Kosonned En Limpoak Nan Mohngiongatail

“I pahn kihdi ei kosonned nan kapehdirail kan oh ntingihediong nan kapehdirail kan oh ntingihediong nan mohngiongirail kan.”​—SEREMAIA 31:33.

1, 2. (a) Dahme kitail pahn tehkpene met? (b) Iaduwen Siohwa eh kasalehda duwen pein ih pohn Nahna Sainai?

NAN artikel riau me kitail ahpwtehn kanekehla, kitail sukuhliki me, ni ahnsou me Moses kohdihdo sang pohn Nahna Sainai, meseo linganla oh marainla oh met kasansalehda sapwellimen Siohwa lingan. Kitail pil sukuhlikier duwen mehn koaduhpwelo me Moses doadoahngki. Eri, ni ahnsou wet, kitail pahn tehk duwen ehu irair me pid ire ehute ahpw kin mie wehwe ong Kristian akan nan rahnwet.

² Ni ahnsou me Moses mih pohn nahnao, e ale mehn kaweid sang rehn Siohwa. Ni arail pokonpene mwohn Nahna Sainai, mehn Israel akan kadehde duwen kasansalda kapwuriamwei me pein Koht ketin kasalehda. “Eri, ni menseng en kesiluh en rahn, nansapwe ieu pa pos pohn nahnao, lioal tapihada piripir, oh pelien depwek mosul pali pa kipehdi pohn nahnao; oh ngilen sowi laud ehu pa kadirehla nan wehwe. Aramas koaros en nan kahnimpwalo salohkihda kowahlap. . . . Ediniei moron ehu eri koaduhpwaldi Nahna Sainai pwon, pwe Kauno ketididohr powe ni sansal en mpwulen kisiniei. Edied en nahnao rasehng edin uhmw kalaimwun ehu. Aramas akan koaros ahpw salohkihda kowahlap.”​—Eksodus 19:16-21.

3. Ihs me Siohwa doadoahngki ni ah ketikihong mehn Israel ko Kosonned Eiseko oh dahme wehio wehwehkihla?

³ Siohwa mahsen ong aramas ko sang ni ah doadoahngki tohnleng men me kasalehiong irail Kosonned kei me kitail kin kahdaneki Kosonned Eiseko. (Eksodus 20:1-17) Eri, sohte peikidpe me kosonned pwukat kin kohsang rehn Siohwa, Wasa Lapalahpie. Siohwa ketin ntingihdi kosonnedo pwuko pohn palien takai riau me Moses kesehdi pwalpeseng ni ahnsou me e kilangada mehn Israel ko kaudokiong sansal en kou kohlo. Siohwa pil pwurehng ntingihdi kosonned ko pohn takai. Ni ahnsouwet, ni en Moses kohdihdo weuwa takai me kosonned ko ntingdi powe, meseo linglingaling. Ni ahnsouo, irail koaros pahn kak wehwehki me kosonned ko ahneki wehwe laud.​—Eksodus 32:15-19; 34:1, 4, 29, 30.

4. Dahme kahrehda Kosonned Eiseko kesempwal?

⁴ Irail kihong pelin takai riau pwuko me Kosonned Eiseko ntingdi powe nan Kohpwahn Inou nan Wasa Sarawiheo nan impwalo oh mwuhr re uhd kihla nan Wasa Sarawiheo nan Tehnpas Sarawio. Kosonned ko kin kasalehda duwen wehwe mehlel me pid Kosonned en Moses oh duwen mwomwen sapwellimen Koht koasoandi en kaunda wehin Israel. Kosonnedo kin kihda mehn kadehde me Siohwa pilida irail mehn Israel kan.

5. Ni ahl dahieu me sapwellimen Koht Kosonned ong Wehin Israel kin kasalehda sapwellime limpoak?

⁵ Kosonned ko kin kasalehda laud duwen Siohwa, keieu sapwellime limpoak ong sapwellime aramas akan. Ia uwen kosonned ko kin wia kisakis kesempwal ong irail ko me kin kapwaiada! Emen ohl loalokong koasoia: “Kosonned en aramas koaros me pid duwen tiahk mwahu mahs de pil ahnsouwet sohte kak ekis pahrekiong de pil mwahusang kosonned eisek pwukat en Koht.” Me pid duwen Kosonned en Moses pwon, Siohwa mahsanih: “Eri, ma kumwail pahn peikiong ie oh dadaur ei inou, kumwail pahn wiahla nei aramas kesempwal. Tohn sampah pwon uhdahn nei, ahpw kumwail me pahn wiahla nei aramas pilipil. Kumwail eri pahn wiahla wehi ehu me pahn papah ie nin duwen samworo, pwihnen aramas ehu me kasarawihong iehte.”​—Eksodus 19:5-7.

