“Pilada Dahme Keieu Mwahu”

1, 2. Kokohp dahieu duwen imwin rahn akan me kahrehda tohnpadahk ko ren medemedewe? Dahme kahrehda?

SISES ahpwtehn mahsanihong sapwellime tohnpadahk ko me tehnpas sarawio pahn kasohrala. Sapwellime mahsen ko kapwunodehda Piter, Seims, Sohn oh Andru. (Mark 13:1-4) Eri ahnsou me re kelehpwla rehn Sises, re patohwan idek reh: “Komw ketin mahsanihong kiht ahnsou dah me mepwukat pahn wiawi, oh kilel da kei me pahn kasalehda ahnsoun omwi pahn ketido oh imwin sampah.” (Mad. 24:1-3) Ni Sises eh ketin sapeng irail, e sohte ihte ketin padahkihong irail duwen mehkan me pahn wiawi mwohn kasohrlahn Serusalem, ahpw e pil mahsanih duwen mehkan me pahn wiawi ni kaimwiseklahn ahn Sehdan sampah. Sises ketin kohpada soahng suwed kan duwehte mahwen, duhpek oh wiewia uhdahn suwed kan. Ahpw e pil ketin kohpada mehkot mwahu. E mahsanih: “Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros—a mwuri, imwin sampah ahpw pahn kohdo.”​—Mad. 24:7-14.

² Tohnpadahk ko kin ieiang Sises kalokalohki rongamwahu en Wehio. (Luk 8:1; 9:1, 2) Ele re tamanda me Sises ketin mahsanih: “Rahket me inenen laud, a tohndoadoahk kan me malaulau; kumwail eri kapakap oh peki rehn kaunen rahket pwe en ketin kadarodohng tohndoadoahk tohto nan sapwellime rahk.” (Luk 10:2) Ahpw re kin medewe: ‘Ia duwen at pahn kalohk “wasa koaros nin sampah” oh kadehde “ong aramas koaros”? Ia wasa me tohndoadoahk kan pahn kohsang ie?’ Tohnpadahk ko uhdahn pahn pwuriamweikihla pweidahn mahsen kan nan Madiu 24:14.

3. Dahme kahrehda sapwellimen Sises mahsen kan nan Luk 21:34 uhdahn kesempwal ong kitail rahnwet? Dahme kitail anahne idek rehtail?

³ Sapwellimen Sises kokohp kin pweipweida nan atail ahnsou. Aramas rar kei kin kalokalohki rongamwahu en Wehio nin sampah pwon. (Ais. 60:22) Ahpw Sises pil ketin kasalehda me e pahn apwal ong ekei ren mwohneki mahs doadoahk en kalohk nan arail mour. Re pahn nohn “kedirepwehkin” irail soahng teikan. (Wadek Luk 21:34.) Sapwellimen Sises mahsen uhdahn kesempwal ong kitail rahnwet pwehki ekei sapwellimen Koht aramas akan sohte kin mwohneki mahs mehkan me keieu kesempwal. Kitail kin kilang met ni arail wiahda pilipil kan me pid arail doadoahk, sukuhl laud, de dipwisou kan. Meteikan kin kihong ahnsou laud ong mwadong oh mehn kamweit kan. Ekei sohte kin wia uwen arail kak nan sapwellimen Koht doadoahk pwehki pwunod en ehuehu rahn. Idek rehmw: ‘Ia duwen ngehi? I kin mwohneki mahs kupwuren Koht nan ei mour?’

4. (a) Dahme Pohl kapakapki me dokedoke Kristian kan nan Pilipai? Dahme kahrehda kapakap anahn? (b) Dahme kitail pahn tehkpene nan iren onop en met oh mwuhr? Ia duwen iren onop pwukat ar pahn sewese kitail?

⁴ Kristian kan ni mwehin wahnpoaron ko anahne doadoahk laud pwehn pousehlahte mwohneki sapwellimen Koht doadoahk nan arail mour. Ihme kahrehda wahnpoaron Pohl kapakapki me irail kan nan Pilipai pahn “pilada dahme keieu mwahu.” (Wadek Pilipai 1:9-11.) Duwehte wahnpoaron Pohl, pali laud en Kristian ko “sohte masepwehk, re kin eimah ahnsou koaros ni ar kin padapadahngkiseli mahseno.” (Pil. 1:12-14) Ni ahlohte, pali laud en kitail rahnwet kin eimah kalohki Mahsen en Koht. Ahpw, e pahn wia kangoang ehu ong kitail en koasoiapene nan iren onop wet ia duwen Siohwa eh kin ketin doadoahngki sapwellime pwihn rahnwet pwe mahsen kan en Madiu 24:14 kak pweida. Met pahn sewese kitail en kalaudehla atail ngoangki doadoahk en kalohk. Dahme sapwellimen Siohwa pwihn kin wiewia oh ia duwen met eh kamwakid kitail oh atail peneinei? Nan iren onop en mwuhr, kitail pahn tehkpene dahme kak sewese kitail en dadaur nan sapwellimen Koht doadoahk oh idawehn kaweid en sapwellimen Siohwa pwihn.

