Ke Kak Pelianda Sehdan oh Kana!

1. (a) Dahme kahrehda atail pelianda Sehdan uhdahn kesempwal ahnsou wet? (b) Ia duwen atail ese me kitail kak kana nan atail pelianda Sehdan?

SEHDAN kin pelianda irail me keidi kan me luwehdi nin sampah oh “sihpw teikan.” (Sohn 10:16, NW) Pwehki eh ahnsou mwotomwotlahr, Tepil kin men wia uwen eh kak en kauwehla pwoson en sapwellimen Siohwa ladu tohto. (Wadek Kaudiahl 12:9, 12.) Ahpw kitail kak kana nan atail pelianda Sehdan. Paipel mahsanih: “Pelianda Tepil, e ahpw pahn tangasang kumwail.”​—Seims 4:7.

2, 3. (a) Dahme kahrehda Sehdan men aramas akan en kamehlele me e sohte mie? (b) Ia duwen omw ese me Sehdan uhdahn mie?

² Me tohto kin mwomwen kouruhrki ma Sehdan uhdahn mie. Ong irail, Sehdan oh ngehn saut akan ihte soahng kei me mi nan pwuhk, kasdo, oh nan video game kan. Aramas pwukat kin medewe me ma ke loalokong, ke sohte pahn kamehlele me ngehn suwed akan uhdahn mie. Ia duwe, Sehdan kin pwunodki ma aramas sohte kamehlele me ih oh nah ngehn saut akan uhdahn mie? Soh. Met kin kamengeila ong Sehdan en pitih irail kan me sohte kamehlele me e uhdahn mie. (2 Kor. 4:4) Sehdan kin uhdahn kangoange soangen madamadau wet pwe en kak pitih aramas.

³ Ahpw nin duwen sapwellimen Siohwa ladu kei, kitail sohte kin lohdi pahn eh lidip kan. Kitail ese me Tepil uhdahn mie. Ia duwen atail ese met? Paipel mahsanihong kitail me Sehdan doadoahngki serpent men pwehn koasoiong Ihp. (Sen. 3:1-5) Sehdan pil pato mwohn Siohwa oh peidengki ahn Sohp eh lelepek. (Sohp 1:9-12) Sehdan pil song en kasonge Sises. (Mad. 4:1-10) Oh mwurin Sises ketin wiahla Nanmwarki nan pahr 1914, Sehdan tepida “mahweniong” luhwen me keidi kan nin sampah. (Kaud. 12:17) Mahwen wet pil pousehlahte wiawi ni Tepilo eh kin song en kauwehla pwoson en me keidi kan oh sihpw teikan. Pwehn kana nan mahwen wet, kitail anahne pelianda Sehdan oh kolokolte atail pwoson en kehlail. Nan iren onop wet kitail pahn koasoiapene ahl siluh me kitail kak wia met.

SOIKALA POHNMWAHSO

4. Ia duwen Sehdan eh wia karasepen emen me keieu pohnmwahso?

⁴ Sehdan uhdahn pohnmwahso. Tohnleng suwed menet uhwongada sapwellimen Siohwa pwuhng en kaunda, oh e song en kahrehiong meteikan en kaudokiong ih, ahpw kaidehn Siohwa. Eri Sehdan iei karasepen emen me keieu pohnmwahso oh aklapalap. Ehu ahl me kitail kak pelianda Sehdan iei en soikala pohnmwahso oh kasalehda aktikitik. (Wadek 1 Piter 5:5.) Ahpw ia duwe, e sapwung en pohlki pein kitail, emen de mehkot?

5, 6. (a) Ia duwe, e sapwung en pohlki pein kitail, emen de mehkot? Menlau kawehwehda. (b) Dahkot aklapalap, oh ia ekei karasepe kan nan Paipel me kasalehda me aklapalap keper?

