihsang atail peren me kohsang kaudok mehlel. Mwurin atail pahn wia uwen me kitail kak pwehn kamwahwihala kahpwalo, e pahn keieu mwahu en manokehla kahpwalo oh kilangwohngete soahng kan me mwahu. Iren Paipel kan en mwuri pahn karasahda duwen met.
Madamadau en Toupahrek Kin Kesempwal
9. Ia duwen Ana eh kasalehda madamadau en toupahrek?
9 Medewehla mehn kahlemeng en Ana me nainekihda soukohp Samuel. E nsensuwedkihla eh sohte kak naineki seri. Mie me kin kasarowe oh kapailoke ih duwen met. Ekei pak, Ana kin mworusala kahrehda e kin sengiseng oh sohte mwenge. (1 Sam. 1:2-7) Ehu pak ni eh kohla kaudok nan tehnpas en Siohwa, Ana “inenen nsensuwed mehlel; ih eri sengiseng oh kapakapohng KAUN-O.” (1 Sam. 1:10) Mwurin Ana kasalehda eh pepehm kan ong Siohwa, samworo lapalap Ilai kohla reh oh nda: “Eri, kohkohwei ni popohl, oh Koht en Israel en ketin kapwaiada omw pekipeken.” (1 Sam. 1:17) Ahnsowo, Ana esehier me e wiahdahr uwen me e kak oh sohte mehkot e kak wia pwehn naineki seri. Ana kasalehda madamadau en toupahrek. Ih eri “kohkohla oh nsenamwahulahr, oh kakehr tungoal.”—1 Sam. 1:18.
10. Soangen madamadau dah Pohl kasalehda ni ahnsou me e lelohng kahpwal ehu me e sohte kak kamwahwihala?
10 Wahnpoaron Pohl pil kasalehda soangen madamadauohte ni ahnsou me e lelohng kahpwal. Eh kahpwalo kahrehda eh kin pwunod laud. E nda me met duwehte “kisin tek kamedek kis.” (2 Kor. 12:7) Sohte lipilipil soangen kahpwal dahieu mwo, Pohl sohte kak kamwahwihala oh kin kapakap ong Siohwa en ketikihsang kahpwalo. Pak depe Pohl kapakap ong Siohwa duwen met? Pak siluh. Mwurin kesiluh en eh kapakap, Koht ketin padahkihong Pohl me “kisin tek kamedek” wet sohte pahn kohsang. Pohl ale kaweid wet oh kin doulahte papah Siohwa ni uwen me e kak.—Wadek 2 Korint 12:8-10.
11. Ia duwen kapakap kak sewese kitail en kamwahwihala atail kahpwal kan?
11 Soangen karasaras pwukat sohte wehwehki me kitail anahne uhdihsang atail kapakap ong Siohwa duwen iren kapwunod kan. (Mel. 86:7) Weksang met, Mahsen en Koht kangoange kitail: “Kumwail dehr pwunodki mehkot, ahpw nan amwail kapakap akan kumwail en peki dahme kumwail kin anahne. Amwail kasapahlkalahngan en pil iang amwail kapakap ahnsou koaros.” Ia duwen Siohwa eh pahn ketin mwekidki atail pekipek karakarahk kan? Paipel pil mahsanih: “Eri, sapwellimen Koht popohl, me inenen laudsang uwen atail dehdehki, ahpw pahn nekinekid mohngiongimwail oh pil amwail lamalam rehn Krais Sises.” (Pil. 4:6, 7) Ei, Siohwa ele sohte pahn ketikihsang atail kahpwal kan, ahpw e pahn ketin sapeng atail kapakap ni eh pahn ketin pere atail kehl en madamadau. Mwurin atail pahn kapakapki ireo, atail madamadau pahn meleileidi oh kitail ele pahn kak kilangada duwen keper en pwunodki kahpwal kan nohk daulihala.
