Ke Kin Wia Kisehn Irail Akan Me Koht Kin Ketin Loalloale?

“Mehmen me kin rong oh kapwaiada ei kosonned kan, iei ih me kin poakohng ie. Oh mehmen me kin poakohng ie, Semei pahn pil poakohng ih.”​—SOHN 14:⁠21, New World Translation.

1, 2. (a) Iaduwen Siohwa kin kasalehda sapwellime limpoak ong aramas akan? (b) Dahme Sises tepida wiahda ni pwong en Nisan 14, 33 C.E.?

SIOHWA kin ketin loalloale aramas akan me e kapikada. Pwe iei uwen Koht e ketin poakong aramas akan “me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.” (Sohn 3:16) Ni ahnsou en wia Katamanpen Kamatalahn Krais kerendo, Kristian mehlel akan kin anahne en medemedewe laud duwen Siohwa me ketin “poakohng kitail, oh ketin poaronehdo Sapwellime Iehros pwe en wiahla tomwpen dipatail kan.”​—1 Sohn 4:10.

² Ni pwong en Nisan 14, 33 C.E., Sises oh sapwellime wahnpoaron 12 me tuhpene nan pere ehu nan ehu ihmw me mih nan Serusalem pwen wia Pahsohpa, pwehn wia kataman ong ni ahnsoun mehn Israel akan me pitsang mehn Isip akan. (Madiu 26:17-​20) Mwurin irail wia kamadipw en mehn Suhs akan, Sises mweidong Sudas en kohkohlahsang rehrail oh e uhd tepida wiahda kataman en sak ehu me pahn wiahla ong Kristian akan, Katamanpen Kamatalahn Krais.a Sises doadoahngki pilawa me sohte doal ihs oh wain weitahta pwehn wia kilel akan me pahn karasahiong sapwellime kalap oh nta, Sises wia kamadipw wet rehn sapwellime wahnpoaron 11. Soun nting kan en Rongamwahu, Madiu, Mark, Luk oh wahnpoaron Pohl, kin kawehwehda ni oaretik iaduwen e wia Kataman wet, oh Pohl kin kahdaneki Kataman wet “sak en soutuk en Kauno.”​—1 Korint 11:20; Madiu 26:26-​28; Mark 14:22-​25; Luk 22:19, 20.

3. Ni ahl kesempwal dah kei me wahnpoaron Sohn eh ntingihdi duwen mouren Sises ni kaimweseklahn aua kei rehn sapwellime tohnpadahk kan nan pereo me weksang mehteiko?

³ Wahnpoaron Sohn sohte ntingihdi nan Rongamwahuo duwen ahr kin pass-seli pilawao oh wain, ele mwein, pwehki ni ahnsou e tepida ntingihdi Rongamwahuo (mpen pahr 98 C.E.), irail tepin Kristian akan kin wehwehkiher oh ahnsou koaros kapwaiada koasoandi wet. (1 Korint 11:23-​26) Ahpw, sang sawas me kohsang powe, Sohn kelepw me kin padahkiong kitail duwen ekei ire kesempwal kan duwen dahme Sises mahsanih oh wiewia mwohnte oh mwurin Sises wia Katamanpen Kamatalahn sapwellime pwoula. Ire kesempwal oaretik kaperen pwukat kin kak audehda irelaud limau de tohto sang nan Rongamwahu en Sohn. Ni sansal, re kin kawehwehda ia soahngen aramas akan me Koht kin ketin poakong. Kitail en kasawiahda pwuhken Sohn irelaud 13 lel 17.

Sukuhlikihsang Rehn Sises Mehn Kahlemeng Mwahu en Limpoak

4. (a) Iaduwen Sohn kasansalehda duwen oaralap kesempwal ehu ni ahnsou Sises oh sapwellime tohnpadahk kan tuhpene oh e tapiada wiahda Katamano? (b) Ia kahrepe kesempwal ehu me Siohwa kin ketin poakohng Sises?