⁵ Atail kin pohlki pein kitail, emen, de mehkot kin kihong kitail pepehm en koapworopworki oh wauneki pein kitail. E pil kihong kitail pepehm en nsenamwahu pwehki kitail de irail kan me kitail karanih wiahda de ahneki mehkot mwahu. Sohte sapwung en ahneki soangen pepehm wet. Wahnpoaron Pohl ndaiong Kristian ko nan Deselonika: “Se kin suweikin kumwail nan sapwellimen Koht mwomwohdiso kan. Se kin suweiki duwen amwail pwoson oh kanengamah nan kamakam akan koaros oh pil lokolok kan me kin lelohng kumwail.” (2 Des. 1:4) Eri en pohlki ahn meteikan doadoahk oh pil pein kitail kak wia kamwahu ong kitail. Kitail sohte anahne namenengki atail peneinei, atail tiahk de wasa me kitail tikida ie.​—Wiewia 21:39.

⁶ Ahpw, aklapalap kak kauwehla atail nanpwungmwahu rehn meteikan, keieu atail nanpwungmwahu rehn Siohwa. Soangen aklapalap wet kak kahrehda kitail en nsensuwed ni atail alehdi kaweid. E pil kak kahrehiong kitail en soikala oh sohte alehdi kaweid ni aktikitik. (Mel. 141:5) Soangen aklapalap wet kin wehwehki en nohn medemedewe duwen pein kitail de aklapalap me kin sansalda rehn irail kan me kamehlele me re mwahusang meteikan, ahpw dahme re kamehlele kalapw sohte mehlel. Siohwa ketin kalahdeki aklapalap. (Esek. 33:28; Eimw. 6:8) Ahpw Sehdan kin perenki ahnsou me aramas kin alasang eh aklapalap ni arail kin suweiki pein irail. Medewehla uwen en Sehdan eh peren ni ahnsou me Nimrod, Parao, oh Apsalom kasalehda arail aklapalap ni arail kin suwei! (Sen. 10:8, 9 NW; Eks. 5:1, 2; 2 Sam. 15:4-6) Aklapalap me pil kahrehda Kain en luhssang eh nanpwungmwahu rehn Koht. Pein Siohwa me ketin kaweid Kain, ahpw Kain kasalehda aklapalap oh sohte men rong. E keptakai, pohnsehsehla sapwellimen Koht kaweid oh sohte pweiek en wiahda dihp mwohn silangin Siohwa.​—Sen. 4:6-8.

7, 8. (a) Ia wehwehn lipilipilki aramas oh ia duwen met eh kin pidada pohnmwahso? (b) Kawehwehda ia duwen pohnmwahso eh kak kauwehla meleilei en nan mwomwohdiso.

⁷ Rahnpwukat, aramas kin kasalehda pohnmwahso ni soangen ahl suwed tohto. Pohnmwahso kin ekei pak dokedoke tiahk en lipilipilki aramas. Nin duwen me ehu dikseneri kasalehda, lipilipilki aramas kin wehwehki en kadeik aramas pwehki mwomwarail de pohn kilirail weksang kitail. E pil wia madamadau ehu me aramas me mwomwarail ehusoahng sang ekei kin ahneki irair oh koahiek kan me weksang meteikan, oh me ekei mwahusang ekei. Lipilipilki aramas kin imwikihla pei, mahwen, oh pil kamakamlahn aramas tohto.

⁸ Mehlel, soahng pwukat en dehr wiawi nan mwomwohdisohn Kristian. Ahpw, akamai nanpwungen riatail Kristian kan ele kak tepida pwehki pohnmwahso oh e kak apwal en mwadangete powehdi. Met wiawiong ekei tepin Kristian ko, ihme kahrehda Seims kalelapek rehrail peidek wet: “Soangen pei kan oh akamai kan koaros me kin wiawi nanpwungamwail, e tepisang ia?” (Seims 4:1) Ma kitail kin kailongki meteikan oh pehm me kitail mwahusang irail, kitail ele pahn nda de wia mehkot me kak uhdahn kamedekihala irail. (Lep. Pad. 12:18) E sansal me pohnmwahso kak kauwehla meleilei en nan mwomwohdiso.

