Siohwa “Sohte Ketin Lipilipilki Aramas”

Mie pak me aramas mwamwahlikin uhk? Mie pak me emen sohte men seweseiuk nan sidowa ape, sohte men kihong uhk doadoahk, de re kailongki uhk pwehki soangen poh dah kilimwen, mehnia keinek ke kohsang, de ma ke lapalap de tikitik? Ma ei, met pil kin wiawihong aramas tohto. Ahpw iet rongamwahwo: Mendahki soahng pwukat kin wiawi wasa koaros nin sampah, mepwukat sohte kin wiawi nanleng. Wahnpoaron Piter uhdahn kamehlele ni eh nda, “Koht sohte ketin lipilipilki aramas.”​—Wadek Wiewia 10:34, 35.

Wahnpoaron Piter koasoia met ni eh mi nan imwen mehn liki men me ede Kornilius. Piter ipwidi wia mehn Suhs men oh mi ni ahnsou ehu me mehn Suhs kan kin wiahki mehn liki kan aramas samin kei oh e sohte pwung emen en patehng. Eri, dahme kahrehda Piter mi nan imwen Kornilius? Met pwehki Siohwa Koht ketin koasoanehdi ira en tuhpene. Piter kilangada kaudiahl ehu me Koht mahsaniong ih: “Ke dehr wiahki me samin mehkot me Koht mahsaniher me mwakelekel.” Piter sehse me rahn ehu mwowe, Kornilius pil alehdi kaudiahl ehu me tohnleng men padahkihong en ileklahng Piter en kohla reh. (Wiewia 10:1-15) Ni Piter eh esehda me Siohwa ketin pidada met, e sohte kak koledi dahme e ndao.

Piter koasoia, “Met I wehwehkidahr me Koht sohte ketin lipilipilki aramas.” (Wiewia 10:34) Me pid lepin lokaiahn Krihk me kawehwehdiong “lipilipilki aramas,” emen me samanih Paipel kawehwehda: “Met kin doakedoake sounkopwung men eh wiahda pilipil ehu kaidehn pwehki aramaso kauwehla kosonned ehu, ahpw pwehki e sohte pwungki mwomwen aramaso.” Koht sohte kin ketin uhki emen pwehki ih mehn ia, wehi me e kohsang ie, ma e lapalap de tikitik, de soangen kahrepe teikan.

Ahpw Siohwa kin ketin mwahngih dahme mi nan mohngiongitail. (1 Samuel 16:7; Lepin Padahk 21:2) Piter pil doula nda: “E kin ketin kupwurperenki mehmen me kin lemmwiki, oh pil wiewia me pwung; sohte lipilipil ih soangen aramas dah.” (Wiewia 10:35) Lemmwiki Koht kin wehwehki en wauneki, kahkahki, likih, oh dehr wia mehkot me kin kansensuwedihala kupwure. Pwehn wiewia me pwung kin pidada emen eh men wia dahme pwung mwohn silangin Koht. Siohwa ketin kupwurperenki aramas men me eh mohngiong uhdahn lemmwiki ih oh kamwakid ih en wiahda dahme pwung.​—Deuderonomi 10:12, 13.

Ma mie pak ke lelohng irair me aramas kin mwamwahlikin uhk de lipilipilkin uhk, mie kahrepe mwahu ken ale kangoang sang ahn Piter koasoia duwen Koht. Siohwa kin ketin kainangihedo aramas sang wehi koaros ong kaudok mehlel. (Sohn 6:44; Wiewia 17:26, 27) E kin ketin karonge oh mwekidki kapakap en sapwellime tohnkaudok kan sohte lipilipil ih mehn ia, wehi me e kohsang ie, de ma e lapalap de tikitik. (1 Nanmwarki 8:41-43) Kitail kak kamehlele me ni Siohwa eh ketin mahsendihdo sang nanleng, e ketin mahsanihada pwihn en aramas ehute me mie. Met sou kin kamwakid uhk ken kalaudehla omw sukuhlki duwen Koht menet me sohte ketin lipilipilki aramas?