Mahsen en Siohwa Kin Ieias
Ire Kesempwal akan Sang nan Pwuhken Rom
NAN pahr 56 C.E., nan eh seilok kesiluh nin duwen misineri men, wahnpoaron Pohl lella kanihmw en Korint. E esehda duwen wekpeseng en madamadau kan nanpwungen Kristian en mehn Suhs akan oh pil Kristian en mehn liki kan nan Rom. Pohl eri ntingihada kisinlikou ehu ong irail pwehn sewese irail en kapwungala kahpwal wet pwe irail en kak miniminpene oh pil pwungpene.
Nan kisinlikou wet ong mehn Rom akan, Pohl kawehwehda iaduwen aramas pahn kak pwungla rehn Koht oh ia mwomwen arail pahn weweid nan mour. Kisinlikou wet kin kalaudehla atail loalokongkihla Koht oh sapwellime Mahsen, oaritikiada sapwellimen Koht kadek kalahngan, oh pil kawauwihala sapwellimen Krais pwukoa nin duwen atail sounkomour.—Ipru 4:12.
PWUNGLA REHN KOHT—IADUWE?
“Aramas koaros wiadahr dihp, oh irail koaros dohsangehr sapwellimen Koht lingan,” ihme Pohl ntingihdi. “Sang ni kupwurkalahngan oh sapan en Koht, irail koaros kin pwungla reh pwehki Krais Sises me kin ketin kamaiauwihirailda.” Pohl pil mahsanih: “Aramas akan kin pwungla rehn Koht sang ni pwoson, kaidehn sang ni ar kin kapwaiada Kosonnedo.” (Rom 3:23, 24, 28) Ki pwoson sang “wiewia pwungo,” koaros irail Kristian keidi kan oh pil pwihn en “pokon kalaimwun” en “sihpw teikan” kakehr en “pwungla rehn Koht”—irail Kristian keidi kan ong mour nanleng nin duwen iengen Krais kan oh pokon kalaimwun, nin duwen kompoakepahn Koht kan, me ahneki koapworopwor en pitsang “kahn kamakam kowahlap.”—Rom 5:18; Kaud. 7:9, 14, NW; Sohn 10:16, NW; Seims 2:21-24; Mad. 25:46.
Pohl eri idek: “Eri dah? Kitail pahn wiahda dihp pwehki atail solahr mi pahn kosonned, ahpw pahn kalahngan en Koht? E sapengla met: “Soh kowahlap!” Ih eri kawehwehda: “Kumwail me lidun me kumwail kin peikiong—ma ong dihp, me imwilah mehla, de ong peik, me imwilah pwung rehn Koht.” (Rom 6:15, 16) E pil mahsanih: “Ma kumwail pahn kemehkihla amwail wiewia suwed kan Ngehno, eri, kumwail pahn mourla.”—Rom 8:13.
Pasapengpen Peidek kan me Pid Duwen Iren Paipel kan:
1:24-32—Iaduwe, soangen wiewia kasaut kan me kileldi nan ire wet kin dokedoke mehn Suhs akan de ong irail mehn liki kan? Mehnda ma pali koaros kin wiewia soahng pwukat, Pohl kin uhdahn koasoakoasoia mehn Israel en mahs akan me sohte kin kapwaiada Kosonnedo. Mendahki irail eseier duwen sapwellimen Koht kopwungpwung kan, irail “kahngalahr medemedewe duwen mehlel en Koht.” Solahr mehkot me kak irehsang irail de katokehdi irail sang wiewia suwed pwukat.
3:24, 25, NW—Iaduwen “tomw me Krais Sises kin ketikihda” kin kak pwainla “dihp kan me wiawi keilahn aio” mwohn e pweipweila? Keieun kokohp me pid duwen Mesaia, me kileledi nan Senesis 3:15, kin pweida nan pahr 33 C.E. ahnsou me Sises ketin pwoula pohn tuhkehn kalokoloko. (Kal. 3:13, 16) Ahpw ni ahnsowohte me Siohwa ketin wiahda kokohp wet, pweinen tomw wet pweipweilahr mwohn silangih, oh sohte mehkot kak kauhdi Koht sang eh pahn ketin kapwaiada dahme e kin ketin kupwurki. Eri pwehki meirong me Sises Krais pahn ketin wia, Siohwa kak en ketin mahkohng dipen irail akan en kadaudok en Adam me kin pwoson sapwellime inou wet. Tomw wet pil kahrehda irail Kristian en mahs akan en pil kak iang kaiasada.—Wiewia 24:15.