Diar Peren en Wia Kupwuren Koht
12. Dahme kahrehda e keper en kolokol pepehm en mworusala?
12 Lepin Padahk 24:10 kin mahsanih: “Ma ke me luwet ni ahnsou apwal, ke me uhdahn lamalam luwet.” Ehu lepin padahk pil mahsanih: “Ni ar kin nsensuwed, re kin seren pahtou.” (Lep. Pad. 15:13) Ekei Kristian kin nohkla mworus kahrehda re uhdihsang arail kaukaule wia wadawad en Paipel oh doudouloale Mahsen en Koht. Arail kapakap kan solahr wia mehkot kaperen oh ele re pil sohla patehng iengerail tohnkaudok kan. Eri, e sansal me e keper en kolokol atail pepehm en mworusala.—Lep. Pad. 18:1, 14.
13. Ia ekei wiewia kan me kak sewese kihsang nsensuwed oh kihong kitail peren?
13 Ni pali teio, en ahneki madamadau pwung pahn sewese kitail en kilangwohngete wasa kan nan atail mour me kitail kak ahneki peren. Depit ntingihdi: “Maing ei Koht, ia uwen ei kin ngoangki kapwaiada kupwuromwien!” (Mel. 40:8) Ma mehkot sapwungala nan atail mour, kitail en dehr uhdihsang atail koasoandi mwahu en kaudok. Ni mehlel, ehu ahl mwahu en pelian atail nsensuwed iei en iang wiewia kan me kin wahdo peren. Siohwa mahsanihong kitail me kitail kak diar peren oh nsenamwahu ni atail kaukaule wadek sapwellime Mahsen oh kin tehk kanaiehng ire kan. (Mel. 1:1, 2; Seims 1:25) Kitail kin ale koasoi kansenamwahu kan me kak kangoange kitail oh kaperenda mohngiongitail sang nan Paipel oh mihting kan en Kristian.—Lep. Pad. 12:25; 16:24.
14. Mehn kadehde dahieu sang Siohwa me kin kihong kitail peren met?
14 Koht ketikihong kitail kahrepe tohto kitail en peren. Sapwellime inou en komour kin wia ehu utupen peren me inenen laud. (Mel. 13:5) Kitail ese me sohte lipilipil dahme kin wiawihong kitail met, ni imwi Koht pahn ketin katingih irail kan me kin nantihong rapahki ih. (Wadek Eklesiasdes 8:12.) Soukohp Apakuk kasalehda uwen mehlel en met ni eh ntingihdi: “Mehnda ma tuhke pik kan sohte pahn wa, oh sohte wahn wain me pwarada nan mwetin wain kan; mehnda ma tuhke olip kan sohte pahn wa, oh sohte wahnsahpw nan mohs akan; mehnda ma sihpw koaros pahn mehla, oh wasahn kamwenge kou pahn tehnla; ahpw I pahn pereperen oh nsenamwahu, pwehki KAUN-O Koht, iei ei sounkomour.”—Apak. 3:17, 18.
“Meid Pai Aramas akan me Arail Koht Iei KAUN-O!”
15, 16. Ia ekei sapwellimen Koht kisakis me kitail kak perenki ni atail awiawih kapai kan en ahnsou kohkohdo?
15 Ni atail awiawih ahnsou kaselel me nekinek ong kitail ahnsou kohkohdo, kupwuren Siohwa iei kitail en perenki soahng mwahu kan me e ketikihong kitail. Paipel mahsanih: “Eri, I eseier me ihte me aramas emen kak wia: en peren oh wia uwen eh kak [“wia mwahu,” NW] ni ahnsou me e momour. Kitail koaros eri en kin mwenge oh nim, oh nsenamwahuki wahn atail doadoahk, pwe met sang ni kalahngan en Koht.” (Ekl. 3:12, 13) En “wia mwahu” kin pidada atail wiewia mwahu ong meteikan. Sises mahsanih me kihkihwei kin kaperen sang ale. Wiewiahn kadek ong atail pwoud, seri kan, pahpa oh nohno kan, oh kisehtail kan kin wahdo nsenamwahu mehlel. (Lep. Pad. 3:27) En limpoak, kadek, oh kasalehda mahk ong riatail Kristian kan kin imwikihla peren, oh met kin kaperenda Siohwa. (Kal. 6:10; Kol. 3:12-14; 1 Pit. 4:8, 9) Atail kin tounmetei pwehn kapwaiada atail doadoahk en kalohk kin wahdo keting laud.
