Mesomwen en Sohpeisang Mehkan me Sohte Katepe!

“Komw kupwure ie, pwe mesei kat en dehr kilang mehkan me sohte katepe; Komw ketin kolokol ei mour nan sapwellimomwi ahl.”​—MEL. 119:37, NW.

1. Ia uwen kesempwal en kisakis en atail koahiek en kilang wasa?

IA UWEN kesempwal en atail koahiek en kilang wasa! Sang met, kitail kin mwadang kilang dahme mi limwahtail ni unsek oh ni poh tohto. Atail koahiek en kilang wasa kin sewese kitail en kilang kompoakepatail kan de keper kan. Sang met, kitail kin pohnese kaselel oh kapwuriamwei en kapikipikda kan oh mehn kadehde me Koht kin ketin ieias oh sapwellime lingan. (Mel. 8:3, 4; 19:1, 2; 104:24; Rom 1:20) Pwehki atail koahiek en kilang wasa kin wahdo ire kan ong atail madamadau, met kesempwal ong kitail en alehdi loalokong duwen Siohwa oh kakehlaka pwoson ih.​—Sos. 1:8; Deud. 17:18, 19.

2. Dahme kahrehda kitail anahne nsenohki dahme kitail kilang? Dahme kitail kak sukuhlki sang pekipek en sounmelkahkao?

² Ahpw dahme kitail kin kilang pil kak kahrehiong kitail nan kahpwal. Ehupenehn atail koahiek en kilang wasa oh atail madamadau kin kehlail, ihme dahme kitail kin kilang kak kahrehda oh kakehlaka ineng kan nan mohngiongitail. Oh pwehki kitail kin mour nan sampah ehu me suwed oh roporop me Sehdan me Tepil kin kakaun, kitail kin kalapw kilang kilel kan me kak kahrehiong kitail en wia pilipil sapwung, mendahki atail kilang ni ahnsou kiste. (1 Sohn 5:19) Ihme kahrehda sounmelkahkao peki rehn Koht: “Komw kupwure ie, pwe mesei kat en dehr kilang mehkan me sohte katepe; Komw ketin kolokol ei mour nan sapwellimomwi ahl.”​—Mel. 119:37, NW.

Ia Duwen Masatail Kak Pitih Kitail?

3-5. Dahme iren Paipel kan kin kasalehda duwen keper en mweidohng masatail en pitih kitail?

³ Medewehla dahme wiawihong tepin liho Ihp. Sehdan ndaiong ih me mese kan pahn uhdahn pehdpeseng ma e pahn kang sang “wahntuhkehn kehsehki aramas dahme mwahu oh dahme suwed.” Ihp uhdahn men ese ia duwen mese kan ar pahn pehdpeseng. Eh men kang wahntuhkeo laudla ni eh kilang tuhkeo me mwahu ong mwenge, oh met wia mehkot me mese kin inangihada. Ei tuhkeo inenen lingan en kilang. Ni eh kilikilang tuhkeo, eh ineng kahrehiong ih en sapeikiong sapwellimen Koht kosonned. Eh pwoud Adam pil sapeik oh met imwikihla suwed ong aramas koaros.​—Sen. 2:17; 3:2-6; Rom 5:12; Seims 1:14, 15.

⁴ Nan mwehin Noha, ekei tohnleng kan pil mwekidki dahme re kilang. Senesis 6:2 mahsanih duwen irail: “Ekei nein koht ko ni ar kilangada lingan en serepein ko, re ahpw pwoudikihda me re mwahuki kan.” Arail kilikilang serepein ko kahrehiong irail en inangihada wia nsenen pwopwoud rehrail, met me sapwung, oh re naineki seri kei me uhdahn lemei. Suwed en aramas en ahnsowo imwikihla kamwomwalahn aramas koaros, ihte Noha oh eh peneinei me pitla.​—Sen. 6:4-7, 11, 12.

⁵ Sounpar epwiki kei mwuhr, ni ahnsou me Akan “kilangada” ekei dipwisou kan me lohdi nan kahnimw en Seriko, e pirapahsang ekei dipwisou ko. Koht ketin kehkehlingki me soahng koaros nan kahnimwo en kamwomwomwla, ihte ekei dipwisou kan me ren wahla wasahn nekidala dipwisou ong Siohwa. Mehn Israel kan ale peneu wet: “Kumwail pahn kadohwankumwailewei sang dipwisou me pahn ohla kan,” pwe kumwail de inengieng ale ekei dipwisou kan sang kahnimwo. Ni Akan eh sapeik, mehn Israel kan luhs ni arail mahweniong kahnimw en Ai, oh ekei irail mehla. Akan sohte wehkada eh pirap lao e sansalda. Akan nda: “I kilangada” dipwisou kan, eri “I inenen mwahukihda dipwisou pwuko, ihme I kihsangki.” Ineng en mese kahrehiong ih en kamakamala, iangahki “mehkoaros me e ahneki.” (Sos. 6:18, 19; 7:1-26) Akan inangihada nan eh mohngiong mehkot me sohte mweimwei ong ih.

