Lamalam Kehlail Kin Ale Kakehlepe Sang Ni Limpoak

“Pwe ngehn sarawi me Koht kin ketikihong kitail sohte kin kahrehiong kitail masak, ahpw sapwellime ngehno kin ketin audehkinkitailda manaman, limpoak, oh kin sewese kitail en kakaun atail ineng kan.”—2 TIMOTY 1:7.

1, 2. (a) Dahme limpoak kak kamwekid aramas en wia?(b) Dahme kahrehda sapwellimen Sises nan kupwur kehlail wiahki mehkot tohrohr?

PWOPWOUD kapw ehu me ahpwtehn kapwopwoud kohla duhki dengk ni oaroahr ni pali mesehn Australia. Ira duhdu kohda kereniong pahn pwar pohn sehdo ah lapalahn pako pwetepwet men pa wiahkintehieu tangalahng liho. Pwe en doarehla mouren liho, ah pwoud ohlo, alehte sikenlahsang liho pwe pakou en uhd ale ih. Ni ahnsou en seridi en ohlo, liohdio koasoia: “E tounmeteikihla ah mour pwehki ngehi.”

² Ehi, limpoak kak kahrehiong aramas akan en kasalehda lamalam kehlail ni ahl tohrohr ehu. Pein Sises Krais mahsanih: “Iet limpoak me keieu laud me emen kak ahneki ong kompoakepah kan, ma e pahn tounmeteikihla eh mour pwehki kompoakepah ko.” (Sohn 15:13) Sohte lel awa 24 mwurin Sises ah mahsanih mepwukat, e ahpw toukihda pein moure, kaidehn pwehki aramas tehmen, ahpw ohng tohnsampah koaros. (Madiu 20:28) Laudsang met, Sises sohte ni kisin ahnsoutehkis lemehdahte ketikihda sapwellime mour pwehn kasalehda lamalam kehlail. E mwahngihkihier ahnsou reirei me e pahn ketin lelohng kapailok oh wiakaula, oh kopwung sapwung, oh eri kamatala nin tuhkeo. E pil kaunopadahng sapwellime wahnpoaron akan ohng dahme pahn wiawi, oh e mahsanih: “Kumwail kilang, pwe kitail kohkohdalahng Serusalem, wasa me Nein-aramas pahn pengipengla rehn samworo lapalap akan oh sounkawehwehn Kosonned kan. Re pahn kadeikada pwe en kamakamala, oh pangala rehn mehn liki kan. E ahpw pahn wiahla mehn kepit rehrail; re pahn kendipiong, wokih, oh kemehla.”—Mark 10:33, 34.

3. Dahme pil kahrehiong Sises en sapwellimaniki nan kupwur kehlail?

³ Dahme kahrehiong Sises ah sapwellimaniki nan kupwur kehlail ni ahl tohrohr? Pwoson oh lahn Koht me wia poahsoan keieu laud ohng en kak sapwellimaniki irair wet. (Ipru 5:7; 12:2) Laud sang mehkoaros, sapwellimen Sises nan kupwur kehlail kohsang ni sapwellime limpoak ohng Koht oh aramas akan me pein sapwellime. (1 Sohn 3:16) Ma mie soangen limpoak wet rehtail oh iangahki pwoson oh lahn Koht, kitail pahn pil kak iang ahneki soangen lamalam kehlail me Krais sapwellimanki. (Episos 5:2) Iaduwen atail kak kekeirada soangen limpoak wet? Kitail anahne pohnese iawasa soangen limpoak wet kin tepisang ie.

“Limpoak Kin Kohsang Rehn Koht”

4. Dahme kahrehda kitail kak nda me Siohwa me utupen limpoak?

⁴ Pein Siohwa kin ketin wia kasalepen limpoak oh utupen limpoak. Wahnpoaron Sohn ntingihdi: “Kompoakepahi ko! Kitail en poakpene, pwehki limpoak kin kohsang rehn Koht. Pwe mehmen me ahneki limpoak, iei ih sapwellimen Koht, oh pein ih kin ese Koht. Ahpw mehmen me sohte ahneki limpoak kin sehse Koht, pwe Koht iei limpoak.” (1 Sohn 4:7, 8) Kahrehda limpoak me ki rasehng sapwellimen Koht, ieite ahnsou me e kak kekeirada rehn loalen aramas emen, iei ni ah pahn kin karanih Siohwa, ki ah pahn ahnekihda loalokong pwung oh mwekidki oh peikiong audepen loalokongo sang nan mohngiongi.—Pilipai 1:9; Seims 4:8; 1 Sohn 5:3.

