Dahme Siohwa Kin Kupwurki Kitail En Wia Nan Rahnpwukat?
“Nindokon eh patopatohwan met, pelien depwek marain pali pa kipeiraildi oh ngihl ehu peidihdo sang nan pelien depweko me mahsanih, “Iei met nei pwutak kompoake me I kin popohlki—kumwail rong sapwellime padahk.’”—MADIU 17:5.
1. Iahd kahrepen Kosonnedo pweida?
SIOHWA ketikihong wehin Israel Kosonnedo, iangahki ire tohto kan. Me pid duwen Kosonnedo, wahnpoaron Pohl ntingihdi: “Pwe meirong keimwohkan me mihmihte ni kisin tungoal oh ni tiahk en kamwakel. Eri, soahng pwukat koaros tiahk sansal kei me pahn doadoahkete lao lel ahnsou me Koht pahn ketin onehda sapahl mehkoaros.” (Ipru 9:10) Ni ahnsou me Kosonnedo kahluwa luhwen mehn Israel kan en kamehlele Sises me Ih Mesaia oh Krais, kahrepen Kosonnedo pweidaher. Ihme kahrehda, Pohl mahsanih: “Krais ketido oh kaimwisekala Kosonnedo.”—Rom 10:4; Kalesia 3:19-25; 4:4, 5.
2. Ihs me mih pahn Kosonnedo, oh iahd irail solahr mih pahn Kosonnedo?
2 Met kin wehwehki me Kosonnedo sohte kin kaunda kitail nan rahnpwukat? Ni mehlel, pali moron en aramas akan sohte mih pahn Kosonnedo, nin duwen sounmelkahkao kawehwehda: “[Siohwa] kin ketin padahkiong Seikop sapwellime mahsen kan, oh sapwellime koasoandi kan oh kopwung pilipil kan ong Israel. E sohte ketin wiahiong met wehi teikan; re sohte ese sapwellime kosonned akan.” (Melkahka 147:19, 20, New World Translation) Ni ahnsou me Koht ketin wiahda kosonned kapw me poahsoanda pohn tomw meirong en Sises, wehin Israel pil solahr mih pahnangin Kosonnedo. (Kalesia 3:13; Episos 2:15; Kolose 2:13, 14, 16) Ma kitail sohte mih pahn Kosonnedo, dahme Siohwa kin kupwurki irail akan me men papah Ih en wia nan rahnpwukat?
Dahme Siohwa kin Kupwurki Kitail en Wia
3, 4. (a) Dahme Siohwa kin kupwurki kitail en wia nan rahn pwukat? (b) Dahme kahrehda kitail anahne kahlemengih Sises?
3 Erein kaimwiseklahn pahr me Sises wia doadoahk en kalohk, sapwellime wahnpoaron kan, Piter, Seims, oh Sohn iang Sises kohdahla pohn nahna ilelei ehu, mwein nan kahng en Nahna Hermon. Wasao, re kilangada kasansal ehu me pid duwen en Sises linganla oh re pein rongada kapitien Koht: “Iei met nei pwutak kompoake me I kin popohlki—kumwail rong sapwellime padahk.” (Madiu 17:1-5) Ih me Siohwa kin kupwurki kitail en wia—en rong Sapwellime Ohl oh kahlemengih Ih oh idawehn sapwellime padahk kan. (Madiu 16:24) Wahnpoaron Piter ntinghdi: “Pwe duwen pein Krais eh lokolongkin kumwail oh ketikihong kumwail karasepe mwahu, ih pil duwen amwail pahn idawehn oh kahlemengih.”—1 Piter 2:21.
4 Dahme kahrehda kitail anahne idawehnla Sises? Pwehki sang ni atail pahn idawehnla Ih, kitail kin pil idawehnla Siohwa Koht. Sises uhdahn esehla oh karanih Semeo, pwe e mihmi rehn Koht erein sounpar lik kei nanleng mwohn e kohdihdo nin sampah. (Lepin Padahk 8:22-31; Sohn 8:23; 17:5; Kolose 1:15-17) Ni ahnsou me Sises mihmi nin sampah, e kin ni lelepek wiliandi Semeo. E kawehwehda: “Ihte me I kin koasoia: mehkan me Sahmo ketin padahkihongieier.” Ahpw ni mehlel, Sises kin kahlemengih Siohwa ni unsek, oh ih kahrepe me e kak nda met: “Mehmen me kilangieier pil kilangehr Sahm.”—Sohn 8:28; 14:9.