9. Ia duwen Paipel eh sewese kitail en dehr lipilipilki ehu pwihn en aramas oh en dehr pohnmwahso? (Menlau kilang tepin kilel.)

⁹ Ma kitail kin kalapw medewe me kitail mwahusang meteikan, kitail anahne taman me Siohwa ketin kalahdeki “koaros me kin aklapalap.” (Lep. Pad. 16:5) Kitail pil anahne kasawih atail mohngiong oh pein idek rehtail, ‘I kin pehm me I mwahusang ehu pwihn en aramas, wehi, de tiahk?’ Ma iei, kitail manokehla me Koht ketin “wiahda kadaudok koaros sang rehn ohltehmen.” (Wiewia 17:26) Eri ni ahl ehu, kitail koaros kohsang pwihn en aramas tehieu pwehki koaros kohsang rehn Adam. E uhdahn pweipwei en leme me Koht ketin wiahda ekei pwihn en aramas mwahusang ekei. Ma kitail ahneki soangen madamadau wet, kitail kin mweidohng Sehdan en kauwehla atail minimin oh limpoak en Kristian. (Sohn 13:35) Pwehn pelianda Sehdan, kitail anahne soikala pohnmwahso.​—Lep. Pad. 16:18.

SOIKALA NOAHROKE KEPWE OH POAKOHNG SAMPAH

10, 11. (a) Dahme kahrehda e kakete mengei en poakohng sampah? (b) Ia imwilahn ahn Demas eh poakohng sampah?

¹⁰ Sehdan me “kaunen sampah wet,” oh e kin kamwakamwakid sampah. (Sohn 12:31; 1 Sohn 5:19) Soahng tohto me sampah wet kin kihda kin uhwong kosonned kan en Paipel. Mehlel me kaidehn soahng koaros nan sampah wet suwed. Ahpw, kitail kak kamehlele me Sehdan pahn doadoahngki eh sampah pwehn kasonge atail ineng kan oh kahrehiong kitail en wiahda dihp. De e pahn song en kahrehiong kitail en poakohngala sampah oh sohla nsenohki atail papah Siohwa.​—Wadek 1 Sohn 2:15, 16.

¹¹ Ekei tepin Kristian ko kin poakohng sampah. Karasepe, Pohl ntingihdi: “Demas poakohngalahr sampah en ahnsou wet; ihme e kesehkinielahr.” (2 Tim. 4:10) Paipel sohte kasalehda ni oaritik soahng dah kan nan sampah me Demas poakohng me kahrehda en kesehla Pohl. Mwein Demas kakete tepida poakohng kepwehn sampah laudsang eh papah Siohwa. Ma met mehlel, Demas luhssang ahnsou mwahu en ahneki pwukoa mwahu kan nan sapwellimen Koht doadoahk. Eh poakohngala sampah kesempwal? Soh. Demas kakete wiahte ahn Pohl sounsawas. Sampah wet sohte kak kihong ih mehkot mwahusang dahme Siohwa kak ketikihong ih!​—Lep. Pad. 10:22.