5, 6. Dahme sewese iengen Sises en mahs oko, ren ahnekihda limpoak me rasehng sapwellimen Krais?

⁵ Ni kaimwiseklahn sapwellime loulou me Sises ketin wia ni ah ket rehn sapwellime wahnpoaron lelepek 11 oko, Sises kasalehda duwen doadoahkpenehn ese Koht oh kekeirada limpoak, ni eh mahsanih: “Ngehi me kahrehiong irail en esei komwi, oh I pil pahn usehla wiewia met pwe limpoak me komw ketin wiahiong ie en mi rehrail, oh I en pil kak mi rehrail.” (Sohn 17:26) Sises ketin sewesehki sapwellime wahnpoaron akan ong ahneki soangen limpoakohte me kin mie nanpwungen ih oh Semeo, oh met kin sansaliki lokaia oh mehn kahlemeng ohng wehwepen mwaren Koht—sapwellimen Koht irair kaselel akan. Kahrehda, Sises ah kak mahsanih: “Mehmen me kilangieier pil kilangehr Sahm.”—Sohn 14:9, 10; 17:8.

⁶ Irair en limpoak me rasehng sapwellimen Krais kin kohsang ni sapwellimen Koht ngehn sarawi. (Kalesia 5:22) Ni ahnsou me Kristian en kawa ko ale ngehn sarawi me inouda nan Pendekos 33 C.E., irail sohte ihte tamanda soahng tohto me Sises ketin padahkiong irail, ahpw irail pil wehwehkihda laud wehwehn iren Pwuhk Sarawi kan. E sansal mwahu me kamarain loal wet inenen kekeirada arail limpoak ong Koht. (Sohn 14:26; 15:26) Ia imwilah? Mendahte ma arail mour mihla nan irair keper irail kin kalohki rongamwahu ni lamalam kehlail oh ngoang.—Wiewia 5:28, 29.

Kasalehda Lamalam Kehlail oh Limpoak ni Wiewia

7. Soangen lokolok dah kan me Pohn oh Parnapas lelohng ni ara wia seiloak en missionary?

⁷ Wahnpoaron Pohl ntingihdi,: “Ngehn sarawi me Koht kin ketikihong kitail sohte kin kahrehiong kitail masak, ahpw sapwellime ngehno kin ketin audehkinkitailda manaman, limpoak, oh kin sewese kitail en kakaun atail ineng kan.” (2 Timoty 1:7) Pohl wasaht kin koasoi sang dahme pein ih lelohng nan ah mour. Tamataman dahme ih oh Parnapas lelohng ni ara kin wiewiapene ara seiloak en missionary. Ira kin kalohk nan kahnimw tohto, iangahki Andiok, Aikoniomw, oh Listra. Nan ehuehu kahnimw akan, ekei aramas akan pwosonla mahseno, ahpw ekei irail kin uhwong oh inenen men peiong ira. (Wiewia 13:2, 14, 45, 50; 14:1, 5) Nan Listra polohn aramas ieu kate Pohl, oh kesehla ih wasao pwe en mehla! “Eri, nindokon irail ko me pwosonlahr ar kapikapil, Pohl ahpw pwourda oh pwuralahng nan kahnimwo. Pweidi songada, Pohl oh Parnapas ahpw douluhllahng Derpe.”—Wiewia 14:6, 19, 20.

