Tohto Pahn Pitila Ni Imwio Ke Pil Kak Iang

Paipel padahkihong kitail me mie kasohrlahn soahng kan ni imwio: “Apwal en ni ahnsowo [“kahn kamakam kowahlap,” NW] pahn laudsang apwal me kin wiawi sang mahs kohdo lel met . . . Koht eri ketin kamalaulaulahr rahn ako; eri, ma e sohte ketin wia met, sohte aramas emen pahn pitla.” (Madiu 24:21, 22) Ahpw Koht ketin inoukihong kitail me aramas tohto pahn pitila. Paipel mahsanih: “Sampah wet . . . sosohrala; ahpw me kin kapwaiada kupwur en Koht pahn momour kohkohlahte.”​—1 Sohn 2:17.

Ma ke men pitsang sosohralahn sampah wet oh ‘mour kohkohlahte,’ dahme ke anahne wia? Ia duwe, ke anahne tepida nekidala omw kepwe kan de pil kaunopada soahng kan me duwehte met? Soh. Paipel kin uhdahn kangoange kitail en koasoanehdi soahng kesempwal kan me weksang mepwukat. Paipel mahsanih: “Ma mepwukat pahn ohla nin duwe met, a ia duwen kumwail, soangen mour dah me konehng kumwail en weweidki? Amwail mour uhdahn pahn konehng en kin mwakelekel oh kasarawihong Koht, nindoken amwail kasikasik sapwellimen Koht Rahno.” (2 Piter 3:10-12) Nan ire pwuko kasalehda me “mepwukat” koaros me pahn ohla kin iangahki kaunda kan en sampah suwed wet oh koaros me pilada en utung kaunda pwukat ahpw kaidehn sapwellimen Koht kaunda. Eri e sansal me ma kitail nekidala kepwe kan, met sohte pahn kapitkitailla sang kasohrala wet.

Mehlel, atail pitila kin pidada atail poadidiong Siohwa Koht oh atail sukuhlki soangen tiahk oh wiewia kan me kin kaperenda ih. (Sepanaia 2:3) Kitail en dehr alasang pali laud en aramas akan rahnwet oh pohnsehsehla kilel kan me kadehdehda ni sansal me kitail mihmi ni ahnsou kesempwal kei, ahpw kitail anahne “kasikasik sapwellimen Koht Rahno.” Sounkadehdehn Siohwa kan kak kasalehiong uhk sang nan Paipel ia duwen omw kak pitsang rahno me kohkohdo.