Medewe Soangen Aramas Dah Me Konehng Ken Wia

1, 2. Dahme anahn pwe Koht en ketin kupwurkin kitail?

ARAMAS tohto kin men ese dahme meteikan medewehki irail. Ahpw nin duwen Kristian akan, me kesempwal sang met iei dahme Siohwa ketin medewehkin kitail. Met pwehki Ih me ketin lapalahpie nanleng oh sampah oh ih “me poahsoan en mour koaros.”​—Mel. 36:9.

² Wahnpoaron Piter kawehwehda pwe ma Siohwa pahn ketin kupwurkin kitail, atail mour “uhdahn pahn konehng en kin mwakelekel oh kasarawihong Koht.” (Wadek 2 Piter 3:11.) ‘Atail mour’ kin sarawi ihte ma kitail mourki mour mwakelekel ni soahng koaros me kitail kin wia. Met kin pidada elen atail madamadau, atail wiewia kan oh atail kaudokiong Koht. Patehng met, kitail anahne ahneki mour me “kasarawihong Koht” me kohsang atail limpoak laud oh wauneki Koht. Eri Koht kin ketin kesempwalki kaidehn atail wiewia kante ahpw pil atail pepehm kan ong ih. Siohwa kin ketin “song mohngiong en aramas koaros” kahrehda e ketin mwahngih ma atail wiewia kan me sarawi de ma kitail kin kaudokiong ih kelehpw.​—1 Kron. 29:17.

3. Peidek dahkei kitail anahne pein idek rehtail?

³ Sehdan me Tepil sohte men kitail en wia soangen aramas akan me Koht ketin kupwurki. Ni mehlel, e kin wia uwen eh kak pwe kitail en sohla ahneki nanpwungmwahu rehn Siohwa. Sehdan kin likamw pwehn song en pitihedi kitail pwe kitail en sohla kaudokiong Siohwa. (Sohn 8:44; 2 Kor. 11:13-15) Eri kitail anahne pein idek rehtail, ‘Ia duwen Sehdan eh kin pitih aramas? Dahme I kak wia pwehn pere ei nanpwungmwahu rehn Siohwa?’

IA DUWEN SEHDAN EH KIN PITIH ARAMAS?

4. Pwehn kauwehla atail nanpwungmwahu rehn Koht, dahme Sehdan kin song wia? Dahme kahrehda?

⁴ Tohnpadahk Seims ntingihedi: “A aramas kin lelohng nan songosong sang ni pein eh ineng suwed eh kin kainangiong pein ih oh kahrehiong nan dihp. Eri, eh kin kanaitikihada eh ineng suwed, oh ni dihp eh kin pweidahr mehlel, e kin kahrehiong mehla.” (Seims 1:14, 15) Pwehn kauwehla atail nanpwungmwahu rehn Koht, Sehdan kin song kamwakid mohngiongitail, wasa me atail ineng kan kohsang ie.

5, 6. (a) Ia duwen Sehdan eh kin song kamwakid mohngiongitail? (b) Soahng siluh dah me Sehdan kin doadoahngki pwehn kahrehiong kitail en ahneki ineng suwed kan nan mohngiongitail? Ia uwen mwahu en eh doadoahngki mepwukat?

⁵ Ia duwen Sehdan eh kin song kamwakid mohngiongitail? Paipel mahsanih: “Sampah unsek mi pahn manaman en Me Suwedo.” (1 Sohn 5:19) Sehdan pil kin doadoahngki soahng kan me “mihmi nin sampah” pwehn pitih aramas. (Wadek 1 Sohn 2:15, 16.) Erein sounpar kid kei, Tepilo kin wiahiong sampah wet ni ahl ehu pwehn pitih aramas. Pwehki atail momour nin sampah wet, kitail anahne perehsang kitail eh widing suwed kan.​—Sohn 17:15.

⁶ Sehdan kin song kahrehiong kitail en ahneki ineng suwed kan nan mohngiongitail. Pwehn wia met, e kin doadoahngki soahng siluh “me mihmi nin sampah” me wahnpoaron Sohn kasalehda: (1) “ineng en uduk,” (2) “mehkan me aramas kin kilang oh ahnehda” oh (3) “mehkoaros me mi nin sampah me aramas kin pohnmwahsohkihda.” Sehdan doadoahngki soahng siluh pwukat koaros pwehn kasonge Sises nan sapwtehno. Pwehki Sehdan kin doadoahngki widing suwed pwukat erein sounpar tohto, e uhdahn esehla mwahu eh pahn doadoahngki oh ese mehnia e pahn doadoahngki ong emenemen aramas. Mwohn atail pahn sukuhlki ia duwen atail pahn pere kitail, kitail pahn koasoiapene ia duwen Tepilo eh kak pitihedi Ihp ahpw sohte kak pitihedi sapwellimen Koht Ohlo.