5. Kristian akan kin mih pahn mehnia kosonned, oh iahd kosonnedo tepida manamanla?
5 Dahme emen anahne wia ma e kin karonge Sises oh kahlemengih Ih? Met wehwehki me kitail kin mihmi pahnangin ekei kosonned kan? Pohl ntingihdi: “Pein ngehi, I sohte mi pahn Kosonnedo.” Nan ire wet, Pohl koasoia duwen “kosonned meringo,” iei Kosonned en Moses, me Koht ketikihong mehn Israel akan. Ahpw, ni pali teio, Pohl wehwehki me e “iang mih pahn kosonned en Krais.” (1 Korint 9:20, 21, NW; 2 Korint 3:14) Ni ahnsou me Kosonned meringo imwisekla, “inou kapw” ehu tepida wiawihda me iei “kosonned en Krais” me sapwellimen Siohwa ladu kan nan rahnpwukat anahne peikiong.—Luk 22:20; Kalesia 6:2; Ipru 8:7-13.
6. Dahkot “kosonned en Krais,” oh iaduwen kitail kak peikiong kosonned wet?
6 Siohwa sohte padahkiong aramas akan en koasoanehdi “kosonned en Krais” en duwehte Kosonned meringo, me kosonned tohto ntingdi oh kosonned pwukat nennepeseng nin duwen oaralap kan. Kosonned kapw wet ong tohnpadahk kan en Krais sohte kin kairekihdi mehkan me aramas akan anahne wia de mehkan me re sohte kak wia. Nan Sapwellime Siohwa Mahsen, E ketin nekidala pwuhk pahieu me kin kawehwehda duwen mour oh padahk kan en Sapwellime Ohl. Oh pil, Koht padahkiong ekei tohnpadahk kan en Sises en ntingihdi ekei kaweid kan me kin pid tiahk kan, koasoandi en mwomwohdiso kan, tiahk kan nanpwungen tohnpeneinei kan, oh ire teikan. (1 Korint 6:18; 14:26-35; Episos 5:21-33; Ipru 10:24, 25) Ni ahnsou me kitail kin idawehnla mehn kahlemeng oh padahk kan en Sises Krais oh kapwaiada kaweid kan en irail me ntingihdi Pwuhk Sarawi pahn kaweid en Sapwellimen Siohwa Ngehn Sarawi ni keieun senturi, kitail kin peikiong “kosonned en Krais.” Ih me Siohwa kin kupwurki sapwellime ladu kan en wia nan rahn pwukat.
Kesempwalpen Limpoak
7. Iaduwen Sises kasansalehda poahsoanpen sapwellime kosonned ni ahnsou me E wia kaimwiseklahn Pahsohpa rehn sapwellime wahnpoaron kan?
7 Limpoak iei irair kesempwal ehu nan Kosonnedo, e pil wia irair kesempwal ehu nan kosonned en Krais. Sises kasansalehda met ni ahnsou me Ih oh sapwellime wahnpoaron kan kasarawi Pahsohpa me wiawi nan pahr 33 C.E. Nin duwen me wahnpoaron Sohn kawehwehda dahme wiawi ni pwongo, Sises kin koasoiahda pahn pak 28 duwen irairen limpoak. Met kasansalehong sapwellime wahnpoaron kan duwen mouren sapwellime kosonnedo. Sohn tepida koasoia duwen wiewia kan en ni pwongo: “Sises ketin mwahngih me sapwellime ahnsou lelehr en mweselsang sampah wet oh ketilahng rehn Seme. E kin ketin loalloale sapwellime kan me mihmi nin sampah, oh e ketin loalloale irail lel ni imwi.”—Sohn 13:1.
8. (a) Dahme kin kasansalehda me wahnpoaron ko kin kalapw akamaipene? (b) Dahme Sises wia pwehn padahkiong sapwellime wahnpoaron ko ehu mehn kasukuhl en lamalam en aktikitik?
