Powehdi Kahpwal kan ni Eimah

“Koht me perehpatail oh atail kehl, me kin ketin sewese kitail ni ahnsou apwal akan.”​—MEL. 46:1.

KE KAK SAPENG?

Ma kitail sohte men soahng suwed kan nan atail mour en poweikitaildi, dahme kitail kak wia?

Kahrepe dah kan kitail ahneki pwehn kasalehda eimah?

Sawas dah me Siohwa ketikihong kitail pwehn dadaur kahpwal kan?

1, 2. Soahng suwed dah kan kin lelohng aramas tohto? Dahme emenemen kitail men wia?

KITAIL kin mour nan ahnsou apwal kan. Sampah wet kin kalapw lelohng kahpwal. Aramas akan kin lelohng kahpwal laud pwehki rerrer en sahpw, ilok laud, mwasikada, lapake, pwolkeno oh melimel ape. Kahpwal kan nan peneinei oh pein ahn emenemen kahpwal pil kin kahrehda me tohto en nsensuwed oh masepwehk. Nin duwen Paipel eh kasalehda, soahng suwed kan kak wiawihong kitail koaros ahnsou sohte lipilipil.​—Ekl. 9:11.

² Sapwellimen Koht aramas akan kin pousehlahte papah Koht ni peren nan irair apwal pwukat. Ahpw emenemen kitail men onopada pwehn dadaur sohte lipilipil soangen kahpwal kan me pahn kak wiawi ni imwin koasoandi wet eh kerendohr. Ia duwen atail kak pousehlahte papah Koht ni peren ni soahng suwed kan ar kin wiawihong kitail? Dahme pahn sewese kitail en ahneki soangen eimah me kitail anahne?

SUKUHL SANG IRAIL KAN ME KIN KASALEHDA EIMAH

3. Nin duwen Rom 15:4 kasalehda, dahme kak kansenamwahwih kitail ma kitail ahneki kahpwal laud kan?

³ Mendahki kahpwal kan kin lelohng aramas tohto met laudsang mahs, kahpwal laud sohte wia mehkot kapw ong aramas. Kitail kilang dahme kitail kak sukuhlki sang ekei sapwellimen Koht ladu kan mahs me kin kasalehda eimah nan irair apwal akan.​—Rom 15:4.

4. Ia ekei kahpwal kan me Depit anahne dadaur? Dahme sewese ih?

⁴ Medewehla ekei kahpwal kan me Depit anahne dadaur. Nanmwarki Sohl men kemehla. Imwintihti kan mahweniong oh ehu pak re wahsang eh pwoud ko. Ekei nanpwungen nah sounpei ko oh pil ekei eh peneinei oh kompoakepah ko pitihedi. Oh ekei ahnsou, e kin nsensuwedla. (1 Sam. 18:8, 9; 30:1-5; 2 Sam. 17:1-3; 24:15, 17; Mel. 38:4-8) Paipel kasalehda uwen Depit eh lokolok pwehki kahpwal pwukat. Ahpw soahng suwed pwukat sohte kaluwetehla eh pwoson Siohwa. Ni mehlel, e nda: “KAUN-O kin ketin sile sang ie soahng keper kan koaros; I sohte pahn masak mehkot.”​—Mel. 27:1; wadek Melkahka 27:5, 10.

5. Dahme sewese Eipraam oh Sara en peren mendahki ara ahneki mour apwal?

⁵ Eipraam oh Sara kin kousoan nan impwal kan pali laud en ara mour. Ira wia mehn likih kei nan wasa kan me ira sohte wehwehki. Mour sohte kin ahnsou koaros mengei ong ira. Karasepe, ira lelohng lokolok pwehki lehk laud ehu oh pwehki keper kan sang wehi kan me kapilpene ira. Ahpw ira eimah oh dadaur pahn soahng pwukat koaros. (Sen. 12:10; 14:14-16) Dahme sewese ira en dadaur? Mahsen en Koht padahkihong kitail me Eipraam “awiawih kahnimw ehu me Koht ketin kupwurehla oh kauwada, kahnimw me poahsoan poatopoat.” (Ipru 11:8-10) Eipraam oh Sara sohte mweidohng mour apwal en kahrehiong ira en nsensuwed. Ahpw ahnsou koaros ira kin tamataman dahme Koht ketin inoukihong ira.