16 Mahsen kan en Eklesiasdes me kileldi powe kin koasoia duwen soahng kansenamwahu kan en mour me duwehte mwenge oh nim. Ei, mendahki kitail kin lelohng kahpwal kan, kitail kak nsenamwahuki sohte pilipil soangen kisakis kan me kitail kin ale sang Siohwa. Patehng met, kaselel en kihrlahn ketipin kan, wasa kan, mwomwen mahn akan, oh pil kapikipik kaselel teikan, kin kapwuriamwei ong kitail oh pil wahdohng kitail peren. Ni atail kin medewe mepwukat, atail limpoak ong Siohwa kin laudla, pwehki ih me wia Soun Ketikihda soahng mwahu koaros.
17. Dahme pahn kihsang douluhl atail kahpwal kan, oh pil ni ahnsowohte kihong kitail nsenamwahu?
17 Ni mehlel, atail limpoak ong Koht, peikiong sapwellime kehkehlik kan, oh pwoson meirong en tomw pahn kihsang douluhl kahpwal en mour soh unsek oh kahluwa kitaillahng peren kohkohlahte. (1 Sohn 5:3) Ahpw ni ahnsouwet, kitail kin nsenamwahu pwehki kitail ese me Siohwa mwahngih soangen apwal koaros me kin lelohng kitail. Depit ntingihdi: “I pahn nsenamwahu oh pereperen pwehki sapwellimomwi limpoak poatopoat. Komw kin ketin mahsanih ei lokolok; komw pil ketin mwahngih ei apwal.” (Mel. 31:7) Pwehki Siohwa kin ketin poakohng kitail, e pahn ketin doare kitailsang apwal akan.—Mel. 34:19.
18. Dahme kahrehda peren en keieu sansal nanpwungen sapwellimen Koht aramas akan?
18 Ni atail awiawih pweidahn sapwellime inou kan, kitail en kahlemengih Siohwa, Koht en peren. Kitail dehr mweidohng pepehm en nsensuwed en kauhdi kitail sang atail papah Koht. Ni ahnsou me kahpwal pwarada, atail koahiek en madamadau oh loalokong en kin kahluwa kitail. Siohwa pahn ketin sewese kitail en powehdi atail pepehm kan oh wia uwen atail kak pwehn katikala imwila suwed me kahpwal kan kin kahrehda. Kitail en perenki soahng mwahu kan me e ketikihong kitail, atail anahn en paliwar oh pil atail nanpwungmwahu reh. Ni atail kin karanih Koht, kitail pahn peren. Met pwehki “meid pai aramas akan me arail Koht iei KAUN-O!”—Mel. 144:15.
Dahme Ke Sukuhlki?
• Ia duwen atail kak kahlemengih Siohwa ahnsou me kitail kin lelohng kahpwal?
• Ia duwen madamadau toupahrek eh kak sewese kitail en powehdi kahpwal kan?
• Ia duwen atail kak diar peren ni atail wia kupwuren Koht ni ahnsoun kapwunod kan?
[Kawehwehpen kilel kan nan ehu ehu pali 18]
Siohwa kin ketin kupwurtoutoukihla soahng suwed kan
[Kawehwehpen kilel kan nan ehu ehu pali 18]
© G.M.B. Akash/Panos Pictures
[Kawehwehpen kilel kan nan ehu ehu pali 20]
Siohwa ketikihong kitail sawas kan pwe kitail en kolokol atail peren