Ia Duwen Omw Kak Wehwehkihla Paipel?
2. Dehr Mwadang Koasoanehdi Dahme Ke Men Kamehlele Duwen Paipel
Mie pak me omw pirien men kauwe aramas emen me ke saikinte tuhwong? Ni ahnsou me ke tuhwong aramaso, dahme ke rongehr kin kahrehda omw sohte kin kak kilang irair mwahu kan en aramaso? Met kak pil wiawi ni omw pahn wadek Paipel.
WAHNPOARON Pohl kasalehda dahme kak wiawi ma kitail pahn kin koasoanehdi dahme kitail men kamehlele me pid duwen Paipel mwohn atail pahn wadek. Me pid ekei mehn Suhs akan, Pohl ntingihdi: “I kak kadehde duwen arail inenen poadidiong Koht, ahpw sohte kekeid ni pwungen marain mehlel.”—Rom 10:2.
Ekei mehn Suhs akan nan mwehin wahnpoaron kan sohte kin men esehla padahk mehlel duwen Mesaia me Pwuhk Sarawi ni Lokaiahn Ipru kin kasalehda. Sises kin ketin kapwaiada kokohp koaros duwen Mesaia. Ahpw, mehn Suhs akan kin tengedihongete dahme re men kamehlele, kahrehda re sohte kak wehwehki Mahsen en Koht me pid duwen Mesaia.
Dahme kitail kak sukuhlki sang met? E kesempwal kitail en dehr koasoanehdi dahme kitail men kamehlele duwen Paipel mwohn atail pahn wadek, pwehki met kak kahrehda atail sohte pahn kak wehwehkihla padahk mehlel en Paipel.
Karasepe, emen sounpadahk en pelien lamalam nan North Carolina nan America kawehwehda me Paipel kin audaudki “madamadau en aramas me kin wekpeseng, oh sohte kak kihda kaweid mwahu ong duwen atail pahn momour.” Ma emen pahn wadek Paipel oh wiahki me Paipel kin audaudki “madamadau en aramas,” e sou pahn soikala ekei kaweid en Paipel ma e sohte pahn pwungki?
Paipel kin kaweidkin kitail en onop mwahu. Me pid mehn Peria kan nan mwehin Pohl, Paipel mahsanih: “Irail ngoangki mehlel rong mahseno, oh rahn koaros irail kin onopki Pwuhk Sarawi pwe re en kadehde ma en Pohl koasoi me mehlel de soh.” (Wiewia 17:11) Duwehte irail, ele ke pahn anahne kihsang omw madamadau me ke koasoanehdier duwen Paipel mwohn ke pahn wadek. Met pahn sewese iuk en wehwehkihla Paipel. Wadek Mahsen en Koht pwe ken kak wehwehkihla sapwellime madamadau kaselel kan.