Dehr “Kaulimehki” Siohwa

1, 2. Dahme kahrehda kitail en dehr kapwukoahki Siohwa kahpwal kan nin sampah? Karasaras dahieu me ke kak doadoahngki pwehn kawehwehda met?

MEDEWEHLA ohl pwopwoud nsenamwahu men me kohla ni imweo rahn ehu oh diarada me soahng koaros nan imweo ohlahr. Kepwehn nan ihmwo ohla, dahl ko koaros pwalpweseng, oh dahil en tahto pil uhdahn ohla. Imwe ihmw kaselelo duwehla wasa ehu me melimel kauwehla. Ihs me ke leme e pahn kapwukoahki? Ia duwe, e pahn nda “Dahme kahrehda ei pwoudo wiahki met?” Soh, e uhdahn pahn nda, “Ihs me wia met?” E ese me eh pwoudo sohte pahn kauwehla imwarao.

² Rahnwet, sampah wet ohlahr. Pwelen sampah, pihl, oh nan wehwe saminlahr. Aramas akan lemei oh tiahk suwed. Ahpw kitail sukuhlki sang nan Paipel me kaidehn Siohwa me ketin kahrehda mepwukat. E ketin kapikada sampah pwehn wia paradais lingan ehu ong kitail. (Sen. 2:8, 15) Siohwa iei Koht en limpoak. (1 Sohn 4:8) Paipel mahsanihong kitail me Sehdan me Tepil iei “kaunen sampah wet,” oh ih me kin kahrehda pali laud en kahpwal pwukat.​—Sohn 14:30; 2 Kor. 4:4.

3. Ia duwen atail kak tepida ahneki madamadau sapwung duwen atail kahpwal kan?

³ Ahpw, kitail sohte kak kapwukoahki Sehdan atail kahpwal kan koaros. Dahme kahrehda? Pwehki ekei atail kahpwal kan kin kohsang pein atail sapwung kan. (Wadek Deuderonomi 32:4-6.) Ele kitail kin nda me kitail kamehlele met. Ahpw pwehki kitail soh unsek, kitail kakete tepida ahneki madamadau sapwung duwen atail kahpwal kan oh met kak keper. (Lep. Pad. 14:12) Kitail kakete tepida kapwukoahki Siohwa a kaidehn pein kitail de Sehdan. Kitail pil kakete “kaulimehki” Siohwa, de uhdahn lingeringerda pah.​—Lep. Pad. 19:3.

4, 5. Ia duwen Kristian men eh kakete “kaulimehki” Siohwa?

⁴ Ia duwe, kitail kak “kaulimehki” Siohwa? Ni mehlel, e sohte mwahu en lingeringerda pahn Siohwa. (Ais. 41:11) Kitail sohte kak pelianda Koht oh kana. E mehlel me kitail sohte kin nda me kitail lingeringerda pahn Siohwa. Ahpw Lepin Padahk 19:3 mahsanih me aramas kin “kauwehkinirailla” ar mwekid pweipwei kan oh “e [“eh mohngiong,” NW] ahpw kin kaulimehki KAUN-O.” Met wehwehki me aramas emen kak kaulimki Koht nan eh mohngiong oh lingeringerda pah. Met kak kamwakid eh wiewia kan. Karasepe, eh papah Siohwa kak wawaila de e uhdi sang iang mwomwohdiso kaudok.

⁵ Dahme kakete kahrehda kitail en “kaulimehki” Siohwa? Ia duwen atail kak soikala lidip wet? Kitail anahne ese pasapengpen peidek pwukat pwe kitail en kak pere atail nanpwungmwahu rehn Siohwa Koht.

IA DUWEN ATAIL KAK WIAHLA EMEN ME “KAULIMEHKI” SIOHWA?

6, 7. Dahme kahrehda mehn Israel kan ni mwehin Moses tepida kaulimki Siohwa?

⁶ Dahme kahrehda sapwellimen Siohwa ladu lelepek men kakete tepida kaulimki Koht nan eh mohngiong? Iren onop wet pahn koasoia soahng limau me kak kahrehiong kitail en lingeringerda oh kitail pahn tehkpene karasaras en irail nan Paipel me tepida “kaulimehki” Siohwa.​—1 Kor. 10:11, 12.

