Mour Kapw—Pwihn Tikitik Pahn Kakaun, Ahpw Aramas Tohto Pahn Paiekihda
SANGETE ni mwehin wahnpoaron kan, Koht kin ketin pilada pwihn en aramas pilipilda kei me wia Kristian lelepek kan pwe ren wiahla sapwellime kan. Pwehki wekidekla laud kin wiawi ong sapwellimen Koht pwukat, Mahsen en Koht kin kahdaneki met mour kapw. Kahrepen mour kapw iei en kaunopada sapwellimen Koht kan me ipwsapahl en wiahla kaun akan nanleng. (2 Timoty 2:12) Pwehn wiahla kaun ekei, re anahne en iasada sang mehla ong mour nanleng. (Rom 6:3-5) Ni arail pahn mi nanleng, re pahn iang Krais kaunda sampah.—Kaudiahl 20:4, 6; 11:15.
Ahpw Mahsen en Koht pil mahsanih me meteikan pil pahn ahneki mour soutuk. Palien Pwuhk Sarawi ni Lokaiahn Ipru oh Lokaiahn Krihk kin mahsanih ire mehlel ehu me Koht kupwurki en komourla pwihn en aramas riau, pwihn tikitik en kaun akan me pahn mi nanleng oh pwihn laud me pahn mi nin sampah pahnangin arail kaunda. Karasepe, wahnpoaron Sohn ntinglahng ienge Kristian akan me alehdier mour kapw. E koasoia duwen Sises: “Krais, ih me tomwkiher dipatail kan, ahpw kaidehn dipatailte [pwihn tikitik], pwe pil dipen aramas koaros [pwihn laud].”—1 Sohn 2:2.
Duwehte met, wahnpoaron Pohl ntingihdi: “Audepen lahng oh sampah koaros [pwihn laud] kin kasikasik ahnsou me Koht pahn ketin kasalehda irail kan me sapwellime [pwihn tikitik].” (Rom 8:19-21) Ia duwen kitail kak wehwehki mahsen en wahnpoaron Sohn oh Pohl? Kitail kak wehwehki ni ahl wet: Irail akan me ipwsapahl pahn wiahla kisehn koperment nanleng. Ong ni kahrepe dahieu? Pwehn wahdo kapai poatopoat ong aramas tohto me pahn momour nin sampah pahn kaundahn Wehin Koht. Ihme Sises ketin padahkihong sapwellime tohnpadahk kan en kapakap: “Mweimwi en pweida wasa koaros, kupwuromwi en kin wiawi nin sampah duwen eh kin wiawi nanleng.”—Madiu 6:10.
Palien Pwuhk Sarawi ni Lokaiahn Ipru pil kasalehda me pwihn riau pwukat pahn ale komour. Karasepe, Siohwa mahsanih ong Eipraam me wia semen Sises: “Wehi koaros [pwihn laud] pahn peki I en kapaiairailda nin duwen ei kapaiadahr kadaudokomw kan [pwihn tikitik].” (Senesis 22:18) Ei, wehi koaros pahn kak ale kapai kan sang rehn ‘kadaudok’ en Eipraam.
Ihs ‘kadaudoko’? Iei Sises Krais oh irail me alehdier mour kapw oh wiahla sapwellimen Koht kei. Wahnpoaron Pohl kawehwehda: “Ma kumwail sapwellimen Krais, eri, kumwail kadaudok en Eipraam.” (Kalesia 3:16, 29) Ia kapai kan me aramas me kohsang wehi koaros kak ale sang rehn ‘kadaudoko’? Iei kapai en ahneki nanpwungmwahu rehn Koht oh paieki mour soutuk nan paradais pohn sampah. Sounmelkahka Depit kohpadahr: “Me pwung kan pahn koukousoan nan sahpwo oh re pahn sapwenikihla kohkohlahte.”—Melkahka 37:29; Aiseia 45:18; Kaudiahl 21:1-5.
Eri, me pilipilda kante kak wia kaun akan nanleng, ahpw aramas tohto pahn kak paiekihda arail kaunda ni arail pahn ahneki mour soutuk nin sampah oh kapai teikan. Se koapworopworki me kowe oh omw peneinei pahn ale kapai soutuk me Wehin Koht pahn wahdo.