⁴ Limpoak iei oaralap kesempwal ieu ong irelaud pwukat me kin audaudkihda sapwellimen Sises kaweid ong sapwellime tohnpadahk kan. Lepin lokaia wet “limpoak” kin pwarada ni mwomwen soahng tohto oh e kin pwarada ni pahn pak 31. Sapwellimen Sises limpoak ong Seme, Siohwa, oh ong sapwellime tohnpadahk kan kin wia keieu sansal nan ire laud pwukat. Rongamwahu teikan duwen mouren Sises kin kasansalehda duwen sapwellimen Sises limpoak ong Siohwa, ahpw ihte Sohn kin ntingihdi me Sises ni sansal mahsanih met: “I poakohng Semei.” (Sohn 14:31) Sises pil mahsanih me Siohwa kin poakong ih oh e pil kawehwehda ia kahrepe. E mahsanih: “I poakohng kumwail, duwehte Sahmo eh ketin loalloale ie; kumwail eri poadidiong ei limpoak. Ma kumwail pahn kapwaiada ei kosonned akan, kumwail pahn poadidiong ei limpoak, duwehte ei kin kapwaiada mahsen en Semei, oh kin poadidiong sapwellime limpoak.” (Sohn 15:9, 10) Ei, Siohwa kin poakohng sapwellime Ohl pwehki e kin peik unsek. Mehn kasukuhl kaselel ehu ong sapwellimen Sises Krais tohnpadahk kan koaros!

5. Iaduwen Sises kasansalehda sapwellime limpoak ong sapwellime tohnpadahk kan?

⁵ Sapwellimen Sises limpoak kehlail ong sapwellime tohnpadahk kan kin sansalda sang nan poadopoad en Sises me Sohn ntingihdi ni kaimwiseklahn Sises tuhpene rehn wahnpoaron akan. Sohn koasoia duwen met: “Eri, rahn tehr ehu mwohn Sarawien Pahsohpa. Sises ketin mwahngih me sapwellime ahnsou lelehr en mweselsang sampah wet oh ketilahng rehn Seme. E kin ketin loalloale sapwellime kan me mihmi nin sampah, oh e ketin loalloale irail lel ni imwi.” (Sohn 13:⁠1) Ni pwongo, e ketikihong irail mehn kasukuhl ehu me irail sohte pahn kak manokehla me pid duwen papah mehteikan ni limpoak. E ketin widen patehn nehrail kan. Met iei wiewia ehu me irail kan koaros pahn anahne en men wia ong Sises oh iengarail brother kan, ahpw re pweiek en wia met. Sises eri wie doadoahk karakarahk wet oh mahsanihong sapwellime tohnpadahk kan: “Ngehi amwail Kaun oh Sounpadahk, me ahpwtehn widen patehnehmwail kan. Kumwail eri uhdahn pahn widen patehnehn emenemen kumwail. I wiahiong kumwail mehn kahlemengih ehu, pwe kumwail en pil wia duwehte me I ahpwtehn kasalehiong kumwail.” (Sohn 13:14, 15) Kristian mehlel akan anahne en men oh perenkihda papah riarail brother kan.​—Madiu 20:26, 27, footnote; Sohn 13:17.

Kapwaiada Kosonned Kapwo

6, 7. (a) Ire kesempwal dahieu me Sohn kawehwehda me pid ni ahnsou Katamano wiawi? (b) Kosonned kapw dahieu me Sises ketikihong sapwellime tohnpadahk kan, oh dahme kahrehda e kapwki?

⁶ Dahme Sohn ntingihdi duwen dahme wiawi nan pereo ni pwong en Nisan 14 kin ni oaretik kawehwehda ni ahnsou me Sudas Iskariot e kohkohlahsang rehrail, eri rongamwahu teikan sohte kin mahsanih duwen met. (Sohn 13:21-​30) Pwuhk en Rongamwahu kan kin ni sansal kasansalehda me ihte ni ahnsou ohl soh-likilik menet me pedoila sang pereo, me Sises tepida wia Katamanpen Kamatalahn Krais. E eri mahsanihong sapwellime wahnpoaron lelepek kan ni ahnsou reirei, ketikihong irail kaweid kan. Ni ahnsou kitail kin kaunopada pein kitail ong iang towehdi Katamano, kitail anahne en men esehla dahme Sises mahsanih ni ahnsowo, oh keieu, pwehki kitail men Koht en ketin poakohng kitail.