Kosonned Ieu Me Ntingdi nan Mohngiong

6. Kosonned dahieu me kesempwal sang kosonned me ntingdi pohn takai riauwo?

⁶ Ni mehlel, kosonned kaselel pwukat kin inenen kesempwal. Ke ese me irail me keidi kan kolokol mehkot me pil kesempwal sang kosonned pwuko me ntingdi pohn takai riauwo? Siohwa kohpadahr me e pahn wiahda Kosonned kapw ehu me weksang Kosonned me wiawiong wehin Israel. “Inou kapw me I pahn wiahiong mehn Israel pahn duwe met: I pahn kihdi ei kosonned nan kapehdirail kan oh ntingihediong nan mohngiongirail kan. I pahn wiahla ar Koht, oh re pahn wiahla nei aramas.” (Seremaia 31:31-34) Sises me wia sounkadokepene Siohwa oh me keidi kan nan inou kapwo, oh e sohte pein ntingihdi kosonned kan ong sapwellime tohnpadahk ko. E kin nantihong ketikihong sapwellimen Siohwa kosonnedo nan madamadau oh mohngiong en sapwellime werek ko sang ni mehkan me e kin mahsanih oh wia.

7. Ihs me “kosonned en Krais tepin kohwong oh ihs me alehda kosonned wet mwuhr?

⁷ Kosonned wet kin adaneki “kosonned en Krais.” E keieu kohwong wehi ngenen ieu iei “Israel en Koht,” kaidehn ong wehin Israel en kawao me wia kadaudok en Seikop. (Kalesia 6:2, 16; Rom 2:28, 29). Israel en Koht kin wiawihkihda irail Kristian keidi kan. Ni ahnsou irail “pokon kalaimwun” me kohsang nan wehi koaros pil kin rapahki ahl akan en kaudokiong Siohwa. (Kaudiahl 7:9, 10; Sekaraia 8:23) Nin duwen “pwihn ehu” pahn “emente sounsilipe” pwihn riau wet kin alehda “kosonned en Krais,” oh mweidohng pwehn kaunda soahng koaros me re kin wia.​—Sohn 10:16.

8. Ia wekpeseng en kosonned en Moses oh kosonned en Krais?

⁸ Weksang irail mehn Israel en kawao me anahne kapwaiada Kosonned en Moses pwehki irail naitikidi nin duwen mehn Israel kei, irail Kristian kan rahnwet kin mih pahn Kosonned en Krais pwehki irail pein pilada oh irail pein men wia met, oh soahng kan me pid duwen irail mehn ia de wasa re naitikidi ie sohte kesempwal. Irail kin sukuhliki duwen sapwellimen Siohwa ahl akan oh irail kin men kapwaiada kupwure kan. Pwehki Mahsen en Koht kin “mih loalarail,” e kin mwomwen ntingdi nan mohngiongarail, irail Kristian keidi kan sohte kin peikiong Koht pwehki e kak kaloke irail ma irail sohte pahn peikiong oh re sohte pil kin ihte peikiong ih pwehki irail pehm me re pwukoahki. Arail peik kin poahsoanda pohn mehkot kesempwal oh me inenen kehlail, oh irail sihpw teikan pil kin peik ni soangen kahrepe ohte pwehki kosonned en Koht kin ntingdi nan mohngiongarail.

Kosonned me Poahsoanda Pohn Limpoak

9. Iaduwen Sises kasalehda me limpoak iei poahsoanpen sapwellimen Siohwa kosonned akan?

⁹ Sapwellimen Siohwa kosonned kan oh kehkehlik kan kak oaralapihehda ni lokaia ehute: limpoak. Met wia mehkot kesempwal sang mahs kohdo oh pil ni ahnsouwet ong kisehn kaudok mehlel. Ni ahnsou me peidek kohda ong Sises me pid mehnia kosonned me keieu laud oh kesempwal Sises ketin sapengki, “Ke pahn poakohng Kauno omw Koht sang nan kapehdomw unsek, sang ni ngenomw unsek, sang ni omw lamalam koaros unsek.” A me keriaun kesempwal: “Ke pahn poakohng mehn mpomw duwen omw kin poakohng pein uhk.” E pousehla mahsanih: “Kosonned riau pwukat, iei me poahsoanen pelien Kosonned en Moseso oh padahk en soukohp ako.” (Madiu 22:35-40) Sises kasalehda me kaidehnte Kosonned Eiseko ahpw pelien nting en Ipru pwon kin poahsoanda pohn limpoak.

