En Mwasamwasahn Sehdan Men Kadallehla Iuk!

1. Menlau kawehwehda ia duwen ngehn emen eh wiahla Sehdan.

MIE ahnsou ehu me e ahneki nanpwungmwahu rehn Siohwa. Ahpw mwuhr, ngehn menet tapiada men aramas en kaudokiong ih. E sohte soikala ineng suwed wet, ahpw e mweidohng en kakairada lao wiahla dihp. (Seims 1:14, 15) Kitail ese me ngehn menet iei Sehdan, me “sohte kin miniminiong me mehlelo.” E uhwongada Siohwa oh wiahla “semen soangen likamw koaros.”​—Sohn 8:44.

2, 3. Ia duwen lepin lokaia kan “Sehdan,” “Tepil,” “serpent,” oh “drakon” ar kin kasalehda duwen sapwellimen Siohwa imwintihti me keieu laud?

² Sangete ahnsowo me e uhwongada Koht, Sehdan kadehdedahr me e wia sapwellimen Siohwa imwintihti me keieu laud oh e uhdahn kaidehn kompoakepahn aramas. Ahd kan me kohwong Sehdan kasalehda uwen eh suwed. Sehdan wehwehki “Sounpelian,” me kasalehda me ngehn suwed menet sohte kin utung sapwellimen Koht pwuhng en kaunda, ahpw e kin kailongki oh uhdahn uhwong met. Laudsang mehkoaros, Sehdan men kilang sapwellimen Siohwa pwuhng en kaunda en imwisekla.

³ Nin duwen me kileldi nan Kaudiahl 12:9, Sehdan adaneki Tepil, me wehwehki “Sounkaraun likamw.” Met katamankihong kitail me Sehdan kin koasoia soahng likamw oh suwed duwen Siohwa sang ni eh nda me Siohwa sounlikamw men. Lepin lokaia kan “serpent en mahso” kin kataman ong kitail rahn kansensuwedo nan mwetuwel en Ihden ni ahnsou me Sehdan doadoahngki sineik men en pitihedi Ihp. Lepin lokaia kan “drakon kalaimwuno” katamankihong kitail duwen mahn kamasepwehk oh met pahrekiong en Sehdan eh kin nannanti en katokehdi kupwuren Siohwa oh kasohrehla Sapwellime aramas akan.

4. Dahme kitail pahn koasoiapene nan iren onop wet?

⁴ E sansal me Sehdan wia emen me keieu keper ong atail lelepek. Ihme kahrehda, Paipel kangoangehkin kitail: “Kumwail onohnop oh mwasamwasahn. Pwe amwail imwintihtio, Tepil, kin kohkohseli duwehte laion emen me kin weriwer, raparapahki ihs me e pahn kadallehla.” (1 Pit. 5:8) Eri, kitail pahn koasoiapene nan iren onop wet duwen irair siluh me Sehdan ahneki. Irair siluh pwukat kasalehda dahme kahrehda kitail anahne pere kitail sang imwintihti mwersuwed menet en Siohwa oh sapwellime kan.

SEHDAN UHDAHN KEHLAIL OH MANAMAN

5, 6. (a) Menlau kihda karasaras kan me kasalehda me tohnleng kan “kehlail oh manaman.” (b) Ni ahl dah me Sehdan kin “kakaun mehla”?

⁵ Tohnleng kan wia ngehn “kehlail oh manaman” kei. (Mel. 103:20) Re ahneki erpit oh kehl laudsang ahn aramas. Mehlel, tohnleng lelepek kan kin doadoahngki arail manaman ong me mwahu. Karasepe, ehu pak sapwellimen Siohwa tohnleng men kemehla sounpei en Asiria meh 185,000 me wia imwintihti kei. Aramas emente sohte kak wia met oh e pil apwal ong karis en sounpei ehu pwon. (2 Nan. 19:35) Ehu pak, tohnleng men doadoahngki eh manaman kehlail oh koahiek en kapitala sapwellimen Sises wahnpoaron ko sang imweteng. Sohte me kilang ahn ngehn menet eh ritingada wenihmw ko, kahluwaiei wahnpoaron ko, oh eri ritingedi wenihmw ko. E wia soahng pwukat koaros erein sounsilepen imweteng ko ar mi karanih wasao.​—Wiewia 5:18-23.

⁶ Tohnleng lelepek kan kin doadoahngki arail manaman ong me mwahu, ahpw Sehdan kin doadoahngki eh manaman ong me suwed. E uhdahn manaman oh kin kamwakid me tohto! Paipel kahdaneki ih “kaunen sampah” oh “koht suwed en sampah wet.” (Sohn 12:31; 2 Kor. 4:4) Sehdan me Tepil pil kin “kakaun mehla.” (Ipru 2:14) Met sohte wehwehki me e kin uhdahte kemehla aramas koaros. Eri, ia wehwehn met? Keieu, madamadau en kailok oh tiahk lemei me Sehdan ahneki kadirehlahr sampah. Keriau, pwehki Ihp kamehlele ahn Sehdan eh likamwo oh Adam sapeikiong Koht, dihp oh mehla lelohngehr tohnsampah pwon. (Rom 5:12) Sises ketin kahdaneki Sehdan “sounkam aramas emen.” (Sohn 8:44) Imwintihti menet uhdahn kehlail oh manaman!