⁷ Dahme meteikan nda kak kamwakid kitail. (Wadek Deuderonomi 1:26-28.) Medewehla dahme Siohwa ketin wiahiong mehn Israel kan. E ketikihong mehn Isip kan kalokolok eisek ko oh kamwomwala Parao oh nah sounpei kan nan Sehd Weitahtao. Mehn Israel kan saledekla! (Eks. 12:29-32, 51; 14:29-31; Mel. 136:15) Sapwellimen Koht aramas akan kaunopadahngehr ren pedolong nan Sapwen Inou. Ahpw re tepida kaulimki Siohwa. Dahme kahrehda sohla arail pwoson mwohnte re pahn ale ketingparail? Pwehki dahme lipoahrok ehk ko koasoiaiong irail kahrehda ren mworusala oh masepwehkada. (Nemp. 14:1-4) Met imwikihla Siohwa eh sohte ketin mweidohng irail ren pedolong nan ‘sahpw kaselelo’ ni ahnsowo. (Deud. 1:34, 35) Dahme kitail kak sukuhlki? Dahme meteikan nda kak kaluwetehla atail pwoson oh kahrehiong kitail en kaulimki mwomwen en Siohwa eh kin ketin kahluwa sapwellime aramas akan.

8. Dahme kahrehda mehn Suda ko ni mwehin Aiseia kapwukoahki Siohwa ar kahpwal kan?

⁸ Kahpwal laud kan kak kahrehda kitail en mworusala. (Wadek Aiseia 8:21, 22.) Ni mwehin Aiseia, mehn Suda ko wie lokolok. Imwintihti kan kapilirailpene. Me tohto rehrail men mwenge pwehki sohte itar mwenge. Ahpw mie kahpwal ehu me laudsang met. Irail solahr rong Siohwa oh re mweidohng arail nanpwungmwahu reh en luwetala. (Eimw. 8:11) Re sohte peki sawas sang rehn Siohwa ahpw re kapwukoahkin ih oh arail nanmwarkio ar kahpwal ko. Pil duwehte, ma kitail mworuskihla kahpwal laud ehu de kahpwal teikan nan atail mour, kitail kakete tepida kapwukoahki Siohwa oh pehm me e sohte ketin sewesei kitail ni ahnsou me kitail anahne.

9. Dahme kahrehda mehn Israel ko ni mwehin Esekiel ahneki madamadau sapwung duwen sapwellimen Siohwa ahl akan?

⁹ Kitail sehse ire mehlel koaros. Pwehki mehn Israel kan ni mwehin Esekiel sohte ese ire kan koaros duwen ehuehu irair, re leme me sapwellimen Koht koasoandi kan me sapwung. (Esek. 18:29) Re kin mwomwehda me re ahneki pwuhng en kadeik Koht oh en pilada ma e kin ketin wiewia mehkan ni ahl me keieu mwahu, mehnda re sohte wehwehki kahrepe koaros me Koht sapwellimaniki. Ia duwen atail kakete wiahda soangen sapwungohte? Mie poadopoad kan nan Paipel me ele apwal ong kitail en wehwehki. De mwehin kitail sohte wehwehki dahme kahrehda kitail kin lelohng irair ehu nan atail mour. Atail mohngiong kakete tepida pehm me sapwellimen Siohwa ahl akan sohte pahrek oh “me sapwung.”​—Sohp 34:5.

10. Ia duwen emen eh kak alasang en Adam eh mehn kahlemeng suwed?

¹⁰ Kitail sohte kin kapwukoahkin kitail dipatail oh atail sapwung kan. Tepin ohl Adam kapwukoahkin Koht pein dipe kan. (Sen. 3:12) Adam ese me e kauwehla sapwellimen Koht kosonned oh me Koht pahn ketin kaloke ih pwehki dipe ko. Ahpw e kapwukoahki Siohwa, dene Siohwa ketin wiahda sapwung ni eh ketikihong lih suwed men en pwoudiki. Meteikan kin alasang en Adam eh mehn kahlemeng suwed sang ni arail kapwukoahki Koht arail sapwung kan. Kitail anahne idek rehtail, ‘I kak uhdahn nsensuwedkihla pein ei sapwung kan kahrehda I tepida medewe me sapwellimen Siohwa koasoandi kan me nohn kakos?’

11. Dahme kitail kak sukuhlki sang Sona?

¹¹ Kitail tepida medemedewehte pein kitail. Soukohp Sona lingeringerda ahnsou me Siohwa ketin mahkohng mehn Ninipe kan. (Sona 4:1-3) Dahme kahrehda? E medewe me re pahn leme me ih soukohp likamw men pwehki e nda me kahnimwo pahn ohla ahpw e sohte ohla. Mwomwen me Sona kin nohn nsenohki dahme aramas ako kin medewehki ih, ahpw e sohte nsenohki mouren aramas ako. Kitail kak ahnekihda ahn Sona pepehmo? Ma kitail kin medemedewehte pein kitail, ele kitail kak manokehla anahn en meteikan. Karasepe, mwein kitail kalokalohngki erein sounpar tohto me rahnen Siohwa kerendohr. Ia duwe, kitail kakete sohla kanengamah oh awih Siohwa ni meteikan ar kauwei kitail pwehki rahno saikinte leledo?​—2 Pit. 3:3, 4, 9.