10. Iaduwen atail ese me limpoak iei kosonned keieu kesempwal nan kosonned en Krais?

¹⁰ Limpoak ong Koht oh mehn mpatail pil wia poahsoanpen kosonned me mih nan mohngiong en Kristian akan? Uhdahn! Kosonned en Krais kin pid limpoak me mih nan mohngiongatail ong Koht oh pil kin wia kisehn kosonned kapw me Kristian akan en ahneki ngenen tohnmetei oh limpoak ong emen emen. Irail en ahneki soangen limpoak me Sises sapwellimaniki oh e pil nsenkihda en tounmeteikihla ah mour ong kompoakepah kan. E padahkiong sapwellime werek ko en limpoak ong Koht oh emen emen duwehte ah kin poakohng irail. Limpoak me re kasalehda nanpwungarail iei kilel laud ong kasansalepen Kristian mehlel kan. (Sohn 13:34, 35; 15:12, 13) Sises pil kaweidih irail en poakohng arail imwintihti kan.​—Madiu 5:44.

11. Iaduwen Sises kasalehda limpoak ong Koht oh pil aramas akan?

¹¹ Sises kin kihda mehn kahlemeng mwahu ong kasalehda limpoak. Nin duwen emen ngehn kehlail nanleng, e perenki kapwaiada kupwuren Semeo me pid sampah. Palahsang ah meirongkihla moure pwehki aramas akan en kak mour kohkohlahte, e kasalehong aramas akan ia mwomwen re pahn mour. E kin karakarahk, kadek, oh nsenohki sewese irail kan me kin mihla nan apwal oh pahtou. E pil kin padahki duwen “mour kohkohlahte,” ni pwerisek pwehn sewese meteikan en esehla Siohwa.​—Sohn 6:68.

12. Dahme kahrehda kitail kak nda me limpoak ong Koht oh mehn mpatail kin ahnsou koaros ehupene?

¹² Limpoak ong Koht oh mehn mpomw kin ahnsou koaros ehupene, sohte kin katohrohrpeseng. Wahnpoaron Sohn mahsanih: “Limpoak kin kohsang rehn Koht. . . . Ma mehmen kin nda, ‘I poakohng Koht,’ ahpw kin kailongki rie, ih aramas likamw men; pwe e sohte kak poakohng Koht me e sohte kilang, ma e sohte poakohng rie me pein ih kilikilang.” (1 Sohn 4:20) Siohwa iei limpoak oh pil kasalepen limpoak. Soahng koaros me e kin wia kin poahsoankihda limpoak. Kitail kin ahneki limpoak pwehki kitail wiawihda ni mwomwe. (Senesis 1:27) Sang ni atail kin kasalehda limpoak ong mehn mpatail, kitail kin kasalehda atail limpoak ong Koht.

En Poakohng kin Wehwehki en Peikiong

13. Ma kitail pahn limpoak ong Koht, dahme kitail en keieu wia?

¹³ Iaduwen kitail kak poakohng Koht me kitail sohte kak kilang? Ahl keieu kesempwal iei en esehla ih. Kitail sohte kak likih oh poakohng ni mehlel emen me kitail sehse. Ihme kahrehda, Mahsen en Koht kin kangoange kitail en esehla Koht sang ni atail wadek Pwuhk Sarawi, kapakap oh pil werekiong irail akan me esehier oh kin poakohng Siohwa. (Melkahka 1:1, 2; Pilipai 4:6; Ipru 10:25) Pwuhken Rongamwahu pahieu kin inenen kesempwal, pwe re kin kasalehda duwen sapwellimen Siohwa irair kan me kin sansalda nan mour oh kalohk me Sises Krais kin wia. Atail ineng en peikiong Koht oh kahlemengih sapwellime irair kan kin kekeirada ni atail kin esehla ih oh kalahnganki limpoak me e kasalehong kitail. Ehi, en poakohng Koht kin pidada peik.