12. Ia duwen Sehdan eh kak isaneki atail ineng kan ni eh doadoahngki “poakepen dipwisou kan”?

¹² Soahngohte pil kak wiawiong kitail rahnpwukat. Nin duwen Kristian kei, kitail kin men apwalih pein kitail oh atail peneinei. (1 Tim. 5:8) Siohwa ketin kupwurki kitail en nsenamwahuki atail mour. Kitail ese met pwehki e ketikihong Adam oh Ihp paradais kaselel ehu ira en kousoan ie. (Sen. 2:9) Ahpw Sehdan kak isaneki atail ineng kan ni eh doadoahngki “poakepen dipwisou kan.” (Mad. 13:22) Me tohto leme me mwohni oh kepwe kan pahn kahrehiong irail en peren de pweida mwahu. Ma kitail ahneki soangen madamadau wet, e kak kahrehiong kitail en luhssang mehkot me keieu kesempwal me kitail ahneki, iei atail nanpwungmwahu rehn Siohwa. Sises ketin katamankihong kitail: “Sohte aramas emen kak liduwih soumas riemen; pwe e pahn kailongki emen, e ahpw pahn poakepoake meteio; e pahn loalopwoatohng emen, e ahpw pahn mwamwahliki meteio. Eri, ih pil duwen kumwail: kumwail sohte kak papah Koht oh pil kepwehn sampah kan.” (Mad. 6:24) Ma kitail kin wia ihte lidu ong kepwe kan, kitail solahr kaudokiong Siohwa. Ih met me Sehdan uhdahn men kitail en wia. Eri kitail dehr mweidohng mwohni de soahng kan me mwohni kak pwainda en kesempwalsang atail nanpwungmwahu rehn Siohwa. Pwehn pelianda Sehdan oh kana, kitail anahne ahneki madamadau pwung me pid duwen kepwe kan.​—Wadek 1 Timoty 6:6-10.

SOIKALA TIAHK SAMIN ME PID WIA NSENEN PWOPWOUD

13. Ia duwen sampah wet eh kihda madamadau sapwung me pid mouren pwopwoud oh wia nsenen pwopwoud?

¹³ Pil ehu lidip me Sehdan kin doadoahngki iei tiahk samin me pid wia nsenen pwopwoud. Aramas tohto leme me en lelepek ong arail pwoud, oh pil mouren pwopwoud solahr kin kadoadoahk oh me e kihsang arail saledek. Karasepe, emen lih me kin iang mi nan kasdo nda me sohte emen kak lelepek ong aramas mente. E pil nda, “Sohte emen I ese me kin lelepek de men lelepek.” Emen ohl me kin iang mi nan kasdo pil nda, “I sohte nohn medewe ma e mehlel me kitail ipwikihdi pwehn mihte rehn emen erein atail mour.” Sehdan kin uhdahn perenki ni ahnsou me aramas ndand kan kauwe sapwellimen Koht kisakis en pwopwoud. Tepilo sohte kin utung koasoandi en pwopwoud, oh e sohte kin men pwopwoud kan en pweida. Eri en pelianda Sehdan oh kana, kitail anahne ahneki sapwellimen Koht madamadau ong pwopwoud.

14, 15. Dahme ke kak wia ma ke lelohng kasongosong en wia tiahk samin me pid wia nsenen pwopwoud?

¹⁴ Mehnda ma kitail pwopwoud de kiripw, kitail anahne nantihong en soikala tiahk samin koaros me pid wia nsenen pwopwoud. Ia duwe, e mengei? Soh douluhl! Karasepe, ma kowe emen me pwulopwul, ele ke kin rong iengomw tohnsukuhl kan suweiki arail wia nsenen pwopwoud ong sohte lipilipil me re men. Ele re kin pil suweiki arail kin sexting, me iei, en kadarala koasoi samin kan oh kilel kan nan neirail cell phone kan. Ni mehlel, nan ekei sahpw, sexting kin pil wehwehki duwehte kadarala kilel de kasdo suwed me seri kan mi loale. Paipel mahsanih: “Me kin nenek, kin wiahda dihp ong pein paliwere.” (1 Kor. 6:18) Soumwahu kan me kohpeseng pwehki tiahk samin kin imwikihla lokolok laud oh mehla. Oh pali laud en me pwulopwul kan me wia nsenen pwopwoud ahpw sohte pwopwoudida nda me re koluhkihla dahme re wia. Palien mehn kamweit kan kin men kitail en kamehlele me sohte imwila suwed ma kitail kauwehla sapwellimen Koht kosonned kan. Ma kitail kamehlele soangen likamw pwukat, kitail kakete mweidohng widing kan en dihp en pitihkitaildi.​—Ipru 3:13.