7. Ia duwen ngehn saut akan ar kasalehda me re kehlail oh manaman?

⁷ Ni atail kin pelianda Sehdan, kitail pil kin pelianda koaros me kin iang ih uhwongada sapwellimen Siohwa pwuhng en kaunda. Met iangahki pwihnen tohnleng, de ngehn saut, tohto teikan me kin uhwong Koht. (Kaud. 12:3, 4) Pak tohto, ngehn saut pwukat kin kasalehda me re kehlail sang aramas oh kahrehiong irail lokolok laud. (Mad. 8:28-32; Mark 5:1-5) Dehr mwamwahliki manaman en ngehn saut pwukat de pil “kaunen ngehn suwed akan.” (Mad. 9:34) Ma sohte sapwellimen Siohwa sawas, kitail sohte kak kana ni atail pelianda Sehdan.

SEHDAN LEMEI

8. (a) Ia ahn Sehdan mehn akadei? (Menlau kilang tepin kilel.) (b) Nin duwen omw kin kilang, ia duwen sampah wet eh kasalehda uwen Sehdan eh lemei?

⁸ Wahnpoaron Piter karasahkihong Sehdan “laion emen me kin weriwer.” Ehu pwuhk kawehwehda me lepin lokaiahn Krihk me kawehwehdi “weriwer,” kin wehwehki “wer en mahn lawalo men me uhdahn duhpekla.” Ia uwen met eh kawehwehda mwahu duwen ahn Sehdan eh wiewia lemei kan! Mendahki sampah unsek mi pahn eh manaman, Sehdan sohte itarki met, ahpw e pil men kadallehla me tohto. (1 Sohn 5:19) Irail kan me Sehdan uhdahn men kadallehla iei me keidi kan me luhluhwe nin sampah oh pil iengerail “sihpw teikan.” (Sohn 10:16, NW; Kaud. 12:17) Ahn Sehdan mehn akadei iei en kasohrehla sapwellimen Siohwa aramas akan. Kalokolok kan me wiawihong sapwellimen Sises tohnpadahk kan sangete ni mwehin tepin Kristian ko leledo met kadehdehda uwen Sehdan eh lemei.

9, 10. (a) Ia duwen Sehdan eh song en kauhdi kupwuren Koht en pweida me pid wehin Israel? (Menlau kihda karasepe kan.) (b) Dahme kahrehda Sehdan ahneki kahrepe tohrohr en tetehkte wehin Israel en mahs? (c) Dahme ke leme Sehdan kin medewe ni ahnsou me emen sapwellimen Siohwa ladu kan wiahda dihp laud rahnpwukat?

⁹ Ni eh song en kauhdi kupwuren Koht en pweida, Sehdan kasalehda me e pil kin lemei ni ehu ahl tohrohr. Laion men me uhdahn duhpekla sohte kin poakehla me e pahn kemehlao oh sohte kin koluhkihla mwuhr. Ni ahlohte, Sehdan sohte kin kasalehda eh poakehla irail kan me e kin song en kadallehla. Karasepe, dahme ke lemehkiong ahn Sehdan pepehm ahnsou kan me e kilang mehn Israel ko wiahda dihp duwehte noahrok oh tiahk samin me pid wia nsenen pwopwoud? Ke kak medewehla Sehdan eh perenkihda eh pweida ni eh kilang imwila suwed en tiahk samin me Simri wiahda oh en Keasi eh noahrok?​—Nemp. 25:6-8, 14, 15; 2 Nan. 5:20-27.

¹⁰ Sehdan ahneki kahrepe tohrohr en tetehkte wehin Israel en mahs. Tamataman me Mesaiao pahn kohsang wehi wet, oh ih me pahn ketin kauwehla Sehdan oh kadehdehda me Siohwa iei me sapwellimanki pwuhng en kaunda. (Sen. 3:15) Sehdan sohte men mehn Israel kan en pweida mwahu, oh e inenen lemei ni eh song en kahrehiong irail en saminkihla dihp. Dehr medewehiong me Sehdan poakehla Depit ni ahnsou me Depit wiahda dipen kamwahl de me e pil poakehla Moses ni ahnsou me soukohp menet solahr mweimweiong en pedolong nan Sapwen Inowo. Sehdan uhdahn perenki kilang emen sapwellimen Koht ladu kan ar kin wiahda dihp laud. Ni mehlel, Tepilo kin doadoahngki dahme e pweida loale pwehn kauwehki Siohwa.​—Lep. Pad. 27:11.