14. Dahme kahrehda kitail kak ndahki me sapwellimen Koht kosonned akan sohte kin wia mehn katoutou?

¹⁴ Ni atail kin poakohng emen, kitail kin ese soahng kan me e kin mwahuki de sohte mwahuki oh kitail kin kawekila atail wiewia kan pwehn pahrekiong mepwukat. Kitail sohte kin men kansensuwedih irail kan me kitail poakohng. Wahnpoaron Sohn ntingihdi, “Pwe iet duwen wehwehn poakohng Koht: kitail en peikiong sapwellime kosonned akan. Oh sapwellime kosonned akan me sohte apwal.” (1 Sohn 5:3) Sapwellimen Siohwa kosonned akan sohte wia mehn katoutou kei oh re sohte pil nohn tohto. Limpoak me kin kahluwa kitail. Kitail sohte anahne wadlikihla kosonned kan pwehn kahluwa kitail nan atail wiewia koaros; pwe atail limpoak ong Koht me kin kahluwa kitail. Ma kitail poakohng Koht, kitail pahn perenki kapwaiada kupwure kan. Koht pahn kin pwungkin kitail, oh kitail kak ale kapai pwe sapwellime kaweid akan kin ahnsou koaros ong ni kamwahupatail.​—Aiseia 48:17.

15. Dahme pahn kamwekid kitail en kahlemengih Siohwa? Kawehwe.

¹⁵ Poakohng Koht kin kamwekid kitail en kahlemengih sapwellime irair kan. Ni atail kin poakohng emen, kitail kin pwungki ah irair kan oh men kahlemengih. Tehk duwen nanpwung mwahu nanpwungen Siohwa oh Sises. Ira kin ketiketpene nanleng mwein ele erein sounpar rar kei. Ira kin ahneki limpoak me mehlel oh loal. Sapwellimen Sises wiewia kan kin duwehte Seme me kahrehda e kak padahkiong sapwellime tohnpadahk kan: “Sises ahpw ketin sapeng, mahsanih, “Mehmen me kilangieier pil kilangehr Sahm.” (Sohn 14:9) Ni atail kin kekeirada atail loalokongkihla oh kalahnganki Siohwa oh sapwellime Ohl, kitail kin mwekidki en kahlemengih. Atail limpoak ong Siohwa oh pil sawas en sapwellime ngehn sarawi, kin sewese kitail “pwilikidier mour mering en mahso iangahki eh wiewia kan; oh met kitail pwuhriongehr nan likoun mour kapw en aramas kapw.”​—Kolose 3:9, 10; Kalesia 5:22, 23.

Kasalehda Limpoak Sang Atail Wiewia kan

16. Iaduwen atail kin kasalehda limpoak ong Koht oh mehn mpatail kan ni atail kin kalohk oh padahk?

¹⁶ Nin duwen Kristian kan, kitail kin mweidohng atail limpoak ong Koht en kamwekid kitail en iang towehda doadoahk en kalohki Wehio oh katohnpadahk. Ni atail kin wia met, kitail kin kaperenda Siohwa Koht, “me kin ketin kupwurki aramas koaros en ale komourparail oh marainkihla me mehlel.” (1 Timoty 2:3, 4) Kitail pahn kak diar peren ni atail sewese meteikan en kihong Mahsen en Koht en ntingdi nan mohngiongarail. Oh kitail kin peren ni atail kin kilang arail wiewia kan kin wekila oh kapwarehda sapwellimen Siohwa irair kan. (2 Korint 3:18) Ni mehlel, en sewese emen en esehla Koht kin wia kisakis keieu kesempwal kitail kak kihong emen. Irail kan me kin wiahla kompoakepahn Siohwa kak perenki erein arail mour.

17. Dahme kahrehda e wia elen loalokong en kakairada limpoak ong Koht oh mehn mpomw sang kakairada limpoak ong kepwe kan?

¹⁷ Kitail kin mih nan sampah ieu me kepwehn sampah wia mehkot kesempwal oh pil me aramas kin poakohng. Ahpw, kepwe kan pahn kak sohrala. Re kak pirapala de pil ohla. (Madiu 6:19) Pwuhk Sarawi mahsanih: “Sampah wet oh mehkoaros nin sampah me aramas kin inengieng kin sosohrala; ahpw me kin kapwaiada kupwur en Koht pahn momour kohkohlahte.” (1 Sohn 2:16, 17) Ei, Siohwa pahn mour kohkohlahte iangahki irail kan me kin poakohng oh papah Ih. Eri, e soh wia elen loalokong en nantihong kekeirda limpoak ong Koht oh pil aramas akan, sang atail pahn rapahki mehkan en sampah wet me pahn ong ahnsou kiste?