8 Sises kin poakohng sapwellime wahnpoaron kan, mendahte ah sohte kin mwomwen pweida ni ah kin songen sewese irail en kihsang rehrail arail ineng en alehdi manaman oh ndandla. Sounpwong kei mwohn irail lellahng nan Serusalem, ‘re akahkamaiki kohdo ihs me keieu lapalap rehrail.’ Oh mwohnte re pedolong nan kahnimwo pwehn iang Pahsohpa, re pwurehng akamai. (Mark 9:33-37; 10:35-45) E sansal me re kin kalap akamaiki met, pwehki dahme wiawi mwurinte irail wahnpoaron akan pedolongala nan pere powe pwehn wia kaimwiseklahn Pahsohpa nanpwungarail. Ni ahnsowo, sohte emen rehrail uhd tepida wiahda arail tiahk en widen patehnehn meteikan. Pwehn padahkiong irail ehu mehn kasukuhl duwen lamalam aktikitik, Sises pein widen patehnehn wahnpoaron ko.—Sohn 13:2-15; 1 Timoty 5:9, 10.
9. Dahme Sises wia ong dahme wiawi mwurinte kaimwiseklahn Pahsohpa?
9 Mendahki mehn kasukuhl wet kohwong irail, mwurin Pahsohpa oh mwurin Sises wiahda Katamanpen eh pahn pwoula, tehk dahme pil pwurehng wiawi. Rongamwahu en Luk mahsanih: “Tohnpadahk ko ahpw akamaikihda ihs me pahn lapalap rehrail.” Sises sohte lingeringer pahn wahnpoaron ko oh lipwore irail, ahpw, ni kadek, E ketikihong irail kaweid mwahu: me irail pahn anahne weksang kaun akan en sampah me kin men ahneki manaman kehlail. (Luk 22:24-27) E ahpw mwuhr ketkihda poahsoanpen kosonned en Krais: “I pahn kihong kumwail kosonned kapw ehu: kumwail en poakpene nanpwungamwail. Duwen ei poakohng kumwail, iei duwen kumwail en poakpene.”—Sohn 13:34.
10. Mehnia kosonned me Sises ketikihong sapwellime tohnpadahk kan, oh met kin pidada dah?
10 Ni ahnsou mwuri, Sises kasansalehda ia uwen loal limpoak en Krais. E mahsanih: “Iet ei kosonned ong kumwail: kumwail en poakpene nanpwungamwail, duwehte ei kin poakohng kumwail. Iet limpoak me keieu laud me emen kak ahneki ong kompoakepah kan, ma e pahn tounmeteikihla eh mour pwehki kompoakepah ko.” (Sohn 15:12, 13) Ia wehwehn mahsan en Sises, me sapwellime tohnpadahk kan pahn anahne tounmeteikihla pein ahr mour ong iengarail me pwoson akan ma re anahne? E sansal me Sohn kin kamehlele mahsen pwukat (e mihmi rehn Sises ni ahnsou Sises me mahsanih mahsen pwukat) pwe mwuhr Sohn ntingihdi: “Iet duwen me kitail kak esehki dahkot limpoak: Krais tounmeteikihla pein ih pwehki kitail; pil duwehte kitail en tounmeteikihla mouritail pwehki riatail Kristian akan.”—Sohn 3:16, NW.
11. (a) Iaduwen kitail kin kapwaiada kosonned en Krais? (b) Mehn kahlemeng dahieu me Sises ketikihda?
11 Eri, kitail sohte kin kapwaiada kosonned en Krais ihte sang ni atail pahn padahkiong meteikan duwen Ih. Kitail pil anahne kahlemengih Sises. Ni mehlel, Sises doadoahngki lokaia kaselel oh pwung kan ni ahnsou eh kin wia sapwellime padahk kan. Ahpw, e kin padahk sang eh mehn kahlemeng mwahu. Mendahki Sises wia ngehn kehlail men ni E ketiket nanleng, E nantihong papah Seme ni eh ketidihdo sampah oh kasalehong aramas akan dahme re pahn wia. E kin aktikitik, kadek oh e kin sewese irail akan me toutoukihla oh pahtoula. (Madiu 11:28-30; 20:28; Pilipai 2:5-8; 1 Sohn 3:8) Oh Sises kangoange sapwellime tohnpadahk kan en limpoakpene, nin duwen e kin poakohng irail.
