Semwehmwe Kin Kasalehda me Koht Sohte Kupwurkin Irail?
KOHT mahsanihong mehn Israel kan en mahs: “Sohte emen kumwail pahn semwehmwehla.” Nan Kosonned kan me Koht ketikihong irail, mie koasoandi ehu ong ia duwen arail pahn apwalih me semwehmwe kan oh kasohrehla arail pweipwand kan. (Deuderonomi 15:1-4, 7-10) Eri, mehn Israel kan sohte pahn kin semwehmwe pwehki Siohwa ketin inoukihda me e pahn ketin kapaiada irail. Koht pahn ketin wia met ma re pahn peikiong Kosonnedo, eri ahpw mehn Israel kan sohte kin peik.
Met sohte wehwehki me Koht sohte kin kupwurki me semwehmwe kan ahpw kin kupwurkihte me kepwehpwe kan. Sapwellimen Koht ladu lelepek tohto kin semwehmwe. Soukohp Eimwos kin wia aramas semwehmwe men oh e kin apwalih sihpw oh pil mwetuwel en pik. (Eimwos 1:1; 7:14) Nan mwehin soukohp Elaisa, lehk lapalap ehu wiawi nan Israel. Elaisa anahne koapworopworki sawas en liohdi semwehmwe men. Liohdio ahnekite kisin pilawa amas kis oh pil kisin leh kiste, ahpw Koht ketin wiahda manaman pwe mepwukat en dehr nekla. Elaisa oh liohdi menet sohte kepwehpwehla pwe Siohwa ketikihong ira ihte uwen me re anahne.—1 Nanmwarki 17:8-16.
Soahng kan me aramas sohte kin kasik kak wiawi oh kahrehiong irail en semwehmwehla. Aksident oh soumwahu kak kahrehiong emen en sohla kak doadoahk ahnsou kis de ahnsou reirei. Mehla kak kahrehda seri men en sepwoupwoula de lih emen en wiahla liohdi men. Soangen kahpwal pwukat sohte kin kasalehda me Koht sohte kin kupwurkin irail. Dahme wiawihong Naomi oh Rud kin kasalehda me Siohwa kin ketin apwahpwalih mwahu me semwehmwe kan. Mendahki Naomi oh Rud semwehmwehla pwehki ara pwoud kan mehla, Siohwa Koht ketin kapaiada ira oh ketin apwalihala ara anahn akan.—Rud 1:1-6; 2:2-12; 4:13-17.
Eri, e sansal me arail kin semwehmwe sohte wehwehki me Koht sohte kin kupwurkin irail. Irail kan me kin loalopwoatohng Siohwa Koht kak kamehlele dahme Nanmwarki Depit koasoia: “Ni ei pwulopwul, oh met ni ei mahlahr, I saikinte kilang aramas mwahu men me KAUN-O ketin likidmeliehla, de nah seri kan pekipeki ar tungoal kisin mwenge.”—Melkahka 37:25.
[Kawehwehpen kilel kan nan ehu ehu pali 7]
Mendahki Naomi oh Rud semwehmwe, Koht kin ketin kapaiada oh apwalih ira