⁷ Mwurin Sises wia Katamanpen kamatalahn eh pwoula, tepin kaweid me e ketkihong sapwellime tohnpadahk kan iei kaweid kapw ieu. E mahsanih: “I pahn kihong kumwail kosonned kapw ehu; kumwail en poakpene nanpwungamwail. Duwen ei poakohng kumwail, iei duwen kumwail en poakpene. Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.” (Sohn 13:34, 35) Dahme kapw nan kosonned wet? Ekis ahnsou mwurin met en ni soutiko, Sises kawehwehda met ni eh mahsanih: “Iet ei kosonned ong kumwail: kumwail en poakpene nanpwungamwail, duwehte ei kin poakohng kumwail. Iet limpoak me keieu laud me emen kak ahneki ong kompoakepah kan, ma e pahn tounmeteikihla eh mour pwehki kompoakepah ko.” (Sohn 15:12, 13) Kosonned en Moses kin padahkiong mehn Israel akan en ‘ke en poakohng mehn mpomw duwehte omw kin poakohng pein uhk.’ (Lipai 19:18) Ahpw sapwellimen Sises kosonned kin deila sang met. Kristian akan anahne poakohng riarail kan duwehte Krais kin poakohng irail, oh irail inengih en pil tohnmeteikihla pein arail mour ong riarail brother kan.

8. (a) Dahme limpoak en tohnmetei kin pidada? (b) Iaduwen Sounkadehdehn Siohwa kan kin kasalehda limpoak en tohnmetei nan rahnwet?

⁸ Ahnsoun Katamano iei ahnsou konehng ehu kitail en kasawihada pein kitail oh wia met nin duwen mwomwohdiso ehu, pwehn tehk ma kitail kin uhdahn doadoahngki kilel en Kristian mehlel akan​—iei limpoak me Krais kin kasalehda. Soangen limpoak en tohnmetei pahn kak wehwehki me emen Kristian pahn tohnmeteikihla moure oh sohte pahn pangala rie brother kan. Ahpw, pali laud en ahnsou e kin pidada atail kin men tohnmeteikihla pein atail ahnsou kan pwen sewese oh papah riatail brother kan oh pil aramas teikan. Wahnpoaron Pohl kin wia mehn kahlemeng mwahu duwen met. (2 Korint 12:15; Pilipai 2:17) Sounkadehdehn Siohwa kan kin ndandkihla wasa koaros nin sampah duwen ahr ngehn en tohnmetei, pwehki irail kin sewese riarail brother kan iangahki mehn mparail kan oh tohnmeteikihla arail ahnsou oh kehl en kaesehkin aramas teikan duwen padahk mehlel en Paipel.b​—Kalesia 6:10.

Ehupenehn Riemen Mehkot Kesempwal

9. Pwe kitail en kak kolokol kesempwal en ehupene me kitail ahneki ong Koht oh sapwellime Ohl, dahme kitail kin wia ni peren?

⁹ Sohte mehkot me kesempwal ong kitail sang limpoak me kitail kin ale sang Siohwa oh sapwellime Ohl, Sises Krais. Ahpw, ma kitail men ahneki oh pehm limpoak wet, kitail pahn anahne wia mehkot. Ni kaimwiseklahn pwong me Sises sapwellimaniki rehn sapwellime tohnpadahk kan, Sises mahsanih: “Mehmen me kin rong oh kapwaiada ei kosonned kan, iei ih me kin poakohng ie. Semei pahn loalloale mehmen me kin poakohng ie, oh I pil pahn poakohng, oh kasalehiong pein ngehi.” (Sohn 14:21) Pwehki kitail kin kesempwaliki atail nanpwungmwahu rehn Koht oh sapwellime Ohl, kitail kin ni pereperen peikiong ara kosonned akan. Kitail pil kin peikiong kosonned kapwo en kasalehda limpoak en tohn metei oh pil kehkehlik me Krais ketkihda mwurin e iasada en “kohwei wasa koaros oh padahkihong tohn wehi kan koaros,” oh nantiong en “katohnpadahkih” irail akan me kin perenki rong duwen Rongamwahu.​—Wiewia 10:42; Madiu 28:19, 20.

