PEIDEK KAN EN PAIPEL PASAPENGLA
Ihs me pahn kohla nanleng, oh dahme kahrehda?
Aramas tohto koapworopworki ren kohla nanleng ni ar mehla. Sises mahsanih me sapwellime tohnpadahk lelepek kan pahn mour nanleng. Mwohn eh pwoula, e ketin inoukihda me e pahn ketin kaunopada dewerail nanleng rehn Semeo.—Wadek Sohn 14:2.
Dahme kahrehda aramas pahn iasada sang sampah ong mour nanleng? Dahme re pahn wia wasao? Sises ketin padahkihong sapwellime wahnpoaron kan me re pahn wia nanmwarki kei. Irail pahn iang kaunda sampah.—Wadek Luk 22:28-30; Kaudiahl 20:4.
Ia duwe, aramas mwahu koaros kin kohla nanleng?
Nan sahpw tohto, ekeite aramas kin wia kaun kei. Sises ketin kaiasada aramas ong mour nanleng pwe ren kak kaunda sampah, eri kitail pahn kasik me e ketin pilada me malaulaute. (Luk 12:32) Paipel kasalehda ia uwen tohto en irail me pahn iang Sises kakaun.—Wadek Kaudiahl 14:1.
Sises ketin kaunopada dewen ekei sapwellime tohnpadahk kan nanleng. Ke ese dahme re pahn wia wasao?
Kaidehn irail kante me kohla nanleng me pahn ale ketingparail. Irail towe lelepek kan en sapwellimen Sises Wehio pahn ahneki mour kohkohlahte nan paradais kapw ehu nin sampah. (Sohn 3:16) Ekei pahn pedolong nan Paradais ni arail pahn pitsang kasohrlahn koasoandi suwed wet, a ekei sang ni arail pahn kaiasada.—Wadek Melkahka 37:29; Sohn 5:28, 29.