“INENG EN UDUK”

7. Ia duwen Sehdan eh doadoahngki “ineng en uduk” pwehn kasonge Ihp?

⁷ Aramas koaros anahne mwenge pwe ren mour. Sounkapikadao ketin wiahda sampah pwehn kihda soangen mwenge tohto. Sehdan ele kin doadoahngki atail ineng en mwenge pwehn kasonge kitail en wia mehkot me pahn kansensuwedihada Koht. Kitail pahn kilang ia duwen eh wia met ong Ihp. (Wadek Senesis 3:1-6.) Sehdan padahkihong Ihp me e sohte pahn mehla ma e tungoale “tuhkehn kehsehki aramas dahme mwahu oh dahme suwed.” E nda me ma e tungoale, e pahn duwehla Koht. (Sen. 2:9) Dahme Tepilo ndinda wehwehki me Ihp sohte anahne peikiong Koht pwe en kin momour. Met uhdahn likamw! Mwurin Tepilo eh kahrehiong en ahneki madamadau wet, Ihp anahne pilada soahng riau: E kak soikala madamadauo, de e kak doula medemedewe oh mweidohng eh ineng en laudla. Mendahki e kak tungoale tuhke teiko koaros, e pilada en medemedewehte duwen tuhkeo me mi nanwerengen mwetuwelo. Met imwikihla eh tungoale wahntuhkeo. Sehdan kahrehiongehr en inangih mehkot me eh Sounkapikadao ketin keinapwihsang.

8. Ia duwen Sehdan eh doadoahngki “ineng en uduk” pwehn kasonge Sises? Dahme kahrehda Sehdan sohte pweida?

⁸ Sehdan song en pitih Sises ni ahlohte. Ni Sises eh ketiket nan sapwtehno oh sohte sakan mehkot erein rahn 40 oh pwong 40, Sehdan song en kasonge ih ni eh doadoahngki ineng ong mwenge. Sehdan nda: “Ma Sapwellimen Kohto komwi, a komw mahsanih pwe takai wet en pikla wiahla pilawa.” (Luk 4:1-3) Sises sapwellimanki pilipil riau: E kak ketin pilada en sohte ketin doadoahngki sapwellime manaman en kaitarala sapwellime anahn en sak, de e kak ketin pilada doadoahngki. Sises mwahngih me e sohte pahn kin doadoahngki sapwellime manaman en ketin wia mehkot ni roporop. Mendahki e pwungitiklahr, eh nanpwungmwahu rehn Koht kin kesempwal sang mwenge. Sises ketin sapeng: “Kaidehkin pilawahte me aramas kak mourki, pwe mahsen koaros me kin pwilipwilsang nin doauesen Koht.”​—Luk 4:4; Mad. 4:4.

“MEHKAN ME ARAMAS KIN KILANG OH AHNEHDA”

9. Ia wehwehn koasoi pwukat “mehkan me aramas kin kilang oh ahnehda”? Ia duwen Sehdan eh doadoahngki met ong Ihp?

⁹ Pil ehu me Sohn koasoia me Sehdan kin doadoahngki pwehn pitiheki aramas iei “mehkan me aramas kin kilang oh ahnehda.” Aramas emen kak tepida inangih mehkot sang ni eh kilangete. Sehdan doadoahngki ineng wet pwehn pitihedi Ihp oh nda: “Kumwa pahn marainla.” Ni Ihp eh kin kilikilang wahntuhkeo, met kalaudehla eh inangih, ih eri “lingankihda tuhkeo.”