11. Dahme kahrehda Sehdan ele men kasonge Sara?

¹¹ Sehdan uhdahn kailongki peneinei me Mesaiao pahn kohsang ie. Karasepe, tehk dahme wiawi mwurinte Koht mahsanihong Eipraam me e pahn “wiahla wehi lapalap ehu.” (Sen. 12:1-3) Erein Eipraam oh Sara ara mi Isip, Parao wahla Sara nan eh tehnpaso pwe Sara en wiahla eh pwoud. Ahpw, Siohwa ketin kauhdi met oh ketin kapitala Sara sang kahpwal wet. (Wadek Senesis 12:14-20.) Ehu mwekid me duwehte met wiawi nan Kerar mwohnte Aisek ipwidi. (Sen. 20:1-7) Ia duwe, Sehdan me kamwakid soahng pwukat en wiawi? Tamataman me Sara kohsang kahnimw kepwehpweo Ur pwehn kousoan nan impwal kan. Eri, ia duwe, Sehdan leme me e kak kasongehki Sara ahn Parao oh Apimelek ara tehnpas kepwehpwe ko? E leme me Sara pahn salelepek ong eh pwoudo oh pil Siohwa oh pwoudikihda emen nanmwarki ko? Paipel sohte kasalehda met, ahpw mie kahrepe mwahu kitail en kamehlele me Tepil pahn perenki kahrehiong Sara en sohla warohng wia kisehn peneinei me Mesaiao kohsang ie. Sehdan sohte katapanki ma adamwahu en lih menet, eh mouren pwopwoud oh nanpwungmwahu rehn Siohwa pahn ohla. Ia uwen lemei en Sehdan!

12, 13. (a) Ia duwen Sehdan eh kasalehda me e lemei mwurin Sises ketin ipwidi? (b) Dahme ke leme Sehdan kin medewehiong me pwulopwul kan me kin poakohng Siohwa oh kin nantihong en papah Ih rahnwet?

¹² Sises ketin ipwidi sounpar tohto mwurin Eipraam. Dehr medewe me Sehdan leme me kisin seri pwelel menet kaselel de kesempwal. Sehdan ese me seri menet pahn laudla wiahla Mesaiao me inoupe mie. Mehlel, Sises iei me keieu kesempwal nan kadaudok en Eipraam. Iei ih me pahn mwuhr ketin “kauwehla doadoahk en Tepilo.” (1 Sohn 3:8) Ia duwe, Sehdan leme me e wia tiahk uhdahn lemei ehu en kemehla seri men? Soh. E sohte nsenohki dahme pwung de sapwung. E sohte pweiek en kemehla serio, Sises. Ia duwen?

¹³ Ni Nanmwarki Erod eh rongada sang sounkasawih usu ko me “Nanmwarkien mehn Suhs akan” ipwidier, e inenen lingeringerda oh men kemehla serio. (Mad. 2:1-3, 13) Ih eri padahkihong sounpei ko en kemehla seri pwutak koaros me sounpar riau kohdi nan Pedleem oh sahpw kan limwah. (Wadek Madiu 2:13-18.) Sises ketin pitsang mwekid suwed en kamakamlahn seri pwuko. Ahpw dahme met kin padahkihong kitail duwen atail imwintihti Sehdan? Tepil sohte kin kesempwalki mouren aramas. E uhdahn sohte pil kin poakepoake seri kan. Sehdan uhdahn wia “laion emen me kin weriwer.” Dehr manokehla me e lemei!

SEHDAN KIN WIDING

14, 15. Ia duwen Sehdan eh ‘karotongehla’ me seupwoson akan?

¹⁴ Ihte ahl me Sehdan kak kahrehiong aramas en uhwongada atail Koht limpoak Siohwa, iei sang ni eh kin pitih irail. (1 Sohn 4:8) Sang eh widing kan, e kin kahrehiong aramas en sohla “koapworopworki Koht.” (Mad. 5:3) E kin “karotongeirailla pwe re dehr kilang marain me dakedaker irail, marain en Rongamwahu duwen lingan en Krais, me uhdahn duwehte mwomwen Koht.”​—2 Kor. 4:4.

