Karanih Koht
“Mehkoaros me Pweidahr nan Ahnsou Samwalahr ako Pahn Manokonokla Douluhl”
DAHME kitail kin tamanda kak wia kapai ehu. Atail kin tamanda ahnsou kaselel kan me kitail kin patehng irail me kitail poakohng kin kansenamwahwih kitail. Ahpw ekei pak, ele dahme kitail kin tamanda kin uhdahn kansensuwed. Ke kin lokolongki omw kin tamanda soahng kamedek kan me ke lelohng mahs? Ma ei, mwein ke kin medewe, ‘Ia duwe, ehu rahn I pahn kak manokehla soahng kansensuwed pwukat?’ Kitail kin diar pasapeng me keieu kangoang nan dahme soukohp Aiseia ntingihedi.—Wadek Aiseia 65:17.
Siohwa ketin kupwurki kasohrehla dahme kin kahrehda soahng kansensuwed kan me kitail kin tamanda. Ia duwen? Sang ni eh pahn ketikihsang kahpwal koaros nin sampah oh ketin wiliankihdi mehkot me inenen mwahu douluhl. Siohwa ketin doadoahngki Aiseia pwehn kasalehda sapwellime inou: “I pahn wiahda sampah kapw ehu oh lahng kapw ehu.” Atail wehwehkihla inou wet kak kadirehkihla mohngiongitail koapworopwor.
Dahkot lahng kapw? Paipel kihda ire riau me kak sewese kitail en wehwehki. Keieu, sounnting en Paipel riemen koasoia ireo “lahng kapw” oh ira koaros kin koasoia duwen wekidekla laud nin sampah wet. (2 Piter 3:13; Kaudiahl 21:1-4) Keriau, nan Paipel lepin lokaia wet “lahng” kak kadoadoahk ong kaunda de koperment. (Aiseia 14:4, 12; Daniel 4:25, 26) Eri, lahng kapw iei koperment kapw ehu me kak kauwada irair pwung oh pahrek nin sampah. Kaunda ehute me pahn kak kapwaiada met, iei Wehin Koht, koperment ehu me mihmi nanleng me Sises ketin padahkihong kitail en kapakapki. Wehi wet pahn kahrehda kupwuren Koht en pweida wasa koaros nin sampah.—Madiu 6:9, 10.
Dahkot sampah kapw? Nna medewehla ire mehlel en Paipel riau me kak sewese kitail en esehda wehwe pwungo. Keieu, ekei pak nan Paipel lepin lokaia “sampah” kin wehwehki aramas akan, a kaidehn sampah. (Sohn 3:16, 17) Keriau, Paipel kohpada me pahn sapwellimen Koht kaunda, aramas lelepek kan pahn esehla irair pwung me pahn lella ni irepen sampah pwon. (Aiseia 26:9) Kahrehda, sampah kapw kin dokedoke pwihn en aramas akan me pahn utungada sapwellimen Koht kaunda oh mourki sapwellime koasoandi pwung kan.
Ke kakehr kilang mwomwen Siohwa eh pahn ketin kasohrehla dahme kin kahrehda soahng kamedek kan me kitail kin tamanda? Ahnsou keren, Siohwa pahn ketin kapwaiada ni unsek sapwellime inou en lahng kapw oh sampah kapw, me iei e pahn ketin kauwada koasoandi pwung ehu nin sampah.a Nan sampah kapwo, soahng kan me kin kahrehda nsensuwed laud me pid paliwar, madamadau oh pepehm me kitail kin tamanda pahn wiahla mehkan en mahs. Aramas lelepek kan pahn uhdahn perenki mour oh re pahn tamatamante soahng mwahu kan nan ehuehu rahn.
Ahpw ia duwen soahng kamedek kan me kin katoutouwih mohngiongitail rahnpwukat? Sapwellimen Siohwa inowo rehn Aiseia pil doula mahsanih: “Mehkoaros me pweidahr nan ahnsou samwalahr ako pahn manokonokla douluhl.” Soahng kamedek kan me kitail kin lelohng nan sampah mering wet pahn ekisekis manokonokla. Ia duwe, ke sou perenkihda inou wet? Ma ei, ke sou diarada duwen omw kak karanihala Kohto me ketikihda inou kaselel wet ong ahnsou kohkohdo?
[Nting tikitik me mi pah]
a Pwehn kalaudehla omw wehwehki duwen Wehin Koht oh dahme e pahn kereniong kapwaiada, menlau kilang irelaud 3, 8 oh 9 nan pwuhken Dahme Paipel Uhdahn Padahngki? me Sounkadehdehn Siohwa kan wiahda.
[Blurb nan pali 12]
Siohwa ketin kupwurki kasohrehla soahng kamedek kan me kitail kin tamanda