Mour Kapw—Ia Kahrepe?

ARAMAS tohto kin kamehlele me emen anahne ipwsapahl pwehn ale mour soutuk. Ahpw kitail kak tehk dahme Sises mahsanih duwen kahrepen mour kapw. E mahsanih: “Mehmen me sohte ipwsapahl, e sohte pahn kak kilang Wehin Koht.” (Sohn 3:3) Kahrehda emen anahne ipwsapahl pwehn kak pidelong nan Wehin Koht, ahpw kaidehn pwehn ale komour. Ahpw ekei pahn nda, ‘en pidelong nan Wehio oh en ale komour sou kin doakedoake kating tehieu?’ Soh. Pwehn wehwehki wekpeseng en ire riau pwukat, kitail pahn tehkpene ia wehwehn “Wehin Koht.”

Wehi ehu iei koperment ehu. Eri, “Wehin Koht” wehwehki “koperment en Koht.” Paipel kin padahngki me Sises Krais, “emen me likamwete aramas,” iei Nanmwarki en Wehin Koht oh mie meteikan me iang Krais kaunda. (Daniel 7:1, 13, 14; Madiu 26:63, 64) Patehng met, kaudiahl ehu me wahnpoaron Sohn kilangada kin kasalehda me irail me iang Krais kaunda kin pilipilda “sang kadaudok koaros, oh lokaia koaros, wehi koaros, oh sahpw koaros” oh re pahn kaunda sampah. (Kaudiahl 5:9; 20:6) Mahsen en Koht pil kasalehda me irail kan me pahn kaunda nin duwen nanmwarki kan pahn wiahda “kisin pwihn sihpw” en irail 144,000 me “pweipweida sang sampah.”—Luk 12:32; Kaudiahl 14:1, 3, NW.

Ia wasa Wehin Koht kin kaunda sang ie? “Wehin Koht” pil kin adaneki “Wehin nanleng,” me kasalehda me Sises oh ienge nanmwarki teikan kin kaunda sang nanleng. (Luk 8:10; 2 Timoty 4:18) Kahrehda Wehin Koht iei koperment en nanleng me wiawihkihda Sises Krais oh pwihn en ienge kaun akan me pilipilda sang tohnsampah.

Eri, ia wehwehn mahsen en Sises kan ni ahnsou me e mahsanih me emen anahne ipwsapahl pwehn “pidelong nan wehin Koht”? Met wehwehki me emen anahne ipwsapahl pwehn iang Krais kakaun sang nanleng. Eri, kahrepen ipwsapahl iei en kaunopada ehu pwihn en aramas pilipilda kei pwehn kaunda sang nanleng.

Met kitail wehwehki me mour kapw inenen kesempwal oh Koht me ketin kahrehda mour kapw wet pwehn kaunopada ehu pwihn en aramas pilipilda kei pwehn kaunda sang nanleng. Ahpw ire wet pahn kihda pil ehu peidek. Ma irail kan me ipwsapahl pahn kaunda sang nanleng nin duwen nanmwarki kan, eri ihs me re pahn kaunda? Kitail pahn diarada pasapengpen peidek wet nan iren onop mwurin met.

[Kawehwehpen kilel kan nan ehu ehu pali 6]

Kahrepen ipwsapahl iei en kaunopada ehu pwihn en aramas pilipilda kei pwehn kaunda sang nanleng

[Kawehwehpen kilel kan nan ehu ehu pali 6]

Wehin Koht kin wiawihkihda Sises Krais oh ienge kaun akan me pilipilda sang tohnsampah