Pelien Lamalam Mehlel Kin Kasalehda Ar Wauneki Mahsen en Koht
SISES kin ketin wauneki Mahsen en Koht me iei Paipel. Ire mehlel wet kin sansal nan sapwellime mahsen ni ahnsou kan me Tepilo kasonge ih. (Madiu 4:4-11) Karasepe, dahme Sises ketin sapengki Sehdan ni ahnsou me Sehdan kasonge ih en ketin wekidala takai ko ong pilawa? Sises ketin doadoahngki mahsen kan me Moses ntingihdi nan Deuderonomi 8:3. Dahme Sises ketin wia ni ahnsou me Tepil nda me e pahn kihong ih manaman en kaunda wehi kan en sampah ma e pahn poaridi oh pwongih ih? Sises sohte ketin pwungki oh e ketin kasalehda kaweid en Paipel nan Deuderonomi 6:13.
Eri mendahte ma ih me sapwellimen Koht Ohlo, Sises kin ketin doadoahngki Paipel ahnsou me e kin ketin wia padapadahk. E sohte kin ketin pohnsouwehla sapwellimen Koht mahsen pwehn ketin pwungki tiahk en aramas. (Sohn 7:16-18) Ahpw ni ahnsowo, tohto irail kaunen pelien lamalam kan me sohte kin wauneki Mahsen en Koht. Dahme kahrehda? Pwehki irail kin kesempwalki tiahk en aramas laudsang dahme ntingdi nan Pwuhk Sarawi. Sises kin eimah oh mahsanihong kaunen lamalam pwuko: “Mwalaun amwailen! Melelete pwe e uhdahn pwungiong kumwail me soukohp Aiseia kohpadahro, me mahsanih, ‘Koht mahsanih, aramas pwukat kin kahkahkin ie arail lokaiahte, a kapehdirail kan me inenen dohsang ie. Sohte katepen ar kin pwongih ie, pwehki re kin padahngkihwei kosonned en aramas dene e pwilisang rehn Koht!’”—Madiu 15:6-9.
Pelien lamalam tohto kan nan sampah mehnda ma irail Kristian de soh, kin nda me re kin wauneki Paipel. Ahpw, pelien lamalam depe me ke ese me kin pwilikihdi tiahk en aramas ahnsou me tiahko kin uhwongada Mahsen en Koht? Kitail pahn kilang duwen karasaras riau.
OARALAP: Mwar kan nan pelien lamalam.
DAHME PAIPEL KIN PADAHNGKI: Sises kin ketin sapwungki kaunen pelien lamalam kan pwehki ar kin men alehdi mwar kan oh kin men sansal mwohn aramas. E mahsanih me aramas pwukat kin “mwahuki mwohd lempahntamw ni kamadipw kan oh mwohndi nan dewen me lapalap akan nan sinakoke kan. Re kin anahne aramas en poaridi oh rahnmwawih irail nan wasahn pokon kan, oh ekerkin irail ‘Sounpadahk.’” Sises eri mahsanihong sapwellime tohnpadahk kan: “Kumwail dehr kin men aramas akan en kin ekerkin kumwail ‘Sounpadahk,’ pwe kumwail koaros kin wia pirien ehu, oh amwail sounpadahk metehmen. Kumwail dehr pil ekerki emen nin sampah ‘Sahm,’ pwe Samamwail metehmen me ketiket nanleng.”—Madiu 23:1-10.
PEIDEK: Kaunen ei pelien lamalam kin men aramas en ekerkin irail mwar kan oh kin men sansal mwahu mwohn aramas? De re kin peikiong Sises oh sohte wia met?
OARALAP: Doadoahngki dikedik oh sansal nan kaudok.
DAHME PAIPEL KIN PADAHNGKI: “Kumwail sohte pahn wiahiong kumwail dikedik en eni de sansal en mehkot me mi pahnlahng, de nin sampah, de nan pihl kan pahn sampah. Kumwail sohte pahn poaridiong dikedik en eni men de pwongih.”—Eksodus 20:4, 5.
Wahnpoaron Sohn nting ong irail Kristian akan: “Nei kompoakepahi ko, kumwail en kadohwaneweisang kumwail koht likamw akan!”—1 Sohn 5:21.
PEIDEK: Ei pelien lamalam kin peikiong kosonned en Paipel me pid en dehr doadoahngki dikedik kan oh sansal akan nan kaudok?
Ke kak Diar Pelien Lamalam me Pwung oh Mehlel
Mendahki pelien lamalam kan me tohto, ahpw ke kak diar ehu me pahn kahluwalahng mour. Mie kilel tohto me kak kasalehda ehu pelien lamalam me ‘uhdahn pwung oh unsek mehlel, me Samatail Koht kin ketin kupwurki.’ (Seims 1:27) Sawasepen Paipel kan me kitail koasoiapeneier nan oaralap pwukat kak wia kilel kan me pahn kak sewese iuk en diarada pelien lamalam me pwung oh mehlel.
Komw kak keinemwe rehn Sounkadehdehn Siohwa kan pwe re en patohwan sapeng sapwellimomwi peidek kan me sansalehr nan oaralap akan nan makasihn wet. Komw kasawih dahme irail pahn nda oh idawehn mehn kahlemeng mwahu kan en mehn Peroa kau. Mwurin arail rong en wahnpoaron Pohl padahk, “irail kin onopki Pwuhk Sarawi pwe re en kadehde ma en Pohl koasoi me mehlel de soh.” (Wiewia 17:11) Ma komw pahn wauneki sapwellimen Koht mahsen oh onopki duwehte mehn Peroa kau, eri, komw pahn kak diar ahl me pahn kohlahng mour. Komwi me pahn pein pilada mehnia ahl komw pahn keid loale.
[Kawehwehpen kilel kan nan ehu ehu pali 9]
Mehnia pelien lamalam me kin kangoange aramas akan en onopki Paipel pwehn kasawih ma dahme irail sukuhlki iei me mehlel?