10. Soangen ehupene kesempwal dah me langalang ong me keidi kan oh pwihn en “sihpw teikan”?

¹⁰ Ni ahnsou mwuri en ni pwongo, Sises sapeng peidek ehu me wahnpoaron lelepek menet Sudas (Thaddaeus) wia, Sises mahsanih: “Mehmen me poakohng ie pahn kapwaiada ei padahk kan, Semei pahn loalloale, oh ngehi oh Semei pahn ketidohng reh oh ketiket reh.” (Sohn 14:22, 23) Edetehn irail Kristian keidi kan kin mih nin sampah ni ahnsouwet, irail akan me ale luhk en iang Krais kakaun sang nanleng kin inenen karanih Siohwa oh sapwellime Ohl. (Sohn 15:15; 16:27; 17:22; Ipru 3:1; 1 Sohn 3:2, 24) Ahpw iengarail “sihpw teikan,” edetehn arail koapworopwor iei en mour kohkohlahte nin sampah, irail pil kin ahneki nanpwungmwahu rehn “sileparail mehtehmen,” Sises Krais, oh rehn arail Koht, Siohwa, ma irail pahn peik.​—Sohn 10:⁠16; Melkahka 15:1-5; 25:14.

“Kaidehn Kumwail Kisehn Sampah”

11. Kaweid kesempwal dahieu me Sises ketikihong sapwellime tohnpadahk kan?

¹¹ Ni kaimwiseklahn ahnsou me Sises tuhwong sapwellime tohnpadahk lelepek akan, mwohn e pwoula, e ketikihong irail kaweid kesempwal wet: Ma Koht pahn poakohng aramas emen, sampah wet pahn kailongki ih. E mahsanih: “Ma sampah kin kailongkin kumwail, kumwail en tamataman me e kailongkin ie mwohn eh kailongkin kumwail. Ma kumwail kisehn sampah wet, eri, sampah wet pahn poakong kumwail duwehte eh kin poakohng nah kan. A I pilkumwailda sang nin sampah; eri, kaidehn kumwail kisehn sampah. Iei kahrepen en sampah eh kin kailongkin kumwail. Kumwail tamataman dahme I ndaiongkumwailehr: ‘Sohte ladu men kin laudsang eh soumas.’ Ma irail kalokeieier, re pil pahn kalokei kumwail. Ma irail kapwaiadahr ei padahk kan, re pil pahn kapwaiada amwail padahk kan.”​—Sohn 15:18-​20.

12. (a) Dahme kahrehda Sises padahkiong sapwellime tohnpadahk kan me sampah wet pahn kailongkin irailla? (b) Pwehki rahn en Katamano pahn kereniong leledo, dahme pahn mwahu ong kitail koaros en doudouloale?

¹² Sises ketikihong irail kaweid wet pwen sewese wahnpoaron 11 oh aramas akan me pahn iangala Kristian mehlel akan ni ahnsou mwuhr en dehr pahtoula oh mworusala pwehki sampah wet kin kailongkin irail. E kapataiong kaweid wet ni mahsen pwukat: “I padahkihong kumwail mepwukat pwe kumwail en dehr dipakelekel. Irail pahn keseikumwailla sang nan arail sinakoke kan. Oh ahnsou kohkohdo, mehmen me pahn kemeikumwailla pahn kihkihong me e kin papah Koht. Irail pahn wiahiong kumwail mepwukat pwehki ar sohte ese Sahm de ngehi. A I ndaiong kumwailehr mepwukat pwe ni ahnsowo eh pahn leledo pwe re en wia mepwukat, kumwail en tamanda ei koasoi pwukat.” (Sohn 16:1-3) Ehu kawehwehn Pwuhk Sarawi kawehwehda me lepin lokaia me kin doadoahk ong lepin lokaia “dipakelekel” kin wehwehki “pwehn kahrehong aramas emen en tepida sohte likih oh tangasang emen me e anahne liki oh peikiong; solahr idawehn.” Nin duwen ahnsou en Katamano wie kerendohr, kitail koaros pahn anahne doudouloale duwen aramas lelepek kan, ni ahnsou mahs oh pil ni ahnsouwet, oh kalemengih ahr pwoson kehlail mehndahki kasongosong kan. Dehr mweidong aramas me kin uhweng kitail de kalokolok kan en kahrehong kitail en kesehla Siohwa oh Sises, ahpw nan kapehdatail kan kitail en liki oh peikiong ira.