8. Iaduwen lamalam kehlail me Pohl oh Parnapas ahneki kin wia kasalepen ara limpoak laud ohng aramas akan?

⁸ Dahme wiawihong Pohl kin kamasakada ih oh Parnapas pwe ira en uhdihsang ara doadoahk en kalohk? Soh! Mwurin ara “kalohkiseli Rongamwahu nan Derpe, oh aramas tohtohie me pwosonla,” ohl riemeno “pwuralahng Listra, oh douluhllahng Aikoniomw oh Andiok.” Pwekida? Pwe ira en kangoange irail me kapw akan en kolokolete arail pwoson. Pohl oh Parnapas mahsanih: “Kitail uhdahn pahn powehdi soangen kahpwal tohto pwe kitail en kak pedolong nan Wehin Koht.” E sansal mwahu, ara lamalam kehlail kohsang ni ara ahneki limpoak loal ohng sapwellimen Krais “kisin pelien sihpw akan.” (Wiewia 14:21-23; Sohn 21:15-17) Mwurin ara idihadahr elder kan en mwomwohdiso kapw pwukat, brother riemen pwukat eri kapakap oh “kasarawihirailla ong Siohwa me re kin koapworopworki.”

9. Ia mwomwen elder en Episos akan arail mwekidiki ahn Pohn limpoak ohng irail?

⁹ Pohl wia aramas nsenoh oh lamalam kehlail men me kahrehda Kristian tohto en kawao, inenen poakepoakehla ih. Nna tamataman dahme wiawi nan mihding ieu me Pohl oh elder kan wia nan Episos, wasa ieu me Pohl mihmihki sounpar siluh oh tohn wasao kin inenen uhwong ih laud. (Wiewia 20:17-31) Mwurin ah kangoangehkin irail en apwalih pelien sihpw akan me Koht ketikihongehr pahn arail epwel, Pohl eri iang irail kelepwikihdi oh kapakap. Eri, “Irail koaros ahpw pwoalehdi Pohl, sengiseng oh metik. Re ahpw inenen nsensuwedkihla koasoio me dene irail sohte pahn pil pwurehng kilang.” Brother oko ahneki limpoak laud ong Pohl! Ni mehlel, ni ahnsou me irail pahn mweselpeseng, Pohl oh ienge ko anahne ‘pein kakalahsang rehrail,’ pwehki elder kan wasao sohla kak kadar irailla.—Wiewia 20:36–21:1.

10. Iaduwen sapwellimen Siohwa sounkadehde kan nan rahnwet kin kasalehda limpoak ni eimah ohng emenemen?

¹⁰ Nan rahnwet, sounapwalih mwemweit kan, elder en mwomwohdiso kan, oh aramas tohto teikan kin ale limpoak laud pwehki eimah me re kasalehiong sapwellimen Siohwa sihpw akan. Karasepe, nan wehi kan me sohte meleilei pwehki mahwin oh pil wasa me doadoahk en kalohk kin irairdi, sounapwalih mwemweit kan oh arail pwoud kin kihong arail mour oh saledek nan irair en keper pwe ren kak pas nan mwomwohdiso kan. Pil ni ahlohte, Sounkadehde tohto ki lelohng apwal rehn kaunen wehi lemei kan oh neirail papah kan pwehki Sounkadehde pwukat arail sohte men pangala iangarail akan oh pil sohte kin men kasalehda iawasa re kin alehsang ie mwengehn ngehn akan. Irail tohtohsang kid kei me kin ale kamakam, lokolok, oh kamakamala pwehki irail sohte kin uhdi sang arail kin kalohki rongamwahu oh sang arail patehng iangarail me pwoson akan ni ahnsoun mihding en Kristian akan. (Wiewia 5:28, 29; Ipru 10:24, 25) Kitail en kahlemengih pwoson oh limpoak en brother oh sister lamalam kehlail pwukat!—1 Deselonika 1:6.

Ke Dehr Mweidohng Omw Limpoak en Loula

11. Ni ahl dah kan me Sehdan kin wia mahwin en pali ngehn ohng sapwellimen Siohwa aramas akan, oh dahme irail anahne wia?