6:3-5—Ia wehwehn en papidaisla oh miniminiong Krais Sises, oh pil papidaisla oh miniminiong ih ni eh pwoula? Ni ahnsou me Siohwa ketin keiekihdi irail akan me kin idawehn Krais ngehn sarawi, irail kin miniminiong Sises oh wiahla pwihn en mwomwohdiso en Kristian keidi kan, me kin wia weren Krais, me wie Tapwi. (1 Kor. 12:12, 13, 27; Kol. 1:18) Iei met me wehwehki arail papidaisla oh miniminiong Krais Sises. Kristian keidi kan pil kin “papidaisla oh miniminiong [Krais] ni eh pwoula” sang ni arail kin mourki mour en tounmetei oh kin soikala koapworopwor en mour soutuk nin sampah. Ihme kahrehda, arail mehla pil wia meirong ehu, me pil duwehte en Sises eh pwoula, ahpw arail mehla sohte warohng ketikihda tomw kesempwal duwehte me Sises ketikihda ni eh pwoula. En papidaisla oh miniminiong Krais ni eh pwoula kin unsekla ni ahnsou me irail me keidi kan kin mehla oh kaiasada ong mour nanleng.
7:8-11—Iaduwen “dihp diarada eh ahnsou mwahu sang ni Kosonnedo”? Kosonnedo kin sewese aramas en wehwehki dahme kin pidada dihp, kahrehiong irail en pohnese me irail aramas dipan ekei. Eri pwehki met, irail kin kasawihda soangen wiewia kan me irail kin wia nin duwen aramas dipan kei, oh arail kin pohnese me irail aramas dipan kei kin sansalda laudsang mahs. Ihme kahrehda kitail kak nda me dihp kin diarada ahnsou mwahu sang ni Kosonnedo.
Mehn Kasukuhl kan ong Kitail:
1:14, 15. Kitail ahneki kahrepe tohto en padahngki rongamwahwo ni eimah. Ehu kahrepe pwukat iei atail kin pwukoahki meteikan me sapwellimen Sises nta kesempwal ketin pwaindahr oh kitail pil pwukoahki sewese irail en esehla Koht oh sapwellime kupwur kan.
1:18-20. Aramas akan me sehse Koht oh sohte kin weweid ni ahl pwung sohte kak peikidki duwen ar wiewia kan, pwehki mepwukat me sansal mwahu sang ni wiepen ni lime kan.
2:28; 3:1, 2; 7:6, 7. Mwurin eh kin koasoia soahng kei me mwein ele kanamenek ong mehn Suhs akan, Pohl kin uhd doadoahngki lokaia kamantik kan me warohng kameleileidi irairo. Met kihda mehn kahlemeng ehu ong kitail en kin apwalihala ni ahl loalokong oh koahiek soangen ire kan me kakete kahrehda aramas en akamai ong kitail.
3:4. Ni ahnsou me aramas kin kosoaia mehkan me weksang dahme Koht ketin mahsanih nan sapwellime Mahsen, kitail kin kadehdehda me “Koht uhdahn pahn mehlel” ni atail kin likih mahsen en Paipel oh kin mwekid pahrekiong kupwur en Koht. Ni atail kin eimah iang doadoahk en kalohki duwen Wehio oh katohnpadahk, kitail kak sewese meteikan en diarada me Koht uhdahn pahn mehlel.
4:9-12. Pwoson me Eipraam ahneki kahrehiong ih en pwungla rehn Koht mwohn eh sirkumsaisla ni eh sounpar 99. (Sen. 12:4; 15:6; 16:3; 17:1, 9, 10) Ni en Koht kin ketin kilangwohng Eipraam nin duwen aramas pwung men mendahte mwohn eh sirkumsaisla, e kin ketin kasalehda ni ahl inenen oh laud ehu dahme kak kahrehda emen en kak pwungla mwohn silangih.
4:18. Koapworopwor iei ehu pali kesempwal nan atail pwoson. Atail pwoson kin poahsoanda pohn atail koapworopwor.—Ipru 11:1.
5:18, 19. Ni eh kasalehda ni pwung duwen pahrekpene en Sises oh Adam, Pohl kin ni ahl sansal oh mwotomwot kawehwehda iaduwen ohl emente kak en “tounmeteikihla moure, pwe me ngeder en maiauda.” (Mad. 20:28) Kitail anahne en alasang mehn kahlemeng mwahu wet me pid en padahk ni ahl pwung oh mwotomwot.—1 Kor. 4:17.
7:23. Soangen kakon kan en paliwaratail duwehte pehtail kan, nehtail kan, oh pil lowetail kin kak ‘kahrehiong kitail en selidi pahn kosonned en dihp,’ eri kitail anahne en kaleke pwe kitail de doadoahngki kakon pwukat ni ahl sapwung.
8:26, 27. Ahnsou me kitail kin lelohng irair kan me inenen apwal oh kitail sehsehla dahme kitail pahn kapakapki, “pein Ngehno kin louloukin kitail.” Eri Siohwa, “me kin ketin sapeng pekipek kan” ketin pwungki soangen kapakap warohng kan me kin kileldi nan sapwellime Mahsen me iei kin pwilwei sang rehtail ong mwohn silangih.—Mel. 65:2.
8:38, 39. Kahpwal kan, ngehn saut akan, de koperment kan en aramas sohte kak kauhdi sang kitail sapwellimen Siohwa limpoak, oh irail pil sohte anahne en kahrehda kitail en uhdihsang limpoak ong ih.
9:22-28; 11:5, 17-26. Kokohp tohto me pid duwen onohnsapahlda en mehn Israel kan kin pweida rehn irail mwomwohdiso en Kristian keidi kan, me towe kan “e malipe, kaidehn sangete rehn mehn Suhs akan, ahpw pil sang rehn mehn liki kan.”