13. Pekipek dahieu me Sises wia me pid sapwellime tohnpadahk kan ni ahnsou e kapakap ong Seme?

¹³ Mwohn irail mweselsangehr pereo nan Serusalem, Sises nan eh kapakap ong Seme koasoia met: “I kihongirailehr sapwellimomwi mahsen, oh sampah kailongkiniraillahr pwehki irail kaidehn kisehn sampah, duwehte ngehi me kaidehn kisehn sampah. I sohte peki rehmwi pwe komwi en ketikinirailsang nin sampah, ahpw pwe komwi en ketin perehsang irail Me Suwedo. Duwehte ngehi me kaidehn kisehn sampah, pil ih duwen irail, kaidehn irail kisehn sampah.” (Sohn 17:14-​16) Kitail kak kamehlele me Siohwa kin apwalihada aramas akan me e ketin poakepoake pwen kakehle irail ni ahr kin katohrohrsang sampah.​—Aiseia 40:29-​31.

Poadidiong Sapwellimen Sahm Limpoak oh Limpoak en Sapwellime Ohl

14, 15. (a) Dahme Sises karasaiong pein ih, pwen kasalehda me e weksang mehnia ‘tuhkehn wain me mwoasoahngot oh soh katepe’? (b) Ihs irail “rah kan” en “tuhkehn wain mehlelo”?

¹⁴ Ni ahnsou me Sises oh sapwellime tohnpadahk lelepek kan koasoakoasoipene ni pwong en Nisan 14, Sises karasaiong pein ih nin duwen “tuhkehn wain mehlel,” me weksang wehin Israel me sohte lelepek oh rasehng ‘tuhke wain pwoat me mwoasoahngot oh soh katepe.’ E mahsanih: “Ngehi me tuhkehn wain mehlel, a Semeio soumwet men.” (Sohn 15:⁠1) Sounpar ngeder kei mwowe, soukohp Seremaia ntingihdi dahme Siohwa mahsanihong sapwellime aramas akan me kesehla Ih: “I padokuhkedi duwehte tuhke wain keneinei pwoat . . . Ahpw kilang dahme ke wialahr! Ke rasehng tuhke wain pwoat me mwoasoahngot oh soh katepe.” (Seremaia 2:21) Soukohp Oseia ntingihdi: “Israel kin rasehng tuhke wain pwoat me mwoasoahngot oh soh katepe. E kin kapwarehda wahnsahpwarail kan ong pein ih. . . . Nan kapehd arail kan kin likamw.”​—Oseia 10:1, 2, NW.

¹⁵ Israel sohte kin kapwarehda wahn akan en kaudok mehlel, ahpw, irail kin lahlahwe padahk mehlel oh kapwarehda wahn sahpw akan ong pein irail. Rahn silu mwohn kaimwiseklahn ahn Sises tuhpene rehn sapwellime tohnpadahk lelepek akan, E padahkiong irail pwihn en kaun akan en mehn Suhs: “Ihme I ndahkihong kumwail, me Wehin Koht pahn kohsang kumwail oh uhd kohieng aramas akan me pahn kapwarehda wahn Wehin Koht.” (Madiu 21:43) Wehi kapw wet iei “Israel en Koht,” me towe kan iei irail Kristian me keidi kan 144,000, me kin rasehng “rah kan” en “tuhkehn wain mehlel,” iei Krais Sises.​—Kalesia 6:16; Sohn 15:5; Kaudiahl 14:1, 3.

16. Dahme Sises kin kangoange irail wahnpoaron lelepek 11 en wia, oh dahme kitail kak ndahki duwen irail pwihn en luhwen mekeidi lelepek kan nan imwin ahnsouwet?