IA DUWEN ATAIL KAK SOIKALA “KAULIMEHKI” SIOHWA?

12, 13. Ma mohngiongitail tepida sapwungki dahme Siohwa ketin wia de dahme e ketin mweidohng en wiawi, dahme kitail anahne wia?

¹² Dahme kitail kak wia ma kitail sapwungki dahme Siohwa ketin wia de dahme e ketin mweidohng en wiawi? Tamataman me e soaloalokong en ahneki madamadau wet. Lepin Padahk 19:3 katamankihong kitail me pwehki atail sohte wehwehki ire kan, kitail kakete kapwukoahki Siohwa kahpwal kan me pein kitail kahrehda. Eri kitail en tehkpene duwen soahng limau me pahn sewese kitail en dehr lingeringerda pahn Siohwa.

¹³ Kolokol omw nanpwungmwahu rehn Siohwa en kehlail. Ma kitail ahneki nanpwungmwahu keren rehn Siohwa, kitail sohte pahn lingeringerda pah. (Wadek Lepin Padahk 3:5, 6.) Kitail anahne likih Siohwa. Kitail en dehr medewe me kitail ese laudsang ih de atail anahn akan iei me keieu kesempwal. (Lep. Pad. 3:7; Ekl. 7:16) Soangen madamadau pwukat pahn sewese kitail en sohte kapwukoahki ih mehkot ni soahng suwed kan ar wiawi.

14, 15. Dahme pahn sewese kitail en dehr mwekidki soahng suwed kan me meteikan nda?

¹⁴ Dehr mweidohng dahme meteikan nda en kamwakid uhk. Mehn Israel kan ni mwehin Moses ahneki kahrepe tohto ren likih me Siohwa pahn ketin sewese irail ren pedolong nan Sapwen Inou. (Mel. 78:43-53) Ahpw ni lipoahrok ehk ko ar nda soahng suwed kan duwen sahpwo, Paipel mahsanih me mehn Israel ko “manokehla sapwellime manaman lapalap,” me iei, re manokehla dahme Siohwa ketin wiahiong irail. (Mel. 78:42) Ma kitail doudouloale soahng kaselel koaros me Siohwa ketin wiahiong kitail, kitail pahn karanihala ih. Met pahn imwikihla atail sohte pahn mweidohng dahme meteikan nda en katohre kitail sang Siohwa.​—Mel. 77:11, 12.

¹⁵ Pil ehu me kak katohre kitail sang Siohwa iei ma kitail ahneki madamadau sapwung duwen riatail Kristian kan. (1 Sohn 4:20) Karasepe, ni Aaron eh idihdida nin duwen samworo lapalap men, mehn Israel ko kaulimki met. Ahpw ong Siohwa, e kin mwomwen me re kaulimki Ih. (Nemp. 16:11; 17:10) Ni ahlohte, ma kitail kaulimki irail kan me Siohwa ketin doadoahngki pwehn wia sapwellime doadoahk nin sampah, kitail kakete kaulimki Siohwa.​—Ipru 13:7, 17.

16, 17. Dahme kahrehda kitail en dehr kapwukoahki Siohwa atail kahpwal kan?

¹⁶ Tamataman me Siohwa sohte kin ketin kahrehda atail kahpwal kan. Ni mwehin Aiseia, mehn Israel kan uhdi sang arail papah Siohwa, ahpw E ketin kupwurkihte sewese irail. (Ais. 1:16-19) Rahnpwukat, ni atail kin ahneki kahpwal kan, atail ese me Siohwa ketin nsenohkihte kitail oh pil kupwurki sewese kitail kin kamweitala kitail. (1 Pit. 5:7) Siohwa pil ketin inoukihong kitail me e pahn ketin kakehlaka kitail pwe kitail en kolokol atail lelepek ong ih.​—1 Kor. 10:13.

¹⁷ Sohp lelohng soahng kan me sapwung oh sapahrek mendahki e kin lelepek ong Siohwa. Ni atail kin lelohng lokolok, kitail anahne tamataman me kaidehn Siohwa me ketin kahrehda. Paipel mahsanih me e ketin kalahdeki soahng kan me sapwung oh sapahrek ahpw e ketin kupwurki dahme pwung. (Mel. 33:5) Kitail anahne duwehte kompoakepahn Sohp, Elihu, me wehwehki me Siohwa sohte kin ketin wia me suwed de sapwung. (Sohp 34:12) Siohwa kin ketikihong kitail “soangen wiawi sapan koaros oh kisakis mwahu koaros.” E sohte kin ketin kahrehda atail kahpwal kan.​—Seims 1:13, 17.

