Pelien Lamalam Mehlel Kin Kasalehda Limpoak Nanpwungarail oh Pil ong Meteikan

PAIPEL mahsanih, “Mehmen me sohte ahneki limpoak kin sehse Koht, pwe Koht iei limpoak.” (1 Sohn 4:8) Ihme kahrehda tohn pelien lamalam mehlel anahne limpoakpene nanpwungarail oh pil ong meteikan.

Pelien lamalam tohto kin wiahda doadoahk kaselel tohto me duwehte, sewese me soumwahu kan, me mah kan oh pil me paisuwed kan. Re kin kangoange towe kan en doadoahngki kaweid en wahnpoaron Sohn me mahsanih: “Ma aramas kepwehpwe men me kilangada apwal en rie souleng, ahpw ritingedihsang rie eh mohngiong, ia duwen eh pahn kak nda me e poakohng Koht nan eh mohngiong? Nei kompoakepahi ko! Atail limpoak en dehr mihmihte ni lepin lokaia de koasoi, ahpw en mihmihte ni uhdahn limpoak mehlel me pahn sansalda sang ni atail wiewia kan.”—1 Sohn 3:17, 18.

Eri, dahme kin wiawi ahnsou me wehi kan kin mahwenpene? Sapwellimen Koht kehkehlik me mahsanih, “Poakohng mehn mpomw duwen omw kin poakohng pein uhk,” pahn kin kadoadoahk ahnsoun meleileite ahpw kin pwilidi ahnsou me emen kaun en politik de nanmwarki pahn pahngokkih mahwen en wiawi?—Madiu 22:39.

Sises mahsanih: “Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.” (Sohn 13:35) Ni omw pahn sapeng peidek pwukat, idek mahs rehmw, ‘Tohn ei pelien lamalam kin kasalehda limpoak ong aramas koaros ahnsou koaros, ni lokaia oh wiewia?’

OARALAP: Mahwen.

DAHME PAIPEL KIN PADAHNGKI: Sises ketin kehkehlikihong sapwellime tohnpadahk kan: “A ngehi I ndaiong kumwail met: kumwail poakohng amwail imwintihti kan oh kapakapki me kin kalokei kumwail.”—Madiu 5:44.

Ahnsou me sounpei ko kodohng salihedi Sises, wahnpoaron Piter usada nah kedlahso pwehn doare Sises. Ahpw Sises mahsanih: “Kapwurehiong noumw kedlahs en nan dewe, pwe koaros me kin doadoahngki kedlahs pahn mehkihla kedlahs.”—Madiu 26:52.

Wahnpoaron Sohn ntingihedi: “Iei me kasalehda wekpeseng en sapwellimen Koht kan oh serien Tepil kan: mehmen me sohte wiahda me pwung de pil sohte poakohng rie, kaidehk ih sapwellimen Koht. Pwe iei met padahk me kumwail rongehr nin tapio: kitail en limpoakpene. Kitail dehr duwehte Kain, me uhdahn kisehn Me Suwedo, pwehki eh kemehla uhdahn rie pwutak, Eipel. Dahme Kain kemehkihla rieo? Pwehki eh wiewia kan me sapwung, ahpw wiewiahn rieo me pwung.”—1 Sohn 3:10-12.

PEIDEK: Ei pelien lamalam kin kangoange towe kan en iang mahwen?

OARALAP: Politik.

DAHME PAIPEL KIN PADAHNGKI: Mwurin aramas ako ar kilang sapwellimen Sises manaman ako, irail ahpw men en iang towehda arail pwihn en politik. Eri, dahme Sises ketin wia? “Ni Sises eh ketin mwahngihada me irail pahn kodohng ale, pwe re en kasapwiladahng nanmwarki, e ahpw kelehpw ketila sang rehrail oh ketidalahng pohn nahnao.”—Sohn 6:15.

Ni ahnsou me Sises selidi oh ale pakaraun likamw me dene e kin ketin kamwakid aramas akan en uhwong arail koperment, Sises ketin sapeng irail mahsanih: “Ei wehi, kaidehn kisehn sampah wet. A ma ei wehi kisehn sampah wet, ei tungoal papah kan pahn peikin ie, pwe emen de pangielahng rehn mehn Suhs akan. Ahpw soh! Ei wehi kaidehn kisehn wasaht!”—Sohn 18:36.

Ahnsou me Sises ketin kapakapki sapwellime tohnpadahko, e mahsanih: “I kihongirailehr sapwellimomwi mahsen, oh sampah kailongkiniraillahr pwehki irail kaidehn kisehn sampah, duwehte ngehi me kaidehn kisehn sampah.”—Sohn 17:14.

PEIDEK: Ei pelien lamalam kin idawehn sapwellimen Sises mehn kahlemeng kan? Irail sohte kin iang pidada pelien politik mehnda ma irail pahn kin sekeniken rehn aramas akan?

OARALAP: Lipilipilki aramas.

DAHME PAIPEL KIN PADAHNGKI: Ni ahnsou me irail akan me kaidehn mehn Suhs tepin wiahla Kristian, wahnpoaron Piter koasoia: “Met I wehwehkidahr me Koht sohte ketin lipilipilki aramas. E kin ketin kupwurperenki mehmen me kin lemmwiki, oh pil wiewia me pwung; sohte lipilipil ih soangen aramas dah.”—Wiewia 10:34, 35.

Ni ahnsou me Seims ntinglahng tepin Kristian akan, e koasoia: “Riei ko! Pwehki amwail pwoson atail Kaun Sises Krais, me Kaun lingan, kumwail dehr lipilipilki aramas akan pwehki mwomwarail kan. Pwe ia duwe, ma ohl kepwehpwe men me kapwatki rihng kohl oh likou mwahu pahn pedolong pwe en iang amwail kaudok, oh pil emen me semwehmwe me likawih likou mering pil iang pedolong; ma kumwail pahn wauneki ohl kepwehpweo oh ndaiong, ‘Mwohndi met pohn sehr kaselel wet,’ ahpw ndaiong me semwehmweo, ‘Kesihnenda mwo, de mwohndiong nan tat limwahn ei sehret,’ eri, kumwail soh katohreikumwailpeseng oh wia kopwung ehu me poahsoankihda lamalam suwed?”—Seims 2:1-4.

PEIDEK: Ei pelien lamalam kin padahngki me aramas koaros kin duwepenehte mwohn silangin Koht oh irail en dehr mwamwahliki aramas akan sohte lipilipil soangen aramas dah irail?

[Kawehwehpen kilel kan nan ehu ehu pali 7]

Mehnia pelien lamalam me towe kan sohte kin iang pid politik, oh sohte kin lipilipilki aramas?