Ihs Irail Imwintihti en Koht Akan?

Imwintihti en Koht me keieu suwed iei Sehdan me Tepil. Ih emen ngehn me pelianda Siohwa. Sehdan kin pelpeliante Koht lel rahnwet oh e kin kahrehong aramas en lelohng kahpwal laud kan. Sehdan uhdahn mwersuwed. Ih sounlikamw men oh sounkamaramas men.​—Sohn 8:44.

Ngehn teikan kin iang Sehdan pelian Koht. Paipel kin kadaneki ngehn pwukat: ngehn saut kan. Duwehte Sehdan, ngehn saut kan kin wia imwintihti ong aramas akan. Re kin perenki kamedekehla aramas akan. (Madiu 9:32, 33; 12:22) Siohwa pahn kasohrehla Sehdan oh nah ngehn saut kan kohkohlahte. Ahpw, arail ahnsoun lidere mour en aramas akan inenen mwotomwotlahr.​—Kaudiahl 12:12.

Ma ke men kompoakepahnki Koht, ke sohte pahn wia dahme Sehdan men ken wia. Sehdan oh ngehn saut akan kin kailongki Siohwa. Re kin imwintihti ong Koht, oh re men kilang ken pil imwintihti ong Koht. Ke anahne pilada ihs me ke men kaperenda​—Sehdan de Siohwa. Ma ke men ale mour soutuk, ke anahne pilada en wia kupwuren Koht. Sehdan kin doadoahngki ah widing kan pwehn pitihdi aramas akan. E kin pitihdi pali moron en aramas akan.​—Kaudiahl 12:9.