Sukuhlki Sang Mahsen En Koht

Dahme Kahrehda Kristian kan Kin Papidais?

Ire wet pahn koasoia peidek kan me ke kak ahneki oh e pahn kasalehda ia wasa nan Paipel me kak diarada pasapeng kan. Sounkadehdehn Siohwa kan pahn perenki iang uhk koasoiapene pasapeng pwukat.

1. Ia wehwehn Kristian kan ar kin papidais?

Papidais iei ahl ehu en peki rehn Koht ken ahneki nanpwungmwahu reh. Eri, Kristian men anahne papidaisla ni ahnsou me e mahkier uwen sounpar ieu me e kak sukuhlki duwen Koht oh wiahla sapwellimen Sises tohnpadahk, a kaidehn ni ahnsou me e wia seri pwelel men. (Wiewia 8:12; 1 Piter 3:21) Kitail kin wiahla sapwellimen Sises tohnpadahk ni atail kin sukuhlki oh kapwaiada dahme e ketin kehkehlingki.​—Wadek Madiu 28:19, 20.

Ni mwehin sapwellimen Sises wahnpoaron ko, me tohto mwekid ni mwadang en sukuhlki Koht oh Sises. Karasepe, ni ohl emen eh sukuhlki me sapwellimen Sises pwoula ritingada elen ahneki mour soutuk, e mwadangete wiahla sapwellime tohnpadahk. Rahnwet, tohto me mohngiong mehlel oh aktikitik kin pilada ren wiahla sapwellimen Sises tohnpadahk.​—Wadek Wiewia 8:26-31, 35-38.

2. Dahme kahrehda Sises ketin papidaisla?

Sises mahki mpen sounpar 30 ni ahnsou me Sohn Sounpapidais kaduhdi nan Pillap Sordan. Sapwellimen Sises papidais kin kasalehda sapwellime pilipil en wia kupwuren Koht. (Ipru 10:7) Met pil iangahki eh ketikihda moure nin duwen meirong ehu ong dipen tohnsampah. Pil mwohn eh ketidihdo sang nanleng pwehn ketin mour nin sampah, Sises kin ketin ahnsou koaros poakohng oh peikiong Semeo Siohwa.​—Wadek Mark 1:9-11; Sohn 8:29; 17:5.

3. Dahme kahrehda Kristian men anahnehki papidais?

Atail irair weksang sapwellimen Sises, kitail ipwidi wia aramas dipan kei. Ahpw sapwellimen Sises meirong kin kahrehiong kitail en kak ahneki nanpwungmwahu rehn Koht. (Rom 5:10, 12; 12:1, 2) Koht kakehr sapwellimankinkitailla oh kitail kak wiahla kisehn sapwellime peneinei. (2 Korint 6:18) Ia duwen atail alehdi kapai wet? Ni ahnsou me kitail kelehpwla kapakap oh inoukihong Siohwa atail mour, kitail inoukihda me kitail pahn kapwaiada kupwure erein atail mour. Mwurin atail wiahdahr inou wet, kitail kin kasalehiong wehipokon atail inou ni atail kin papidaisla.​—Wadek Madiu 16:24; 1 Piter 4:2.

4. Ia duwen omw kak kaunopada ong papidais?

Sounkadehdehn Siohwa kan kin onopki Paipel rehn aramas sohte lipilipil me men karanihala Koht. Onopki Paipel oh iang towehda mihting en Kristian kan pahn kakehlakahda omw limpoak ong Koht oh omw pwoson ih. E pil pahn seweseiuk ken kakairada madamadau oh pepehm mwahu oh pil tiahk mwahu. Kakairada limpoak, pwoson, oh soangen irair kaselel teikan me kin kaperenda Koht pahn seweseiuk ken kolokol omw inou en papah Siohwa kohkohlahte.​—Wadek Sohn 17:3; Ipru 10:24, 25.

Pwehn kalaudehla omw wehwehki met, menlau kilang irelaud 18 en pwuhk wet, Dahme Paipel Uhdahn Padahngki?, me Sounkadehdehn Siohwa kan wiahda