¹⁵ Ma ke lelohng kasongosong en wia tiahk samin me pid wia nsenen pwopwoud, dahme ke kak wia? Ken pohnese me mie omw luwet. (Rom 7:22, 23) Kapakap ong Koht pwehn kakehle iuk. (Pil. 4:6, 7, 13) Soikala irair kan me kak kahrehiong uhk en pwupwudiong nan tiahk samin. (Lep. Pad. 22:3) Oh ma mie kasongosong, mwadang soikala.​—Sen. 39:12.

16. Dahme Sises mahsanih ni ahnsou me Sehdan song en kasonge ih, oh dahme kitail kak sukuhlkihsang mehn kahlemeng wet?

¹⁶ Sises ketin wiahda mehn kahlemeng mwahu ong kitail. E sohte ketin mweidohng ahn Sehdan inou kan en pitihdi ih. E sohte pil kin ketin medemedewe duwen soahng pwukat. Ahpw e mwadangete mahsanihong Sehdan: “E ntingdier.” (Wadek Madiu 4:4-10.) Sises mwahngih duwen Mahsen en Koht, ihme kahrehda e kak ketin mwadangete doadoahngki iren Paipel kan ni ahnsou me Sehdan kin kasonge ih. Pwehn pelianda Sehdan oh kana, kitail anahne sohte mweidohng pein kitail en lelohng kasongosong en tiahk samin me pid wia nsenen pwopwoud.​—1 Kor. 6:9, 10.

KANA SANG NI OMW DADAUR

17, 18. (a) Soangen lidip dah teikan me Sehdan kin doadoahngki, oh dahme kahrehda kitail kak kasik met? (b) Dahme pahn wiawiong Sehdan, oh ia duwen met eh kin kangoange iuk en dadaur?

¹⁷ Soahng siluh pwukat, pohnmwahso, noahroke kepwe, tiahk samin me pid wia nsenen pwopwoud wia ekeite nanpwungen lidip kan me Sehdan kin doadoahngki. Ahpw mie me tohtohsang. Karasepe, mie ekei Kristian me arail peneinei kan kin uhwongada irail de tohnsukuhl kan me kin kapailoke irail. Ekei kin kousoan nan sahpw kan me arail kopermento kin song en kauhdi arail doadoahk en kalohk. Kitail kasik me kitail kak lelohng soangen kahpwal pwukat. Pein Sises ketin katamankihong kitail: “Aramas koaros pahn kailongkinkumwailla pwehki ngehi. A me pahn dadaurete lel ni imwi, ih me pahn mourla.”​—Mad. 10:22.

¹⁸ Ia duwen atail kak pelianda Sehdan oh kana? Sises mahsanih: “Kumwail nantihong oh kanengamahiong, pwe ih duwen amwail pahn komourala.” (Luk 21:19) Sohte mehkot me aramas kak wiahiong kitail kin poatopoat. Sohte me kak kihsang atail nanpwungmwahu rehn Koht ihte ma kitail mweidohng met en wiawi. (Rom 8:38, 39) Mehnda ma ekei sapwellimen Siohwa ladu lelepek kan mehla, met sohte wehwehki me Sehdan kana. Siohwa pahn ketin kaiasada irail. (Sohn 5:28, 29) Sohte ahn Sehdan koapworopwor ong ahnsou kohkohdo. Mwurin sampah suwed wet sohrala, e pahn lekdekla nan pwoahr loalo me soh kapi erein pahr kid. (Kaud. 20:1-3) Ni imwin pahr kid me Krais kakaun, Sehdan pahn “sapwedekda sang nan selipe kan” oh pahn song pwurehng pitihdi aramas unsek kan. Mwurin met, e pahn sohrala. (Kaud. 20:7-10) Sohte ahn Tepil eh koapworopwor ong ahnsou kohkohdo, ahpw mie ahmw! Pousehlahte pelianda Sehdan, oh kolokol omw pwoson en kehlail. Ke kak pelianda Sehdan oh kana!