6. Ia duwen atail kak alasang Sohp?

⁶ Sohp iei emen me lelohng lokolok laud. Medewehla ia eh pepehm ni ahnsou me soahng koaros nan eh mour mwomwen suwedla. (Sohp 3:3, 11) E pil sohte uhdahn wehwehki dahme kahrehda soahng pwuko wiawihong ih. Ahpw mendahki eh mi nan irair wet, e sohte uhdihsang eh nannanti. E kolokol eh lelepek oh pwoson Koht. (Wadek Sohp 2:3.) Met uhdahn wia mehn kahlemeng mwahu ong kitail!

7. Ia ekei soahng kan me Pohl lokolongki nan eh papah Koht? Dahme kihong ih eimah en pousehlahte?

⁷ Pil medewehla mehn kahlemeng en wahnpoaron Pohl. E ntingihedi me e lelohngehr irair keper akan nan kahnimw, sapwtehn oh nan madau. E koasoia me e kin “duhpekla oh men nimpilda” oh e ‘sohte kin diar wasahn pweidi de eh likou.’ Pohl pil koasoia me ekei pak e iang sohp me kihrla oh pwehki met, ehu pak e peipeikiseli nan madau pwohng ehu oh rahn ehu. (2 Kor. 11:23-27) Mendahki eh mour mihla nan apwal, e kolokolete eh madamadau pwung. Ehu pak mwurinte eh kereniong kamakamala pwehki eh kin papah Koht, e nda: “Ahpw mepwukat wiawihong kiht, pwe se en dehr koapworopworki pein kiht ahpw Kohtohte me kin ketin kaiasada me melahr akan. Ih me ketin doareikitala sang soangen apwal en mehla pwukat, oh ih me pil pahn ketin doareikitala.” (2 Kor. 1:8-10) Kaidehn me tohto lelohngehr uwen tohtohn irair keper me Pohl lelohng. Ahpw ekei pak, tohto rehtail kin ahneki soangen pepehm me e ahneki. Kahrehda eh mehn kahlemeng en eimah kak kansenamwahwih kitail.

DEHR UHDI PWEHKI KAHPWAL KAN

8. Ia duwen kahpwal kan en rahnwet ar kak kamwakid kitail? Menlau karasahda.

⁸ Nan sampah rahnwet kin diren kahpwal laud oh pil irair kapwunod kan me kin kahrehda me tohto en pehm me arail kahpwal kan nohn laud de nohn tohto. Pil sapwellimen Koht ladu kan kin ahneki soangen pepehm wet. Lani,a kin perenki iang eh pwoud wia doadoahk en pioneer nan Australia ni ahnsou me e diarada me e ahneki kanser en dihdi. Met uhdahn kapwuriamwei ong ih. E nda me wini me e kin ale ko kin kahrehda eh uhdahn soumwahu oh e kin pehm me sohte katepen eh mour. Ni ahnsowohte, e pil anahne apwalih eh pwoudo mwurin toahkte kan ar pwalang tihnseweo. Ma kitail mi nan soangen irairo, dahme kitail kak wia?

9, 10. (a) Dahme kitail en dehr mweidohng Sehdan en wia? (b) Soangen madamadau dah me kak sewese kitail en dadaur “soangen kahpwal tohto” me kileldi nan Wiewia 14:22?

⁹ Ni soahng suwed kan ar kin wiawihong kitail, kitail anahne tamataman me Sehdan kin men doadoahngki mepwukat pwehn kaluwetehla atail pwoson oh kihsang atail peren. Ahpw kitail en dehr mweidohng ih en wia met. Lepin Padahk 24:10 mahsanih me ma kitail mworusala, kitail sohte pahn ahneki kehl en dadaur atail kahpwal kan. Ma kitail kin doudouloale mehn kahlemeng kan sang Paipel, duwehte me kitail koasoiapenehr mwoweo, kitail kak ahneki eimah me kitail anahne ma kitail ahneki kahpwal kan.