SAPWELLIMEN SIOHWA PWIHN NANLENG

5, 6. (a) Dahme kahrehda Siohwa ketikihong sapwellime ladu kan kasansal kan duwen dahme wiewiawi nanleng? (b) Dahme Esekiel kilangada nan kansansal ehu?

⁵ Mie soahng tohto me Siohwa ketin pilada en sohte kileldi nan Paipel. Karasepe, e sohte ketikihong kitail oaritik kan duwen mwahliel en aramas de duwen nan wehwe. Ahpw Siohwa ketikihong kitail ire kan me kitail anahne pwe kitail en kak wehwehki kupwure oh peikiong ih. (2 Tim. 3:16, 17) E mwahu en ese me Siohwa ketin pilada en ketin padahkihong kitail duwen sapwellime pwihn nanleng. E kin kaperen en wadek duwen ire wet nan Paipel nan pwuhken Aiseia, Esekiel, Daniel, oh Kaudiahl. (Ais. 6:1-4; Esek. 1:4-14, 22-24; Dan. 7:9-14; Kaud. 4:1-11) Dahme kahrehda Siohwa ketin mweidohng kitail en ese duwen ekei soahng kan me wiewiawi nanleng?

⁶ Siohwa ketin kupwurki kitail en ahnsou koaros tamataman me kitail wia kisehn pwihn ehu nin sampah oh nanleng. Sapwellimen Siohwa pwihn me mi nanleng kin doadoahk laud en wia kupwuren Siohwa. Karasepe, Esekiel kilangada kasansal ehu en kuruma laud ehu me karasahiong sapwellimen Siohwa pwihn nanleng. Kuruma wet inenen marahra oh kak mwadang wekidala wasa me e pahn kohla ie. (Esek. 1:15-21) Esekiel pil kilangada me dake kurumao. E nda: “Mwohmw wet wie lingalingdo duwehte lingaling en prons nan werengen kisiniei.” E kapatahiong: “Ih duwen met mwomwen marain lingaling me kin kasalehda me KAUN-O kin ketiket wasao.” (Esek. 1:25-28) Esekiel ele uhdahn pwuriamweikihla kasansal wet. E kilang me Siohwa ketin kaunda ni unsek sapwellime pwihn oh ketin doadoahngki sapwellime manaman pwehn kaweidih. Kuruma wet me wie mwekimwekid nan kasansalo kin wia karasaras kaselel ehu duwen sapwellimen Siohwa pwihn nanleng eh kin wie doadoahk.

7. Ia duwen kasansal me Daniel kilangada eh kin kihong kitail koapworopwor?

⁷ Daniel pil kilangada kasansal ehu me kihong kitail koapworopwor. E kilangada Siohwa, “Mehmeno me ahneki mour poatopoat,” me ket nan mwoahl ehu me utupe ko mehn kadahr kei. (Dan. 7:9) Siohwa kupwurki Daniel en kilang me Sapwellime pwihn kin wie mwekimwekid, de kin wie doadoahk pwehn wia kupwure. Daniel eri kilangada “emen me likamwete aramas,” Sises, me alehdi manaman pohn sapwellimen Siohwa pwihn nin sampah. Sapwellimen Sises kaunda pohn tohnsampah sohte pahn wiawi erein sounpar keite. Ahpw e “pahn poatopoat, oh sapwellime wehi sohte pahn imwisekla.” (Dan. 7:13, 14) Kasansal wet kamwakid kitail en likih Siohwa oh sewese kitail en wehwehki dahme e kin ketin wiewia. Oh pwehki Sises ketin ale manaman sang rehn Siohwa, kasansal wet pil kin kamwakid kitail en likih Sises nin duwen atail Kaun.

8. Ia duwen kasansal kan duwen sapwellimen Siohwa pwihn ar kamwakid Esekiel oh Aiseia? Ia duwen kasansal pwukat ar kin kamwakid kitail?