Anahne Kaiahne Pein Kitail

6, 7. Mehnia “koasoandi kan” me Sehdan kin kalapw doadoahngki pwehn pitihkitaildi? Ia duwen soun pesines kan arail kin doadoahngki met?

⁶ Aramas akan rahnwet kin lelohng kasongosong ni ahl me duwehte dahme wiawihong Ihp, tohnleng sapeik kan oh Akan. Nanpwungen “koasoandi kan” koaros me Sehdan kin doadoahngki pwehn pitih aramas akan, “mehkan me aramas kin kilang oh ahnehda” me keieu kehlail. (2 Kor. 2:11; 1 Sohn 2:16) Soun pesines kan nan atail ahnsou me kin kangoange aramas akan en pwain arail dipwisou kan kin ese me aramas kin ahnsou koaros mwekidki dahme re kilang. Emen me samanih palien pesines nan Iurop koasoia: “Koahiek en kilang wasa iei me keieu kehlail sang koahiek en rong, ned, neme oh pepehm ape oh kak kasonge aramas akan en wia mehkot me uhwong dahme re ese me keieu mwahu.”

⁷ Ihme kahrehda soun pesines pwukat kin kaukaule kasalehiong kitail kilel kan me wiawihda pwehn kamwakid oh kalaudehla ineng en alehda arail dipwisou kan! Nan Amerika, emen ohl me kin wia soun roporop kin sukuhlki ia duwen kasalepen dipwisou kan eh kin kamwakid emenemen aramas. E koasoia me met kin “wiawihkihda kaidehkin ihte en pohnese ire kan ahpw e kin kainangihada pepehm de wiewia teikan rehn me kilikilang.” Kilel kan me kin kainangihada aramas ong ineng suwed kin kalapw kadoadoahk. Ihme kahrehda e inenen kesempwal kitail en koasoanehdi teng en kanahieng dahme kitail kilang oh pil dahme kitail kihong nan mohngiongitail!

8. Ia duwen Paipel eh kasalehda kesempwalpen kanaiehng dahme kitail kilang?

⁸ Mehkan me aramas kin kilang oh ahnehda oh dipen ineng en uduk pil kak kasonge Kristian mehlel kan. Kahrehda, Mahsen en Koht kin kangoange kitail en kaiahne pein kitail ong dahme kitail kilang oh inengieng. (1 Kor. 9:25, 27; wadek 1 Sohn 2:15-17.) Ohl pwungo Sohp kin wehwehki me kilang oh ineng kin uhdahn dokpene. E koasoia: “I wiadahr inou lapalap ehu: I en dehr kin kangkakil serepein men ni ineng suwed.” (Sohp 31:1) Sohp sohte men doahke lih men ni ahl suwed oh e pil sohte men mweidohng eh madamadau en ahneki madamadau suwed. Sises ketin kasalehda kesempwalpen kihsang madamadau suwed ni eh mahsanih: “Mehmen me pahn kilikilang lih emen oh men dihpki, nahn e wiadahr dipen kamwahl nan kapehde.”​—Mad. 5:28.

Liksang me Sohte Katepe kan

9. (a) Dahme kahrehda kitail anahne kanaiehng ni atail doadoahngki Internet? (b) Dahme kakete imwikihla kilang kilel suwed ahnsoukiste?

⁹ Nan sampah, “kilikilang” kilel suwed kan ahpw mehlel nan Internet kin rekla rahnpwukat. Ia duwen atail kakete iang kilangada kilel pwukat mendahki kitail sohte rapahki? Kilel suwed pwukat kin kakete pwarada nan computer. De e kin pekederdo nan neitail e-mail oh kilel suwed pwukat kin wiawihda pwe en apwal en kihsang nan e-mail. Mehnda ma emen kilang ahnsoukiste mwohn e kihsang, kilelo kin tengala nan eh madamadau. Kilangete ahnsoukis kak imwila suwed. E kak kahrehiong emen en pehm me e dipada oh apwalki kihsang kilel suwed nan eh madamadau. Suwed sang met, emen me kin men “kilikilang” kilel suwed kin kasalehda me e saikinte kemehla eh ineng suwed kan.​—Wadek Episos 5:3, 4, 12; Kol. 3:5, 6.