¹⁰ E pil mwahu en tamataman me kitail sohte kak kihsang kahpwal koaros. Ni mehlel, kitail kak kasik kahpwal kan. (2 Tim. 3:12) Wiewia 14:22 padahkihong kitail: “Kitail uhdahn pahn powehdi soangen kahpwal tohto pwe kitail en kak pedolong nan Wehin Koht.” Ke dehr mweidohng kahpwal kan en kamworuseiukala, ahpw ke kak medewe me soahng pwukat kin kihong uhk ahnsou mwahu ken kasalehda me ke pwoson me Koht sapwellimanki koahiek en ketin sewese iuk.

11. Ma kitail sohte men soahng suwed kan nan atail mour en kamworuseikitailla, dahme kitail kak wia?

¹¹ Kitail anahne medemedewehte soahng mwahu kan nan atail mour. Mahsen en Koht padahkihong kitail me “ni aramas ar kin peren, re kin kouruhr,” de e kin mwahuong kitail, ahpw “nsensuwed” kak kihong kitail pahtou. (Lep. Pad. 15:13) Ma kitail kin ahnsou koaros medemedewe soahng kan me kitail sohte kak wekidala nan atail mour, kitail pahn mworusala. Kitail kin kalahnganki Siohwa eh ketikihong kitail sawas. Mehnda ma pil ahnsoun kahpwal laud, e pahn ketikihong kitail kangoang sang sapwellime Mahsen, utuht sang riatail Kristian kan oh kehl sang sapwellime manaman. Soahng pwukat iei me kitail en medemedewe oh me pahn kihong kitail peren. Dehr medemedewe soahng suwed kan nan omw mour, ahpw wia dahme ke kak pwehn dadaur ehuehu kahpwal oh medemedewehte soahng mwahu kan me ke ahneki.​—Lep. Pad. 17:22.

12, 13. (a) Dahme kin sewese sapwellimen Koht ladu kan ren dadaur kahpwal kan? Menlau karasahda. (b) Ia duwen kahpwal kan ar kin sewese kitail en pohnese dahme keieu kesempwal nan atail mour?

¹² Nan atail ahnsou, kahpwal laud kan kin wiawi nan ekei sahpw. Kitail kak sukuhlki sang riatail Kristian kan duwen arail kin dadaur nan irair pwuko mendahki e sohte mengei ong irail. Nan February, 2010, rerrer en sahpw oh ilok laud ehu nan Chile kauwehla imwen riatail Kristian kan oh pil arail kepwe tohto. Ekei sohla arail doadoahk. Mendahki re mi nan irair wet, riatail kan kin soupisengki sapwellimen Siohwa doadoahk. Samuel me imweo uhdahn ohla koasoia: “Mendahki soangen apwal pwukat, ngehi oh ei pwoud sohte uhdihsang iang towehda mihting kan oh pil kalohk. I kamehlele me at kin kalapw wia soahng pwukat sewese kiht sen dehr sohla ahneki koapworopwor.” Ira oh Kristian tohto teikan sohte mweidohng kahpwalo en kamworuseirailla ahpw re pousehlahte ngoangki papah Siohwa.

¹³ Nan September, 2009, keteu laud kahrehda lapake nan pali laud en kahnimw kan en Manila, Philippine. Ohl kepwehpwe men me eh kepwe tohto sohla mie nda me lapakeo lelohng me tohto oh kahrehda “kahpwal oh lokolok ong me kepwehpwe oh pil me semwehmwe.” Met katamankihong kitail sapwellimen Sises kaweid erpit: “Kumwail ngoangki kepwehpwehkihla paien nanleng, me mer oh loangenmwet sohte kin kauwehla, oh wasa me aramas lipirap akan sohte kak dapengpeseng ihmw akan oh pirap ie.” (Mad. 6:20) Mwohni oh dipwisou kan kak mwadang sohrala, eri aramas akan me kin mwohneki mepwukat nan arail mour kin kalapw nsensuwedla. E uhdahn wia elen loalokong en mwohneki mahs Siohwa nan atail mour pwehki kitail kak pousehlahte kompoakepahnki ih sohte lipilipil dahme kin wiewiawi.​—Wadek Ipru 13:5, 6.

