Mie me Kin Karonge Kapakap kan?

“Ni tapio I kin peikasalki me mie Koht. Ahpw ekei pak I kin kapakap. I sohte nohn kamehlele me mie emen me kin rongorong, ahpw ni mehlel, I kin koapworopworki me mie. I sohte kin peren oh sohte katepen ei mour. I kahng kamehlele Koht pwehki I kin medewe me me luwet kante me kin kamehlele Koht.”​—PATRICIA,a IRELAND.

MIE pak me ke ahneki soangen pepehm me duwehte ahn Patricia? Ke kin kapakap mendahki ke kin peikasalki me mie Koht? Mie me tohto me kin ahneki madamadau wet. Tehk ire pwukat.

◼ Roporop ehu wiawi nanpwungen mehn Britain 2,200 kasalehda me persent 22 en irail pwukat kin kamehlele me mie Koht men me kapikada sampah oh me kin karonge kapakap kan. Nan roporopohte kasalehda me persent 55 sohte kin kalapw kapakap.

◼ Roporop ehu me wiawi nanpwungen aramas 10,000 sang soangsoangen sahpw kan kasalehda me, nanpwungen irail kan me sohte kamehlele Koht, kereniong persent 30 en irail pwukat kin kapakap.

Dahme Kahrehda Re Kin Peikasal?

Ohl emen sang England me adaneki Allan koasoia: “I kin nda me I sohte kamehlele Koht pwehki I medewe me pelien lamalam kan kin wiawihda pwehn kaunda aramas oh ale mwohni. I pil kin medewe me ma mie Koht, kopwung sapahrek sohte pahn nohn tohto. Ahpw ekei pak, I kin mwohndi oh koasoiong ‘mehkot.’ I pil kin idek, ‘Ia duwen ei miehla?’”

Me kin ahneki soangen pepehm wet kin pein ahneki kahrepe kan en kin peikasalki ma kapakap kan kin pasapengla. Pali laud en ahnsou, arail peikasal kin kohsang eh sohte pasapengpen peidek pwukat:

◼ Mie Sounkapikada men?

◼ Dahme kahrehda pelien lamalam kan kin kalapw kahrehda kahpwal?

◼ Dahme kahrehda Koht ketin mweidohng lokolok en mie?

Ma ke kak ese pasapengpen peidek pwukat, ke leme ke sohla pahn peikasalki omw kapakap?

[Nting tikitik me kileldi pah]