Pelien Lamalam Mehlel Kin Kasalehda Tiahk Mwahu
PELIEN lamalam mehlel kin padahkihong kitail en kesempwalki dahme mwahu pwehn kapwungala atail tiahk kan. E kin sewese kitail en nantihong wia dahme keieu mwahu. Eri, ia duwen atail pahn kak ese ma pelien lamalam mehlel kin wia met?
Kitail pahn tehkpene dahme wahnpoaron Pohl ntingialahng Kristian akan nan Korint, kahnimw ehu me kin ndandki tiahk suwed. E kin kaweidkin irail: “Me kin nenek kan, me kin pwongih dikedik en eni kan, me kamwahl akan, me wia dipen Sodom kan, me lipirap akan, me noahroke kepwe kan, me kamamsakau kan, me karaunlikamw akan, oh me loallap suwed kan, re sohte pahn iang sohsohki Wehin Koht.” E pil mahsanih: “Eri, ekei kumwail iang mihmi ni soangen aramas pwukat mahso, ahpw met kumwail mwakelekelsangehr dihp, oh kasarawihongehr Koht, oh pwunglahr rehn Koht ni mwaren atail Kaun Sises Krais oh ni ngenen atail Koht.” (1 Korint 6:9-11.) Eri, pelien lamalam mehlel kin sewese ekei aramas me kin mouren tiahk suwed mahso en wiahla sapwellimen Koht ladu mwakelekel oh pwung!
Paipel pil kin kehkehlingki: “Pwe ahnsou ehu pahn leledo me aramas akan sohla pahn men rong padahk mehlel, ahpw re pahn idawehnla pein nsenarail; oh re pahn piladahng pein irail sounpadahk tohto me pahn kin koasoiaiong irail soahng kan me re kin men rong.”—2 Timoty 4:3.
Eri, dahme pelien lamalam me ke ese kan kin wia? Re kin kapwaiada kaweid kan en Paipel me pid dahme pwung oh dahme sapwung? De re kin mwamwahliki kaweid en Mahsen en Koht ni ar kin padahkihong aramas akan soahng kante “me re kin men rong”?
Pwe ken kak kasawih ma pelien lamalam ehu kin kasalehda wa mwahu, e pahn mwahu ma ke pahn doadoahngki ahnsou en sapengla peidek pwukat.
OARALAP: Pwopwoud.
DAHME PAIPEL KIN PADAHNGKI: “Kumwail koaros uhdahn pahn wauneki kasarawien kapwopwoud, oh kumwail ohl pwopwoud oh lih pwopwoud kan, kumwail uhdahn pahn kin loalopwoatpene. Koht pahn ketin kadeikada me kin mouren kamwahl oh me kin mouren nenek.”—Ipru 13:4.
PEIDEK: Ia duwe, tohn ei pelien lamalam kin kangoange irail kan me kin kousoanpene nin duwen pwopwoud ehu en kin inou sarawi de wiahda kisinlikou nan mwoalen kopwung?
OARALAP: Mweipeseng en pwopwoud.
DAHME PAIPEL KIN PADAHNGKI: Ni ahnsou me irail peidek ma ia pahn kahrepe me pwung ong mweipeseng en pwopwoud, Sises mahsanih: “Eri, kumwail en ese pwe mehmen mweisang eh pwoud ni kahrepe ieu me kaidehn kamwahl, e ahpw pwoudikihda emen lih tohrohr, e wiadahr dipen kamwahl.”—Madiu 19:9.
PEIDEK: Ei pelien lamalam kin wauneki sapwellimen Sises kaweid ong mweidada mweipeseng en pwopwoud ihte pwehki kamwahl? Re pil kin mweidohng me sohte dipadao en pwurehng pwopwoudida?
OARALAP: Tiahk en nenek.
DAHME PAIPEL KIN PADAHNGKI: “Eri, kumwail kadohwaneweisang kumwail tiahk en nenek. Pwe dihp koaros me aramas kin wiahda, kin wiawi likin paliwar; a me kin nenek, [kin] wiahda dihp ong pein paliwere.”—1 Korint 6:18.
“Lih akan solahr inengieng ohl, ahpw re kin pein kalel nanpwungarail. Pil duwehte ohl akan, re kin pwilikihdi arail inengieng lih, re ahpw kin pein kalel nanpwungarail. Ohl akan kin wiapene soahng kanamenek kan nanpwungarail; oh ni imwilah re pahn ale kalokaparail me konehng arail wiewia suwed kan.”—Rom 1:26, 27.
PEIDEK: Ei pelien lamalam kin padahngki me wia nsenen pwopwoud nanpwungen meh riemen me sohte pwopwoud de pil ohl mwahuki ohl de lih mwahuki lih iei dihp laud ehu?
OARALAP: Towe kan kin lelepek ong kapwaiada kaweid en Paipel kan.
DAHME PAIPEL KIN PADAHNGKI: “Ahpw I koasoia duwen irail kan me kin wia riamwail souleng ahpw kin nenek, kin noahrok, kin pwongih dikedik en eni kan, kin karaunlikamw, kin kamamsakau de kin loallap suwed. Kumwail dehr pil kin patehng irail oh iang mwenge rehrail.” (1 Korint 5:11) Eri, dahme pahn wiawihong irail kan me kin kose me dene irail Kristian ahpw sohte kin koluhkihla diparail kan? Paipel mahsanih: “Kumwail kesepwekehsang nanpwungamwail aramas suwedo.”—1 Korint 5:13.
PEIDEK: Ei pelien lamalam kin kesehsang towe kan me sohte kin koluhkihla diparail kan oh sohte kin kapwaiada kaweid en Paipel?
[Kawehwehpen kilel kan nan ehu ehu pali 6]
Mehnia pelien lamalam me kin kapwaiada ni lelepek kaweid en Paipel kan?