¹⁵ Ehu me Sehdan kin keieu doadoahngki pwehn pitih aramas iei pelien lamalam likamw. Ia uwen eh peren ni eh kilang aramas akan ar kin kaudokiong me melahr akan, kapikipik kan, mahn akan de soahng koaros likin Siohwa, me kupwurki koaros en kaudokiong ih kelehpw! (Eks. 20:5) Pil me tohto me medewe me re kaudokiong Koht ni pwung kin tengla nan padahk likamw oh kasarawi kan me sohte katepe. Re mihla nan irair kansensuwed ehu, duwehte irail ko me Siohwa ketin kalelapak rehrail: “Dahme kumwail pahn kesehkihla noumwail mwohni kan ong ni mehkot me sohte pahn kaitarala amwail anahn? Dahme kumwail pahn kesehkihla wahn pwudowamwail kan ahpw kumwail sohte pahn medla? Kumwail rong ie oh kapwaiada dahme I pahn mahsanih, kumwail ahpw pahn nsenamwahukihla kisin tungoal me keieu kaselel sang koaros.”​—Ais. 55:2.

16, 17. (a) Dahme kahrehda Sises mahsanihong Piter: “Kohla mwuri, Sehdan”? (b) Ia duwen Sehdan eh kakete pitihkitaildi pwe kitail en sohla mwasamwasahn?

¹⁶ Sehdan pil kak pitihdi sapwellimen Siohwa ladu kan me kin ngoangki papah ih. Karasepe, medewehla dahme wiawi ni ahnsou me Sises ketin padahkihong sapwellime tohnpadahk ko me e pahn kereniong kamakamla. Wahnpoaron Piter, me poakohng Sises, patohwanohng: “Maing ei Kaun, komw kadek ong pein komwi; mepwukat sohte mwahn pahn lelohng komwi.” Sises mahsanihong Piter: “Kohla mwuri, Sehdan!” (Mad. 16:22, 23, NW) Dahme kahrehda Sises ketin kahdaneki Piter “Sehdan”? Pwehki Sises ketin mwahngih dahme pahn kereniong wiawi. Sises pahn kereniong ketin pwoula nin duwen meirong ehu oh pahn ketin kadehdehda me Tepilo sounlikamw men. Met wia ahnsou kesempwal ehu nan poadopoad en aramas, ahpw kaidehn ahnsou ehu me Sises en ketin “kadek ong” pein ih. Sehdan pahn perenki ma Sises sohla kin ketin mwasamwasahn.

¹⁷ Ni atail kerenlahng imwin koasoandi suwed wet, kitail pil mihmi nan ahnsou apwal akan. Sehdan men kitail en “kadek ong” pein kitail sang ni atail nsenohkihte en pweida mwahu nan sampah wet. E men kitail en manokehla me kitail mihmi ni imwin rahn akan oh sohla mwasamwasahn. Ke dehr mweidohng met en wiawiong uhk! Ahpw ken “mwasamwasahn.” (Mad. 24:42) Dehr kamehlele ahn Sehdan likamw kan me dene imwio saikinte keren, de me imwio sohte pahn douluhl leledo.

18, 19. (a) Ia duwen Sehdan eh song en pitih kitail oh kahrehiong kitail en medewe me kitail sohte warohng sapwellimen Siohwa limpoak? (b) Ia duwen Siohwa eh kin ketin sewese kitail en pepehd oh mwasamwasahn?

¹⁸ Sehdan pil kin song en pitihdi kitail ni ehu ahl tohrohr. E men kitail en kamehlele me kitail sohte warohng sapwellimen Koht limpoak oh me Koht sohte pahn ketin mahkohng dipatail kan. Ahpw mepwukat kisehn ahn Sehdan likamw kan. Medewehla, ihs me uhdahn sohte warohng sapwellimen Siohwa limpoak? Iei Sehdan. Ihs me Koht sohte pahn ketin mahkohng? Pil Sehdan. Ahpw Paipel kamehlelehiong kitail: “Koht me uhdahn pwung; e sohte pahn ketin meliehla amwail wiewia kan de amwail limpoak ong ih.” (Ipru 6:10) Siohwa kin ketin kalahnganki atail nannanti en kaperenda ih, oh atail papah ih kaidehk doadoahk mwahl ehu. (Wadek 1 Korint 15:58.) Eri kitail en dehr mweidohng ahn Sehdan likamw kan en pitihkitaildi.

¹⁹ Nin duwen me kitail kilangehr, Sehdan ngehn kehlail oh manaman men, inenen lemei, oh kin widing. Ia duwen atail kak kana nan atail peiong imwintihti menet? Siohwa kin ketikihong kitail sawas. Sapwellime mahsen kin kasukuhlih kitail duwen ahn Sehdan eh lidip kan pwe kitail en ese duwen eh koasoandi kan. (2 Kor. 2:11) Ni atail wehwehkihla soangsoangen wiepe kan me Sehdan kin doadoahngki pwehn uhwong kitail, kitail kakehr pepehd oh mwasamwasahn. Ahpw en esehte wiepe pwukat sohte itar. Paipel mahsanih: “Pelianda Tepil, e ahpw pahn tangasang kumwail.” (Seims 4:7) Iren onop en mwuhr pahn koasoia wasa siluh me kitail kak pelianda Sehdan oh kana.