¹¹ Ni ahnsou me Sehdan piskendidohng sampah, e koasoanehdi en kauwohng ah lingeringer rehn sapwellimen Siohwa ladu kan, pwehki re kin “kapwaiada kosonned en Koht kan oh kin [kadehde duwen] Sises.” (Kaudiahl 12:9,17) Ehu ahn Tepil widing iei kaloke aramas. Ahpw, pak tohto, wiepen doadoahk wet kin pwurodohng ih suwed sang mahs, pwe e kin kahrehiong sapwellimen Koht aramas akan ar kin kolokolpene teng nan arail limpoak en Kristian oh kin kahrehiong irail me tohto en kalaudehla arail pwerisek nan doadoahk en Koht. Pil ehu ahn Sehdan widing, iei en kasonge aramas ki arail ineng suwed kan me re kin luwetiki. Powehdi soangen wiepe wet kin anahne pil ehu soangen lamalam kehlail tohrohr pwehki pei wet kin wiawi nan pein loalen aramaso, pwehn kin pelipelian ineng sapwung kan me kohsang nan pein atail mohngiong ‘widing kan.’—Seremaia 17:9; Seims 1:14, 15.

12. Iaduwen Sehdan ah kin doadoahngki “ngenen sampah” ni ah kin song en kaluwetala atail limpoak ohng Koht?

¹² Nanpwungen ahn Sehdan dipwisou en mahwin akan, mie pil ehu me inenen kehlail—“ngenen sampah” iei ah mehn kasonge luwet en aramas pwe ren uhwong sapwellimen Koht ngehn sarawi. (1 Korint 2:12) Ngenen sampah kin kangoangehki aramas en roporop oh noahrok kepwe—“ineng en mehkan me aramas kin kilang.” (1 Sohn 2:16; 1 Timoty 6:9, 10) Edetehn dipwisou oh mwohni kaidehn mehkan me suwed, ahpw ma kitail poakohng mepwukat laud sang atail poakohng Koht, eri Sehdan pahn poweikitaildi. Kehl de “manaman,” en ngenen sampah, kin kohsang atail inengieng wia dipen uduk, oh e pil kin rir ohng kitail en mwadangete kasawihada, e kin kahrehda soukautih, oh e kin duwehte kisinieng me mih wasa koaros. Ke dehr mweidong ngenen sampah en kasoumwahuihada mohngiongomw!—Episos 2:2, 3; Lepin Padahk 4:23.

13. Iaduwen atail lamalam kehlail ohng wia tiahk min, a pahn lelohng kasongpe?

¹³ Pwehn kak liksang oh katohreiuksang ngehn suwed en sampah wet, ke anahne kehlail nan irair en mwakelekel. Karasepe, e anahne lamalam kehlail en kesihnenda aluhwei sang nan imwen kasdo ieu de en kakunla computer de TV ni ahnsou me kilel suwed kan kin pwarada. E kin anahne lamalam kehlail en pelianda ineng en patehng oh alasang iangatail akan oh en pil uhdihsang werek suwed. Pil duwehte met, e anahne lamalam kehlail pwe kitail en kolokol kosonned en kaweid en Koht akan, ni aramas ar pahn kin kepitkin kitail, sohte lipilipil ma iangatail tohnsukuhl, de iangatail tohndoadoahk, de mehn mpatail de atail peneinei kan.—1 Korint 15:33; 1 Sohn 5:19.

14. Dahme kitail en wia ma kitail ohkihlahr ngenen sampah?

¹⁴ Eri, ia uwen kesempwal kitail en kakehlakahla atail limpoak ohng Koht oh riatail akan ni pali ngehn! Kihong ahnsou en kasawih atail mehn akadei kan oh atail elen mour en kilang ma ngenen sampah sou kauweikitaillahr ni soangen ahl soh lipilipil. Ma iei—mehnda ma e tikitik—kitail en kapakap ong Siohwa en ketikihong kitail lamalam kehlail pwehn sewese usadahsang oh kihsang douluhl met sang nan atail mour. Siohwa sohte pahn ketin likidmeliehla soangen pekipek mehlel wet. (Melkahka 51:17) Laudsang met, sapwellime ngehn inenen kehlail sang ngenen sampah.—1 Sohn 4:4.

