PEIDEK KAN EN PAIPEL PASAPENGLA

Dahme kahrehda Sises mwarenki sapwellimen Koht Ohl?

Koht sohte ketin anahne sapwellimanki werek pwehn nainekihda seri kan pwehki ih me Sounkapikpen mour koaros. Aramas akan kapikipikda ni ahl ehu me re kak alasang sapwellimen Koht irair kan. Ihme kahrehda tepin aramas me Koht ketin kapikada, Adam, adaneki “sapwellimen Koht.” Pil duwehte, Sises mwarenki “Sapwellimen Kohto” pwehki e kepikipikda ahneki irair kan duwehte me Semeo sapwellimanki.​—Wadek Luk 3:38; Sohn 1:14, 49.

Iahd me Sises ketin kepikipikda?

Koht ketin kapikada Sises mwohn eh ketin kapikada Adam. Ni mehlel, Koht ketin kapikada Sises oh ketin doadoahngki ih pwehn wiahda soahng teikan koaros, iangahki tohnleng kan. Ihme kahrehda Paipel kahdaneki Sises “mesenih oh lapalap sang soahng kan koaros” me Koht ketin kapikada.​—Wadek Kolose 1:15, 16.

Mwohn eh ketin ipwidi nan Pedleem, Sises ketin wia tohnleng men nanleng. Ni ahnsou me Koht ketin kupwurki, e ketin kasauda mour en Sises sang nanleng ong nan kapehden Mery pwehn ipwidi nin duwen aramas emen.​—Wadek Luk 1:30-32; Sohn 6:38; 8:23.

Dahme kahrehda Koht ketin mweidada Sises en ipwidi nin sampah nin duwen aramas emen? Pwukoa tohrohr dah me Sises ketin kapwaiada? Ke kak diar pasapengpen peidek pwukat nan Paipel, oh re kak kalaudehla omw wehwehki oh kalahnganki dahme Koht oh Sises ketin wiahda ong uhk.