10. Dahme kak kahrehiong seri kan en kilang kilel suwed? Dahme kak imwikihla arail kilang kilel suwed?

¹⁰ Seri kan kakete iang kilang kilel suwed pwehki arail kin men ese soahng tohto. Ma met wiawi, e kakete wekidala en seri kan madamadau duwen nanpwungen ohl oh lih. Ehu ripoht kasalehda duwen met me e kak kauwehla arail madamadau me pid ohl oh lih oh re kin “apwalki ahneki nanpwung mwahu rehn meteikan, ahneki madamadau sapwung ong lih akan oh re kakete sohla kak uhdihsang kilang kilel suwed. Met kak kauwehla arail sukuhl, nanpwung mwahu rehn kompoakparail oh arail peneinei.” Suwed sang mepwukat, re kak apwalki ahneki nanpwungmwahu rehn arail pwoud.

11. Menlau karasahda keperpen kilang kilel suwed.

¹¹ Emen brother ntingihdi: “Nanpwungen soangen tiahk kan me I apwalki uhdihsang mwohn ei wiahla Sounkadehde men, kilang kilel suwed me I keieu apwalki. Kilel pwukat kin pwurepwurehng pwarada nan ei madamadau ni ahnsou kan me I sohte kasik. Met kin kak wiawi ni ahnsou me I ned mehkot, rong ekei ngilen keseng, kilang de pil medemedewe mehkot. Rahn koaros I kin nantihong kihsang nan ei madamadau.” Pil emen brother, ni eh tikitik e kin kilang makasihn en kilel suwed me eh pahpao me kaidehn Sounkadehde men naineki. E kin wia met ni ahnsou me eh pahpa oh nohno sohte kin mi ni imwarailo. E ntingihdi: “Kilel pwukat uhdahn suwed ong ei madamadau ni ei pwulopwul! Leledo met sounpar 25 mwuri, I sohte kak manokehla ekei kilel pwukat, mendahki ia uwen ei kin nantihong en manokehla. Met kahrehiong ien pehm me I dipada mendahki I kin soikala medewe soahng pwukat.” Ia uwen eh kin loalokong en liksang soangen pepehm suwed pwukat sang omw sohte kin kilang mehkan me sohte katepe! Ia duwen emen eh kak wia met? E anahne nantihong “salihedi soangen lamalam koaros pwe en peikiong Krais.”​—2 Kor. 10:5.

12, 13. Soahng soh katepe dah kan Kristian kan anahne liksang? Dahme kahrehda?

¹² Oh pil mehkan me sohte katepe kitail en liksang iei mehn kamweit kan me kin kangoange madamadau en kepwehpwe, wunahni, tiahk lemei, kakerehdi nta oh mehla. (Wadek Melkahka 101:3.) Siohwa ketikihong pahpa oh nohno Kristian kan pwukoahn pilada dahme re pahn kilang nan imwarail. Mehlel sohte Kristian men kin men pidada wunahni. Ahpw pahpa oh nohno kan anahne ese kasdo kan, prokram en TV, nintendo, mangnga oh pwuhk ong seri kan me kin kasalehda ni sansal de sohte sansal duwen wiewiahn wunahni.​—Lep. Pad. 22:5.

¹³ Sohte lipilipil ma kitail pwulopwul de mah, kitail en dehr perenki kilang kasdo de nintendo me kin kasalehda tiahk lemei oh kamaramas me kin mwomwen mehlel. (Wadek Lepin Padahk 6:16-19.) Kitail en dehr kin medemedewe soangen wiewia kan me Siohwa ketin kalahdeki. Tamataman me Sehdan men kasonge atail madamadau. (2 Kor. 11:3) Ma kitail kin kilang mehn kamweit konehng kan ahnsou reirei, e kak kihsang ahnsou ong atail kaudok en peneinei, wadawad en Paipel ehuehu rahn oh atail kaunopada ong mihting kan.​—Pil. 1:9, 10.

Idawehn Sapwellimen Sises Mehn Kahlemeng

14, 15. Dahme kitail anahne tehk duwen kesiluh en kasongosong me Sehdan wiahiong Sises? Ia duwen Sises eh kak ketin powehdi met?

¹⁴ Kitail sohte kak liksang kilang ekei mehkan me sohte katepe nan sampah suwed wet. Sises pil ketin lelohng soahng pwukat. Kesiluh en kasongosong me Sehdan wia pwehn kahrehiong Sises en sohpeisang wia kupwuren Koht, “Tepil eri pil kahluwadahla Sises pohn nahna ileile ehu oh kasalehiong wehi koaros en sampah oh duwen ar lingan.” (Mad. 4:8) Dahme Sehdan wiahki met? E sansal me Sehdan men isanekihla kehl en kamwakid dahme Sises kak kilang. Ma e kilang lingan en wehi kan koaros, met kakete kasonge Sises en ketin lohdiong ineng en men ndandla. Dahme Sises ketin wia?