12. Dahme kahrehda kitail kak nda me kosonned en Krais sohte kin katikitikiala anahnpen limpoak ong Siohwa?
12 Limpoak ong Siohwa—me wia kosonned me keieu laud—kin mih ni irair en kesempwal kadepe nan kosonned en Krais? (Madiu 22:37, 38; Kalesia 6:2) Keriau? Uhdahn soh! Limpoak ong Siohwa oh limpoak ong iengatail Kristian akan kin pahrekpene. Emen sohte kak uhdahn poakohng Siohwa ma e sohte kin poakohng rie kan, pwe wahnpoaron Sohn koasoia met: “Ma mehmen kin nda, ‘I poakohng Koht,’ ahpw kin kailongki rie, ih aramas likamw men; pwe e sohte kak poakohng Koht me e sohte kilang, ma e sohte poakohng rie me pein ih kilikilang.”—1 Sohn 4:20; pil kilang 1 Sohn 3:17, 18.
13. Ia lipwen ahn tohnpadahk kan ahr kin peikiong sapwellimen Sises kosonned kapwo?
13 Ni ahnsou me Sises ketikihong sapwellime tohnpadahk kan kosonned kapw en limpoakpene nanpwungarail duwehte E kin poakohng irail, E kawehwehda dahme pahn wiawi ma re pahn kasalehda limpoak. “Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.” (Sohn 13:35) Tertullian, emen ohl me memour sounpahr epwiki kei mwurin pwoulahn Sises, kin kasalehda me limpoak nanpwungen Kristian en mahs kan me sansal. E koasoia dahme aramas akan me kaidehn Kristian kin nda duwen tohnpadahk kan en Krais: ‘Kilang ia uwen laud en limpoak nanpwungarail oh irail kin onopada ren kin mehkihla emen emen.’ Eri, kitail kak idek pein rehtail, ‘I kin kasalehda soangen limpoak wet ong iengei Kristian akan me pahn kasansalehda me ngehi emen tohnpadahk en Sises?’
Iaduwen Kitail kin Kasalehda Atail Limpoak
14, 15. Dahme pahn kak kahrehong kitail en apwaliki peikiong kosonned en Krais, ahpw dahme pahn kak sewese kitail en kapwaiada kosonned en Krais?
14 E kesempwal sapwellimen Siohwa ladu kan en ahneki limpoak en Krais. Ahpw, ke kin apwaliki kasalehda limpoak ong riomw akan me kin raparapahki pein kamwahuparail? Eri, nin duwen me kitail ahpwtehn koasoiada, irail wahnpoaron kan pil kin akamaipene pwehn utungada pein ahr ineng roporop kan. (Madiu 20:20-24) Mehn Kalesia kan pil akamaipene nanpwungarail. Mwurin Pohl kawehwehda me limpoak ong mehn mpatail kan kin wia poahsoan en Kosonnedo, e kaweidkinirailla: “A ma kumwail pahn kin pekehkehpene nanpwungamwail duwehte mahn lawalo kan, eri, kumwail kanahieng pwe kumwail de mwomwla.” Mwurin e kasalehda wekpeseng en ahnepen aramas oh wahn ngehn en Koht, Pohl kapataiong kaweid wet: “Kitail en dehr aklapalap de kamwakara emen, de peirinpene. Kumwail sawaskipene amwail wisik toutou kan, pwe ih duwen amwail pahn kapwaiada kosonned en Krais.”—Kalesia 5:14–6:2.
15 Pwehki Siohwa kin kupwurki kitail en peikiong kosonned en Krais, met kin wehwehki me E kin kupwurki kitail en wia mehkan daulihla dahme kitail kakohng? Mendahki e wia apwal ong kitail en kadek ong aramas me kin kansensuwedih kitail, kitail anahne “wialahr sapwellimen Koht seri kompoak kei, oh song en kahlemengih ih. Nan atail mour kitail weweidki limpoak.” (Episos 5:1, 2) Kitail anahne kilangwong mehn kahlemeng mwahu en Koht, me “kasalehiong kitail ia uwen laud en sapwellime limpoak ong kitail: pwe ni ahnsou me kitail mihmi nan dihp, Krais ketin pwoukinkitailla.” (Rom 5:8) Sang ni atail kadek lamalam en pein sewese meteikan oh pil iangahki irail ako me suwediong kitail, kitail pahn kakehr ahneki nsenamwahu ni atail ese me kitail kin kahlemengih Koht oh kin peikiong kosonned en Krais.
