Kahpwal kan me Lih akan Kin Dadaur — Watchtower ONLINE LIBRARY

Kahpwal kan me Lih akan Kin Dadaur

“Ni ei kilang dahme aramas akan kin wiahiong lih akan, I sohte men laudla oh wia lih emen.”—ZAHRA, SOUNPAR 15, koasoia nan pwuhk GEO, me wiawihda France.

DAHME serepein pwulopwul menet koasoia kin kasalehda mehlelpen kahpwal ehu me kin wiewiawi. Nan sampah pwon, tiahk lemei oh madamadau en wiakauwe lih kin lelohng serepein oh lih akan erein arail mour. Medewehla ire mehlel pwukat:

● Madamadau en kesempwalki ohl laudsang lih. Nan sapwen Eisia, pali laud en pahpa oh nohno kan kin men naineki pwutak sang serepein. Ripoht ehu sang palien UN, nan pahr 2011, kasalehda me nan sahpwo, kereniong lih meh sapw silidep pahrar (134 million) kin sohla mie pwehki wiewiahn kaiohla, kamalahn seri pwelel, oh soukautih en apwalih mwahu seri.

● Palien Sukuhl. Nan sampah pwon, lih oh serepein kan kin wiahda persent 66.6 en irail kan me ale kasukuhl malaulau sang sounpar pahieu.

● Tiahk suwedih lih. Daulih lih meh rielik wenesapw (2.6 billion) mi nan sahpw akan me sohte kin medewe me angkehlail nan pwopwoud wia tiahk en mwersuwed ehu.

● Epwelpen roson en paliwar. Nan sahpw semwehmwe kan, mpen minit riau koaros, lih emen kin mehkihla kahpwal en liseian oh neitik pwehki sohte epwelpen wini me kowohng irail.

● Pwuhng en sapwasapw. Mendahki lih akan me kin padokedi laudsang elep en wahnsahpw kan nan sampah, nan sahpw tohto sohte arail pwuhng nin duwen kosonned en sapweniki de sohsohki sahpw.

Dahme kahrehda lih akan sohte ahneki soangen pwuhng pwukat? Ekei tiahk en sahpw kin idawehn padahk oh tiahk kan en pelien lamalam kan me kin sewese kakairada madamadau en tiahk lemei ong lih akan. Ehu doaropwehn nuhs en France kasalehda dahme soun repenpwung en kosonned Chandra Rami Chopra kosoaia: “Mie soahng ehu me pelien lamalam koaros kin pwungki: Re kin utung madamadau en wiakauwe lih.”

Ke pil kin ahneki madamadau wet? Ia duwe, ke leme me Paipel kin mwomwen koasoia me lih akan sohte kesempwal, duwen me pwuhken pelien lamalam tohto kin koasoia? Ekei nda me mie iren Paipel kan me kin mwomwen wia met. Ahpw ia duwen Koht me sapwellimanki Paipel eh kin uhdahn ketin kilangwohng lih akan? Mendahki aramas tohto kin uhdahn utung ire wet de soh, atail tehk ni keneinei oh mehlel dahme Paipel mahsanih pahn sewese kitail diarada pasapengo.

[Kilel nan pali 3]