Lelohng Pein Kasongosong kan ki Lamalam Kehlail

15, 16. Iaduwen limpoak me rasehng sapwellimen Krais ah kin sewesei kitail en powehdi pein atail apwal akan? Kihda mehn karasepe.

¹⁵ Ekei elen songosong me sapwellimen Siohwa ladu kan kin lokolongki iei me pid apwal en soh unsek en war akan oh apwal en mahla, me pak tohto kin imwikihla soumwahu, mwoatorala, pwunod oh soangen kahpwal tohto teikan. (Rom 8:22) Limpoak me duwehte sapwellimen Krais kak sewesei kitail en powehdi soangen kahpwal pwukat. Kilang karasepen Namangolwa, me keirada nan peneinei Kristian ieu nan Zambia. Ni ahnsou me e sounpahr riau, Namangolwa mwoatorala. E nda: “I kin namenek pwe I lemeleme me aramas pahn pwuriamweikihla mwomwei. Ahpw riei kan ni pali ngehn sewesei ie ien kilangwohng met ni ahl tohrohr ehu. Imwilahn met, I powehdi ahi namenek, oh mwurin mwo I papidaisla.”

¹⁶ Edetehn Namangolwa mie were wheelchair, e kin kalapw anahne aluhki peh kan oh pwukie kan nan ahl me pihk. Ahpw e kin iang kalohk oh wia auxiliary pioneer sounpwong riau de tohtohsang nan ehuehu pahr. Emen tohnihmw sengiseng ni ahnsou me Namangolwa padahk ong ih. Pwekida? Pwehki kapehde inenen mwekidki ahn sister menet ah pwoson oh lamalam kehlail. Me wia kasalepen sapwellimen Siohwa kapai, aramas limen me onop Paipel rehn Namangolwa papidaisla oh emen irail wiahla elder en mwomwohdiso. E nda: “Neikat kin inenen weirek ahpw I sohte mweidohng met en kauiehdi.” Sister menet iei emen nanpwungen Sounkadehde tohtohie nan sampah pwon me ahneki kahpwal en paliwar ahpw kehlail ni pali ngehn pwehki arail limpoak ohng Koht oh mehn mparail akan. Ia uwen arail kin kesempwal mwohn silangin Siohwa!—Akkai 2:7.

17, 18. Dahme kin sewese aramas tohto en kin kak dadaurete pahn arail soumwahu oh kasongosong kan? Kihda ekei karasepe nan pein omw wasa.

¹⁷ Kohwa soumwahu kak wia mehkot kamworus oh kansensuwed. Emen elder en mwomwohdiso koasoia: “Nan pwihn en onop en pwuhk (book study) me I kin iang, sister men iang ahneki soumwahu en suke oh pil ahneki soumwahu en mwidihlihk, ah emen ahneki kanser, ah riemen ahneki soumwahu en nan kakon suwed, ah emen ahneki soumwahu riau me ede lupus oh fibromyalgia. Ekei ahnsou irail kin pahtoula. Ahpw ihte ahnsou me re sohte kin iang towehda mihding iei ni ahnsou me re uhdahn soumwahu laud de re mihmi nan imwen wini. Irail koaros kin kaukaule iang doadoahk en kalohk. Irail kin katamankidohng ie duwen Pohl, me nda: ‘Ni ei kin luwet, iei ahnsou me I kin kehlail.’ I kin inenen kapinga uwen arail limpoak oh arail lamalam kehlail. Ele irair me re mihmi loale kihong irail en medemedewe arail mour oh dahme keieu kesempwal nan arail mour.”—2 Korint 12:10.

¹⁸ Ma ke kin nannantihong pepeiong kiaulahn paliwar, soumwahu oh soangen kahpwal teikan, “poadidiong kapakap ahnsou koaros” ki sawas pwe ke dehr pahn lohdi pahn pepehm en mworusala. (1 Deselonika 5:14, 17) Ei, mehlel me pahn mie ahnsou kan me ke pahn peren ah ekei pak ke pahn nsensuwed, ahpw nantihong medemedewehte mehkan me mwahu, mehkan me ngenen, ahpw mehlel atail koapworopwor kesempwal me pid Wehin Koht. Emen sister koasoia: “Ohng ie, doadoahk en kalohk kin wia wini.” Ehukihong rongamwahu ohng aramas teikan kin sewese ih en kin medemedewehte soahng mwahu kan.

