Iren Mehn Kasukuhl 4

Ihs Tepilo?

Sehdan me Tepil​—⁠iawasa e kohsang ia? (1, 2)

Ia duwen Sehdan ah kin kak pitihidi aramas? (3-7)

Dahme kahrehda komwi anahne pelianda Tepilo? (7)

1. Lepin lokaia “tepil” wehwehki mehmen me kin karaun likamw. “Sehdan” wehwehki imwintihti de sounpelien. Lepin lokaia pwukat inenen konehng imwintihti en Koht menet. Nin tepio, ih emen tohnleng unsek me kin mihmih nanleng rehn Koht. Ahpw, mwuhr e nohn madamadau ilehla oh noarokehda soahngen kaudok me Koht kelehpw me warong en sapwellimanki en uhd kohwong ih.—Madiu 4:8-10.

2. Tohnleng menet, Sehdan, uhd doadoahngki siniek emen en koasoiong Ihp. Sang ni eh wiahda likamw kei ong liho, e pitihdi oh kahrehiong en sapeikiongla Koht. Sehdan uhwengada sapwellimen Koht “kaunda,” de pwais nin duwen Wasa Lapalapie. Sehdan kihda peidek en peikasal ma Koht kin kaunda ni ahl me konehng oh ni ahl me Sapwellime aramas kan pahn keieu paiekihda. Sehdan pil kin peidek ki duwen ma mie aramas akan pahn kolokolte arail lelepekong Koht. Sang wiewia wet, Sehdan wiahkihla pein ih imwintihti en Koht. Ihme kahrehda e adaneki Sehdan me Tepil.—Senesis 3:1-5; Sohp 1:8-11; Kaudiahl 12:9.

3. Sehdan kin song en pitihdi aramas en kaudokong ih. (2 Korint 11:3, 14) Ehu ahl e kin kasonge aramas akan, iei me pid kaudok likamw. Ma pelien lamalam ehu kin wia padahk likamw me pid duwen Koht, e kin wia kupwuren Sehdan. (Sohn 8:44) Aramas kan me kin iang pelien lamalam likamw akan ele mwein kin ni mehlel kamehlele me re kin kaudokiong Koht mehlel. Apw re kin papah Sehdan. Sehdan me ‘koht en sampah wet.’—2 Korint 4:4.

4.Wunahni iei pil ehu ahl me Sehdan kin wahkidohng aramas akan pahn eh manaman. Irail mwein kin likweri ngehn akan en pere irail, kasoumwahuda mehteikan, kosetipw, de wiahda manaman kan. Sehdan, ih ngehn suwed me kin kakehla wiewia pwukat. Ma kitail men kaperenda Koht, kitail pahn soikala wiewiahn wunahni kan.—Deuderonomi 18:10-12; Wiewia 19:18, 19.

5. Sehdan pil kin kaweid sapwungih aramas ki madamadau en pohnmwahso ki pein arail keinek oh mwomwen pwongihala pali en politik. Ekei kin lemehiong me pein ahr wehi oh keinek mwahusang mehteikan. Ahpw, met sohte pwung. (Wiewia 10:34, 35) Ah mehteikan kin sohpeiwong pwihn kan en politik ong kamwahuiala kahpwal en aramas akan. Sang ni wiewia wet, re kin soikala Wehin Koht. Wehio kelehpw me kak kamwahuiala atail kahpwal kan.—Daniel 2:44.

6. Pil ehu ahl me Sehdan kin kaweid sapwungih aramas iei sang ni e kin kasonge irail ki ineng suwed kan. Siohwa kin padahkiong kitail en liksang wiewiahn dihp kan pwehki e mwahngih kitail pahn lelong kahpwal kan. (Kalesia 6:7, 8) Ekei aramas mwahuki ken iang irail nan wiewia suwed kan. Ahpw, taman me, Sehdan me uhdahn mwahuki ken iang wia wiewia pwukat.—1 Korint 6:9, 10; 15:33.

7. Sehdan ele pahn doadoahngki kalokolok de aramas en uhweng kowe pwehn kahrehong uhk ken mweisang Siohwa. Ekei koampoakepomw kan ele pahn lingeringer pahmw pwehki omw kin ononop Paipel. Mehteikan ele kin kapailoke iuk. Ahpw ihs ke pweipwandkihiong omw mour? Sehdan kin men kamasepwehkiukada pwe ken kak uhdi sang sukuhliki duwen Siohwa. Ke dehr mweidong Sehdan en kana! (Madiu 10:34-39; 1 Piter 5:8, 9) Ni omw kin pelianda Tepilo, ke pahn kaperenda Siohwa oh kasalehda me ke kin utungada Sapwellime kaunda.—Lepin Padahk 27:11.

[Kilel kan nan pali 9]

Kaudok likamw, wunani, oh uhki wehi kan kin kaweid sapwungihala aramas akan

[Kilel nan pali 9]

Pelianda Sehdan sang ni omw pahn kin nantihlahte oh sukuhliki duwen Siohwa