Koht Kin Ketin Inoukihda me Ke Pahn Kepwehpwehla?
‘Koht kin kupwurki ken kepwehpwehla, waraneki sidohsa tohto oh ahneki pesines me pweida mwahu . . . Eri pwoson ih oh kihong ih mwohni koaros uwen me ke kak.’
EHU doaropwen rohng nan Brazil ripohtki me ekei pelien lamalam kan nan sahpwo kin padahngki soangen koasoi duwehte met. Me tohto kin kamehlele koasoi pwukat. Me pid duwen irail kan me dene irail Kristian nan America, ehu makasihn me adaneki Time ripohtki: “Aramas tohtohki persent 61 kin kamehlele me Koht kin kupwurki irail en kepwehpwehla. Ah aramas me tohtohki persent 31 . . . kin kamehlele me ma ke pahn kihong Koht mwohni, E pahn ketikihong uhk mwohni me tohtohsang uwen me ke kihda.”
Soangen padahk wet kin rek nan ekei sahpw nan America me duwehte Brazil, oh aramas tohto kin iang pelien lamalam kan me kin padahngki me Koht pahn ketin kapaiada irail pwe ren kepwehpwehla. Ahpw ia duwe, Koht kin ketin inoukihong aramas akan me kin kaudokiong ih me re pahn kepwehpwehla? Sapwellimen Koht ladu en mahs akan koaros kin kepwehpwe?
Nan Palien Pwuhk Sarawi ni Lokaiahn Ipru, kitail kin kalapw wadek me irail kan me Koht kin ketin kapaiada kin kepwehpwe. Karasepe, nan Deuderonomi 8:18 mahsanih: “Kumwail tamatamante KAUN-O, amwail Koht, pwe ih me kin ketikihong kumwail manaman pwe kumwail en alehdi kamwahu kan [“kepwe kan,” NW].” Met kin kamehlelehiong mehn Israel kan me ma re pahn peikiong Koht, eri e pahn ketin kapaiada arail wehi.
Ahpw ia duwen emenemen sapwellimen Koht ladu kan? Ohl lelepek Sohp inenen kepwehpwe, oh mwurin Sehdan kahrehiong ih en semwehmwehla, Siohwa ketikihong ih “uwen tohtohn dipwisou pak riapak me e ahneki mahso.” (Sohp 1:3; 42:10) Eipraam pil kepwehpwe. Senesis 13:2 mahsanih me e “naineki sihpw, kuht, oh kou tohto, iangahki kohl oh silper.” Ahnsou me nein nanmwarki pahmeno sounpei kan salihedi Lohd me wia nein rien Eipraam pwutak, Eipraam ahpw “kapokonepene ohl loalopwoat kan en eh kahnimpwalo, irail koaros me 318.” (Sen. 14:14) Eipraam naineki “ohl loalopwoat” meh 318 me koahiek en mahwen. Met wehwehki me tohn eh peneinei inenen tohto. E kak apwalih peneinei laud wet oh met kin kasalehda me Eipraam inenen kepwehpwe oh e pil naineki diren mahn akan.
Ei, sapwellimen Koht ladu tohto en mahs me duwehte Eipraam, Aisek, Seikop, Depit, Solomon, oh meteikan kin kepwehpwe. Eri met wehwehki me Koht pahn ketin wiahiong koaros me kin kaudokiong ih en kepwehpwehla? Ia duwe, ma emen kin semwehmwe, met wehwehki me Koht sohte kin ketin kapaiada ih? Ire mwurin met pahn koasoia duwen peidek pwukat.