KAHREPE KAN KITAIL AHNEKI EN KASALEHDA EIMAH

14. Kahrepe dah kan kitail ahneki en kasalehda eimah?

¹⁴ Sises mahsanihong sapwellime tohnpadahk ko me e pahn mie kahpwal kan ni ahnsou e ketier, ahpw e mahsanih: “Kumwail dehpa salohda.” (Luk 21:9) Mie kahrepe mwahu kan me kitail ahneki en kasalehda eimah pwehki atail Nanmwarki Sises Krais oh Sounkapikpen lahng oh sampah, Siohwa, kin ketin sewese kitail. Pohl kangoange Timoty ni eh nda: “Pwe Koht kin ketikihong kitail kaidehn irair en masak, ahpw kehl oh limpoak oh madamadau pwung.”​—2 Tim. 1:7, NW.

15. Dahme ekei sapwellimen Koht ladu kan ndahki arail kin likih ih? Ia duwen atail kak ahneki soangen eimahohte?

¹⁵ Paipel padahkihong kitail dahme ekei sapwellimen Koht ladu kan ndahki arail kin likih ih. Karasepe, Depit nda: “KAUN-O kin ketin sinsile oh doandoare ie; I kin likih. E kin ketin sewese ie oh kaparanih ie.” (Mel. 28:7) Pohl koasoia: “Ni soahng pwukat koaros kitail powehdier unsek sang ni manaman en ih me ketin loalloaleikitailehr!” (Rom 8:37) Ni ahnsou me Sises mwahngih me e pahn kereniong selidi oh kamakamala, e mahsanih mehkot me kasalehda ni sansal me eh nanpwungmwahu rehn Koht kin kehlail. E mahsanihong sapwellime tohnpadahk ko: “I sohte uhdahn pahn kelehpwla, pwe Semei kin ketin ieiang ie.” (Sohn 16:32) Dahme sapwellimen Koht ladu pwukat kasalehda nan arail koasoi kan? Re kasalehda me irail koaros kin likih Siohwa ni unsek. Ma kitail sukuhlki en likih Koht ni ahlohte, kitail kak ahneki eimah me kitail anahne nan soangen irair apwal koaros.​—Wadek Melkahka 46:1-3.

PAIEKIHDA SAWAS KAN ME KOHT KETIKIHONG UHK

16. Dahme kahrehda e kesempwal ong kitail en onopki Mahsen en Koht?

¹⁶ Eimah me kitail anahne sohte kin kohsang atail likih pein kitail ahpw e kin kohsang atail likih Koht. Kitail kak ahneki eimah ma kitail kin kaukaule onopki sapwellime Mahsen, Paipel. Ma kitail wia met, kitail kin esehla Koht oh sukuhlki en likih ih. Sister men me ahneki soumwahu en pwunod laud kawehwehda me ni eh kin pwurepwurehng wadek iren Paipel kan me kin kakehlaka ih, e kin nsenamwahula. Kitail kin wia atail Kaudok en Peneinei nan wihk koaros nin duwen me ladu lelepek oh loalokong kaweidkin kitail? Atail onopki Mahsen en Koht kak sewese kitail ahneki madamadau en sounmelkahkao me koasoia: “Ia uwen ei poakohng sapwellimomwi kosonnedo! I kin medemedewe sang nimenseng lel nipwong.”​—Mel. 119:97.

17. (a) Ia pil ehu ahl me Siohwa kin ketin sewese kitail en ahneki eimah? (b) Ia duwen koasoiepen riatail kan nan neitail sawaspen Paipel kan ar kin sewese iuk?

¹⁷ Pil ehu ahl me Siohwa kin ketin sewese kitail en ahneki eimah iei sang ni eh ketikihda sawaspen Paipel kan me padahkihong kitail duwen sapwellime Mahsen oh sewese kitail kalaudehla atail likih ih. Karasepe, koasoiepen riatail Kristian kan nan neitail kisin pwuhk kan sewesehier me tohto. Emen sister nan Eisia me ahneki soumwahu en pwunod laud ale kangoang sang eh wadek duwen koasoiepen emen brother. Brothero wia emen misineri mahs oh ahneki soangen soumwauohte. Mendahki met, brothero kin pousehlahte papah Koht ni lelepek. Sistero koasoia: “E sewese ie en wehwehki ei kahpwalo oh kihong ie koapworopwor.”