16. Iaduwen kitail kin kasalehda me kitail kin poakohng Koht oh Krais?
16 Kitail anahne tamanda me kitail kin kasalehda atail limpoak sang atail wiewia kan, kaidehn ihte sang atail lokaia kan. Pil pein Sises, ni ehu ahnsou, kin sapwellimaniki ahnsou apwal ong ah madamadau ni ah pahn wia kupwuren Koht pwehki irair akan me pid kupwuro. Sises kapakapki, “Ipa, ma komw ketin kupwurki, a komw ketikihweisang ie delen lokolok wet.” Ahpw e mwadangete kapataiong met: “Ahpw soh, kaidehkin nsenei, pwe kupwuromwihte en pweida.” (Luk 22:42) Ahpw mendahki Sises lelohng lokolok laud, e wia kupwuren Koht. (Ipru 5:7, 8) Peik iei ehu mehn kadehdepen atail limpoak oh kin kasalehda me kitail kin pohnese me sapwellimen Koht ahl me keieu pwung. Paipel mahsanih, “Pwe iet duwen wehwehn poakohng Koht: kitail en peikiong sapwellime kosonned akan. Oh sapwellime kosonned akan me sohte apwal.” (1 Sohn 5:3) Sises mahsanih ong sapwellime wahnpoaron akan: “Ma kumwail poakohng ie, a kumwail pahn kapwaiada ei kosonned akan.”—Sohn 14:15.
17. Kosonned tohrohr dahieu me Sises kihong sapwellime tohnpadahk kan, oh iaduwen kitail ese me kosonned wet kin kadoadoahk ong kitail rahnwet?
17 Sises padahkiong sapwellime kan en limpoakpene, ahpw likin met, kosonned tohrohr dahieu me e pil ketikihong irail en wia? E kehkehlingkiong oh kaiahne irail en wia doadoahk en kalohk. Piter mahsanih: “E ketin mahsanihong kiht se en kalohkiseli rongamwahu ong aramas akan oh kadehde me iei ih me Koht ketin idihadahr pwe en wia sounkopwung en me momour oh me melahr akan.” (Wiewia 10:42) Sises wia kehkehlik wet ni sansal: “Kumwail eri kohwei wasa koaros oh padahkiong tohn wehi kan koaros; pwe re en wiahla nei tohnpadahk: papidaisihirailla ni mwaren Sahm oh Sapwellime oh Ngehn Sarawi, oh kehkehlingkihong irail re en peikiong mehkoaros me I koasoanediong kumwail.” (Madiu 28:19, 20; Wiewia 1:8) Sises pil kasansalehda me kaweid pwukat pil pahn kadoadoahk ong sapwellime tohnpadahk kan ni ahnsouwet, “ni imwin ahnsou,” pwe e mahsanih met: “Rongamwahu en Wehin Koht pahn lohkseli was koaros nin sampah, pwe kadehde en mie ong aramas koaros—a mwuri, imwin sampah ahpw pahn kohdo.” (Daniel 12:4; Madiu 24:14) Ni mehlel, Koht kupwurki kitail en wia doadoahk en kalohk. Ahpw, ekei aramas kin lemeleme me Koht kin kupwurki kitail en wia doadoahk en kalohk oh doadoahk wet kin wia mehkot daulihla dahme kitail kakohng. Ahpw, mehlel?
Dahme Kahrehda E Kin Mwomwen Apwal
18. Dahme kitail anahne tamanda ni ahnsou me kitail kin wia kupwuren Siohwa ahpw lelohng kalokolok kan?
18 Nin duwen me kitail kilangehr, Siohwa kin kupwurki aramas akan en kapwaiada soangsoangen kosonned akan erein poadopoad en aramas akan. Oh nin duwen dahme re anahne wia kin wekpeseng, pil duwehte arail kasongosong kan kin wekpeseng. Pwehki Koht kin kupwurki met, Sapwellimen Koht Ohl kin lelohng kasongosong kan me keieu apwal, lao lel E kamakamala ni ahl me keieu lemei. Ahpw ni ahnsou me kitail kin lelohng kalokolok kan pwehki Siohwa kin kupwurki kitail en wia, kitail anahne tamanda me kaidehn Ih me ketikihdo mehn kasongpatail kan. (Sohn 15:18-20; Seims 1:13-15) Uhwong en Sehdan kahrehda aramas kin wiahda dihp, oh pil aramas kin lelohng kalokolok, oh mehla, oh Sehdan me kin kahrehong aramas en apwaliki kapwaiada dahme Siohwa kin kupwurki sapwellime ladu kan en wia.—Sohp 1:6-19; 2:1-8.