10. Ia duwen Sehdan eh kasongehki Sises “mehkan me aramas kin kilang oh ahnehda”? Dahme Sises ketin sapengki?

¹⁰ Ia duwen Sehdan eh doadoahngki “mehkan me aramas kin kilang oh ahnehda” pwehn kasonge Sises? Sehdan “kasalehiong ni marepteieu wehin sampah koaruhsie, oh patohwanohng, ‘I pahn kihong komwi soangen manaman koaros oh lingan en wehi pwukat koaros.’” (Luk 4:5, 6) Sises sohte mahsanih wehin sampah koaros, ahpw e mahsanih kaudiahl ehu me kasalehda lingan en wehi ko koaros. Sehdan pehm me dahme Sises pahn mahsanihada pahn kasonge ih. E ndaiong Sises: “Eri, koaruhsie pahn kohieng komwi, ma komw poaridi mwohi oh pwongih ie.” (Luk 4:7) Sises uhdahn sohte kupwurki wia soangen aramas me Sehdan men en ketin wia. Sises ketin mwadang sapeng mahsanih: “E ntingdier nan Pwuhk Sarawi me ‘Kaun-ohte, omw Koht, me ke pahn pwongih, oh ihete me ke pahn papah.’”​—Luk 4:8.

“MEHKOAROS ME MI NIN SAMPAH ME ARAMAS KIN POHNMWAHSOHKIHDA”

11. Ia duwen Sehdan eh pitihedi Ihp?

¹¹ Ni Sohn eh koasoia duwen soahng kan nan sampah, e nda duwen “mehkoaros me mi nin sampah me aramas kin pohnmwahsohkihda.” Ni ahnsou me Adam oh Ihp ara kelehpw wia aramas nin sampah, ira sohte kak pohnmwahsohki ong aramas teikan soahng kan me ira ahneki. Ahpw ira wiahla aramas pohnmwahso kei. Sehdan kahrehiong Ihp en kamehlele me mie mehkot kaselel e warohng ale ahpw Koht sohte kupwurki ketikihong. Tepilo ndaiong me ma e kang “wahntuhkehn kehsehki aramas dahme mwahu oh dahme suwed,” e pahn “duwehla Koht, . . . esehla dahme mwahu oh dahme suwed.” (Sen. 2:17; 3:5) Sehdan men Ihp en medewe me e sohte anahne Siohwa pwe en mour. Mwein irair en pohnmwahso iei ehu kahrepe me Ihp kamehlele likamw pwoatet. E kangala wahntuhke keinapwo oh medewe me mwein e sohte pahn mehla. Ia uwen eh sapwung!

12. Ia pil ehu wiepe me Sehdan kasongehki Sises? Ia duwen Sises eh ketin mwekidki met?

¹² Sises ketin weksang Ihp pwe e ketikihda mehn kahlemeng kaselel en aktikitik. Sehdan kasonge Sises en ketin wia mehkot pwehn suweikihong aramas akan oh kasonge Koht. Ahpw Sises uhdahn sohte kupwurki wia met pwe met wiewiahn aramas pohnmwahso! E ketin sapeng ni sansal oh inen mahsanih: “E ntingdier, ‘Ke dehr kasongosonge Kaun-o, omw Koht.’”​—Wadek Luk 4:9-12.

IA DUWEN ATAIL KAK PERE ATAIL NANPWUNGMWAHU REHN SIOHWA?

13, 14. Ia duwen Sehdan eh kin song pitih kitail rahnpwukat?

¹³ Rahnpwukat, Sehdan kin doadoahngki soangen elen widing kohte me e doadoahngkihong Ihp oh Sises. E kin doadoahngki “ineng en uduk” pwehn kasonge aramas akan ren wia tiahk suwed, de mwenge oh nim daulihala. E kin doadoahngki “mehkan me aramas kin kilang oh ahnehda” pwehn kasonge aramas ren kilang kilel oh kasdo suwed, ahpw ni mehlel nan Internet. Oh e kin doadoahngki “mehkoaros me mi nin sampah me aramas kin pohnmwahsohkihda” pwehn kainangiong aramas akan en wiahla aramas pohnmwahso, men ahneki manaman, ndandla oh ahneki kepwe tohto.

¹⁴ Sehdan kin doadoahngki “dipwisou me mihmi nin sampah” duwehte sounlaid men eh doadoahngki pahn. Pahn kin mwomw mwahu ong mwahmw akan ahpw mie kehs loale. Ni ahlohte, Sehdan kin doadoahngki soahng kan me ele mwomw mwahu oh anahn pwehn kahrehiong kitail en men wia mehkot me uhwong sapwellimen Koht kosonned kan. Sehdan men kitail en kamehlele me atail apwalih atail anahn kan oh wiahiong atail mour en nsenamwahu kin kesempwal sang wia kupwuren Koht. Ia duwe, ke pahn mweidohng Sehdan en pitihiukedi?