10:10, 13, 14. Pwe en peipeiante limpoak me kitail ahneki ong Koht oh pil ong meteikan, pwoson kehlail ong Siohwa oh pil ong sapwellime inou kan kak kamwakid kitail en ahneki ngoang laud en iang doadoahk en kalohk me Kristian koaros kin wia.
11:16-24, 33. Ia uwen kaselel oh toupahrek en “sapwellimen Koht kupwur kadek, oh pil uwen sapwellime kadeik apwal.” Ei, “KAUN-O iei silepamwail me manaman, sapwellime wiewia kan me unsek oh pwung.”—Deud. 32:4.
MOMOUR NI AHL ME PAHREKIONG ATAIL PWUNGLA REHN KOHT
Pohl mahsanih: “Eri, riei ko, pwehki reken sapwellimen Koht kalahngan ong kitail, I wia pekipek ngidingid wet ong kumwail: kumwail mweidala paliwaramwail kan pwe en wiahla mehn meirong momour, me sarawi oh kaperen pahn kupwur en Koht.” (Rom 12:1) Pwehki arail pwoson, Kristian kan pwunglahr rehn Koht, “eri” dahme Pohl mahsanih mwuhr anahne en kamwakid arail madamadau ong duwen pein irail, meteikan, oh pil kaun en koperment kan.
Pohl ntingihdi: “I ndaiong kumwail koaros: kumwail dehr medemedewe me kumwail me lapalap.” Ih eri pil kaweidki: “Amwail limpoak en uhdahn mehlel.” (Rom 12:3, 9) “Aramas koaros uhdahn pahn peikiong pwungen wehi kan.” (Rom 13:1) Me pid irair de pilipil kan me emen kin doadoahngki kadeikpen loale en wiahda, Pohl kin kangoange Kristian kan en ‘tokedihsang arail kin kadeikada meteikan.’—Rom 14:13.
Pasapengpen Peidek kan me Pid Duwen Iren Paipel kan:
12:20—Iaduwen kitail kin “kanamenekihala mehlel, rasehng mwoalus mwehl” pohn moangen imwintihti men? Ni mwehin Pwuhk Sarawi, aramas akan kin kihong mete me kin kahdaneki ‘ore’ nan kisiniei mwehl oh kin touk ong mwoalus karakar powe oh pahn mete wet. Eri pwehki laudlahn karakar en mwoalus me kohda pohn mete wet, e kin kapeipeseng de katohrohrpeseng soahng sakanakan koaros ni meteo. Pil duwehte, kitail kin kanamenekihala mehlel, rasehng mwoalus mwehl pohn moangen imwintihti men ni atail kin kasalehda wiewia kadek ong irail oh kahrehda arail irair en uhwong kan en peipeseng oh irail uhd kasalehda arail irair mwahu kan.
12:21—Iaduwen atail “mwahu en powehdi me suwed”? Ehu ahl me kitail kin wia met iei en eimah ni soh masak oh tengeteng ong atail pwukoahn doadoahk me Koht ketikihong kitail en kalohki rongamwahu en Wehio lao lel ahnsou me Siohwa pahn ketin koasoanehdi iahd me doadoahk wet pahn nek.—Mark 13:10.
13:1—Ni ahl dahieu me “[Koht] me kin ketikihongehr pwungen wehi kan nin sampah”? Koht ketin mweidohng kaun en koperment kan pwung en kaunda, oh mie wasa kan pahn arail kaunda me Koht ketin kohpahdahr dahme pahn wiawi, oh iei met wehwehn “[Koht] me kin ketikihongehr pwungen wehi kan nin sampah.” Met kin dehde mwahu sang dahme Paipel kin kohpada duwen tohto en irail kaun akan.
Mehn Kasukuhl kan ong Kitail:
12:17, 19. En dupungki ong me suwed emen kin wehwehki me kitail kin men pein pwukoahki dahme Siohwa kelehpw warohng pwukoahki. Ia uwen e wia madamadau aklapalap ieu ma kitail kin “dupungkihong me suwed” emen!
14:14, 15. Kitail en dehr kansensuwedihada de kauwehkihla riatail Kristian emen ong me pid soangen mwenge de soangen mehn nim dah me kitail kin men kisekisehki irail.
14:17. En ahneki nanpwungmwahu rehn Koht sohte kin ihte poahsoanda sang dahme emen kin kang de nim de dahme emen kin irehsang pein ih en dehr kang de nim. Ahpw, e kin pidada pwung, popohl, oh peren.
15:7. Kitail anahne en dehr lipilipilki aramas ahnsou me kitail kin kasamwohdo irail nan mwomwohdiso ahpw mehlel irail akan me kin ni mehlel raparapahki padahk mehlel oh en pil kin kalohki duwen Wehio ong koaros me kitail tuhwong.
[Kawehwehpen kilel kan nan ehu ehu pali 31]
Tomw en Sises kak en kadoadoahk ong dihp kan me wiawihdahr mahs mwohn eh pweipweila?