Mwohni Kak Wahdo Nsenamwahu Mehlel?
SONIA ipwidi nan Spain. Ni ahnsou me e tikitik, e kin iang eh nohno kohla towehda mihting kan en Sounkadehdehn Siohwa kan. Ahpw ni eh laudla, e kosoula nan ehu kahnimw nan England me adaneki London. Ih eri tepida doadoahk nan ehu ohpis me kin sewesehki soun pesines kan pwehn kalaudehla neirail mwohni.
Sonia kin perenki eh doadoahko. E kin alehdi mwohni laud oh e pil kin apwalih mwohni laud ong soun pesines kan. Doadoahko inenen kaperen oh kin pweida mwahu. Sonia kin doadoahk awa 18 ehu rahn oh ekei pwohng e kin meirkihlahte awa riau de siluh. Soahng koaros me e kin wia kin pid eh doadoahko. Ahpw rahn ehu, soahng koaros wekidekla. Mwein pwehki eh mour me kapwunod, Sonia soumwahuda oh mwoatorala. Ahpw e mahkihte sounpar 30.
Elep paliweren Sonia mwoatorala oh toahkte kan sohte uhdahn ese ma e pahn kak pwurehng lokaia. Eh nohno mwadang seiloakla England pwehn apwalih Sonia. Ahnsou me Sonia kakehr pwurehng tepida alu, eh nohno ndaiong ih, “I pahn kohla iang mihting kan en mwomwohdiso oh ke anahne iang ie pwehki ke sohte kak kelekelehpw.” Sonia pwungki met, oh ia imwilahn met?
Sonia nda, “Soahng koaros me I rong inenen mwahu oh I pwungki. Ngehi eri pwungki en onop Paipel rehn emen irail ko me kasamwo ie ni ahnsou me I tepila nan arail Wasahn Kaudok. Iengei kan en mahso solahr tehk ie ahpw kompoakepahi kapw pwukat kin kadek oh nsenohkin ie.”
Eri, kedekedeo Sonia kakehr pwurehng lokaia oh e kin mwadang esehla padahk en Paipel. E sohte lel sounpar ehu a e papidaisla. Tohto kompoakepah kapw kan kin doadoahngki pali laud en arail ahnsou ong doadoahk en kalohk oh e kin kak kilang uwen arail peren. Sonia kin medemedewe, ‘I men duwehla irail. I men kihong Siohwa uwen ei kak koaros!’ Ahnsou wet Sonia kin doadoahngki pali laud en eh ahnsou ong doadoahk en kalohk.
Dahme Sonia sukuhlki sang soahng pwukat? E koasoia, “Mendahki I kin alehdi mwohni laud, kapwunod kan en ei doadoahko kin kahrehiong ie en pwunod oh sohte nsenamwahu. I esehda me dahme keieu kesempwal nan mour iei en ahneki nanpwungmwahu rehn Semei nanleng, Siohwa. Met I inenen nsenamwahu.”
Wahnpoaron Pohl ntingihdi: “Pwe limpoak ong mwohni, iei tepin soangen suwed koaros. Mie ekei me kin inenen kasikasik en naineki mwohni, eri, re ahpw salongalahsang pwoson oh kauwehkihla mohngiongirail soangen kapahtou tohtohie.” (1 Timoty 6:10) Sonia kak kadehdehda mehlelpen mahsen pwukat.