⁸ Ia duwen kasansal pwukat duwen sapwellimen Siohwa pwihn ar kin kamwakid kitail? Duwehte Esekiel, kitail kin uhdahn mwekidkihda dahme Siohwa ketin wiewia. (Esek. 1:28) Soukohp Aiseia pil kilangada kasansal ehu duwen dahme wiwiawi nanleng. Ni ahnsou me luhk kohwong ih en padahkihong meteikan duwen dahme Siohwa ketin wiewia, e mwadangete alehdi. (Wadek Aiseia 6:5, 8.) Pwehki e ale sawas sang rehn Siohwa, Aiseia ese me sohte mehkot kak kauhdi ih sang eh pahn wia eh doadoahk nin duwen soukohp men. Duwehte Aiseia, kitail kin mwekidki en utungada sapwellimen Siohwa pwihn sang ni atail kin kalaudehla atail wia sapwellime doadoahk. E wia mehn kangoang ehu en ese me kitail wia kisehn pwihn ehu me kin ahnsou koaros kedirepwki wiewia kupwuren Siohwa.

SAPWELLIMEN SIOHWA PWIHN SAMPAH

9, 10. Dahme kahrehda e anahn me ehu kisehn sapwellimen Siohwa pwihn en mihmi sampah?

⁹ Siohwa ketin doadoahngki sapwellime Ohl pwehn ketin wiahda sapwellime pwihn sampah me kin iang sapwellime pwihn nanleng doadoahkpene. Met anahne wiawi pwe doadoahk me Madiu 24:14 kohpada en kak pweida. Dahme kahrehda? Medewehla kahrepe siluh pwukat.

¹⁰ Keieu, Sises mahsanih me sapwellime tohnpadahk kan pahn kalohk “lelohng ni irepen sampah.” (Wiewia 1:8) Keriau, irail kan me pahn wia doadoahk en kalohk pahn anahne kaweid en Paipel oh pil kangoang. (Sohn 21:15-17) Kesiluh, irail pahn anahne mihting kan, wasa me re kak pokonpene pwehn kaudokiong Siohwa oh sukuhlki ia duwen arail pahn kalohk. (Ipru 10:24, 25) Pwe mepwukat koaros en wiawi, sapwellimen Sises tohnpadahk kan pahn anahne soandi mwahu.

11. Ia duwen atail kak utungada sapwellimen Siohwa pwihn?

¹¹ Ia duwen atail kak utungada sapwellimen Siohwa pwihn? Ehu ahl kesempwal en wia met iei sang ni atail kin likih brother kan me kin tiengla mwowe nan doadoahk en kalohk. Siohwa oh Sises kin ketin likih brother pwukat, oh kitail pil anahne wia met. Brother pwukat kakete doadoahngki arail ahnsou oh kehl pwehn song en kamwahwihala kahpwal kan nin sampah wet. Ahpw re sohte wiewia met. Kitail en koasoiapene dahme sapwellimen Siohwa pwihn nin sampah kin kilikilangwohngete ahnsou koaros.

RE KIN MWOHNEKI “PILADA DAHME KEIEU MWAHU”

12, 13. Ia duwen elder kan ar kin apwalih pwukoa me re ahneki? Dahme kahrehda met kin kangoange iuk?

¹² Elder koahieklahr kan nan sampah pwon alehdi pwukoahn koasoanehdi oh pil tiengla mwowe nan doadoahk en kalohk nan sahpw kan me re kin papah ie. Ni arail wiahda pilipil kan, re kin rapahki kaweid sang nan Paipel.Ni ahl wet, re wiahkihla Paipel mehn ‘sereparail oh kamarainpen elerail kan.’ Re pil kin kapakapki sapwellimen Siohwa kaweid.​—Mel. 119:105; Mad. 7:7, 8.

¹³ Duwehte elder kan ni mwehin tepin wahnpoaron ko, elder kan me kin koasoanehdi doadoahk en kalohk rahnpwukat kin mwohneki mahs “doadoahk en wia padahk.” (Wiewia 6:4) Re kin perenkihda arail kilang pweidahn doadoahk en kalohk nan arail wasa oh pil nan sampah pwon. (Wiewia 21:19, 20) Re sohte kin wiahda kosonned tohto ong sapwellimen Koht aramas akan. Ahpw re kin idawehn Paipel oh pil kaweid en sapwellimen Koht manaman ni arail kin wiahda koasoandi kan me anahn pwehn sewese doadoahk en kalohk en mwekimwekid kohwei. (Wadek Wiewia 15:28.) Ni ahl wet, brother pwukat kin wiahda mehn kahlemeng mwahu ong koaros nan mwomwohdiso kan.​—Ep. 4:11, 12.