18. Iaduwen emen misineri kasalehda limpoak en tohnmetei?

¹⁸ Irail kan me kin kasalehda limpoak kin wahdo kaping ong Siohwa. Tehk duwen emen misineri nan Senegal me adaneki Sonia. E kin onop Paipel rehn emen lih me adaneki Heidi, me alehdi soumwahu HIV sang rehn ah pwoud me sohte iang padahk mehlel. Mwurin ah pwoudo mehla, Heidi papidaisla, ahpw mwuhr paliwere tepida luwetla oh e kapedolong nan imwen wini pwehki soumwahu AIDS. Sonia koasoia: “Tohndoadoahk en imwen winio wia uwen arail kak koaros ahpw re inenen malaulau. Irail kan sang nan mwomwohdiso pein nsenkihda arail ahnsou pwehn apwalih ah anahn kan ni imwen winio. Keriau en pwongo, I mih nan lohs ehu limwahn ah pehto oh sewese apwalih ih lao e mehla. Emen toahkte nda: ‘Aht kahpwal me kin keieu laud iei ni ahnsou me peneinei kan kin kalap kihdihte arail peneinei kan me ahneki AIDS oh kohkohlahsang irail. Ahpw, dahme kahrehda kowe kaidehn ah peneinei oh pil sohte kohsang sahpwet oh pil pohn kili amwa sohte duwehpene ahpw ke pein men kihong uhk nan keper en apwalih aramas soumwahu?’ I kawehwe ong ih me, ong ngehi, Heidi duwehte uhdahn riei me likamwete aht nohno oh pahpa tehmen. Ni ahnsou me I esehla Heidi me mwuhr I wiakihla uhdahn riei, I diarada peren ni ahi apwalih ih.” Sonia sohte alehda ahn Heidi soumwahuo mendahki e apwalih ih.

19. Dahme kitail en isaneki ni atail pahn kihong kosonned en Koht nan mohngiongatail?

¹⁹ Mehn kahlemeng mwahu tohto me pidada ngenen tohnmetei kin dierek rehn sapwellimen Siohwa ladu kan. Sohte kosonned me ntingdi me kin kak kasalehda ihs sapwellimen Koht aramas akan nan rahnwet. Me weksang met kitail kin kilang pweidahn mahsen kan nan Ipru 8:10: “Kauno pil mahsanih, eri, iet inou lap me I pahn kauwada nanpwungen ngehi oh mehn Israel kan ni rahn ako me pahn kohdo, I pahn audehkihla kapehdirail kan oh ntingihediong nan mohngiongirail ei kosonned akan. I pahn wiahla ar Koht, oh re pahn wiahla nei aramas.” Kitail en ahnsou koaros kesempwaliki kosonned me pid limpoak me Siohwa ntingihdi nan mohngiongatail, oh isaneki ahnsou mwahu koaros en kasalehda limpoak.

20. Dahme kahrehda kosonned en Krais wia kisakis kesempwal ieu?

²⁰ Ia uwen e kin wia mehkot kaperen ni atail kin papah Koht iangahki riatail nan sampah pwon me kin kasalehda soangen limpoak! Irail kan me kin kihong kosonned en Krais nan mohngiongarail kin perenki kisakis kesempwal wet me sohte mwohni kak pwainda nan sampah kailok wet. Re sohte kin ihte perenki limpoak en Siohwa ahpw re pil kin diar peren nan limpoak kehlail en riatail kan ni pali ngehn. “Ia uwen lingan, ia uwen kansenamwahu en sapwellimen Koht aramas akan ar kin miniminpene!” Mendahki Sounkadehdehn Siohwa kan kin kohsang nan wehi tohto, lokaiahki lokaia tohto oh pil kohsang nan tiahk en wehi me wekpeseng, irail kin ehupene oh perenki ehupenehn pali ngehn me kin toupahrek. Ehupene wet kin wahdo en Siohwa kapai. Sounmelkahkao ntingihdi: “E rasehng pwoaik pohn Nahna Ermon, me kin mweremwerediong pohn dohl kan en Saion. Pwe iei wasao me Kauno ketin inoukihda me e pahn ketikihong kitail sapwellime kupwuramwahu--mour me sohte kak imwisekla.”​—Melkahka 133:1-3.

Ke Kak Sapeng?

• Ia uwen kesempwal en Kosonned Eiseko?

• Ia kosonned me ntingdi nan mohngiong kan?

• Iaduwen irair en limpoak kin pid “kosonned en Krais”?

• Ni ahl dah kei kitail kak kasalehda atail limpoak ong Koht oh mehn mpatail?

[Kilel nan Pali 15]

Mehn Israel oko ale kosonnedo pohn takai riauwo

[Kilel nan Pali 17]

Sonia iangahki emen serepein en Senegal nan Kapokon en District 2004