19. Dahme kahrehda e wia pwais kaselel ehu en kapwaiada dahme Koht kin kupwurki kitail en wia ki sapwellime Ohl?
19 Ki Sapwellime Ohl, Siohwa koasoanehdi me, ni imwin ahnsou, sapwellime ladu kan pahn kalohkseli nan sampah pwon me ihte me pahn kamwahuwihala ahn aramas lokolok kan koaros iei Wehin Koht. Koperment en Koht wet pahn irisweisang kahpwal koaros pohn sampah—mahwen, mwersuwed, duhpek, mahla, soumwahu oh mehla. Wehio pahn wahdo paradais lingan pohn sampah, oh pil irail me mehlahr kan pahn iasada. (Madiu 6:9, 10; Luk 23:43; Wiewia 24:15; Kaudiahl 21:3, 4) Kitail ahneki pwais kaselel en lohkiseli Rongamwahu pwukat! Ni sansal, e sohte apwal en wia dahme Siohwa kupwurki kitail en wia. Kitail kin lelohng kahpwal akan, ahpw Sehdan me Tepil oh sampah wet me kin kahrehda kahpwal pwukat kin lelohng kitail.
20. Iaduwen kitail kak powehdi kahpwal akan me Tepilo kin wiahda?
20 Iaduwen kitail kak powehdi kahpwal akan me Sehdan kin wiaiong kitail? Sang ni atail pahn medemedewe duwen mahsen pwukat: “Samwa, ke en loalokongla, I ahpw pahn kin pereperen; e pahn mie ei pasapeng ong mehmen me pahn kauwei ie.” (Lepin Padahk 27:11) Sises utungada Siohwa ni ah kin kihong pasepengpen ahn Sehdan kauwe Siohwa ni ah pwilikihdi soanamwahu en ah mour nanleng pwehn ketidihdo sampah oh wia kupwuren Koht. (Aiseia 53:12; Ipru 10:7) Nin duwen aramas men, Sises dadaurete kasongosong koaros, lao lel E pwoula nin tuhke en kalokolok ehu. Ma kitail pahn idawehnla atail Soun Mehn Kahlemeng Mwahu, kitail pil kak dadaurete kalokolok kan oh pil kapwaiada dahme Siohwa kin kupwurki kitail en wia.—Ipru 12:1-3.
21. Ia omw pepehm akan duwen limpoak me Siohwa oh Sapwellime Ohl kasalehda?
21 Ia uwen laud limpoak me Koht oh Sapwellime Ohl kin kasalehong kitail! Pwehki meirong en Sises, aramas peik kan kin ahneki koapworopwor en mour kohkohlahte nin Paradais. Eri, kitail en dehr mweidohng mehkot en kaluwetala atail koapworopwor. Ahpw, pein emen emen kitail en kesempwaliki dahme Sises wia, nin duwen me Pohl kasalehda: “Sapwellimen Koht Ohl . . . ketin loalloale ie oh meirongkihong Koht pein ih pwehki ngehi.” (Kalesia 2:20) Eri, kitail pahn kasalehda atail kalahngan laud ong atail Koht limpoak, Siohwa, me sohte kin kupwurki kitail en wia mehkan me daulihla dahme kitail kakohng.
Iaduwen Komw Pahn Sapeng?
◻ Dahme Siohwa kin kupwurki kitail en wia nan rahnpwukat?
◻ Iaduwen Krais kasansalehda kesempwalpen irairen limpoak ni kaimwiseklahn ni soutik me e pahn mih rehn sapwellime wahnpoaron kan?
◻ Iaduwen kitail kak kasalehda me kitail kin poakohng Koht?
◻ Dahme kahrehda atail wia dahme Siohwa kin kupwurki kitail en wia kin wia pwais kaselel ong kitail?
[Kilel nan Pali 23]
Mehn kasukuhl dahieu me Sises padahkiong sapwellime wahnpoaron akan ni ahnsou e widen nehn wahnpoaron ko?
[Kilel nan Pali 25]
Mendahki kalokolok kan, kalohkiseli Rongamwahu iei ehu pwais kaperen