15. Ia duwen atail kak duwehte Sises oh pelianda ahn Sehdan kasongosong?

¹⁵ Sehdan pitihedi Ihp, ahpw e sohte pitihedi Sises. Ehuehu ahnsou me e song pitih, Sises ketin sapeng ih sang nan Paipel, mahsanih: “E ntingdier.” Ma kitail wia tohnsukuhl en Paipel mwahu kei, kitail pahn esehla mwahu Paipel oh kak tamataman ire kan me kak sewese kitail ni atail lelohng kasongosong. (Mel. 1:1, 2) Atail tamataman mehn kahlemeng en sapwellimen Koht ladu lelepek kan kak sewese kitail en loalopwoat duwehte irail. (Rom 15:4) Atail wauneki mehlel Siohwa, me iei en poakohng dahme e ketin poakohng oh tateki dahme e ketin kalahdeki, pahn pere kitail.​—Mel. 97:10.

16, 17. Ia duwen atail “kehl en madamadau” kak kamwakid kitail?

¹⁶ Wahnpoaron Pohl kangoange kitail en doadoahngki atail “kehl en madamadau” pwehn wiahla soangen aramas me ahneki sapwellimen Siohwa madamadau, a kaidehn madamadau en sampah. (Rom 12:1, 2, NW) Pohl katamankihong kitail me kitail anahne kanahieng kaunda atail madamadau kan. E nda: “Se kin kesehdi soangen aklapalap koaros me kin uhda oh kin pelianda erpit en Koht; se kin salihedi soangen lamalam koaros pwe en peikiong Krais.” (2 Kor. 10:5) Atail madamadau kin kamwakid laud soangen aramas dah kitail, eri kitail anahne song medewe soahng kan me kin kaperenda Koht ahnsou koaros.​—Pil. 4:8.

¹⁷ Ma kitail men sarawihla, kitail anahne kesehla madamadau oh ineng sapwung kan. Kitail anahne poakohng Siohwa “ni mohngiong mwakelekel.” (1 Tim. 1:5) Ahpw mohngiong me widing, oh ele kitail sohte pahn pohnese ia uwen “dipwisou me mihmi nin sampah” kin kamwakid kitail. (Ser. 17:9) E kesempwal kitail en idawehn ahn Pohl kaweid: “Kumwail kalelapak oh wia keseupen pein kumwail ma kumwail weweidki pwoson.” Ni atail kin onop Paipel, kitail anahne pein idek rehtail: ‘Ia duwe, ei madamadau oh ineng kan kin kaperenda Koht?’​—2 Kor. 13:5.

18, 19. Dahme kahrehda kitail anahne nantihong wia soangen aramas me Siohwa ketin kupwurki?

¹⁸ Dahme pil kak sewese kitail en pelianda “dipwisou me mihmi nin sampah” iei en tamataman dahme Sohn koasoia: “Sampah wet oh mehkoaros nin sampah me aramas kin inengieng kin sosohrala.” (1 Sohn 2:17) E mwomwen me ahn Sehdan koasoandi pahn mihmi kohkohlahte. Ahpw ehu rahn e pahn imwisekla. Mehkoaros nan ahn Sehdan sampah pahn kereniong sohrala. Atail tamataman met pahn sewese kitail en sohte lohdi pahn ahn Sehdan widing kan.

¹⁹ Wahnpoaron Piter ntingihedi me kitail anahne wia soangen aramas me Koht kupwurki ni atail ‘kasikasik sapwellimen Koht Rahno, oh wia uwen me atail kak pwe en kamwadangahdo—Rahno me lahng pahn roangala oh ohkihla kisiniei, oh audepen pahnlahng pahn peikipeseng karakar mwuledek.’ (2 Pit. 3:12) Kereniong rahno pahn leledo, oh Siohwa pahn ketin kasohrehla ahn Sehdan koasoandi koaros nin sampah. Lao lel ahnsowo, Sehdan pahn doulahte doadoahngki “dipwisou me mihmi nin sampah” pwehn kasonge kitail duwehte eh kasonge Ihp oh Sises. Kitail en dehr duwehte Ihp oh song kaitarala atail ineng kan. Met pahn duwehte atail wiahki Sehdan atail koht. Kitail anahne duwehte Sises oh pelianda kasongosong pwukat, sohte lipilipil ia uwen mwomw mwahu Sehdan pahn wiahiong mepwukat. Emenemen kitail en nantihong wia soangen aramas me Siohwa ketin kupwurki.