¹⁵ Sises sohte ketin kilangwohngete kasongosong wet. E sohte ketin kupwurehda ineng sapwung pwukat. Oh e sohte ketin anahne medemedewe laud en Tepil kasongosongo pwehn soikala. Sises ketin mwadang mahsanih: “Sehdan, kohkohweisang ie!” (Mad. 4:10) Sises ketin medemedewehte eh nanpwungmwahu rehn Siohwa oh dahme e ketin sapengki kin pahrekiong sapwellime mehn akadei en wia kupwuren Koht. (Ipru 10:7) Ni imwilahn met, Sises ketin irehdi en Sehdan koasoandi widing en kasonge ih.

16. Dahme kitail kak sukuhlki sang sapwellimen Sises mehn kahlemeng ni eh ketin pelianda en Sehdan kasongosong?

¹⁶ Kitail kak sukuhlki sang sapwellimen Sises mehn kahlemeng. Keieu, kitail koaros kin lelohng en Sehdan kasongosong. (Mad. 24:24) Keriau, dahme kitail kin kilangki masatail kak kalaudehla atail ineng ong mehkot mwahu de suwed. Kesiluh, Sehdan pahn kin isaneki uwen me e kak en doadoahngki “mehkan me aramas kin kilang oh ahnehda” pwehn kasonge kitail en sohpeisang Koht. (1 Pit. 5:8) Oh kapahieu, kitail pil kak pelianda Sehdan, ahpw mehlel ma kitail mwadang mwekid.​—Seims 4:7; 1 Pit. 2:21.

Kolokol Mesomwen en “Mwakelekel”

17. Dahme kahrehda e loalokong en medewe dahme kitail en wia mwohn atail pahn lelohng kasongosong kan?

¹⁷ Atail inou ong Siohwa kin pidada atail pil inoukihda en sohpeisang mehkan me sohte katepe. Ni atail inoukihda en wia kupwuren Koht, kitail kin iang sounmelkahkao koasoia: “I kin kadohwansang ie soangen tiahk suwed koaros, pwehki ei kin ngoangki peikiong sapwellimomwi mahsen.” (Mel. 119:101) E pahn loalokong en medewe dahme kitail pahn wia mwohn atail pahn lelohng kasongosong kan. Dahme Paipel keinepwih kin sansal ong kitail. Kitail sohte kin pohnsehse en Sehdan koasoandi kan. Iahd me Sehdan kasonge Sises en ketin kawekila takai ong pilawa? Mwurin e ketin kaisihsol erein rahn 40 oh pwohng 40 oh e ketin “pwungitikla.” (Mad. 4:1-4) Sehdan kak ese iahd me kitail kin luwetala oh mengei en lohdi pahn kasongosong. Kahrehda, met iei ahnsou en medemedewe kanaiehng ire pwukat. Dehr awih! Ma kitail kin tamataman atail inou ong Siohwa rahn koaros, kitail pahn koasoanehdi teng en sohpeiweisang mehkan me sohte katepe.​—Lep. Pad. 19:20.

18, 19. (a) Ia wekpeseng en pwoaren mas “mwakelekel” oh pwoaren mas “suwed”? (b) Dahme kahrehda e kesempwal en pousehlahte medemedewe mehkan me katapan? Dahme Pilipai 4:8 kin kaweidki me pid ire wet?

¹⁸ Rahn koaros kitail kin kilang soahng tohto me kitail kin lelki ahpw kin kerempwa kitail, oh mepwukat kin wie tohtohla. Eri, e uhdahn kesempwal kitail en idawehn sapwellimen Sises kaweid en kolokol mesetail kan en “mwakelekel.” (Luk 11:34-36) Pwoaren mas “mwakelekel” kin kilangwohngete wia kupwuren Koht. Weksang met, pwoaren mas “suwed” kin widing, noahrok, oh kin men kilang mehkan me sohte katepe.

¹⁹ Tamataman me dahme mesetail kilang kin kamwakid atail madamadau oh atail madamadau kin kamwakid atail mohngiong. Kahrehda, ia uwen kesempwal kitail en kin pousehlahte medemedewe mehkan me katapan! (Wadek Pilipai 4:8.) Ei mehlel, kitail en pwungki dahme sounmelkahkao nda: “Komw kupwure ie, pwe mesei kat en dehr kilang mehkan me sohte katepe.” Eri, ni atail kin nantihong mwekid pahrekiong atail kapakap, kitail kak kamehlele me Siohwa pahn ketin “kolokol [atail] mour nan [sapwellime] ahl.”​—Mel. 119:37; Ipru 10:36.

Kousapahl

• Ia ehupenehn masatail, madamadau oh mohngiong?

• Keper dah kan me kohsang kilang kilel suwed?

• Dahme kahrehda e kesempwal en kolokol masatail kan en “mwakelekel”?

[Kilel kan nan pali 25]

Soahng sohte katepe dah kan me Kristian akan anahne liksang?