18. Dahme kahrehda kitail anahne kapakap ahnsou koaros?

¹⁸ Siohwa pil kin ketin doadoahngki kapakap pwehn sewese kitai. Kapakap pil kak sewese kitail nan irair koaros. Wahnpoaron Pohl kasalehda uwen kesempwal en kapakap ni eh koasoia: “Kumwail dehr pwunodki mehkot, ahpw nan amwail kapakap akan kumwail en peki dahme kumwail kin anahne. Amwail kasapahlkalahngan en pil iang amwail kapakap ahnsou koaros. Eri, sapwellimen Koht popohl, me inenen laudsang uwen atail dehdehki, ahpw pahn nekinekid mohngiongimwail oh pil amwail lamalam rehn Krais Sises.” (Pil. 4:6, 7) Ia duwe, kitail kin ahnsou koaros kapakapki sawas pwehn dadaur irair apwal kan? Alex, brother men nan Britain me ahneki soumwahu en pwunod laud ahnsou werei, nda me dahme kin keieu sewese ih iei eh kin ’patohong Siohwa ni kapakap oh rong ih sang eh kin wadek sapwellime Mahsen.’

19. Ia uwen kesempwal en iang towehda mihting kan?

¹⁹ Mihting kan pil iei ehu ahl me Siohwa kin ketin sewese kitail. Sounmelkahkao ntingihedi me e kin men mi nan tehnpas en Siohwa. (Mel. 84:2) Ia duwe, kitail kin ahneki soangen pepehmohte? Lani, me kitail koasoia mwoweo, nda me e uhdahn kesempwal ong ih en iang towehda mihting koaros oh patehng rie Kristian kan. E nda: “I ese me I anahne mi wasao ma I men Siohwa en ketin sewese ie.”

20. Ia duwen atail kin kedirepwki doadoahk en kalohk eh kin sewese kitail?

²⁰ Kitail pil kin ahneki eimah ni atail kin kedirepwkihla doadoahk en kalohk. (1 Tim. 4:16) Sister men nan Australia me kin ahneki kahpwal tohto nda: “I sohte kin men iang doadoahk en kalohk, ahpw elder men luke ie ien iang ih kalohk. Eri I kohla iang ih. Siohwa uhdahn kin ketin sewese ie pwehki ehuehu ahnsou me I kin kalohk, I uhdahn kin peren.” (Lep. Pad. 16:20) Me tohto diarada me ni arail kin sewese meteikan ren pwoson Siohwa, re pil kin kakehlakahda pein arail pwoson. Ni arail kin sewese meteikan, re kak uhdihsang medewe pein arail kahpwal kan oh re kin medemedewehte “dahme keieu mwahu.”—Pil. 1:10, 11.

21. Dahme kitail kak kamehlele mehnda ma mie atail kahpwal kan?

²¹ Siohwa ketikihong kitail soahng tohto me kak sewese kitail en dadaur atail kahpwal kan. Ma kitail kin mweidohng en ketin sewese kitail, kitail kak peren mehnda ma mie atail kahpwal. Kitail pil kak sukuhlki en eimah ni atail kin doudouloale mehn kahlemeng mwahu kan en sapwellimen Koht ladu kan oh alasang irail. Mendahki kitail ele pahn ahneki kahpwal tohto ni imwin koasoandi wet eh kerendohr, kitail kak ahneki soangen pepehm me Pohl ahneki ni eh nda: “Ekei ahnsou paliwarat lellel, se ahpw sohte ohla douluhl” oh “sohte kin loaltikla.” (2 Kor. 4:9, 16) Sang sapwellimen Siohwa sawas, kitail kak ahneki eimah pwehn dadaur atail kahpwal kan.​—Wadek 2 Korint 4:17, 18.

[Nting tikitik me kileldi pah]

[Kilel nan pali 14]

Ni omw kin lelohng kahpwal, doadoahngki sawas kan me Siohwa ketikihda