Limpoak Kak Sewese Irail me Wiahda Dihp en Pwurodohng Rehn Siohwa

19, 20. (a) Dahme kak sewese irail oko me pwupwudiong nan dihp pwe irail en kak nantihong alehda lamalam kehlail en pwurodohng rehn Siohwa? (b) Dahme kitail pahn tehkpene nan artikel en mwurin met?

¹⁹ Aramas tohto me luwetala ni pali ngehn de kin mihla nan irair en dihp laud sohte kin mengeiki pwurodohng rehn Siohwa. Ahpw, lamalam kehlail me re anahne pahn kak kohdohng irail ma re koluhla mehlel oh pwurehng kalaudehla arail limpoak ohng Koht. Nna, kilang Mario,a me mih nan United States. Mario kesehla mwomwohdiso en Kristian, oh wiahla soun kamamsakau men oh tengala ni wini en kasahliel, oh mwurin sounpahr 20, e pidelong nan kalapwuhs. Mario nda: “I tepiada pil ehu medemedewe ni loal duwen ia pahn imwilahn ahi mour ni ahnsou kohkohdo oh pwurehng wadek nei Paipel. Mwuri ekis, I tepida kalahnganki duwen sapwellimen Siohwa irair kaselel akan, mehlel me pid mahk, oh iei me I kin kalap kapakap oh pekipeki. Mwurin ahi pedoisang nan kalapwuhs, I sohla iang aramas suwed kan me I kin werekiong mahs, ngehi kohla iang towehda mihding en Kristian akan, oh mwurin mwo ngehi pwurehng kasapahldohng nan mwomwohdiso. Nan paliwereiet, I kin lelohng imwila suwed kan me I kamwerehdi, ahpw met me kesempwal, iei me miehier ahi koapworopwor kaselel. Sohte mehkot me I kak wia pwehn kasalehda duwen ahi kalahngankihong Siohwa sapwellime limpoak oh mahk.”—Melkahka 103:9-13; 130:3, 4; Kalesia 6:7, 8.

²⁰ Irail akan me duwehte Mario kin inenen nanti laud oh pwurodohng rehn Siohwa. Ahpw arail limpoak me re pwurehng kapwurehdo oh kalaudehla—kohsang ni arail onop Paipel, oh kapakap oh doudouloale Mahsen en Koht akan—pahn kihong irail lamalam kehlail oh pweida mwahu me re anahne. Mario pil kehlailkihda koapworopwor en Wehio. Ehi, likin limpoak, pwoson oh lahn Koht, koapworopwor kak wia manaman kehlail ieu ohng kamwahuwihala atail mour. Nan artikel en mwurin met, kitail pahn tehkpene ni keneinei duwen kisakis en ngehn kesempwal wet.

[Nting tikitik me mi pah]

Ke Kak Sapeng?

• Iaduwen limpoak ah kahrehiong Sises en sapwellimaniki nan kupwur kehlail tohrohr ehu?

• Iaduwen ahn Pohl oh Parnapas ara poakohng riarail kan ah kihong ira lamalam me inenen kehlail?

• Soangen wiewia dah kan me Sehdan kin wia pwehn song en kihsang limpoak en Kristian?

• Limpoak ong Siohwa kak kihong kitail lamalam kehlail pwe kitail en kak powehdi mehnia kasongosong?

[Kawehwehpen kilel kan nan ehu ehu pali 15]

Ahn Pohl limpoak ong aramas akan kin kihong ih lamalam kehlail pwehn dadaurete

[Kawehwehpen kilel kan nan ehu ehu pali 16]

E anahne lamalam kehlail pwe kitail en kolokol sapwellimen Koht kosonned akan

[Kawehwehpen kilel kan nan ehu ehu pali 16]

Namangolwa Sututu