18, 19. Dahme kahrehda kitail en dehr peikasalki Siohwa? Karasaras dahieu me sewese kitail en wehwehki met?

¹⁸ Dehr peikasalki Siohwa. Koht me ketin unsek, oh sapwellime madamadau kan me ileile sang atail madamadau. (Ais. 55:8, 9) Ma kitail uhdahn aktikitik oh mpahi, kitail pahn kak nda me kitail sohte wehwehki soahng koaros. (Rom 9:20) Pali laud en ahnsou, kitail sehse ire mehlel koaros duwen irair ehu. Mwein nan omw mour, ke kilang mehlelpen lepin padahk wet: “Aramas me kin tepin koasoi nan mwoalen kopwung kin mwomwen pwung lao me uhwongo pahn wiahiong eh peidek kan.”​—Lep. Pad. 18:17.

¹⁹ Karasepe, mwein kompoakepatail keren men wiahda mehkot me kitail sohte wehwehki, de kitail pehm me dahme e wiahu weksang dahme kitail kalapw kilang. Ia duwe, kitail pahn mwadang medewe me e wiahda sapwung ehu? Soh, ahpw kitail pahn medewe me kitail sehse ire mehlel koaros duwen dahme wiawi. Ma kitail kin men kasalehiong kompoakepatail soh unsek kan soangen limpoak wet, kitail uhdahn anahne pil men likih Samatail nanleng. Sapwellime ahl akan oh madamadau me ileilehsang atail!

20, 21. Dahme kahrehda kitail en dehr kapwukoahki Siohwa atail kahpwal kan?

²⁰ Tamataman uhdahn kahrepen atail kahpwal kan. Kitail anahne pohnese me kitail me pein kahrehda ekei atail kahpwal kan. (Kal. 6:7) Kitail en dehr kapwukoahki Siohwa atail kahpwal kan. Dahme kahrehda? Medewehla karasaras wet: Dahme kak wiawi ma emen tangahki sidohsa uhdahn uk nan wet keper ehu? E kak kauwehla were sidohsao. Ia duwe, sountangahki sidohsao pahn kapwukoahki wasa me wiahda sidohsao? Uhdahn soh! Pil duwehte, Siohwa ketikihong kitail saledek en pein wiahda atail pilipil kan. Ahpw e pil ketin padahkihong kitail ia duwen atail pahn wiahda pilipil mwahu kan. Eri kitail en dehr kapwukoahki Siohwa ma kitail wiahda sapwung kan.

²¹ Ahpw kaidehn atail kahpwal kan koaros kin kohsang wiewia sapwung kan. Soahng kei kin wiawi pwehki “paisuwed kin lelohng aramas koaruhsie.” (Ekl. 9:11) Kitail en pil dehr manokehla me Sehdan me Tepil iei me kin kahrehda me suwed kan nan sampah. (1 Sohn 5:19; Kaud. 12:9) Sehdan me iei imwintihtio, kaidehn Siohwa!​—1 Pit. 5:8.

PERE OMW NANPWUNGMWAHU REHN SIOHWA

22, 23. Dahme kitail anahne tamataman ma kitail mworusala pwehki atail kahpwal kan?

²² Ni omw pahn ahneki kahpwal kan, tamataman mehn kahlemeng mwahu en Sosua oh Kalep. Lipoahrok ehk ko nda soahng suwed kan duwen Sapwen Inowo, ahpw Sosua oh Kalep koasoia soahng mwahu kan. (Nemp. 14:6-9) Re kin pwoson Siohwa. Ahpw re anahnehte iang mehn Israel teikan alialuhseli erein sounpar 40. Ia duwe, Sosua oh Kalep kaulim de nsensuwedla pwehki ara iang ale kalokolok? Soh. Ira likih Siohwa oh E ketin kapaiairahda. Mendahki pali moron en mehn Israel ko mehla nan sapwtehno, Siohwa ketin mweidohng Sosua oh Kalep en pedolong nan Sapwen Inowo. (Nemp. 14:30) Pil duwehte, Siohwa pahn ketin kapaiakitailda ma kitail “sohte pahn pwangahkihda” atail papah ih.—Kal. 6:9; Ipru 6:10.

²³ Ma ke mworusala pwehki mie omw kahpwal kan, de pwehki sapwung en meteikan, de pwehki pein omw sapwung kan, dahme ke anahne wia? Ken tamataman me Siohwa iei Koht emen me inenen mwahu. Medewehla soahng mwahu kan me Siohwa ketin inoukihda pwehn ketikihong uhk. Pein idek rehmw ia pahn mwomwen omw mour ma ke sohte ahneki nanpwungmwahu rehn Siohwa. Mihmihte reh oh dehr mweidohng omw mohngiong en lingeringerda pah!