¹⁶ Sises padahkiong wahnpoaron 11 me iang ih nan pereo: “Rah koaros me wosasang ie ahpw sohte wa, Semeio kin ketikihsang. E kin koahkoa rah koaros me kin kapwarehda wa, pwe re en pil wa tohtohla. Kumwail poadohng ie, oh I pil pahn poadohng kumwail. Ma kumwail sohte poadohng ie, kumwail sohte kak wa, duwehte rahntuhke pwoat pil sohte kak wa, ma e sohte poadohng ni kahlap en tuhkeo.” (Sohn 15:2, 4) Poadoapoad en sapwellimen Siohwa aramas akan en ni ahnsowet kin kasansalehda me irail pwihn lelepek en luhwen Kristian mekeidi kan kin poadohng arail Tapwi, Krais Sises. (Episos 5:23) Re kin mweidong Koht en kamwakelehda irail. (Malakai 3:2, 3) Tepida sang nan pahr 1919, arail doadoahk en Wehio kin kapwarehda wah tohto, keieu Kristian me keidi kan oh mwuri sang pahr 1935, irail “pokon kalaimwun” kin wie tohtohla.​—Kaudiahl 7:9; Aiseia 60:4, 8-​11.

17, 18. (a) Dahme Sises mahsanih me kin sewese me keidi kan oh sihpw teikan en mihmihte nan sapwellimen Siohwa kupwurlimpoak? (b) Ma kitail pahn iang tohwehda Katamano, iaduwen met pahn kak sewese kitail?

¹⁷ Sapwellimen Sises mahsen kan kin doakdoake irail Kristian mekeidi kan koaros: “Iet duwen lingaling en Sahmo eh pahn sansalda, ma kumwail pahn kapwarehda wa tohto, oh ih duwen amwail pahn wiahla nei tohnpadahk. I poakohng kumwail, duwehte Sahmo eh ketin loalloale ie; kumwail eri poadidiong ei limpoak. Ma kumwail pahn kapwaiada ei kosonned akan, kumwail pahn poadidiong ei limpoak, duwehte ei kin kapwaiada mahsen en Semei, oh kin poadidiong sapwellime limpoak.”​—Sohn 15:8-​10.

¹⁸ Kitail koaros men mihmihte nan sapwellimen Koht kupwurlimpoak oh met kin kahrehong kitail en wiahla Kristian akan me kin wah tohto. Kitail kin wia met sang ni atail kin doadoahngki atail ahnsou kan koaros en lohkiseli “Rongamwahu en Wehio.” (Madiu 24:14) Kitail pil kin wia uwen me kitail kak en doadoahngkihla “wahn ngehn akan” nan mouratail kan. (Kalesia 5:22, 23) Atail pahn iang towehda Katamanpen Kamatalahn Krais pahn kakehle kitail en men wia met, pwe kitail pahn ale mehn kataman kan en sapwellimen Koht oh Krais limpoak ong kitail.​—2 Korint 5:14, 15.

19. Sawas dahieu kitail pahn sukuhliki nan artikel en mwuhr?

¹⁹ Mwurin Sises wiahda koasondi en Katamano, e inoukihong sapwellime tohnpadahk lelepek kan me Seme pahn poaronehdo “sounsawaso, ngehn sarawi.” (Sohn 14:26) Nan artikel en mwuhr, kitail pahn sukuhliki iaduwen ngehn wet kin sewese irail me keidi kan oh sihpw teikan en men Siohwa en ketin pousehlahte poakohng kitail.

[Nting tikitik me mi pahs]

Peidek kan en Kousapahl

• Mehn kasukuhl dahieu me kin pid papah meteikan ni elen limpoak me Sises ketikiong sapwellime tohnpadahk kan?

• Ni ahnsoun Katamano, e pahn konehng kitail en tehk pein kitail duwen dah?

• Dahme kahrehda kitail en dehr dipakelekelkihda duwen kaweid en Sises duwen kailok oh kalokolok me pahn kohsang sampah wet?

• Ihs me “tuhkehn wain mehlel”? Ihs irail “rah kan,” oh dahme irail anahne wia?

[Kilel nan Pali 21]

Sises ketikihong sapwellime wahnpoaron kan mehn kasukuhl ehu me pid papah meteikan ni elen limpoak me re sohte kak manokehla

[Kilels nan Pali 22, 23]

Sapwellimen Krais tohnpadahk kan kin peikiong sapwellime kosonned me pid limpoak soh roporop oh tohn metei