14, 15. (a) Dahme kin wiawi pwehn sewese kitail en wia doadoahk en kalohk nan sampah pwon? (b) Ia omw pepehm duwen dahme ke kin wiewia pwehn utungada doadoahk en kalohk?

¹⁴ Riatail brother tohto kin doadoahk rahn koaros pwehn kaunopada neitail sawaspen Paipel kan, atail mihting kan oh mihting tohrohr kan. Karasepe, meh kid kei me kin toukihda pein irail kin uhdahn doadoahk laud pwehn kawehwehda neitail sawaspen Paipel kan ni lokaia tohtohsang 600. Pwehki met, aramas tohto kak sukuhlki “soangen manaman kapwuriamwei kan me Koht ketin wiadahr” ni pein arail lokaia. (Wiewia 2:7-11) Brother oh sister pwulopwul kan kin doadoahk laud en wiahda pwuhk pwukat ni arail doadoahngki misihn en wiahda pwuhk kan. Pwuhk pwukat eri pekederla nan mwomwohdiso kan me pil kin mi wasa doh.

¹⁵ Pil nan atail wasa, me tohto kin wiewia doadoahk me kin sewese kitail en kilikilangwohngete doadoahk en kalohki rongamwahwo. Karasepe, meh kid kei kin toukihda pein irail pwehn kauwada Wasahn Kaudok oh pil wasahn mihting tohrohr kapw kan. Meteikan kin sewese irail kan me kin lelohng melimel de rerrer en sahpw ape oh pil irail kan me anahne sawas ong palien wini kan. Ekei kin koasoanehdi koasoandi kan ong mihting tohrohr tikitik oh laud kan, oh pil ekei kin kihda kasukuhl kan en Paipel. Ia kahrepen doadoahk pwukat koaros? Doadoahk pwukat kin wiawi pwehn sewese kitail en kalohki rongamwahwo, kekeirda nan padahk mehlel oh sewese aramas tohto ren wiahla sapwellimen Siohwa tohnkaudok kan. Sapwellimen Siohwa pwihn nin sampah kin ni mehlel mwohneki mahs ren pilada dahme keieu kesempwal.

IDAWEHN MEHN KALEMENG EN SAPWELLIMEN SIOHWA PWIHN

16. Dahme ke kak wia ong omw kaudok en peneinei oh pein omw onop en Paipel?

¹⁶ Ia duwe, kitail kin kihong ahnsou en medemedewe dahme sapwellimen Siohwa pwihn kin wiewia? Ke kak wia roporop duwen pwihn wet nan omw kaudok en peneinei de pein omw onop en Paipel oh doudouloale dahme ke sukuhlki. Karasepe, e pahn kaperen en onopki duwen kasansal kan me kohwong Aiseia, Esekiel, Daniel oh Sohn. Pwuhken Jehovah’s Witnesses—Proclaimers of God’s Kingdom (lokaiahn wai) oh sawaspen Paipel teikan de kasdo kan pil kin padahkihong kitail soahng mwahu tohto duwen sapwellimen Koht pwihn.

17, 18. (a) Ia duwen iren onop wet eh sewese iuk? (b) Peidek dah kan me kitail anahne idek rehtail?

¹⁷ E mwahu kitail en doudouloale ia duwen Siohwa eh ketin doadoahngki sapwellime pwihn pwehn utungada doadoahk en kalohk. Kitail en iang pwihn kaselel wet mwohneki pilada dahme keieu kesempwal. Atail pepehm pahn duwehte ahn Pohl me ntingihedi: “Nan sapwellimen Koht kalahngan lapalap e ketikihong kiht kohwa doadoahk wet; ihme se sohte kin pwangahkihda.” (2 Kor. 4:1) E pil kangoange rie Kristian ko: “Kitail dehr pwangahki atail wiewia mwahu kan; pwe ma kitail sohte pahn pwangahkihda, ahnsou pahn leledo kitail ahpw pahn dolung.”​—Kal. 6:9.

¹⁸ Ia duwe, kowe de omw peneinei anahne wiahda ekei wekidekla kan pwe kumwail en kak mwohneki pilada dahme keieu kesempwal nan amwail mour en ehuehu rahn? Ke kak kihsang soahng kan me sohte nohn kesempwal nan omw mour pwe ken kak kalaudehla omw doadoahk en kalohk? Nan iren onop en mwuhr, kitail pahn koasoiapene soahng limau me pahn sewese kitail en idawehn mehn kahlemeng en sapwellimen Siohwa pwihn oh kolokol atail ngoang nan sapwellime doadoahk.